A esilefeil ewe kapas allim usun Mwúún Kot wóón unusen fénúfan, usun met Jesus a fen oesini. (Mateus 24:14) Ewe puken Taniel a áiti ngenikich pwe ena Mwú, ina án Kot nemenem. A mak eú oesini lón Taniel sópwun 2 mi áiti ngenikich pwóróusen tettelin ekkewe mwúún aramas epwe watte péchékkúlen ar nemenem wóón fénúfan, seni Papilon lóóm tori lón ach ei fansoun. Lón wokisin 44 a oesini met epwe fis lón mwachkkan, a erá:

“Ewe Koten läng epwe aüetä eu mwü esap tongeni tala, esap pwal wor eu mwü epwe tongeni akufu. Iwe, ei mwü epwe ataela o arosala ekewe lusun mwü, nge epwe püsin nom tori feilfeilachök.”

Ena oesini pwal ekkewe ekkóch oesini lón Paipel, ra apasa pwe án Kot we Mwú epwe siwili meinisin mwúún aramas me anúkúchara manawen aramas wóón fénúfan. Epwe ifa usun manawen aramas fán án Kot we Mwú? Ikkeei ekkóch pwon mi amwarar repwele pwénútá ekiseló chék.

• ESAP CHÚEN WOR MAUN

  Kölfel 46:9: “[Kot] a aükätiu maun won unusen fanüfan, a kupi ekewe likapich o pwülü ekewe siles, a fisi ngeni ekkei ekewe wokenin maun.”

  Anchangei epwe ifa usun fénúfan ika aramas ra fen áeá meinisin met mi nóm rer, me ar sile le álisi aramas lap seni ar áeá iei le ffér pisekin maun mi nieló aramas! Ena pwon epwe pwénútá fán nemenien án Kot we Mwú.

• ESAP CHÚEN WOR SAMAU

  Aisea 33:24: “Esap wor eman chon ewe fanü epwe apasa pwe a samau.”

  Ekieki usun ei fénúfan atun esap chúen wor aramas epwe riáfféú ren semwenin ngasangas, kanser, malaria are pwal ekkóch semmwen. Esap chúen wor lamoten pioing me sáfei. Epwe unusen péchékkúl inisin aramas meinisin wóón fénúfan lón mwachkkan.

• ESAP CHÚEN WOR LENGITA

  Kölfel 72:16: ‘Epwe wor chomong wiich lon ewe fanü. Epwe wor uän irä won ekewe chuk.’

  Epwe naféch mwéngé wóón fénúfan fán iten meinisin. Esap chúen wor echik me nafangawen mwéngé mi vitamin.

• ESAP CHÚEN WOR METEK, LETIPETA ME MÁLÓ

  Pwärätä 21:4: “[Kot] epwe talüpwasei chönün mas seni won meser meinisin. Esap chüen wor mäla ika letipeta ika kechü ika cheuch, pun ekewe mettochun lom ra morola.”

   A wewe ngeni pwe aramas repwe unuséch me kúna manaw esemuch lón ewe paratis wóón fénúfan! Ina met ewe Chón Férikich mi tong, Jiowa Kot a fen pwonei.

Ekkena mettóch ra kon amwarar, iwe óm ekiek nge resap tongeni fis? Lape ngeni aramas repwe mwittir tipeeú ngeni pwe ra fókkun sani ena sókkun manaw ewe Paipel a pwonei. Nge ren chómmóng popun ra meefi pwe a weires ngeniir ar repwe weweiti án aramas manaw tori feilfeiló chék. Sise pwal máirú ren ena ekiek, pún saminne a wor emén mi fen eáni ena esin manaw me epwe tongeni apwóróusa ngenikich usun.

Aramas ra nóm fán fétekin tipis me máló, me pokiten a fansoun langattam weiresin manawer ren metek me riáfféú, ra meefi pwe pwisin ina usuusun manaw. Nge a fókkun sókkóló met ewe Chón Férikich, Jiowa Kot a tipeni fán iten aramas.

Ren ach sipwe lúkú pwe epwe wesewesen pwénútá meinisin án Kot kewe pwon, iei met a fen anúkúnúkú ngenikich usun an kapas: “Ai kapas esap liwinto rei fän pön, pwe epwe afisätä mine üa tipeni o apwönüetä mine üa akünöü ngeni.”​—Aisea 55:11.

Ewe Paipel a fen áweweei pwe Jiowa i emén Kot “esap chofona.” (Titus 1:2) Pokiten a fen pwonei ekkeei mettóch meinisin mi amwarar fán iten mwachkkan, epwe eú alen tipachem ngenikich ach sipwe ekieki usun ekkeei kapas eis: Mi wesewesen tufich án aramas repwe manaw tori feilfeiló chék lón eú Paratis wóón fénúfan usun met Kot a fen pwonei? Met mi lamot sipwe féri pwe sipwe kúna feiéch seni án Kot pwon? Lón ekkeei lesen mwirin ei, kopwe kúna ekkewe pwóróus mi álilliséch ngonuk repwe pélúwen ekkena kapas eis.