Ekkóch aramas ra ekieki ika mi siwil masouen ewe Paipel. Ewe soufós Aisea a apasa pwe án Kot kapas “epwe nonom tori feilfeilachök.” (Aisea 40:8) Pwata sia tongeni lúkúlúk pwe masouen ekkewe popun makken Paipel án Kot kewe pwon ra mak lón, mi léllé ngeni kapiin Paipel ikenái?

A wor án Kot manaman le túmúnú an Kapas me eppeti seni an epwe siwil masouan. Lón fansoun lóóm, atun ra kan chék kapiini ewe Paipel ren péúr, ekkewe chón kapi mi túmúnúéchú ar angang ra kan álleani iteiten eféú me eféú ekkewe mesen mak lón Paipel pwe repwe túmúnú pwe esap wor met mi kapachelong, siwil, are téttélúwu. Nge, aramas rese unuséch, ina minne ekkóch chón kapiini ewe Paipel iir mi ekis mwáálliló.

Mi wor ngeréún kapiin ewe Paipel minen lóóm lóóm. Ika mi ekis sókkóló masouen eú kapi, sia tongeni aléllé ngeni pwal ekkóch kapi pwe epwe leteló met pwúngún.​—Ren pwal ekkóch pwóróus, ppii ewe lesen “Has the Bible Been Changed or Tampered With?” wóón jw.org.

Áwewe chék ren ekkewe taropween lóóm iter Dead Sea Scroll aramas ra kúna me lón ekkewe pokungo únúkkún ewe Setin Máló lón 1947. Ekkena taropween lóóm ra masou ren kinikinin ewe Paipel mi fen nóm lap seni ruu ngeréú ier. Ekkewe sousile ra aléllééi ekkeei taropween lóóm ngeni ewe Paipel mi wor rech lón ach ei fansoun. Met ra kúna?

Ra kúna pwe a léllé ngeni masouen ekkewe popun makken Paipel. * Sia tongeni lúkúlúk pwe Kot a túmúnúfichi pwe masouen ewe Paipel fán itach ikenái mi pwúng.

Ina popun, sia tongeni álleani Paipel me unusen lúkúlúk pwe masouan mi pwúng. Iwe, sipwe ppii met sia tongeni káé usun Kot seni néún kewe soufós.