Kot A Tongeikich?

EN MI meefi choutiuen ekkewe osukosuk ren om famili, semmwen, angang, are pwal ekkoch wiis mi chou? Chommong aramas ra meefi ina ussun. Me pwungungau, atai alluk, me foffor mi akachofesa ra kku aramas meinisin ikenai. Pwungun pwe a ina met ewe Paipel a apasa: “Masouen lang me fonufan meinisin ra chok ngungufengen tori ei fansoun.” (Rom 8:22) Ina popun sise mairu pwe chommong aramas ra eis: ‘Kot a tongeikich? Epwe alisikich?’

Ewe king mi tipatchem, Solomon a iotek ngeni Kot: “En echok ka silei leluken aramas meinisin.” Solomon a lukuluk pwe Kot ese chok silei kich nge a pwal tongei emon me emon leich. A tongeni tingorei Kot pwe epwe “auselingeer me lang” me apwonueta iotekin emon me emon mi niueiti Kot me pwaralo ngeni “riafoun pusin lelukan.”​—2 Kronika 6:29, 30.

Ikenai, Jiowa Kot a chuen tongeikich me a etiwakich le tittingor lon iotek. (Kol Fel 50:15) A pwon pwe epwe auselinga ekkewe iotek seni lelukach me mi tipeeu ngeni letipan. (Kol Fel 55:16, 22; Luk 11:5-13; 2 Korint 4:7) Ewer, Jiowa a auselinga “ar iotek . . . are eman chok aramas are [noun] aramasen Israel meinisin . . . ese lifilifil met sokun iotek ika tingor ra eani.” Iwe, ika sia lukuluk won Kot, tingor an alillis, me arap ngeni, sipwe kuna an tumun me emmwen. (An Salomon Fos 3:5, 6) Ewe soumakkei Paipel Jemes a alukulukukich: “Oupwe arap ngeni Kot, iwe, epwe arap ngenikemi.”​—Jemes 4:8.