1-2. Ifa ussun sia tongeni álleanifichi me káéfichi ewe Paipel? Áweweei.

 ANCHANGEI pwe ka ekiekin mééni eú imw. Met ka akkomw mochen kúna me mwen óm kopwe féri ena kefil? Itá kopwe chék mochen kúna sasingin mesen ewe imw? Ese mwáál kopwe mochen pwisin kúna ena imw ren mesom pwe kopwe tongeni fetálfeil únúkkún, tolong lón me etittina meinisin ekkewe ruumw, me katoléch meinisin kinikinin ena imw. Eli kopwe pwal mochen katol chúngaan ena imw pwe kopwe silei ifa ussun a kaú. A ffat pwe kopwe mochen katol unusen ewe imw ka mochen mééni.

² Sia tongeni féri ena esin atun sia álleani me káé ewe Paipel. Emén soukáéén Paipel a apasa pwe ewe Paipel a ussun “eú imw mi fókkun tekia me alóllóóletiw lóngólóngun.” Iwe ifa ussun sia tongeni sileéchú masouen ewe Paipel? Iká ka chék emwittiri óm álleani ewe Paipel, eli kopwe tongeni chék káé “ekewe lessen fän iten chon popuetä kaiö kapasen Kot.” (Ipru 5:12) A lamot kopwe tolong lón ewe imw pwe kopwe sileéchú napanapan, a pwal ina ussun, a lamot óm kopwe káéfichi ewe Paipel pwe kopwe unusen weweiti. Eú alen óm kopwe káé ewe Paipel, ina óm ppii ifa ussun ekkewe sókkopaten kinikinin lón ra ririfengen, achocho le weweiti met ka lúkú, me pwal achocho le weweiti pwata ka lúkú ekkena pwóróus.

3. Met ewe aposel Paul a pesei chienan kewe Chón Kraist ar repwe féri, me pwata? (Efisos 3:​14-19)

³ Ren ach sipwe unusen weweiti án Kot we Kapas, a wor ekkóch mettóch mi lamot sipwe káéfichi. Ewe aposel Paul a peseei ngeni chienan kewe Chón Kraist ar repwe káéfichi án Kot Kapas pwe repwe tongeni unusen weweiti “chölapan me langataman, pwal tekian me alololun” ewe enlet. Iwe  repwe “warar” me núkúchar lón ar lúkú. (Álleani Efisos 3:​14-19.) A lamot sipwe pwal ina ussun. Iei sipwele ppii ifa ussun sia tongeni káéfichi án Kot we Kapas pwe sipwe unusen weweiti masouan.

4. Met sia tongeni féri pwe sipwe ririéch ngeni Jiowa? Áweweei.

⁴ Pokiten kich Chón Kraist, iwe sise chék mochen ach sipwe weweiti ekkewe afalafal mi mecheres. Ren álillisin án Kot we ngún mi fel, sia fókkun mochen káé “pwal mwo nge ekewe ekiekin Kot mi alolol.” (1 Kor. 2:​9, 10) Pwata kese poputááni eú kkótun pwisin káé epwe eririéchuuk ngeni Jiowa? Áwewe chék, ka tongeni research wóón ifa ussun a pwáári an tongei néún kewe chón angang lón fansoun lóóm me ifa ussun ena a pwáári pwe a pwal tongeek. Ka pwal tongeni káé ifa ussun Jiowa a mochen án ekkewe chón Israel repwe fel ngeni me aléllééi ena ngeni ifa ussun a mochen ach sipwe fel ngeni lón ei fansoun. Are eli ka tongeni káé tichikin ekkewe oesini Jises a apwénúetá atun a manaw wóón fénúfan me féri ewe angangen afalafal.

5. Mi wor eú pwóróus ka mochen research wóón lón óm pwisin káé?

⁵ Ekkóch ekkewe chón káé Paipel mi kúttafichi ekkewe pwóróus mi alóllóól, ra apwóróusa ekkóch ekkewe mettóch ra mochen alapaaló ar káé ussun. Ka tongeni kúna ekkóch me lein alor kana me lón ewe pwóór itelapan, “ Ekkewe Pwóróus Ka Tongeni Káéfichi.” Ka tongeni fókkun pwapwa le káé ekkena itelap ren álillisin ewe Watch Tower Publications Index are ewe Research Guide for Jehovah’s Witnesses. Óm káéfichi ewe Paipel a tongeni apéchékkúla óm lúkú me álisuk le “fefeitä lon om silei Kot.” (SalF. 2:​4, 5) Iei sipwele ppii ekkóch ekkena pwóróus mi alóllóól lón ewe Paipel sia tongeni káéfichi.

6. (a) Áweweei iká pwata minne Jiowa a tipeni a sópwéch iteitan. (b) Pwata sia tongeni erá pwe minne Jiowa a tipeni fán iten aramas me fénúfan a “seni chék me lóóm lóóm”? (Efisos 3:​11, NW)

⁶ Áwewe chék, ekieki met Paipel a apasa ussun minne Kot a tipeni. Jiowa ese ussun ekkewe aramas mi filaatá efóch chék al repwe  pwer wóón pwe repwe tori eú leeni ra mochen ló ngeni. Nge iká a wor och mettóch mi eppeti ena al, neman resap tori ena leeni. Nge Jiowa a sókkóló, pún minne a tipeni a ussun ena leeni. I a fen filaatá ia epwe ló ie, iwe a tongeni pwer wóón sókkopaten al pwe epwe tikeri ikena epwe ló ie. Sia kilisou pwe ekis me ekis, Jiowa a pwáári me lón ewe Paipel “minne a tipeni an epwe apwénúetá seni chék me lóóm lóóm.” (Ef. 3:​11, NW) Iwe, ese lifilifil met epwe fis, Jiowa a sópwéch fansoun meinisin pokiten “a féri pwe mettóch meinisin epwe apwénúetá minne a tipeni.” (SalF. 16:​4, NW) Me mwirilóón met Jiowa a féri, epwe nóm tori feilfeiló chék. Met Jiowa a tipeni, me ikkefa ekkewe siwil a féri pwe epwe apwénúetá minne a tipeni?

7. Mwirin án Atam me If ú ngeni Jiowa, ifa ussun a ekkesiwili alen an apwénúetá minne a tipeni? (Mateus 25:34)

⁷ Kot a ereni ekkewe popun aramas met a tipeni fán iter. Repwe ‘nöünöü o achomonger pwe fanüfan epwe masou rer o nom fän nemenier. Repwe nemeni . . . mönün won unusen fanüfan.’ (Ken. 1:28) Lupwen Atam me If ra ú ngeni Kot, tipis a tori aramas, iwe nge ena ese tongeni aúkatiw án Jiowa apwénúetá minne a tipeni. I a ekkesiwili alen an apwénúetá minne a tipeni. Mwittir chék, a akkóta eú Mwú lón láng an epwe apwénúetá minne a tipeni seni lóóm fán iten aramas me fénúfan. (Álleani Mateus 25:34.) Lón ewe fansoun Jiowa a filaatá, a tiinaato Néún we mwánichi pwe epwe asukula ngeni aramas ussun ewe Mwú me epwe fangoló manawan pwe epwe selánikich seni tipis me máló. Mwirin Jiowa a amanawasefáli Jises me eliwinisefáli ngeni láng pwe epwe wisen King lón an we Mwú. Nge mi pwal chúen chómmóng met sia tongeni káé ussun minne Kot a tipeni.

8. (a) Ifa ewe pwóróus mi fókkun aúchea lón ewe Paipel? (b) Me ren Efisos 1:​8-11, met Jiowa epwe pwal apwénúetá? (Ppii ewe sasing wóón péén.)

⁸ Ewe pwóróus mi fókkun aúchea lón ewe Paipel, ina itéchúlóón iten Jiowa we atun epwe apwénúetá minne a tipeni fán iten fénúfan ren an áeá an we Mwú fán án Kraist nemenem. Minne Jiowa a tipeni ese tongeni siwil. A pwonei pwe meinisin minne a tipeni epwe apwénúetá. (Ais. 46:​10, 11; Ipru 6:​17, 18) Fénúfan epwe wiliiti eú paratis, ikewe mwirimwirin Atam me If kewe mi unuséch me pwúng repwe “manau [ie] feilfeilo chok.” (Kölf. 22:​26, Testament mi Fö) Nge esap chék ina met Jiowa epwe apwénúetá. I a pwal fókkun tipeni an epwe etipeeúfengeni meinisin néún kewe wóón láng me fénúfan. Iwe fán túppwél, meinisin repwe álleasochisi Jiowa ar we Sounemenem. (Álleani Efisos 1:​8-11.) Kese mwaar ren múrinnéén án Jiowa apwénúetá minne a tipeni?

9. Ren ach ákkálleani ewe Paipel, ifa úkúúkún pwóróusen mwachkkan sia silei?

⁹ Ekieki ewe oesini Jiowa a eáni me lón ewe tánipiin Eten mi mak lón Keneses 3:15. b A fós ussun ekkewe mettóch repwe fis repwe apwénúetá minne a tipeni. Iwe nge, ekkena mettóch repwap fis fitengeréú ier mwirin. Áwewe chék, Kot a ereni Eperiam pwe mwirin fitu tettelin táppin mwirimwirin kewe, emén me lein mwirimwirin kana epwe wiliiti ewe Kraist. (Ken. 22:​15-18) Iwe, lón ewe ier 33, ewe Tefil a “küw apilipilin pechen” Jises, ussun met ewe oesini a fen apasa. (Föf. 3:​13-15) Ewe sáingoon kinikin lón ewe oesini, ina án ewe ‘mwirimwir’ epwe puri mékúren  Setan, ewe epwe fis lón mwachkkan. (Pwär. 20:​7-10) Ewe Paipel a pwal pwáraaló chómmóng pwóróus ussun met epwe fis mwen epwele muchúló ewe koput lefilen án Setan ei ótót me án Jiowa we mwicheich.

10. (a) Ikkefa ekkewe mettóch repwele fis ekiseló chék? (b) Ifa ussun sia tongeni ammólnatá ekiekich me letipach? (Ppii ewe footnote.)

¹⁰ Ekieki ekkeei mettóch mi kkóló ewe Paipel a apasa repwe fis. Akkomw, ekkewe mwú repwe eáni ei esilesil, “mettoch meinisin a kinamwe o nükünüköch.” (1 Tes. 5:​2, 3) “Müttir” chék, ewe riáfféú mi lapalap epwe poputá atun ekkewe mwú repwele maunei meinisin lamalam chofona. (Pwär. 17:16) Mwirin ena, eli epwe wor ekkóch mettóch mi amwarar epwe fis atun ewe “Nöün Aramas epwe feito won kuchu fän manaman me ling mi lapalap.” (Mat. 24:30) Jises epwe féri an apwúng wóón aramas, epwe áimuni ekkewe siip seni ekkewe siike. (Mat. 25:​31-33, 46) Lón ena atun, Setan epwe sópweeló an angangen ú ngeni Jiowa. Iwe pokiten a fókkun oputa néún Kot aramas, i epwe amwékútú eú mwichen mwúún aramas, ewe Paipel a eita ngeni Kok lon ewe fanú Makok, ar repwe maunei néún Jiowa kewe aramas. (Is. 38:​2, 10, 11) Lón ekkena atun, ekkewe lusun mi kepit repwe kochufengen lón láng pwe repwe fiti Kraist me an we mwichen soufiu lón láng le maun lón ewe maunen Armaketon, ina ewe sáingoon kinikin lón ewe riáfféú mi lapalap. c (Mat. 24:31; Pwär. 16:​14, 16) Mwirin, epwele poputá án Kraist we Nemenem Úkúúkún Engéréú Ier wóón ei fénúfan.—Pwär. 20:6.

11. Ifa ussun ewe ápilúkúlúkún manaw esemuch a kkúú manawom? (Pwal ppii ewe sasing.)

¹¹ Iei kopwele ekieki met epwe fis mwirin ewe 1,000 ier. Ewe Paipel a apasa pwe ewe Chón Férikichetá a pwal mwo nge ‘atolonga ekiekin fansoun esemwüch lon letipach.’ (SalAf. 3:11) Ekieki ifa ussun ena a weneituk me óm riri ngeni Jiowa. Ewe puk Draw Close to Jehovah, pekin taropwe 319, a amwasangasangakichetá ren an apasa: “Lupwen sia manaw ren ipúkú ier, engéréú ier, million ier, pwal mwo nge billion ier, epwe fókkun  lapóló ach silei ussun Jiowa Kot lap seni met sia silei iei. Nge epwe chúen wor chómmóng mettóch mi amwarar sia tongeni káé ussun i. . . . Sise pwal mwo nge tongeni anchangei úkúúkún lingen me amwararen manaw lón ewe paratis. Nge ewe mi kon múrinné seni meinisin, ina ach ririéch ngeni Jiowa fansoun meinisin.” Nge ren mwo iei, met sia pwal tongeni káé ussun lón ach sópweeló le kákkáé án Kot we Kapas?

12. Ifa ussun sia tongeni silei met masouen láng? Áweweei.

¹² Ewe Paipel a ekis pwáár ngenikich iká ifa ussun án emén epwe nónnóm ren Jiowa “won läng.” (Ais. 33:5) A pwáári ekkewe mettóch mi amwarar ussun Jiowa me kinikinin an we mwicheich mi nóm láng. (Ais. 6:​1-4; Tan. 7:​9, 10; Pwär. 4:​1-6) Áwewe chék, sia tongeni álleani ekkewe mettóch mi amwarar Isikiel a kúna atun ‘a fis pwe läng a sukula, nge a wor künaan seni Kot.’—Is. 1:1.

13. Met ka aúcheani lón wisen Jises we lón láng, ussun met Ipru 4:​14-16 a áweweei?

¹³ Pwal ekieki met Jises a féfféri fán itach seni láng lón wisan wisen King me Souasor mi Lap mi tong. Pokiten i, iwe sia tongeni arap ngeni “än Kot we lenien mot” lón iótek me tingorei an úméúméch me álillis “lon fansoun ach osupwang.” (Álleani Ipru 4:​14-16.) Amwo sisap fókkun etiwaaló eú rán sise ekilonei met Jiowa me Jises ra fen féri me met ra féfféri fán itach seni lón láng. Ar tong ngenikich epwe achchúngú letipach me amwékútúkich le angang ngeni Jiowa fán tinikken.—2 Kor. 5:​14, 15.

14. Ifa eú me lein ekkewe mettóch mi múrinné sia tongeni féri pwe sipwe pwáári ach kilisou ngeni Jiowa me Jises? (Pwal ppii ekkewe sasing.)

¹⁴ Eú me lein ekkewe mettóch mi múrinné sia tongeni féri pwe sipwe pwáári úkúúkún  watteen ach kilisou ngeni Kot me Néún we, ina ach achocho le álisi aramas le wiliiti néún Jiowa Chón Pwáraatá me néún Jises chón káé. (Mat. 28:​19, 20) Ina met ewe aposel Paul a féri pwe epwe pwáári an kilisou ngeni Kot me Kraist. A silei pwe Jiowa a tipeni án “aramas meinisin repwe küna manau, repwe pwal silei ewe let.” (1 Tim. 2:​3, 4) A fókkun angang weires lón an we angangen afalafal le álisi chómmóng aramas úkúúkún an tufich pwe epwe ‘tongeni amanaua ekoch me leir ren met epwe tufich ngeni.’—1 Kor. 9:​22, 23.

15. Me ren Kölfel 1:​2, met a tongeni efisi ach pwapwa?

¹⁵ Ewe chón makkeei Kölfel 1, a apasa pwe emén mi “pwapwaiti än ewe Samol mi Lapalap allük o ekieki usun lerän me lepwin,” i emén mi pwapwa me sópwéch. (Kölf. 1:​1-3) Emén chón afféúni Paipel a memmeef wóón ekkena wokisin, a erá pwe a lamot ngeni emén an epwe fókkun “mochen angei án Kot emmwen, iwe epwe kútta, káé, me awora watteen fansoun le ekieki ussur. A pwal erá pwe “iká emén a oluoló eú rán nge ese álleani Paipel, iwe a solap ena rán.” Ka tongeni kúna pwapwa lón óm kákkáé ewe Paipel ren óm káé chómmóng tichikin pwóróus mi aúchea me kúna ifa ussun ra ririfengen meinisin. A ifa me apwapwaan ach káéfichi meinisin masouen án Kot we Kapas!

16. Met sipwe káé lón en lesen mwirin ei?

¹⁶ Ese kon weires ach sipwe weweiti ewe pwóróus mi aúchea Jiowa a áiti ngenikich me lón an we Kapas. Lón en lesen mwirin, sipwe pwóróus ussun eú me lein ekkena pwóróus mi aúchea, ina án Jiowa we imwenfel mi lap lón pekin ngún, ewe Paul a kapas ussun lón néún we taropwe ngeni ekkewe Chón Kraist chón Ipru. Amwo itá óm káéfichi ena pwóróus epwe atoto watteen óm pwapwa.