1. Met ewe chónláng a apasa, nge met weween fán itach?

 IKÁ emén chónláng a fós ngonuk, kopwe mochen aúseling ngeni met a erá? Iwe, lón ei fansoun emén chónláng a kakkapas “ngeni sokun mwich me ainang, kapas me mwü meinisin.” Met a apasa? “Oupwe asamolu Kot o mwareiti an tekia! . . . Oupwe fel ngeni ewe mi föri läng me fanüfan.” (Pwär. 14:​6, 7) Jiowa chék ewe Kot mi enlet itá meinisin repwe fel ngeni. A ifa me kilisouch ren an ngenikich ewe tufich mi aúchea le fel ngeni lón an we imwenfel mi lap lón pekin lúkú!

2. Met án Jiowa we imwenfel lón pekin lúkú? (Pwal ppii ewe pwóór “ Minne ewe Imwenfel lón Pekin Lúkú Ese Weneiti.”)

² Met wesewesen weween ewe imwenfel lón pekin lúkú, me ia sia tongeni kúna me ie tichikin áweween? Ewe imwenfel lón pekin lúkú esap ina eú wesewesen imw. Ina án Jiowa kókkót fán iten án aramas fel ngeni mi lóngólóng wóón án Jises méén kepich. Ewe aposel Paul a áweweei ena kókkót lón néún we taropwe ngeni ekkewe popun Chón Kraist chón Ipru mi nóm lón Jutia. b

3-4. Met Paul a lólileniesini ussun ekkewe Chón Kraist chón Ipru mi nóm Jutia, me ifa ussun a álisiir?

³ Pwata Paul a mak ngeni ekkewe popun Chón Kraist chón Ipru mi nóm Jutia? Ussun ikkeei ruu populapan. Áeúin, pwe  epwe awora ngeniir kapasen apéchékkúl. Me mwen ar wiliiti Chón Kraist, lape ngeniir ra fiti ewe lamalamen Jus. Néúwisin ena lamalam neman ra esiiter ren ar wiliiti Chón Kraist. Pwata? Pún ese wor án ekkewe Chón Kraist imwenfel repwe ló fel lón, ese wor ar róngen asor repwe asor ngeni Kot ie, me ese wor souasor epwe álisiir. Ena a tongeni elichippúngú néún Kraist kana chón káé me apwangapwangaaló ar lúkú. (Ipru 2:1; 3:​12, 14) Eli epwe tongeni efisi án ekkóch me leir repwe pwal mwo nge ekiekin liwiniti ewe lamalamen Jus.

⁴ Oruuan, Paul a ereni ekkena Chón Kraist chón Ipru pwe rese achocho ar repwe weweiti ekkewe pwóróus mi minefé are alóllóól mi lamot repwe alapaaló le káé ussun, ina ekkewe “mongö mi pöchökül” mi nóm lón án Kot we Kapas. (Ipru 5:​11-14) Ussun ekkóch me leir ra chúen fiti masouen ewe Allúkún Moses. Iwe nge, Paul a áweweei pwe ekkewe asor ena Allúk a apasa pwe aramas repwe eáni, rese tongeni unusen amóeló tipis. Ina ewe popun, ena Allúk “a wesila.” Mwirin ena, Paul a áiti ngeniir ekkóch me lein ekkewe pwóróus mi alóllóól lón Paipel. A áchchema ngeni chienan kewe Chón Kraist “eu apilükülüköch mi mürina” mi lóngólóng wóón án Jises we asor mi tongeni enletin álisiir le “arap ngeni Kot.”—Ipru 7:​18, 19.

5. Met a lamot sipwe weweiti seni lón ewe puken Ipru, me pwata?

⁵ Paul a áweweei ngeni chienan kewe chón Ipru pwata a kon múrinné napanapen ar fel ngeni Jiowa iei lap seni napanapen ar fel ngeni me lóóm. Napanapen án ekkewe chón Jus fel mi lóngólóng wóón ewe Allúk, ina “ngünüen chök ekewe mettoch repwe feito me mürin, nge ewe mi wesewesen enlet, iei i Kraist.” (Kol. 2:17) Ngúnúwen och mettóch, ina chék napanapan, esap ina wesewesen ewe mettóch. Pwal ina ussun ren napanapen án ekkewe chón Jus fel ngeni Kot lóóm, ina chék ngúnúwen ewe fel mi kon múrinné epwe feito. Iwe, a pwal lamot sipwe weweiti ewe kókkót Jiowa a isettiw fán itach fán iten musolóón ach kewe tipis pwe sipwe fel ngeni lón ewe napanap mi ketiw me ren. Iei sipwele apépéfengeni “ngünüen” (napanapen án chón Jus fel) me ewe “wesewesen enlet” (napanapen án Chón Kraist fel), ewe puken Ipru a áweweei ussun. Iká sia féri ena, sipwe weweéchúti weween ewe imwenfel lón pekin lúkú me ifa ussun a weneitikich.

6. Met ekkewe aramas ra áeá ngeni ewe imwenfel mangaku?

⁶ Napanapen án chón Jus fel. Paul a alónga met a fós ussun wóón ewe imwenfel mangaku Moses a féri lón ewe ier 1512 mwen Kraist. (Ppii ewe chart “Napanapen án Chón Jus Fel—Napanapen án Chón Kraist Fel.”) Ewe imwenfel mangaku a ussun eú tento ekkewe chón Israel ra uwei ngeni ekkewe leeni ra mwékút ngeni ie. Ra áeá ena imwenfel arapakkan 500 ier tori an a kaútá ewe imwenfel lón Jerusalem. (Eks. 25:​8, 9; Num. 9:22) Ena “imwenfel seni mangaku,” ina ewe leeni ekkewe chón Israel ra kochufengen ie pwe repwe fel ngeni Kot me asoresini ar kewe asor. (Eks. 29:​43-46) Iwe nge, ena imwenfel mangaku a pwal liosuetá och mettóch mi kon múrinné seni, ewe epwe tori ekkewe Chón Kraist.

7. Ineet atun a wor ewe imwenfel lón pekin lúkú?

⁷ Napanapen án Chón Kraist fel. Ewe imwenfel mangaku lóóm ina “ngünüen ekewe mettoch mi wor lon läng,” me a liosuetá án Jiowa we imwenfel mi lap lón pekin lúkú. Paul a apasa pwe ena imwenfel mangaku, “eu lios fän itach ikenai.” (Ipru 8:5; 9:9) Ina minne lón ewe atun a mak ngeni ekkewe chón Ipru, a fen wor ewe imwenfel lón pekin lúkú. A kawor lón ewe ier 29. Lón ena ier, Jises a papatais, a kepit ren ewe ngún mi fel, me a poputá le angang ngeni Jiowa lón wisan “Souasor mi Lap” lón ewe imwenfel lón pekin lúkú. c—Ipru 4:14; Föf. 10:​37, 38.

8-9. Me ren Ipru 7:​23-27, met a asokkafesenni néún chón Israel kewe souasor mi lap me ewe Souasor mi Lap, Jises Kraist?

⁸ Napanapen án chón Jus fel. Ewe souasor mi lap a wisen tupuni ekkewe aramas mwen mesen Kot. Aaron, i ewe áeménún souasor mi lap mi kefil me ren Jiowa atun efinúnún ewe imwenfel mangaku. Iwe nge, ussun met Paul a áweweei pwe chómmóng ra wiliiti souasor pokiten ekkewe souasor ra máló, iwe rese “tongeni sopwela angangen wiser.” d (Álleani Ipru 7:​23-27.) Me pokiten ekkena souasor mi lap rese unuséch, a lamot repwe pwal eáni asor fán iten pwisin ar tipis. Ina och mettóch mi fókkun asokkafesenni néún ekkewe chón Israel kewe souasor mi lap seni ewe Souasor mi Lap, Jises Kraist.

⁹ Napanapen án Chón Kraist fel. Ach we Souasor mi Lap Jises Kraist, “a angang lon . . . wesewesen ewe imwenfel seni mangaku ewe Samol a aüetä, nge sap aramas.” (Ipru 8:​1, 2) Paul a áweweei pwe pokiten Jises “a manau tori feilfeilachök, an angang lon wisan wisen souasor esap la ngeni pwal eman.” Paul a pwal apasa pwe Jises ese ussun ekkewe souasor mi lap lón Israel, “esap wor an mwäl ika an tipis,” ina minne ese lamot “an epwe eäni asor iteiten rän” fán iten an tipis. Iei sipwele ppii sókkofesenin ewe róngen asor me ewe asor lón napanapen án chón Jus fel me án ekkewe Chón Kraist fel.

10. Met ekkewe asor wóón ewe róngen asor ra áiti ngenikich?

¹⁰ Napanapen án chón Jus fel. Lúkún asamalapen ewe imwenfel mangaku, a wor eú róngen asor mi ffér seni piras. Me ikena ie, ekkewe souasor ra asoratá ngeni Jiowa ekkewe asor man. (Eks. 27:​1, 2; 40:29) Iwe nge, ekkena asor rese tongeni unusen amóeló tipisin  ekkewe aramas. (Ipru 10:​1-4) Ewe angangen asor man mi kan fiffis lón ewe imwenfel mangaku, a liosuetá ewe eú asor epwe unusen amóeló tipisin aramas.

11. Ifa ewe róngen asor Jises a asoresini manawan wóón? (Ipru 10:​5-7, 10)

¹¹ Napanapen án Chón Kraist fel. Jises a silei pwe Jiowa a tiinaato i ngeni fénúfan pwe epwe asoresini manawan fán iten aramas. (Mat. 20:28) Ina popun, atun Jises a papatais, i a pwáári an tipemecheres le féri met Jiowa a mochen an epwe féri. (Joh. 6:38; Kal. 1:4) Jises a asoresini pwisin i wóón eú róngen asor lón kapas áwewe, ewe mi liosuetá ‘letipen’ Kot. Letipen Kot pwe Néún we epwe asoresini manawan mi unuséch. Jises a fangoló manawan “fän eu chök, nge a naf ngeni fansoun meinisin” pwe epwe omusa, are unusen amóeló, tipisin meinisin chókkewe mi anganga ar lúkú Kraist. (Álleani Ipru 10:​5-7, 10.) Iei sipwele pwóróus wóón met masouen ewe imwenfel mangaku ra liosuetá.

12. Ié kewe ra tongeni tolong lón ekkewe ruumw lón ewe imwenfel mangaku?

¹² Napanapen án chón Jus fel. A fókkun lélé met mi nóm lón ewe imwenfel mangaku me ewe imwenfel mi kaútá mwirin lón Jerusalem. A wor ruu ruumw lón, “ewe Leni mi Pin” me ewe ‘leni mi Unusen Pin,’ nge eché kaaten a refifesenniir. (Ipru 9:​2-5; Eks. 26:​31-33) Lón ewe Leeni mi Pin, a wor eú leenien lamp mi ffér seni kolt, eú róngen asoren étúét, me eú chepelin pilawa. Ekkewe chék “souasor” mi kepit, a mumu ngeniir ar repwe  tolong lón ewe Leeni mi Pin pwe repwe féri ar angang mi pin. (Num. 3:​3, 7, 10) Lón ewe Leeni mi Unusen Pin, a wor eú pwórófel mi ffér seni kolt mi liosuetá án Jiowa nónnóm. (Eks. 25:​21, 22) Ewe chék souasor mi lap, a mumu ngeni an epwe tolong pekilóón ewe kaaten ngeni ena Leeni mi Unusen Pin fán eú lón eú ier atun ewe Ránin Asoren Omusomusen Tipis. (Lif. 16:​2, 17) Iteiten ier, a tolong fán chchaan ekkewe man pwe epwe asoresini omusomusen pwisin an tipis me án meinisin ekkewe aramas. Ló, ló, ló, ren án Jiowa we ngún mi fel a ffatoló met masouen ewe imwenfel mangaku ra wesewesen liosuetá.—Ipru 9:​6-8. e

13. Met ewe Leeni mi Pin me ewe Leeni mi Unusen Pin ra liosuetá lón napanapen án Chón Kraist fel?

¹³ Napanapen án Chón Kraist fel. Mi chék kaúk chóchóón néún Kraist kewe chón káé mi kepit ren ewe ngún mi fel, me eáni eú riri ngeni Jiowa mi kkóló aúchean. Ekkena 144,000 repwe eti Jises lón ewe wis souasor lón láng. (Pwär. 1:6; 14:1) Ewe Leeni mi Pin lón ewe imwenfel mangaku, a liosuetá ar mumu pwe repwe néún Kot lón pekin ngún atun ra chúen nóm wóón fénúfan. (Rom 8:​15-17) Ewe Leeni mi Unusen Pin lón ewe imwenfel mangaku a liosuetá láng, ikewe ie Jiowa a nónnóm ie. Ewe kaaten mi refifesenni ewe Leeni mi Pin me ewe Leeni mi Unusen Pin, a liosuetá inisin Jises, inisin futuk. Atun a chúen inisini ena inisin futuk, i ese tongeni tolong lón láng an epwe Souasor mi Lap lón ewe imwenfel lón pekin lúkú. Ren an fangoló inisin pwe epwe eú asor fán iten aramas, a suuki ngeni meinisin Chón Kraist mi kepit ar repwe eáni manaw lón láng. Iwe, a pwal lamot ar repwe fangoló inisiir inisin futuk pwe repwe manaw lón láng. (Ipru 10:​19, 20; 1 Kor. 15:50) Mwirin án Jises manawsefál, a tolong lón ewe Leeni mi Unusen Pin lón ewe imwenfel lón pekin lúkú, ikewe meinisin ekkewe mi kepit repwe eti i.

14. Me ren Ipru 9:​12, 24-26, pwata napanapen ach fel ngeni Jiowa lón an we imwenfel lón pekin lúkú a fókkun múrinné seni napanapen án chón Israel fel ngeni?

¹⁴ Sia tongeni kúna ffatéchún án Jiowa we kókkótun fel mi limeliméch mi lóngólóng wóón ewe asorun méén kepich me wisen Jises Kraist we souasor pwe a fókkun múrinné. Ewe souasor mi lap lón Israel a tolong lón ewe Leeni mi Unusen Pin férien aramas fán chchaan ekkewe asor man, nge Jises a tolong “lon läng,” ewe leeni mi unusen pin seni meinisin, pwe epwe nóm mwen mesen Jiowa. Me ikena ie a mwei ngeni Kot aúchean manawan mi unuséch wóón fénúfan fán ásengesich pwe epwe amóeló ach kewe “tipis ren an asor püsin inisin.” (Álleani Ipru 9:​12, 24-26.) Án Jises asor, a unusen amóeló tipis. Iei sipwele káé pwe ese lifilifil iká sia eáni ewe ápilúkúlúkún manaw lón láng are wóón fénúfan, kich meinisin sia tongeni fel ngeni Jiowa lón an we imwenfel lón pekin lúkú.

15. Ié kewe ra angang lón kiánin ewe imwenfel mangaku?

¹⁵ Napanapen án chón Jus fel. Ren ewe imwenfel mangaku, a wor kiánin mi ttittiló ikewe ekkewe souasor ra féri ar kewe angang ie. Eú watteen róngen asoren kek seni piras a nóm ikena ie fitifengen me eú sepien konik seni piras ekkewe souasor repwe áeá le limetiir mwen repwe féri ar kewe angang mi pin. (Eks. 30:​17-20; 40:​6-8) Iwe nge, ekkewe imwenfel mi kaútá mwirin, a pwal wor kiániir me lúkún ikewe ekkewe esap iir souasor ra tongeni fel ngeni Kot ie.

16. Ié kewe ra angang lón eú me eú kiánin ewe imwenfel lón pekin lúkú?

 ¹⁶ Napanapen án Chón Kraist fel. Me mwen án ekkewe lusun mi kepit repwe eti Jises lón ewe wis souasor lón láng, iir ra túppwél lón ar angang wóón fénúfan lón kiánin ewe imwenfel lón pekin lúkú. Ewe watteen sepien konik, ina eú minen áchchem ngeniir pwal ngeni Chón Kraist meinisin ar repwe akkamwéchú liméchún manawer me nónnómur lón pekin ngún. Iwe, ia ewe “mwich mi fokun chocho” ra angang ngeni Jiowa ie, iir kewe mi álisi pwiin Kraist kewe mi kepit fán túppwél? Ewe aposel Jon a kúna pwe iir ra “ütä me mwen ewe lenien motun king,” ewe a weneiti lúkún kiánin ewe imwenfel wóón fénúfan, ikewe “ra angang ngeni [Kot] lerän me lepwin lon imwan imwenfel.” (Pwär. 7:​9, 13-15) Sia fókkun kilisou pwe Jiowa a ngenikich ewe tufich mi aúchea ach sipwe fel ngeni lón an we imwenfel mi lap lón pekin lúkú!

17. Ikkefa ekkewe asor sia pwapwa le fang ngeni Jiowa?

¹⁷ Lón ei atun a nóm ren meinisin Chón Kraist ewe tufich mi aúchea ar repwe fel ngeni Jiowa ren ar áeá ar fansoun, péchékkúl, me wéúúr le angang ngeni. Ussun chék met Paul a ereni ekkewe Chón Kraist chón Ipru, fansoun meinisin sia tongeni “isettá ngeni Kot ach asorun mwareiti iteitan, weween uwaan tunawach, ewe sia áeá le esilei ngeni aramas itan we.” (Ipru 13:​15, NW) Sia tongeni pwáári ach aúcheani ach tufichin fel ngeni Jiowa ren ach fang ngeni met mi kon múrinné seni meinisin.

18. Me ren Ipru 10:​22-25, ikkefa ekkewe mettóch a lamot sipwe kan féfféri, me met sisap fókkun ménúkaaló?

¹⁸ Álleani Ipru 10:​22-25. Arapakkan lemuchúlóón néún Paul we taropwe ngeni ekkewe chón Ipru, a fós ussun ekkewe mettóch sipwe kan féfféri iteitan lón ach fel ngeni Jiowa. A kapachelong ach sipwe iótek ngeni Jiowa, afalafala ngeni aramas ussun ach we ápilúkúlúk, mwichfengen, me alapaaló ach apéchékkúlafengenikich “pun sia silei pwe Ränin ach Samol a arapoto.” Arapakkan lemuchúlóón ewe puken Pwärätä, néún Jiowa we chónláng a erá: “Kopwe fel ngeni Kot!” (Pwär. 19:10; 22:9) A apasa ena fán ruu pwe epwe pwáári úkúúkún watteen aúchean. Amwo sisap fókkun ménúkaaló meinisin ekkeei mettóch sia káé ussun án Jiowa we imwenfel mi lap lón pekin lúkú me ewe tufich mi aúchea mi nóm rech, ina ach sipwe fel ngeni ach we Kot mi lapalap!