“Ngingir A Fen Feilo Won Fonufan Meinisin”

“Oupwe feilo asoulangalo chon fonu meinisin, oupwe papataisir fan iten ewe Sam, me ewe Nau, me ewe Ngun mi Fel.”​—MATTU 28:19.

1, 2. (a) Ifa ewe wiis Jises a awiisa ngeni noun kewe chon kaeo? (b) Met popun ekkewe chon Kraist lon ewe aewin senturi ra tongeni fori chommong angang?

 EKISELO mwen an Jises feita lang, a awiisa ngeni noun kewe chon kaeo eu wiis. A ereniir: “Oupwe feilo asoulangalo chon fonu meinisin, oupwe papataisir fan iten ewe Sam, me ewe Nau, me ewe Ngun mi Fel.” (Mattu 28:19) Mwa met ren weiresin ena wiis!

² Ekieki mwo! Lon Pentekos 33 C.E., ewe ngun mi fel a fen niitiu won orun 120 chon kaeo me ra poputa le apwonueta wiiser ar repwe esileifeili pwe Jises ewe Messaia mi pwonetiu, ewe emon epwe amanaua aramas. (Fofor 2:1-36) Ifa ussun eu pwin aramas mi kisikis a tongeni afalafala “chon fonu meinisin”? Ese tufich ren aramas, nge “ren Kot mettoch meinisin a tufich.” (Mattu 19:26) An Jiowa ngun mi fel a alisi ekkewe chon Kraist loom, me ra meefi atapwalapwalen ewe angang. (Sekaraia 4:6; 2 Timoti 4:2) Ina popun, lon chok fitu ier, ewe aposel Paul a tongeni apasa pwe ewe kapas allim a fen afalafalfeil “ekis meinisin fan lang.”​—Kolose 1:23.

3. Met a pwoluelo ewe “wit,” ekkewe chon Kraist?

³ Lon unusen ewe aewin senturi, fel mi enlet a sopwosopwolo le choufetal. Iwe nge, Jises a fen oesini pwe epwe wor fansoun lupwen Setan epwe amorafeili “ira ingau” mi pwoluelo ewe “wit” are chon Kraist mi enlet, ren fite puku ier tori ewe fansoun ras. Ena oesini a pwonuta mwirin maloon ekkewe aposel.​—Mattu 13:24-39.

Lapeloon Choochoor Ikenai

4, 5. Seni lon 1919, menni angang ekkewe chon Kraist mi kepit ra poputa le fori, me met popun a weires?

⁴ Lon 1919, ina ewe fansoun ewe wit are chon Kraist mi limelimoch epwe aimu seni ekkewe ira ingau. Ekkewe chon Kraist mi kepit ra silei pwe repwe chuen apwonueta ewe wiis watte Jises a awiisa ngeniir. Ra fokkun luku pwe ra manau lon “ekkewe ran le sopolon” me ra chechchemeni an Jises we oesini: “Ei kapas allim usun ewe mu epwe esineifeili won unusen fonufan, pwe epwe pwar ngeni einang meinisin. Iwe, a ina sopolon.” (2 Timoti 3:1; Mattu 24:14) Pwungun pwe ra fen silei watteen ewe angang repwe fori.

⁵ Iwe nge, ussun chok ekkewe chon kaeo lon 33 C.E., a weires ewe angang ekkewe chon Kraist mi kepit repwe fori. Choochoor fite ngerou chok lon ekkoch chok fonu. Epwe ifa ussun repwe tongeni esileifeili ewe kapas allim “won unusen fonufan”? Chechchemeni mwo pwe choochoon aramas won fonufan a fen lapelo seni arapakan 300 milion lon ranin ekkewe Sisar ngeni 2 bilion mwirin ewe aewin maunen fonufan. Me lon unusen ewe 20en senturi, a muttir chommongelo.

6. A ifa me watteen choufetallin ewe kapas allim lupwen a tikeri ewe ier 1930?

 ⁶ Iwe, noun Jiowa kewe mi kepit, ussun chok pwiir kewe lon ewe aewin senturi, ra poputa le apwonueta wiiser fan lukuluk mi unus lon Jiowa, me ngunun we a nonnom rer. Lon 1935, 56,000 som chon afalafal ra fen esileifeili ewe enlet seni Paipel lon 115 fonu. Ra fen fori angang watte nge mi chuen watte ewe angang repwe fori.

7. (a) Ifa ewe minefoon osukosuk a tori ekkewe chon Kraist mi kepit? (b) Ren alillis seni ekkewe “ekkoch siip,” ifa ussun ewe angangen ioifengen a feffeita tori ikenai?

⁷ Mwirin, ar weweochiiti porausen ewe “mwich mi lapalap” lon Pwarata 7:9 a efisata eu minefoon angang weires me a pwal awora alillis ngeni ekkena chon Kraist mi chofo le angang. Ewe mwich mi lapalapen “ekkoch siip,” nge ese ffat iteiter, chon luku mi eani apilukulukun manau won fonufan, repwe ioifengen “seni ekkewe mu meinisin, o ekkewe einang meinisin, o sokkun aramas meinisin, o sokkun kapas meinisin.” (Jon 10:16) Repwe ‘angang ngeni [Jiowa] le ran me lepwin.’ (Pwarata 7:15) Weween pwe repwe alillis lon ewe angangen afalafal me asukula aramas. (Aisea 61:5) Iwe, ekkewe chon Kraist mi kepit ra pwapwa le kuna chommongoloon ekkewe chon afalafal ngeni fitu kit me mwirin ngeni fitu milion. Lon ewe ier 2003, a tori eu minefoon choochoon chon afalafal 6,429,351​—lape-ngeniir kinikinin ewe mwich mi lapalap. * Ekkewe chon Kraist mi kepit ra kilisou fan iten ei alillis, me ekkewe ekkoch siip ra pwapwa pwe repwe tongeni alisi pwiir kewe mi kepit.​—Mattu 25:34-40.

8. Met ekkewe Chon Pwarata Jiowa ra fori fan ekkewe osukosuk watte atun ewe oruuen maunen fonufan?

⁸ Lupwen a pwalosefal ewe mwichen aramas mi ussun chok wit, Setan a awatteelo an maun ngeniir. (Pwarata 12:17) Met a fori lupwen a poputa le ioifengen ewe mwich mi lapalap? A efisata foffor mi akachofesa! Sia tipemwaramwar pwe Setan a emmweni ewe maun ngeni fel mi enlet a fiffis atun ewe oruuen maunen fonufan? Chon Kraist lon ekkewe ruu pekin ra kuna osukosuk watte. Chommong pwiich kewe ra kuna riaffou watte, me ekkoch ra malo fan iten ar luku. Nge, ra aloni alon ewe soumak kol mi fel: “Ua mwareiti ewe kapasen Kot, ua luku Kot, o use mo niuokus. Meeta fituk epwe tongeni fori ngeniei.” (Kol Fel 56:4; Mattu 10:28) Ekkewe chon Kraist mi kepit me ekkewe ekkoch siip ra uppos le utafengen pokiten ra pochokkulelo ren manamanen Jiowa. (2 Korint 4:7) Iwe mwiriloon, “ewe kapasen Kot a mamarita.” (Fofor 6:7) Lon 1939, lupwen ewe maun a poputa, 72,475 chon Kraist mi tuppwol ra repotei pwe ra fiti ewe angangen afalafal. Iwe nge, ewe repot ese unus fan iten 1945, ewe ier ewe maun a muchulo, a pwaralo pwe 156,299 Chon Pwarata ra afalafala ewe kapas allim. Mwa met ren watteen an Setan kkuf!

9. Ikkefa ekkewe sukul minefo ra poputa le atun ewe Oruuen Maunen Fonufan?

⁹ A ffat pwe ewe osukosuk lon ewe oruuen maunen fonufan ese efisi tipemwaramwar lein noun Jiowa kewe chon angang ika ewe angangen afalafal epwe pwonueta. Pwungun pwe lon 1943, lupwen ewe maun a watteta, ruu minefoon sukul ra poputa. Eu itan Sukulen Afalafal, a fis lon ekkewe mwichefel meinisin fan iten an epwe asukula ekkewe Chon Pwarata le afalafal me foralo chon kaeo. Ewe eu, ewe Watchtower Bible School of Gilead, a ffor fan iten an epwe asukula ekkewe misineri pwe repwe apochokkula ewe angangen afalafal lon ekkewe fonuen  ekis. Ewer, lupwen a wes ewe maun, ekkewe chon Kraist ra mmonleta le alapalo ar angang.

10. Ifa ussun tinikkennin noun Jiowa kewe aramas a pwapwalo lon ewe 2003?

¹⁰ Mwa met ren ochun angangen ekkeei sukul! Pokiten ar kaeo lon ewe Sukulen Afalafal, kukkun me chinnap, sam me in me semirit, pwal mwo nge ekkewe mi semmwen, ra fen fiti me likiitu le apwonueta wiiser mi watte seni Jises. (Kol Fel 148:12, 13; Sowel 2:28, 29) Lon ewe ier 2003, ukuukun 825,185 iteiten maram ra pwarata ar miritiiti atapwalapwalen ewe angang ren ar pioneer lon ekkoch maram are lon unusen ewe ier. Lon pwal ena ier, Chon Pwarata Jiowa ra nounou 1,234,796,477 awa ren ar repwe afalafala ewe kapas allim ussun ewe Muu. Pwungun pwe Jiowa a pwapwa ren tinikkennin noun kewe aramas!

Lon Ekkewe Fonuen Ekis

11, 12. Ikkefa ekkewe poraus a pwarata angangochun ekkewe misineri?

¹¹ Lon ekkewe ier ra lo, chokkewe ra fen sochungio seni Gilead me, kanoto chok, chokkewe mi sochungio seni ewe Ministerial Training School ra fen fori angang mi fokkun murinno. Ren chok awewe lon Brazil, mei wor kis seni 400 chon afalafal lupwen ekkewe misineri ra war lon 1945. Ekkeei misineri me chokkewe mi tapwelo mwirir ra achocho le angangpok me pwiir kewe mi tinikken lon Brazil, me Jiowa a mmen efeiochu ar angang. A ifa me apwapwaan chokkewe mi chechchemeni me loom me iei ra kuna pwe mei wor eu minefoon chochoon 607,362 chon afalafal lon Brazil lon 2003!

¹² Sipwe poraus ussun Japan. Mwen ewe oruuen maunen fonufan, mei wor orun ipuku chon afalafala ewe Muu lon ena fonu. Atun ewe maun, riaffou mwaal watte a ekisalo choochoon ekkewe chon afalafal, me le muchuloon ewe maun, ekkoch chok Chon Pwarata ra chuen manau lon pekin ngun me lon pekin aion. (An Salomon Fos 14:32) Chokkewe mi amwochu ar tuppwol ra mmen pwapwa lon 1949 lupwen ra souni ekkewe 13 misineri mi sukul lon Gilead, me ekkewe misineri ra muttir tongei pwiir kewe mi meseik me kisaseu lon Japan. Lap seni 50 ier mwirin, lon 2003, ewe 217,508 chon afalafal ra wewe ngeni eu minefoon choochoon chon afalafal lon Japan! Jiowa a fokkun efeiochu noun kewe aramas lon ena fonu. Mei pwal wor pwal ekkoch poraus mi wewe chok seni pwal chommong fonu. Chokkewe mi tufichin afalafal lon ekkewe fonuen ekis ra fen alisaata choufetalin ewe kapas allim, ina popun lon 2003 a esilesilfeil lon 235 fonu won unusen fonufan. Ewer, ewe mwich mi lapalap a towu seni “fonu meinisin.”

‘Seni Ekkewe . . . Einang Me Aramas Me Sokkun Kapas’

13, 14. Ifa ussun Jiowa a pwarata ewe lamoten ach afalafala ewe kapas allim lon “sokkun kapas . . . meinisin?”

¹³ Ewe aewin manaman mwirin ekkewe chon kaeo ra kepit ren ewe ngun mi fel lon Pentekos 33 C.E. a fis lupwen ra kapas lon sokkopaten fos ngeni ewe pwin aramas. Neman chokkewe ra rongorong ekkewe chon kaeo ra eani eu fos mi international, eli fosun Kris. Pokiten ir “re Jus mi tuppwel,” ese mwaal ra tongeni weweiti ewe afalafal lon fosun Ipru lon ewe imwen fel. Nge ra wesewesen mochen auseling lupwen ra rongorong ewe kapas allim lon ewe fos ra fen silei le kukkunuur.​—Fofor 2:5, 7-12.

¹⁴ Ikenai mwo, sia nounou chommong sokkopaten fos lon ach angangen afalafal. A fen  oesini pwe ewe mwich mi lapalap esap chok feito seni ekkewe muu nge seni ‘ekkewe einang, me aramas me sokkun kapas.’ Iwe, minne Jiowa a oesini ren Sekaraia a tipeeu ngeni ei poraus: “Lon ekena ran engol mwan seni ekewe mwu mi sokola ar kapas repwe amwochu lepwulun ufen eman chon Juta o ura, ‘Kose mochen kopwe mwut ngenikem pwe aipwe etikemi, pun am aia rong pwe Kot a etikemi.’” (Sekaraia 8:23) Inaamwo ika ese chuen wor ewe liffangen kapas lon sokkopaten fos ren Chon Pwarata Jiowa nge, ra silei ewe lamoten ar asukula aramas lon pwisin ar fos.

15, 16. Met ekkewe misineri me pwal ekkewe ekkoch ra fori pwe repwe tongeni afalafal lon sokkopaten fos?

¹⁵ Pwungun pwe ikenai mei wor ekkoch fos chommong aramas ra aea, ussun chowean fosun Merika, fosun Franis, me fosun Spanish. Iwe nge, chokkewe mi fen mwokut seni fonuer pwe repwe afalafal lon pwal ekkoch fonu ra achocho le kaeo ewe fos lon ewe fonu ra nonnom ie pwe chokkewe mi “fil ngeni manau esemuch” repwe tongeni rongorong ewe kapas allim. (Fofor 13:48) Ach fori mi tongeni weires. Lupwen pwiich kewe lon ewe fonuen South Pacific itan Tuvalu ra osupwangen puk lon pwisin ar fos, emon lein ekkewe misineri a achocho ngeni. Pokiten esor dictionary, a pwisin poputa le makkeei ekkewe kapas me weweer lon kapasen Tuvalu. Feil, feil, a katowu ewe puk Kopwe Tongeni Manau Tori Feilfeilo chok lon Paratis won Fonufan, * lon fosun Tuvalu. Lupwen ekkewe misineri ra tori Curaçao, esor Paipel me dictionary lon fosun Papiamento. Mei pwal wor tipefesen ifa ussun ewe fos epwe mak. Nge, ruu ier mwirin warotoon eu misineri mi pupulu, ewe aewin tract ussun ewe Paipel a katowu lon ena fos. Ikenai, Papiamento eu lein ekkewe 133 fos Ewe Leenien Mas ra peres lon eu chok fansoun me fosun Merika.

¹⁶ Lon Namibia ekkewe misineri rese tongeni kuna emon Chon Pwarata seni ena fonu mi tongeni alisiir le chiyaku. Pwal och, lon eu fosun ena fonu itan Nama, esor kapas lon fosun ewe fonu mi mak fan chommong lon nouch kewe puk, awewe chok ren ewe kapas “unusoch.” Emon misineri a apasa: “Ua kutta alillis seni ekkewe sense mi kaeo ewe Paipel fan iten chiyaku. Pokiten ese watte ar silei ussun ewe enlet, ua mommot rer ren ai upwe cheki pwe ekkewe poraus meinisin mi pwung.” Nge, lo, lo, lo, ewe tract Life in a New World a chiyaku ngeni ruaanu fosun Namibia. Ikenai, Ewe Leenien Mas a katowu iteiten maram lon fosun Kwanyama me Ndonga.

17, 18. Menni osukosuk a pwak lon Mexico me lon pwal ekkewe ekkoch fonu?

¹⁷ Lon Mexico, lape-ngeni ekkewe aramas ra eani fosun Spanish. Iwe nge, mwen warotoon ekkewe chon Spain, ra eani chommong sokkopaten fos, me tori iei ra chuen nounou ekkoch  me leir. Ina popun, ekkewe puken Chon Pwarata Jiowa ra ffor lon fisu fosun Mexico fengen me Mexican Sign Language. Ach Angangen Afalafala ewe Muu lon fosun Maya ewe aewin mettoch mi peres a katowu iteiten maram lon fosun American Indian. Pwungun pwe fite ngerou chon Maya, chon Aztec, me pwal ekkewe ekkoch ra kapachelong lon ekkewe 572,530 chon afalafala ewe Muu lon Mexico.

¹⁸ Kanoto chok, fite milion aramas ra fen sulo ngeni ekkewe fonuen ekis fan osopwisek, are ra feilo ngeni pwal eu fonu pokiten nafangauen moni. Ina popun, mei wor chommong aramas mi sokkolo ar fos lon chommong fonu. Chon Pwarata Jiowa ra achocho le fos ngeniir. Ren chok awewe, lon Italy, mei wor ekkewe mwichefel me kumi lon 22 fos lukun fosun Italy. Fan iten kalisitaan pwiich kewe le afalafal ngeni aramas mi sokkolo ar fos, a fisita ekkewe sukul pwe repwe tongeni kaeo 16 fos, kapachelong Italian Sign Language. Lon pwal chommong fonu, Chon Pwarata Jiowa ra achocho le chuuri ekkewe aramas mi sokkolo ar fos lon fonuer. Ewer, ren an Jiowa alillis, ewe mwich mi lapalap a wesewesen feito seni chommong, chommong aramas mi sokkolo ar fos.

“Won Fonufan Meinisin”

19, 20. Ikkefa an Paul kewe kapas mi pwonueta ikenai? Awewei mwo.

¹⁹ Lon ewe aewin senturi, ewe aposel Paul a makkei: “Nge upwe eis, rese mo rong? Ewer, ra rong, pun ‘ngingir a fen feilo won fonufan meinisin, o ar kewe fos a tori le sopun fonufan.’” (Rom 10:18) Ika mei pwung ena lon ewe aewin senturi, iwe ita epwe pwal pwung ikenai! Fite milion​—eli lap seni lon ekkewe fansoun meinisin​—ra apasa: “Upwe mwareiti ewe SAMOL fansoun meinisin; ai kapasen mwareiti i epwe nonnom lon auei fansoun meinisin.”​—Kol Fel 34:1.

²⁰ Pwal och, ewe angang ese mmangelo. Choochoon ekkewe chon afalafala ewe Muu a lapalapelo. A pwal lapelo ewe fansoun aramas ra aea fan iten ewe angangen afalafal. Chon afalafal ra chuurisefalli fite milion aramas me ra kaeo Paipel ngeni fitepuku ngerou aramas. Chommong ra pwarata pwe ra mochen auseling. Lon ewe ier, mei wor eu minefoon choochoon chon fiti ewe Achechchemenien Maloon Jises, ren 16,097,622. A ffat pwe mei chuen wor angang watte epwe fis. Amwo sipwe sopweilo le appiru an pwiich kewe luku mi pochokkul, chokkewe mi likiitu fan riaffou watte. Amwo sipwe pwarata tinikkennin pwiich kewe meinisin mi achocho ngeni an Jiowa angang seni 1919. Iwe, sipwe sopweilo ach apasa alon ewe soumak kol mi fel: “Mettoch meinisin mi ngasangas epwe mwareiti ewe SAMOL! Oupwe mwareiti ewe SAMOL!”​—Kol Fel 150:6.

[Ekkewe pwóróus fan]

Kopwe Tongeni Awewei?

• Menni angang pwiich kewe ra poputaani lon 1919, me met popun a weires?

• Io kewe ra ioifengen pwe repwe alisata ewe angangen afalafal?

• Ifa porausen ekkewe misineri me pwal ekkoch lon ekkewe fonuen ekis?

• Ifa ewe poraus om kopwe pwarata pwe Jiowa a efeiochu angangen noun kewe aramas ikenai?

[Ekkewe Kapas Eis fan Iten ewe Lesen]

[Credit Line]

Kapung: sasingin U.S. Navy; ekkewe ekkoch: sasingin U.S. Coast Guard

[Sasing lon pekin taropwe 21]

Ewe fitikoko lon ewe oruuen maunen fonufan ese efisata an chon Kraist tipemwaramwar pwe ewe kapas allim epwe esilesilfeil

[Sasing lon pekin taropwe 23]

Ewe mwich mi lapalap epwe feito seni einang me sokkun kapas meinisin