Ewe mana, ina ewe mwéngé ekkewe chón Israel ra mwéngé iteitan atun ar nómofetál lón ewe fénúpéén úkúúkún 40 ier. (Eks. 16:35) Nge Jiowa a pwal awora ngeniir kweil lón ekkewe ruu atun. (Eks. 16:​12, 13; Num. 11:31) Iwe nge, ekkewe chón Israel ra pwal mwéngé pwal ekkóch mwéngé nge esap iteitan.

Áwewe chék, fán ekkóch Jiowa a emmweni néún kewe aramas ngeni eú leeni “ia repwe asösö ie,” me ikena ie a kawor ngeniir ekkóch mettóch epwe ataweei ar osupwang. (Num. 10:33) Eú me lein ekkena leeni itan Elim eú leeni a wor chómmóng konik ie lón eú fénúpéén, ikkena “a wor ie engol me ruu chönüttu pwal fik irä palm.” Ese mwáál ina ewe irá palm mi uwaani dates. (Eks. 15:27) Ewe puk itelapan Plants of the Bible a erá pwe ena irá palm mi uwaani dates “ra máár lón sókkopaten leeni, . . . me ina ewe irá aramas ra kan ákkáeá lón ewe fénúpéén. Fite million aramas ra kan áeá ena irá lape ngeni fán iten ener mwéngé, ar apúra, me imwer.”

Ekkewe chón Israel neman ra pwal kaúló lón ekkewe sókkun leeni mi watte a wor chómmóng konik ie lón eú fénúpéén nge lón ei fansoun a iteni Feiran, ina kinikinin ewe Wadi Feiran. a Me ren ewe puk Discovering the World of the Bible a erá pwe ena wadi, are lemool chénúpupu, “a 81 mwail ttaman me ina eú me lein ekkewe lemool chénúpupu mi kon ttam me lingéch, me kon iteféúló lón Sinai.” Ena puk a pwal apasa pwe emén a tongeni tikeri Feiran Oasis iká a sái 28 mwail seni ewe ia ewe konik a pupulóng ngeni ewe sáát. Ena Feiran a úlúngát mwail ttaman, me ina epwe 2,000 fiit tekian seni sáát. A kon chómmóng iráán palm lón me a kon lingéch ina popun ra aléllé ngeni ewe tánipiin Eten. Ren fitengeréú ier, aramas ra kan soun ló ikena pwe ren chómmóngun ekkena irá palm mi uwaani dates.

Lupwen ekkewe chón Israel ra sú seni Isip ra uwou ener pilawa mi éúwéú, sepi ra kan áeá le éúwéú, me neman ekkóch féún irá me apúra. Nge pwúngún, ekkena mettóch resap nómottam. Ekkewe aramas ra pwal uwei “chomong pwiin sip me kow.” (Eks. 12:​34-39) Iwe nge, pokiten a mmen áweires lón ena fénúpéén, ese mwáál chómmóng me lein ekkena man ra máló. Ekkóch leir neman ekkewe chón Israel ra fen ocheer, ekkóch eli ra eániir asor, pwal mwo nge eániir asor ngeni ekkewe kot chofona. b (Föf. 7:​39-43) Nge, ekkewe chón Israel ra pwal foleni ekkóch man, ussun alon  Jiowa ei ngeniir pokiten ar álleasolap: “Iwe, nöümi repwe chon fofol man lon ewe fanüapö lon ükükün faik ier.” (Num. 14:33) Ina minne, mi tufich pwe néúr kana man ra awora ngeniir milik me pwal ekkóch ochaar futuk nge ese fókkun naf ena le atufichi ina epwe úlúngát million aramas ren úkúúkún 40 ier. c

Ia ekkewe man ra kúnékún me ie ener mwéngé me únúmer? d Lón ena atun, eli a watte púngún rán ina popun a wor chómmóng irá lón ewe fénúpéén. Iei alon ewe Insight on the Scriptures, Volume 1, pwe 3,500 ier lóóm, “a chómmóng konik lón ewe leeni ikewe chón Israel ra nóm ie lap seni lón ei fansoun.” Sia silei ena pokiten a chómmóng lemoolun chuuk mi alóllóól me pwásápwás efisien ekkewe chénúpupu ra piin pupu ikena ie. Inaamwo iká ina ussun, nge ena fénú a péén me eniweniw. (Tut. 8:​14-16) Iká Jiowa ese áeá an manaman le awora ngeni ekkewe chón Israel konik, iwe iir fengen me néúr kewe man repwe fen máló.—Eks. 15:​22-25; 17:​1-6; Num. 20:​2, 11.

Moses a ereni ekkewe chón Israel pwe Jiowa a fen amwéngééniir mana ‘pwe epwe aiti ngeniir pwe aramas resap manau ren mongö chök, pwe ra manau ren ekewe kapas meinisin mi towu seni awen ewe Samol mi Lapalap.’—Tut. 8:3.