Ach Mammasa A Atapwalapwalelo

“Iei minne oupwe chok mamasa, pun ouse sinei ranin an noumi Samol epwe feito.”​—MATTU 24:42.

1, 2. Met a anneta pwe sia manau atun ekkewe ranin le sopwoloon an ei otot?

 EWE soumak Bill Emmott a apasa pwe “lap seni meinisin, maun a fen alapalapa ewe aruween senturi.” Atewe a apasa pwe uruwoon aramas a ur ren porausen feiengau seni maun me foffor mwanesol nge a pwal apasa: “Ewe aruween senturi ese sokkolo lapalapan pokiten met a fiffis atun ena ipuku ier nge a sokkolo pokiten ukuukun met a fiffis. Ina ewe aewin ipuku ier a wor eu maun won unusen fonufan. . . . Me a ussun ita pwe ekkewe ruu maunen fonufan sap eu chok a fokkun menlapei pwungun ena poraus.”

² Jises Kraist a oesini pwe epwe wor maun, ‘einang ngeni einang me mu ngeni mu.’ Iwe, ir eu chok kinikinin ewe ‘esisinen [an Jises] liwinsefal pwal sopolon ei fansoun.’ Jises a pwal fos ussun lengita, malapalap, me chechchechin fonu lon an oesini mi lapalap. (Mattu 24:3, 7, 8; Luk 21:6, 7, 10, 11) Ren chommong lapalaper, watteen ekkeei fitikoko me ewe feiengau seniir a fen lapalapelo. Ngauen aramas a choufetal me ngauer a pwalo ren lapalapen an aramas ekiek ussun Kot me chiechier. Sia kuna tunaloon minne mi pwung me lapeloon atai alluk me fofforun mwanesol. Tongen Kot a siwil ngeni tongen moni, me aramas ra kutta lom minne ra pwisin pwapwa ren. Ei poraus a anneta pwe sia nonnom lon “fansoun weires.”​—2 Timoti 3:1-5.

3. Ifa ussun “ewe esisinen ewe fansoun” epwe kku kich?

³ Ifa ekiekum ussun ngaueloon fofforun aramas? Chommong aramas rese ekieki, are rese chuen meefi och ussun chommongun ekkewe mettoch mi ngau ra fiffis iteiten ran. Ekkewe aramas mi foummong me chokkewe mi fokkun tipatchem rese miritiiti weween “esisinen ekkewe fansoun”; me ekkewe nouwisin lamalam rese fen awora emmwen mi fich ngeni ekkewe osukosuk. (Mattu 16:1-3) Nge Jises a pesei noun kewe chon kaeo: “Oupwe chok mamasa, pun ouse sinei ranin an noumi Samol epwe feito.” (Mattu 24:42) Jises a peseikich, sap pwe sipwe chok ekis ekieki, nge sipwe fokkun “mamasa.” Ika sipwe mammasa, sipwe tumunuoch me ononoto. Esap naf ach chok tipeeu pwe sia nonnom lon ekkewe ranin le sopwoloon, are apasa pwe sia fen nonnom le atun fansoun weires. Sipwe fokkun lukuluk pwe “sopolon mettoch meinisin a fen arapoto.” (1 Piter 4:7) Ren ena esin lukuluk ach mammasa epwe atapwalapwalelo. Iwe, iei ewe kapas eis sipwe pwungupwung won: ‘Met epwe alisikich le apochokkula ach lukuluk pwe sia arap ngeni ewe sopwoloon?’

4, 5. (a) Met epwe apochokkula ach lukuluk pwe sia arap ngeni ewe sopwoloon, me met popun? (b) Ifa eu mettoch a wewefengen ren ranin Noa kewe me nonnomun ewe Noun aramas?

⁴ Chechchemeni mwo ekkewe lapalapen fonufan mi choufetal mwen eu fansoun mi amairu lon uruwoon aramas​—ewe Nooter lon ranin Noa we. A kon watte ngauen aramas pwe letipen Jiowa “a fokkun weires ren.” A apasa: “Upwe arosala foriei aramas me won fanufan.” (Keneses 6:6, 7) Me a ina met a fori. Jises a alollofengenni ranin Noa we me ach ei fansoun. A apasa: “Pun ussun chok ekkewe ranin Noa, epwe iei usun ren an ewe Noun-Aramas waroto.”​—Mattu 24:37.

 ⁵ Sipwe tongeni eani ekiek pwe meefien Jiowa ussun ewe fonufan ikenai a ussun chok an ekiek ussun ewe fonufan mwen ewe Nooter. Ika a fen arosalo aramas mi ngau lon ranin Noa we, iwe, epwe pwal arosalo aramas ingau ikenai. Ach weweochuuti wewefengennin ena fansoun loom me ach ei fansoun epwe apochokkula ach lukuluk pwe sia arap ngeni ewe sopwoloon ei fonufan mi ngau. Iwe, ikkefa ekkewe lapalap mi wewefengen? Mei wor limu sipwe fos ussun. Aewin, pwe a wor eu kapasen ourour mi ffat ussun ewe kata.

Kot A Ouroureer Ussun “Mettoch Mi Aramas Resaamwo Kuna”

6. Ifa ewe kapasen ourour Jiowa a awora lon ranin Noa we?

⁶ Lon ranin Noa we, Jiowa a apasa: “Nguni esap nonom lon aramas tori feilfeilachok, pun aramas fituk chok. Iwe, ranin manauan epwe ipuku rue ier chok.” (Keneses 6:3) Ei appio seni lang lon 2490 B.C.E. a weneiti sopwoloon ewe fonufan mi towau seni Kot. Ekieki mwo weween ei poraus fan iten chokkewe mi manau lon ena fansoun! Ipuku ruwe ier chok lusun mwen Jiowa epwe “aworato eu noter won fanufan pwe epwe arosala monumanau meinisin won fanufan.”​—Keneses 6:17.

7. (a) Met Noa a fori lupwen a rongorong ewe kapasen ourour ussun ewe Nooter? (b) Met sipwe fori lupwen sia rongorong porausen sopwoloon ei otot?

⁷ Noa a rongorong porausen ewe kata fite ier me mwan an epwe fis, me a tipatchem an nounou ewe fansoun ren an epwe ammonlata. Ewe aposel Paul a apasa: “Kot a fonou Noa usun ekkewe mettoch mi aramas resaamo kuna. Iwe, Noa a auseling ren luku, o a forata ewe waim, pwe epwe amanaua chon le imwan.” (Ipru 11:7) Nge kich? Tiwe som ier ra fen lulo seni ewe poputaan ekkewe ranin le sopwoloon lon 1914. Pwungun pwe sia nonnom lon ewe “fansoun sopolan fanufan.” (Taniel 12:4) Met sipwe fori pokiten ekkewe kapasen ourour sia fen angei? Ewe Paipel a apasa: “I mi fori letipen Kot epwe nonnom feilfeilo chok.” (1 Jon 2:17) Iei ewe fansoun sipwe atapwalapwal le fori letipen Jiowa.

8, 9. Ifa ewe kapasen ourour a esilesilfeil lon ei fansoun, me ifa ussun a esilesilfeil?

⁸ Lon ei fansoun, chokkewe mi enletin kaeo ewe Paipel ra fen miritiiti pwe ei otot won fonufan epwe katalo. Ina met sia luku? Nengeni met Jises a apasa ren kapas mi ffatoch: “Pun lon ewe fansoun epwe fis riaffou mi lapalap, usun chok esaamo fis seni le poputan fonufan tori ikenai, o esap pwal usun chok mwirin.” (Mattu 24:21) Jises a pwal apasa pwe epwe feito fan ewe wiis Soukapwung mi seikita me ren Kot me epwe aimufeseni ekkewe siip seni ekkewe siike. Ekkewe rese fich ngeni manau “repwe chok feilo lon ninni esemuch.”​—Mattu 25:31-33, 46.

⁹ Jiowa a akkachema noun kewe aramas ussun ekkeei kapasen ourour ren ewe mongo lon pekin ngun mi kawor ren “ewe chon angang mi tuppwel o tipatchem.” (Mattu 24:45-47) Pwal och, iteiten muu, einang, kapas, me aramas, ra rongorong ewe appio pwe repwe “niuokusiti Kot, o alingalo i, pun a fen tori klokun  an we kapung.” (Pwarata 14:6, 7) Eu kinikin mi lamot lon porausen ewe Muu Chon Pwarata Jiowa ra esileifeili won unusen fonufan ina ewe kapasen ourour pwe Muun Kot epwe muttir siwili ekkewe muun aramas. (Taniel 2:44) Sisap auselingamwaalli ei kapasen ourour. Fansoun meinisin ewe Kot Mi Lapalap a apwonueta an kewe kapas. (Aisea 55:10, 11) A fen apwonueta an kewe kapas lon ranin Noa we, me epwe apwonueta an kewe kapas lon ach ei fansoun.​—2 Piter 3:3-7.

Lisowu Mwaal A Choufetal

10. Met sipwe tongeni apasa ussun watteen ewe lisowu mwaal lon ranin Noa kewe?

¹⁰ Iei pwal eu mettoch ranin Noa me ach ei fansoun ra wewefengen. Jiowa a alluk ngeni ewe aemonun mwan me fefin pwe repwe “auralo fonufan,” ren ar nounou ar tufichin chufengen me ren ewe kkotun pupulu Kot a akkota. (Keneses 1:28) Lon ranin Noa we, ekkewe chonlang mi alleasolap ra fen alimengaualo chon fonufan ren sokkopaten lisowu mwaal. Ra feitiu fonufan, inisini inisin chon fonufan, me ra chufengen me ekkewe fin fonufan mi fokkun lioch. Ra nounatiu aramas mi esop chon fonufan me esop timon​—ekkewe Nefilim. (Keneses 6:2, 4) Tipisin ekkeei chonlang mi mochenia a ussun chok ewe lisowu mwaal lon Sotom me Komora. (Juta 6, 7) Ina popun sokkopaten lisowu mwaal a choufetal lon ena fansoun.

11. Ifa an aramas ekiek ussun pwung me mwaal iei mi wewefengen me ekiekin aramas lon ranin Noa kewe?

¹¹ Mei fet an ei fonufan ekiek ussun lisowu? Lon ekkewe ranin le sopwoloon lisowu mwaal ewe mettoch mi lamot seni meinisin fan iten chommong aramas. An Paul awewe a weneiti chokkewe: “Ra fen aporoingaualo letiper, o ra fangelo manauer ngeni angolosa, pun ra fakkun mochen fori sokkun limengau meinisin.” (Efisus 4:19) Sasing me kachito mi limengau, chufengen mwen pupulu, lisowu mwaal lefilen aramas watte me semirit, me lisowu lefilen mwan are fefin ra choufetal. Ekkoch ra fen “angei won inisir ewe liwinin ingau” ren sokkopaten semmwenin sikepwach, kataloon famili, me pwal ekkoch osukosuk.​—Rom 1:26, 27.

12. Met popun sipwe amaaraata koput fan iten minne mi ngau?

¹² Lon ranin Noa we, Jiowa a tiinalo ewe Nooter ren an epwe awesalo ewe fonufan mi umwesilo ren lisowu mwaal. Sisap monuki pwe ach keei ran ra wewe chok me ranin Noa kewe. Ewe “riaffou mi lapalap” mi epwe feito epwe limetawu seni ei fonufan ‘aramas mi fori lisou, mocheisou, are fori tipisin Sotom.’ (Mattu 24:21; 1 Korint 6:9, 10; Pwarata 21:8) Mi fokkun atapwalapwal ach amaaraata koput fan iten minne mi ngau me atowauakichelo seni ese lifilifil met a tongeni emmwen ngenikich lisowu mwaal!​—Kol Fel 97:10; 1 Korint 6:18.

Fonufan A Ur Ren “Foforun Mwaneson”

13. Lon ranin Noa we, met popun ewe fonufan a ‘ur ren fofforun mwaneson’?

¹³ Ewe Paipel a awewe won pwal eu lapalapen ranin Noa: “Nge chon fanufan ra fokun foforingau fan mesen Kot o eani foforun mwaneson ekis meinisin.” (Keneses 6:11) Fofforun mwanesol ese fen poputa lon ranin Noa. Noun Atam we Kein a fen nnielo pwiin we mi pwung. (Keneses 4:8) An Lamek we kol mi sikasini an nnielo emon anuwol, a pwalo met aramas  ra kan ekieki ussun fofforun mwanesol. Neman a sotun tumunu manauan, nge ewe kol a pwari an aramas ekiekin mwanesol lon ena atun. (Keneses 4:23, 24) Sokkofesennin ranin Noa, ukuukun ewe fofforun mwanesol. Lupwen ekkewe chonlang mi ngau ra puluweni ekkewe fin fonufan, ra nounou me pokiten nour kewe​—ekkewe Nefilim​—fofforun mwanesol a fokkun lapelapelo. Lon ewe New World Translation Paipel a pwa pwe ewe kapas mi weneiti ekkeei mwanemmong mi mwanesol lon fosun Ipru a wewe ngeni ‘chokkewe mi efisi an ekkewe ekkoch turutiu.’ Iwe mwiriloon, ewe fonufan “a ur ren foforun mwaneson.” (Keneses 6:13) Anchangei mwo ekkewe osukosuk mi tongeni ppiita lupwen Noa a mochen tumunuochu an famili lon ena esin fonufan! Iwe nge, Noa emon ‘mi pwung mwen pilon kana.’​—Keneses 7:1.

14. Ifa ukuukun ewe fonufan a ur ren ‘fofforun mwaneson’ ikenai?

¹⁴ Fofforun mwanesol a choufetal lon uruwoon aramas meinisin. Nge, ussun chok lon ranin Noa kewe, lon ach ei fansoun a fiffis eu lapeloon fofforun mwanesol. Sia kan rongorong ussun fofforun mwanesol lefilen chon eu famili, terrorism, nninniiloon unusen eu einang, an emon peki chommong aramas nge esor popun. Sipwe pwal chechchemeni ewe nni manau a fen fisita atun ekkewe maun. Ewe fonufan a ursefal ren fofforun mwanesol. Pwata? Met a fen alisata ei lapeloon fofforun mwanesol? Poluen ena kapas eis epwe pwalo pwal eu mettoch mi wewe chok lon ranin Noa me ach ei fansoun.

15. (a) Met a fen alisata lapeloon fofforun mwanesol atun ekkewe ranin le sopwoloon? (b) Sipwe lukulukoch pwe epwe fis met?

¹⁵ Lupwen an Kot Muun Messaia a fen fisita lon lang lon 1914, ewe King, Jises Kraist, a mwokutukut me a fori och mettoch mi fokkun lamot. Setan ewe Tefil me noun kewe timon ra fen koturutiu seni lang ngeni fonufan. (Pwarata 12:9-12) Mwen ewe Nooter, chonlang mi alleasolap ra pwisin likitalo leenier lon lang, nge lon ach ei fansoun ra koturutiu. Pwal och, rese chuen tongeni inisini inisin aramas ren ar repwe lisowu mwaal. Pokiten ar mangau, song, me ar niueiti ewe kapwung epwe feito, ra etipetipa aramas me mwicheich won fonufan ar repwe fori chommong fofforun atai alluk mi annou me fofforun mwanesol mi lapalap seni met a fen fisita lon ranin Noa we. Jiowa a ataielo ewe otot won fonufan a fen fisita mwen ewe Nooter pokiten ekkewe chonlang mi alleasolap ra fen auralo ren foffor ingau. Iwe, epwe fori ussun chok lon ach ei fansoun! (Kol Fel 37:10) Iwe nge, chokkewe mi mammasa ra silei pwe ar amanau a arapoto.

 Ewe Poraus A Afalafalfeil

16, 17. Ifa ewe aruaanuun mettoch mi wewefengen ren ach ei fansoun me ranin Noa we?

¹⁶ Ewe aruaanuun mettoch mi wewefengen ren ach ei fansoun me ewe fansoun mwen ewe Nooter ina ewe angang Noa a wiisen fori. Noa a falei efoch waaimw. I pwal emon “chon afalafal.” (2 Piter 2:5) Ifa ewe poraus Noa a afalafala? An Noa afalafal epwe fen kapachelong an pesei aramas ar repwe aier me eu ourour ussun ewe kata epwe feito. Jises a apasa pwe aramas lon ranin Noa “rese meefi och, tori ewe noter a fis, o a uweiirelo meinisin.”​—Mattu 24:38, 39.

¹⁷ Ussun we chok, Chon Pwarata Jiowa ra tinikken le apwonueta wiiser le afalafal, me ra esileifeili porausen Muun Kot ekis meinisin won fonufan. Lon arapakan kinikinin fonufan meinisin, aramas mi tongeni rongorong me alleaani porausen ewe Muu lon pwisin ar fos. Ewe Leenien Mas, mi esileifeili Muun Jiowa We, a katowu lon lap seni 140 kapasen fonufan me a wor lap seni 25,000,000 kapi a peres iteitan. Pwungun pwe ewe kapas allim ussun Muun Kot a esilesilfeil “won unusen fonufan, pwe epwe pwar ngeni einang meinisin.” Lupwen a wes ei angang me ren an Kot mochen, iwe, epwe fis ewe sopwoloon.​—Mattu 24:14.

18. Ifa ussun sipwe tongeni alollofengenni uwaan ach angangen afalafal me met aramas ra fori lupwen Noa a afalafaleer?

¹⁸ Mwen ewe Nooter, pokiten aramas rese aucheaani mettochun ngun me ar rese aucheaani an Kot ekiek ussun pwung me mwaal, ese weires ach anchangei ukuukun watteen an aramas takiri, kapas ingau ngeni, me esiita Noa me an we famili. Iwe nge, ewe sopwoloon a fisita. Pwal ussun chok, a wor chommong “chon esiit” atun ekkewe ranin le sopwoloon. Nge ewe Paipel a apasa: “Ranin ach Samol epwe feito usun chok emon chon sola.” (2 Piter 3:3, 4, 10) Epwe feito lon ewe fansoun mi fen filita. Esap mmang. (Apakuk 2:3) Sia tipatchem ika sipwe mammasa!

Ekkoch Chok Repwe Manau

19, 20. Ifa ussun sipwe alollofengenni ewe Nooter me kataloon ei otot won fonufan ikenai?

¹⁹ Ach alollofengenni ranin Noa me ach ei fansoun esap wes ren porausen ngauen me kataloon aramas. Mei wor chokkewe ra manau seni ewe Nooter, me epwe wor chokkewe mi manau seni sopwoloon ewe otot iei. Chokkewe mi manau seni ewe Nooter ir mi mosonoson me a sokkolo lapalapen manauer seni an ekkewe ekkoch. Ra auselinga ewe ourour seni Kot me ra kaimulo seni ewe fonufan mi ngau lon ena fansoun. “Noa a kuna umoumoch me ren Kot,” alon ewe Paipel. “I chok a foforoch lein pilon kana.” (Keneses 6:8, 9) Seni ekkewe aramas meinisin, eu famili, “aramas mi chokukkun, ir walumon chok, ra manau pokiten ewe konik.” (1 Piter 3:20) Jiowa Kot a awiisa ngeniir wiiser: “Oupwe nounou o achomongakemi pwe fanufan epwe masou remi.”​—Keneses 9:1.

²⁰ An Kot we Kapas a alukulukuukich pwe “eu mwich mi fakkun lapalap” epwe “feito seni ewe riaffou mi lapalap.” (Pwarata 7:9, 14) Epwe wor fitemon lon ena mwich mi fakkun lapalap? Jises a apasa: “Mi pwangkukkun ewe asam o mi chokukkun ewe al a alelo ngeni manau, iwe, mi chokisikis mi kuna.” (Mattu 7:13, 14) Lupwen sia alollofengenni choochoor me choochoon chon fonufan iei, fite bilion aramas, chokkewe mi manau seni ewe riaffou mi lapalap repwe chokisikis. Nge repwe eani eu wiiser mi auchea mi ekis wewe chok me ewe wiis chokkewe mi manau seni ewe Nooter ra pwapwaiti. Neman ekkewe mi manau seni ewe riaffou mi lapalap repwe tongeni nounou. Repwe kinikinin eu minefoon mwichen aramas won fonufan.​—Aisea 65:23.

 “Oupwe Mamasa”

21, 22. (a) Ifa ussun ach pwungupwungfengen won ei porausen ewe Nooter a fen alisuk? (b) Ifa ewe lesenin ier fan iten 2004, me met popun sipwe lefareni ewe fon a awora?

²¹ Inaamwo ika a ussun ita pwe porausen ewe Nooter esap wor lamotan ngenikich ikenai nge, a wesewesen awora eu kapasen ourour sise tongeni tunalo. (Rom 15:4) Ekkewe mettoch mi wewefengen lon ach ei fansoun me lon ranin Noa kewe repwe alapalo ach ekiek ussun ewe lamoten met a fiffis iei me achema ngenikich ifa ussun Jises epwe feito ussun emon chon sola ren an epwe apwungu ekkewe aramas mi ngau.

²² Ikenai, Jises Kraist a emmweni eu angang mi fokkun watte. Lon kapas awewe a aueta och mettoch lon pekin ngun. Mei wor eu paratis lon pekin ngun me, ussun chok ewe waaimw, a ffor fan iten tumunun me amanauen chon fel mi enlet. (2 Korint 12:3, 4) A lamot ach nonnom lon ena paratis ika sipwe manau seni ewe riaffou mi lapalap. An Setan fonufan a nom lukun ewe paratis lon pekin ngun me a mmonleta le muttir oromalo ir mi molululo lon pekin ngun. Ina ewe popun pwe sipwe “mammasa” me mmonleta fan iten ranin Jiowa we.​—Mattu 24:42, 44.

En Mi Chechchemeni?

• Ifa ewe fon Jises a awora ussun an waroto?

• Jises a alollofengenni ewe fansoun epwe nonnom ren met?

• Ifa ussun ach ei fansoun me ranin Noa ra wewefengen?

• Ifa ussun ach pwungupwung won ekkena mettoch mi wewefengen lon ranin Noa me ach ei fansoun epwe kku ach ngunun atapwal?

[Ekkewe Kapas Eis fan Iten ewe Lesen]

[Ekis Pwóróus lón pekin taropwe 7]

Ewe lesenin ier fan iten 2004: “Oupwe mammasa . . . Oupwe akkammonlakemi.”​—Mattu 24:42, 44.

[Sasing lon pekin taropwe 4]

Noa a auselinga ewe kapasen ourour seni lang. Nge kich?

[Sasing lon pekin taropwe 5]

“Pun usun chok ekkewe ranin Noa, epwe iei usun ren an ewe Noun-Aramas waroto”