1. Pwata chómmóng aramas ra rukoruk?

A WOR chómmóng lamalam mi erá pwe iir Chón Kraist me Kot a etiwa ar fel. Esap pwata iei me rukoruken chómmóng aramas! Ra eis, “A chék wor eú lamalam mi enlet, are Kot a etiwa meinisin lamalam?” Sia unusen lúkúlúk pwe minne sia afalafala, ina ewe enlet, me napanapen án Chón Pwáraatá Jiowa fel lón ei fansoun, ina met Jiowa a etiwa? Mi tufich ach sipwe enletin silei? Sipwe etittina ekkeei pisekin ánnet.

2. Me ren 1 Tesalonika 1:5, pwata Paulus a fókkun lúkúlúk pwe minne a lúkú ina ewe enlet?

² Aposel Paulus a fókkun lúkúlúk pwe minne a lúkú ina ewe enlet. (Álleani 1 Tesalonika 1:5.) Ese chék lúkú ena pokiten a eselipato pwapwaan, nge a fókkun káéfichi án Kot we Kapas. A lúkú pwe “kapasen lon ekewe Toropwe mi Pin meinisin ra pop seni Ngünün Kot.” (2 Tim. 3:16) Met a káé? Lón an káé ewe Kapasen Kot, a kúna ekkewe pisekin ánnet mi alúkúlúk pwe Jesus i ewe Messaia mi pwonetiw, ekkewe pisekin ánnet ekkewe néúwisin lamalamen Jus rese mochen etiwa. Ra apasa pwe ra afalafala aramas ewe enlet usun Kot, nge ra féri minne Kot a oput. (Tit. 1:16) Paulus ese usun ekkena néúwisin lamalam. Ese chék fili met epwe lúkú seni án Kot we Kapas me met esap lúkú. A chék mmólnetá le afalafala me apwénúetá “unusen ekiekin Kot.”​—Föf. 20:27.

3. Itá mi lamot ach sipwe silei meinisin pélúwen ach kewe kapas eis ren ach sipwe unusen lúkúlúk pwe minne sia silei, ina ewe enlet? (Pwal ppii ewe pwóór “ Án Jiowa Ekiek me Féffér Ra ‘Chomong Seni Ai Üpwe Tongeni Aleaniir.’”)

 ³ Ekkóch ra meefi pwe itá úrúrún lamalam mi enlet epwe tongeni pélúweni meinisin kapas eis, pwal mwo nge ekkewe ese mak pélúwer lón ewe Paipel. Nge mi tufich ena? Sipwe nengeni pwóróusen Paulus. A pesei chienan kewe chón lúkú pwe repwe “sotuniir meinisin,” nge a pwal erá pwe a wor chómmóng mettóch ese weweitiir. (1 Tes. 5:21) A makkeei pwe “ach silelap me ach kapasen osuni resap unus,” me a pwal erá pwe “mine sia küna iei a usun chök ngününgünün mettoch mi toputop lon kilas.” (1 Kor. 13:9, 12) Paulus ese weweiti mettóch meinisin, iwe pwal ina usun kich. Nge Paulus a weweiti ekkewe pwóróus mi lamot me enlet usun Jiowa. A naf silean mi alúkúlúkú pwe minne a silei, ina ewe enlet!

4. Ifa usun sipwe tongeni apéchékkúla ach lúkúlúk pwe minne sia silei ina ewe enlet, me met sipwe káé usun ekkewe Chón Kraist mi enlet?

⁴ Eú alen ach sipwe tongeni apéchékkúla ach lúkúlúk pwe minne sia silei ina ewe enlet, ina ren ach alélléfengeni napanapen ewe fel Jesus a poputááni ngeni napanapen án Chón Pwáraatá Jiowa fel lón ei fansoun. Lón ei lesen, sipwe káé pwe ekkewe Chón Kraist mi enlet (1) ra oputa fel ngeni ululun, (2) ra súféliti iten Jiowa we, (3) aúcheani ewe enlet, me (4) unusen tongefengeniir.

5. Met sia káé seni Jesus usun ewe esin napanapen fel mi pwúng, me ifa usun sipwe apwénúetá minne a áiti ngenikich?

⁵ Pokiten Jesus a fókkun tongei Jiowa, iwe a fel ngeni i chék atun a nóm láng me pwal atun a nóm fénúfan. (Luk. 4:8) A áiti  ngeni néún kewe chón káé ar repwe chék fel ngeni Jiowa. Jesus me néún kewe chón káé mi tuppwél rese fókkun néúnéú ululun lón ar fel ngeni Kot. Pokiten sise tongeni kúna Kot, iwe ese wor emén a tongeni anapanapa liosun are féri ululun! (Ais. 46:5) Nge ifa usun ren ach féri ululun chókkewe aramas ra eita ngeniir aramasepin me iótek ngeniir? Iei met Jiowa a apasa lón ewe oruuen allúk lón ewe Allúk Engol: “Kosap föri uluulun anümwäl fän itom, kosap pwal alapalapa och mettochun pekitä lon läng are och mettochun pekitiu won fanüfan . . . Kosap chapetiu ngeniir are fel ngeniir.” (Eks. 20:4, 5) Chókkewe iir mi mochen apwapwaai Kot, ra weweiti pwe Kot ese mochen ach sipwe fel ngeni ululun.

6. Ifa ewe esin napanapen fel Chón Pwáraatá Jiowa lón ei fansoun ra chék pwal eáni?

⁶ Chókkewe mi káé pekin uruwo ra erá pwe lón fansoun ekkewe aposel, ekkewe Chón Kraist ra chék fel ngeni Kot. Áwewe chék, eú puken uruwo a erá pwe ekkena Chón Kraist “repwe fókkun oputa” ewe ekiek usun néúnéún ululun lón ekkewe imwenfel. Chón Pwáraatá Jiowa lón ei fansoun, ra eáni ewe esin napanapen fel ekkewe popun Chón Kraist ra eáni. Sise iótek ngeni liosun chókkewe aramas ra kan eita ngeniir “aramasepin,” are ekkewe chónláng, me pwal mwo nge Jesus. Sise salute are fel ngeni ewe filaiken mwú me pwal féri ekkewe mettóch mi pwári pwe sia fel ngeni mwúún fénúach we. Ese lifilifil sóssót sipwe kúna, nge sipwe úppós le álleasochisi alon Jesus ei: “Kopwe fel ngeni ewe Samol om Kot.”​—Mat. 4:10.

7. Ifa usun Chón Pwáraatá Jiowa ra fókkun sókko seni meinisin ekkewe lamalam?

⁷ Chómmóng aramas lón ei fansoun ra sani le aúseling ngeni ekkewe chón afalafal iir mi iteféúló. Ra fókkun eingaaretá pwe usun itá nge ra fen fel ngeniir. Chómmóng aramas ra fiti ar kewe fál, kamé makkeier kewe puk me asor watteen moni ngeniir me ar kewe pekin. Ekkóch ra lúkú meinisin met ekkena chón afalafal ra erá. Ra fókkun pwapwa le aúseling ngeni ekkena chón afalafal pwe usun itá nge Jesus chék nge a afalafal ngeniir! Nge chókkewe iir mi fel ngeni Jiowa lón enlet, rese tapweló mwirin aramas. Ikaamwo sia súféliti chókkewe iir mi wisen emmwenikich, nge sia fiti alon Jesus ei mi fataffatéch, mi erá: “Ämi meinisin oua pwipwi.” (Mat. 23:8-10) Sise fel ngeni aramas, ese lifilifil ika iir néúwisin lamalam ika néúwisin mwú. Me sise pwal mochen álisatá met ra achocho le féri. Sise pekini eú pekin me sia imu seni ei fénúfan. Ekkena mettóch ra asókkakicheló seni pwal ekkewe ekkóch lamalam mi erá pwe iir Chón Kraist.​—Joh. 18:36.

8. Ifa usun sia silei pwe Jiowa a mochen pwe itan we epwe lingeló me unusen chéúló?

⁸ Lón eú atun, Jesus a iótek: “Semei, kopwe alinga itom!” Jiowa pwisin a pélúweni an na iótek ren eú méngúngú mi léúwommong seni láng me a pwonei pwe epwe elingaaló itan we. (Joh. 12:28) Lón unusen án Jesus angangen afalafal, a fen elingaaló iten Seman we. (Joh. 17:26) Ina popun, Chón Kraist mi enlet ra meefi pwe a eú feiéch ar repwe néúnéú iten Kot we me esile ngeni aramas.

9. Ifa usun ekkewe popun Chón Kraist ra pwári pwe ra súféliti iten Kot we?

⁹ Lón fansoun ekkewe popun Chón Kraist, ekiseló mwirin fférútáán ewe mwichefelin Chón Kraist, Jiowa a “popuetä le pwäräta an ekiek ren an angei me lein ekewe chon lükün  Israel eu mwichen aramas fän itan.” (Föf. 15:14) Ekkena popun Chón Kraist, ra pwapwa le néúnéú iten Kot we me esile ngeni aramas. Ra néúnéú iten Kot we atun ra afalafal me atun ra makkeei ekkewe puk lón Paipel. * Ra pwári pwe iir chék ekkewe aramas mi esilei iten Kot we.​—Föf. 2:14, 21.

10. Pwata sia silei pwe Chón Pwáraatá Jiowa chék, iir ewe mwichen aramas mi esilei iten Jiowa we?

¹⁰ Itá Chón Pwáraatá Jiowa, iir ewe mwichen aramas mi esilei iten Jiowa we? Nengeni ekkeei pisekin ánnet. Chómmóng néúwisin lamalam lón ei fansoun ra fókkun achocho le amonomonaló pwe a wor pwisin iten Kot. Ra télawu me lón néúr kewe chiyakúún Paipel, me lón ekkóch atun, ra pinei néúnéún ena it lón ar kewe fál. * A ffat pwe Chón Pwáraatá Jiowa chék ra ésúfélú me elingaaló iten Jiowa we. Sia esilefeili iten Kot we lap seni pwal ekkewe ekkóch lamalam! Sia achocho le eáni ewe sókkun manaw mi fich ngeni itach we, Chón Pwáraatá Jiowa! (Ais. 43:10-12) Sia fen féri lap seni 240 million kapiin ewe New World Translation of the Holy Scriptures, ewe mi néúnéú iten Jiowa we lón ekkewe wokisin ekkóch ekkewe chón chiyakú ra télawu me ie. Sia pwal awora ekkewe puk me ekkewe álillis seni Paipel mi néúnéú iten Jiowa we lón lap seni 1,000 fósun fénúfan!

11. Ifa usun ekkewe popun Chón Kraist ra pwári ar aúcheani ewe enlet?

¹¹ Jesus a aúcheani ewe enlet, weween ewe enlet usun Kot me minne a tipeni. Napanapen án Jesus manaweni manawan a pwári pwe a tipeeú ngeni ena enlet, me a esile ngeni aramas usun. (Joh. 18:37) Ekkewe Chón Kraist mi enlet ra pwal unusen aúcheani ewe enlet. (Joh. 4:23, 24) Ren enletin, ewe aposel Petrus a apasa pwe án Chón Kraist lúkú, ina “ewe Al mi Let.” (2 Pet. 2:2) Pokiten ekkewe popun Chón Kraist ra fókkun aúcheani ewe enlet, rese etiwa án ekkewe lamalam afalafal, eérenier kewe, me pwisin ar kewe ekiek ese tipeeú ngeni ewe enlet. (Kol. 2:8) A pwal ina usun ren ekkewe Chón Kraist mi enlet lón ei fansoun, ra achocho le “manaueni ewe manauen let” ren ar unusen alónga meinisin ar kewe lúkú me napanapen manawer wóón án Jiowa we Kapas.​—3 Joh. 3, 4.

12. Met a fis atun chókkewe mi wisen emmwenikich ra mirititi pwe a lamot an epwe ffatoló ach weweiti eú pwóróus, me pwata ra mwittir féri siwil?

¹² Néún Kot kewe aramas lón ei fansoun rese erá pwe ra unusen weweiti meinisin masouen ewe Paipel. Fán ekkóch a mwáálliló ar áweweei eú pwóróus seni Paipel are lón kkótun ewe mwicheich. Itá ena mettóch esap ámáirú ngenikich. Ewe Paipel a affata pwe ach weweiti usun ewe Paipel, epwe ffaffateló mwirin ekis fansoun. (Kol. 1:9, 10) Ekis me ekis, Jiowa a pwáppwáraaló ewe enlet, me a lamot ach sipwe mosonottam le witi sasaramolóón ewe enlet. (SalF. 4:18) Atun chókkewe mi wisen emmwenikich ra mirititi pwe a lamot an epwe ffatoló ach weweiti eú pwóróus, ra mwittir féri siwil. Chómmóng lamalam lón ei fansoun ra siwili minne ra eáni káit pokiten ra mochen apwapwaai chón ar we lamalam me mochen iteféúló lein chón fénúfan. Nge Chón Pwáraatá Jiowa ra féri siwil pokiten ra mochen arap ngeni Kot me fel ngeni lón ewe napanap Jesus a poputááni. (Jas. 4:4) Sia féri ekkewe siwil, esap pokiten siwililóón ekiekin chón ei fénúfan, nge pokiten a ffaffateló ach weweiti ewe Paipel. Sia aúcheani ewe enlet!​—1 Tes. 2:3, 4.

13. Ifa ewe napanap mi lap seni meinisin ekkewe Chón Kraist mi enlet ra pwári, me ifa usun a pwápwááló lein Chón Pwáraatá Jiowa lón ei fansoun?

¹³ Tong, ina ewe napanap mi lap seni meinisin mi esissillatá ekkewe popun Chón Kraist. Jesus a erá: “Are oupwe echenifengenikemi, aramas meinisin repwe silei, pwe ämi nei chon kaiö.” (Joh. 13:34, 35) Ekkewe Chón Pwáraatá Jiowa wóón unusen fénúfan ra pwári ewe tong mi enlet me ra tipeeúfengen. Ra sókko seni ekkewe ekkóch lamalam pokiten ra usun chék eú famili, inaamwo ika ra feito seni sókkopaten fénú me eéreni. A pwáló ach enletin tongfengen atun ach kewe mwich me mwichelap. Ena mettóch a apéchékkúla ach lúkúlúk pwe ach fel ngeni Jiowa, ina ewe esin fel mi ketiw me ren.

14. Me ren Kolose 3:12-14, ifa eú alen ach sipwe pwári pwe sia unusen tongefengen lefilach?

¹⁴ Iei án Paipel éúréúr ngenikich: “Oupwe tupwöl le echenifengenikemi lefilemi.” (1 Pet. 4:8) Eú alen ach pwári ena esin tong, ina ren ach omusomusfengen me likiitú ngeni apwangapwangen emén me emén kich. Sia pwal kútta alen ach sipwe kisáseú me etiwetiwéch ngeni meinisin chón lón ewe mwichefel, pwal mwo nge ngeni chókkewe iir mi ámetekikich. (Álleani Kolose 3:12-14.)  Atun sia pwári ena esin tong, sia ánnetatá pwe kich Chón Kraist mi enlet.

15. Ikkefa pwal ekkóch mettóch sia léllé ngeni napanapen án ekkewe popun Chón Kraist fel wóón?

¹⁵ Lón pwal ekkóch mettóch, sia eáni ewe napanapen fel ekkewe popun Chón Kraist ra pwal eáni. Áwewe chék, kókkótun ach we mwicheich a usun kókkótun án ekkena Chón Kraist. A wor néúch kewe chónemmwen mi wisen sáifetál, ekkewe mwán mi ásimaw, me ekkewe chónálillisin mwichefel. (Fil. 1:1; Tit. 1:5) Sia pwal usun ekkena popun Chón Kraist lón ach aúcheani án Jiowa kewe allúk usun lisowu me pwúpwúlú, pinin chcha, me ach túmúnú ewe mwichefel seni chókkewe iir mi féri tipis nge rese mochen aier.​—Föf. 15:28, 29; 1 Kor. 5:11-13; 6:9, 10; Ipru 13:4.

16. Met sia káé seni minne a mak lón Efisos 4:4-6?

¹⁶ Jesus a erá pwe chómmóng repwe erá pwe iir néún chón káé, nge esap iir meinisin ra enlet. (Mat. 7:21-23) Ewe Paipel a pwal erenikich pwe lón ekkewe ránin lesópwólóón chómmóng repwe “pomweni pomwen souläng.” (2 Tim. 3:1, 5) Nge ewe Paipel a enletin erenikich pwe a wor “eu chök lükülük” mi ketiw me ren Kot.​—Álleani Efisos 4:4-6.

17. Ié kewe lón ei fansoun iir mi tapweló mwirin Jesus me eáni ewe eú chék lúkú mi enlet?

¹⁷ Ié kewe ra eáni ewe eú chék lúkú mi enlet lón ei fansoun? Sia fen etittina ekkewe pisekin ánnet. Sia fen kúna ewe esin napanapen fel Jesus a asukula usun me ekkewe popun Chón Kraist ra eáni. Mi chék wor eú pélúwen ena kapas eis, Chón Pwáraatá Jiowa. A ifa me feiéchúch le wiliti emén néún Jiowa me silei ewe enlet usun i me minne a tipeni! Amwo sipwe sópweló le nónnóm chék lón ewe enlet fán watteen lúkúlúk.