Seni lepoputáán aramas, ewe Chón Fératá a atoura an pwóróus ngeniir ren an néúnéú chónláng me néún kewe soufós. A pwal filatá pwe an kewe pwóróus me an kewe pwon repwe makketiw. Ekkena pwon seni Kot ra tongeni kkúú manawom lón mwachkkan. Iwe, ia ka tongeni kúna me ie án Kot kana pwon lón ach ei fansoun?

Án Kot kapas fán itach a nóm lón ewe Paipel. (2 Timoty 3:16) Ifa usun Kot a néúnéú ekkewe soufós le makkeei an kapas? (2 Petrus 1:21) Kot a esile ngeni ekkewe chón makkeei Paipel ekiekin, iwe ra makkeetiw. Pwal ina usun lón ach ei fansoun. Ika emén businessman a ereni néún we seketeri an epwe wisen makkeei eché néún taropwe, sia weweiti pwe ena taropwe néún ewe businessman. Pwal ina chék usun, inaamwo ika Kot a néúnéú aramas le makkeei an kapas, nge I wesewesen ewe Sounemenemen Makken ewe Paipel.

Án Kot kapas a unusen aúchea, ina minne a mochen pwe aramas meinisin repwe álleani me weweiti. Lón ach ei fansoun, an we “pworausen manau esemüch” a kawor ngeni “sokun mwich me ainang,” me kapas. (Pwärätä 14:6) Ren án Kot álillis, a fen ffér unusen ewe Paipel are och kinikinin lón lap seni 3,000 fósun fénúfan, a chómmóng lap seni puk meinisin.