Aramas Ra Eriaffouur Pokiten Ar Fori Minne Mi Pwung

PLAY

Aramas Ra Eriaffouur Pokiten Ar Fori Minne Mi Pwung

“Mi pwapwa ir mi kuna riaffou pokiten ar fori minne mi pwung.”—MATTU 5:10, NW.

1. Met popun Jises a nom mwen mesen Pontius Pailat, me met a apasa ngeni?

“IEI popun ua uputiu, pwal iei popun ua feitiu fonufan, pwe upwe pwarata usun ewe enlet.” (Jon 18:37) Lupwen Jises a apasa ena, a nom mwen mesen Pontius Pailat, ewe re Rom mi wiisen kepinaan Jutia. Jises ese nom ren pokiten a ina pwisin filian are pokiten an Pailat korato. Nge, a nom ikewe ie pun ekkewe sou emmwen lon ewe lamalamen Jus ra tipimwaal ngeni pwe i emon chon fofforingau me a fichiiti an epwe nninniilo.—Jon 18:29-31.

2. Met Jises a fori, iwe, met mwiriloon?

² Jises a silefichi pwe a wor nemenien Pailat fan iten an epwe angasalo are nnielo i. (Jon 19:10) Nge ena mettoch ese pinei i seni an epwe pwora le kapas ngeni Pailat ussun ewe Muu. Inaamwo ika Jises epwe tongeni nninniilo, nge a achocho le afalafal ngeni ena sou nemenem mi tekia seni meinisin lon ena leeni. Inaamwo ika Jises a afalafal ngeni, nge a kuna apwung me a nninniilo, iwe, a mmen watte an riaffou lupwen aramas ra chufolueta won efoch iraan nninni, nge a ina ussun pokiten an tipemecheresin tipeeu ngeni an epwe nninniilo fan iten minne a luku.—Mattu 27:24-26; Mark 15:15; Luk 23:24, 25; Jon 19:13-16.

Emon Chon Pwarata are Emon mi Nninniilo fan iten Minne a Luku (Martyr)?

3. Ifa weween ewe kapas “martyr” lon fansoun an we a mak Paipel, nge met weween lon ei fansoun?

³ Lon ei fansoun, chommong aramas ra ekieki pwe mi sokkongau emon mi nninniilo fan iten minne a luku. Fan chommong, aramas ra kan meefi pwe ekkan aramas mi filata pwe repwe nninniilo fan iten minne ra achifoua, nge akkaewin, minne ra luku lon ar kewe lamalam, ir furio are ir minen efeiengau ngeni aramas. Iwe nge, ewe kapas martyr a popu seni eu kapasen Kriik (marʹtys) mi wewe ngeni “chon pwarata” lon fansoun an we a mak ewe Paipel, weween, emon mi uwawu poraus mi enlet ussun minne a luku, nge eli epwe fis ena lon eu kapwung. Iwe, lo, lo ena kapas a wewe ngeni “emon mi fangolo manauan fan iten eu minen pwarata,” are pwal mwo nge an awora minen pwarata ren an fangolo manauan.

4. Jises akkaewin met sokkun martyr?

⁴ Jises akkaewin emon martyr lon ena aewin weween ena kapas. Ussun an a ereni Pailat, a feito pwe epwe “pwarata usun ewe enlet.” An kapasen pwarata a efisata memmeef mi sokkofesen lon aramas. Letipen ekkoch me lein ekkewe aramas kisikis a fokkun chung ren minne ra rong me kuna, iwe, ra luku Jises. (Jon 2:23; 8:30) Nge a lap me lein ekkewe pwin aramas me ekkewe sou emmwen lon pekin lamalam ar ra fokkun oput. Iei alon Jises ngeni mararin kewe, nge esap ir chon luku i: “Fonufan ese tongeni oput ami, nge a chok oput ngang, pun ngang ua pwarata usun ewe fonufan pwe an kewe fofor mi chok ingau.” (Jon 7:7) Pokiten an kapasen pwarata ussun minne mi enlet, Jises a kuna koputan seni ekkewe nouwisiin muun, iwe, a emmwen ngeni an nninniilo. A enlet pwe i “ewe chon pwarata mi tuppwel o enlet (marʹtys).”—Pwarata 3:14.

“Aramas Meinisin Repwe Oput Ami”

5. Le poputaan an we angangen afalafal, met Jises a apasa ussun chon eriaffou?

⁵ Sap minne Jises a chok kuna riaffou, nge a pwal ouroura noun kewe chon kaeo pwe epwe chok pwal ina ussur. Le poputaan an we angangen afalafal, iei alon Jises ngeni chon auseling ngeni an we Afalafal won ewe Chuuk: “Mi pwapwa ir mi kuna riaffou pokiten ar fori minne mi pwung, pun repwe alemwiri ewe muun lang. Mi pwapwa ami lupwen aramas repwe esiitakemi me eriaffoukemi me chofonata sokkun kapas mi ngau ussumi fan itei. Oupwe chengel me mwanek, pun liwinimi a lapalap lon lang.”—Mattu 5:10-12.

6. A ifa ussun an Jises ouroura ekkewe 12 aposel lupwen a tiniirelo?

⁶ Mwirin, lupwen Jises a tinalo ekkewe 12 aposel, iei alon ngeniir: “Nge oupwe tumunukemi seni aramas, pun repwe afangema ami ngeni chon pungupung, o repwe ninni ami lon ar kewe sinakok. Repwe pwal atekinikemilo mwen mesen kepina o pwal king pokitei, pwe oupwe pwarata ngenir me ekkewe re Jentail.” Nge sap minne ekkewe chok sou emmwen lon pekin lamalam repwe eriaffou ekkewe chon kaeo. Pwal iei alon Jises: “Pwin epwe afangema pwin ngeni malo, pwal seman noun; nge nour repwe u ngeni semer kewe me iner pwe repwe niirelo. Iwe, aramas meinisin repwe oput ami pokiten itei, nge are emon epwe likiitu tori sopolon, iwe, epwe manau.” (Mattu 10:17, 18, 21, 22) Uruwoon chon Kraist lon ewe aewin senturi a pwarata pwe mi enlet ena kapas.

Poraus mi Enlet Ussun Likiitu fan Tuppwol

7. Met popun Stifen a nninniilo?

⁷ Ekiselo mwirin maloon Jises, Stifen akkaemonun me lein chon Kraist mi nninniilo pokiten an pwarata minne mi enlet. Ena mwan a “ur ren chen me manaman, o a fori minen amwarar pwal esisin lapalap lein ekkewe aramas.” Ekkewe chon lamalam mi oput i “rese tongeni u ngeni an tipatchem me ewe Ngun a kakapas ren.” (Fofor 6:8, 10) Pokiten a kon watte ar lolowo, ra atekinalo Stifen ren ewe kapwung tekia an chon Jus itan Sanhedrin, iwe, a uta mwen mesen chon tipimwaal ngeni me a eani och afalafal mi fokkun manaman. Iwe nge, ekkena chon oputa Stifen ra nnielo ena chon pwarata mi tuppwol.—Fofor 7:59, 60.

8. Met ekkewe chon kaeo lon Jerusalem ra fori lupwen a poputa an aramas eriaffouur mwirin nninniiloon Stifen?

⁸ Mwirin nninniiloon Stifen, “ewe mwichefel lon Jerusalem a kuna riaffou mi fakkun lapalap, o ir meinisin ra chok kupetfesen lon fonuen Jutia me Sameria, nge ekkewe chok chon kuno ra nonnom.” (Fofor 8:1) Ena riaffou a ita aukatiu an chon Kraist angangen afalafal? Aapw, pun a mak pwe “ekkewe mi kupetfesen ra chok feilfetal o afalafala ewe kapas.” (Fofor 8:4) Ese mwaal meefier a ussun meefien ewe aposel Piter lupwen a apasa ei mettoch mesemwan: “Sipwe fakkun alleasochisi Kot lap seni aramas.” (Fofor 5:29) Inaamwo ika ra kuna riaffou, nge ekkena chon kaeo mi tuppwol me pwora ra likiitu lon ewe angangen pwarata minne mi enlet, inaamwo ika ra silei pwe minne ra fori epwe alapalo an aramas eriaffouur.—Fofor 11:19-21.

9. Met sokkun riaffou a sopwosopwolo ngeni noun Jises kewe chon kaeo?

⁹ A enlet pwe ese kisikisilo an aramas eriaffouur. Akkom, sia kuna pwe Saul—nge i ewe mwan mi atola me tipeeu ngeni nninniiloon Stifen—“a chuen ngasepwichiesini kapasen amosok o kapasen ninni usun noun ewe Samol kewe chon kaeo; o a feilo ren ewe samol-fel lapalap, a tingor pwe epwe makkei ekkoch taropwe ngeni ekkewe sinakok lon Tamaskos, pwe, are epwe kuna ekkoch mi aleni ewe Al, mwan are fefin, epwe fotekini ir o uweiireto Jerusalem.” (Fofor 9:1, 2) Iwe, orun ewe ier 44 C.E., “ewe king Erot a eitielo poun pwe epwe eriaffou ekkoch me lein chon ewe mwichefel. Iwe, a nielo Jemes, pwin Jon, ren katilas.”—Fofor 12:1, 2.

10. Porausen met sokkun riaffou a mak lon Fofor me Pwarata?

¹⁰ A mak lon lusun ewe puken Fofor och poraus esap tongeni molo, porausen ekkewe sossot, fotek, me riaffou ekkewe chon tuppwol ra likiitu fan, awewe chok ren Paul, ewe mi fen pin eriaffou chon Kraist me lom, iwe mwirin, a wiliiti emon aposel, nge neman i a nninniilo le poun ewe meilapen Rom itan Niro orun 65 C.E. (2 Korint 11:23-27; 2 Timoti 4:6-8) Iwe, lon ewe puken Pwarata, nge mi mak arap ngeni le sopwoloon ewe aewin senturi, sia kuna pwe ewe aposel mi chinnap itan Jon a fotek won ewe too Patmos “fan asengesin an Kot we kapas o an Jises Kraist we pwarata.” A pwal mak lon ena puken Pwarata och kapas ussun “Antipas, nei we chon pwarata mi tuppwel, atewe ra nielo” lon Perkamom.—Pwarata 1:9; 2:13.

11. Ifa ussun fofforun ekkewe popun chon Kraist a anneta pwe mi pwung alon Jises ussun an aramas eriaffouur?

¹¹ Ekkena poraus meinisin ra anneta pwungun alon Jises ei ngeni noun kewe chon kaeo: “Are ra eriaffouei, repwe pwal eriaffoukemi.” (Jon 15:20) Ekkewe popun chon Kraist mi tuppwol ra mmonleta ren ewe fansoun ar repwe kuna ewe sossot mi lap seni meinisin, sossotun malo—ren an aramas awateer, ren ar koturulong lein manmwocho, are ren mettoch ese lifilifil—ren ar repwe apwonueta wiiser ei me ren ewe Samol Jises Kraist: “Oupwe chon pwarata usi lon Jerusalem, lon Jutia me Sameria, o pwal lon unusen fonufan meinisin.”—Fofor 1:8.

12. Pwata an aramas eriaffou chon Kraist esap och chok porausen lom?

¹² Epwe mwaal an emon ekieki pwe ena sokkun fofforun eriaffou noun Jises kewe chon kaeo a chok fis lon ekkewe fansoun lom. Sia fen kuna pwe Paul a kuna chommong fansoun weires, nge iei makkeian: “Ir meinisin mi mochen manaueni ewe manau mi fich ngeni Kot lon Kraist Jises repwe kuna riaffou.” (2 Timoti 3:12) Iei alon Piter ussun an chon Kraist kuna riaffou: “Iei popun a fen korikemi, pwe Kraist a pwal kuna riaffou fan asengesimi, o a isetiu eu leenien appiru mwemi, pwe ami oupwe tapwelo mwirin lon ipwan.” (1 Piter 2:21) Tori ekkeei “ranin le sopwoloon” lon ei otot minen lom, noun Jiowa kewe aramas ra chuen kukkuna oput me riaffou seni aramas. (2 Timoti 3:1) Ekis meinisin won fonufan, Chon Pwarata Jiowa ra fen kuna riaffou fan nemenien ekkewe sokkopaten muu.

Pwata Aramas ra Oputer me Eriaffouur?

13. Noun Jiowa kewe chon angang lon ei fansoun repwe chechchemeni met ussun an aramas eriaffouur?

¹³ Inaamwo ika a lap me leich lon ei fansoun sise kan kuna minen eppetin ach afalafal me ach mwichfengen fan kinamwe, nge sipwe lefareni an Paipel we kapasen achechchem pwe “lapalapen ei fonufan mi sissiwil.” (1 Korint 7:31, NW) Nonnomuch epwe tongeni muttir siwil, ina minne, ika sise mmonleta lon ekiekich, letipach, me pwal lon pekin ngun, sipwe tongeni mecheresin turukapelo. Iwe, met sipwe tufichin fori ren ach sipwe tumunukich? Iei eu minen tumun mi fokkun pochokkul, an epwe wesewesen ffatoch lon ekiekich ewe popun chon Kraist ra kan kuna oput me riaffou, inaamwo ika ra tongei kinamwe me achocho le alleasochisi allukun muun.

14. Me ren Piter, ifa ewe popun aramas ra eriaffou chon Kraist?

¹⁴ Ewe aposel Piter a kapas ussun ena mettoch lon noun we aechoon taropwe, nge eli a makkei lefilen 62-64 C.E., lupwen chon Kraist lon unusen ewe Muun Rom ra kuna sossot me riaffou. Iei alon: “Ami mi achengicheng, ousap weitifengen ren sokkun riaffou mi feito remi usun chok ekkei pwe epwe sotunikemi, usun chok ita och mettoch mi fo a torikemi.” Ren an epwe awewei minne a ekieki, pwal iei alon Piter: “Nge oupwe tumunukemi pwe emon leimi ete kuna riaffou usun chok emon chon nielo aramas, are chon sola, are chon fori mi ingau, are chon etileepat. Nge are emon epwe kuna riaffou pokiten i emon Chon Kraist, iwe, esap sau ren, nge epwe chok alingalo Kot pokiten ei it.” Piter a affata pwe ra kuna riaffou pokiten ir chon Kraist, nge esap pokiten ar fori mettoch mi ngau. Ika ra fen kapachelong lon “ekkewe foffor mi fokkun ngau” ussun ekkewe aramas unukkur, ekkena aramas repwe pwapwaitiir me chiechi ngeniir. Nge a enlet pwe ra kuna riaffou pokiten ar achocho le akkapwonueta wiiser we, wiisen chon tapwelo mwirin Kraist. A pwal ina ussun chon Kraist mi enlet lon ei fansoun.—1 Piter 4:4, 12, 15, 16.

15. Ifa ussun an a sokkofesen minne aramas ra ekieki ussun Chon Pwarata Jiowa me minne ra fori ngeniir?

¹⁵ Lon chommong fonu, aramas ra apunga Chon Pwarata Jiowa ren ar angangfengen fan tipeeu lon ar kewe mwichelap me ar angangen kau leenien mwich me met kana, ren manauer mi wenechar me ar tinikken, ren limochun manauer me murinnoon ar kewe famili, me pwal mwo nge ren torotorochun ufer me sorosorochur. * Iwe nge, a pinepin ar angang lon ukuukun 28 fonu lon ewe atun an we a mak ei poraus, me chommong lein ekkewe Chon Pwarata ra kuna kawet me poutuloon pisekir are imwer pokiten minne ra luku. Pwata aramas ra apunger, iwe nge, ra pwal eriaffouur? Iwe, met popun Kot a mutata ena mettoch?

16. Ifa akkaewin ewe popun Kot a mut ngeni noun kewe aramas ar repwe kuna riaffou seni aramas?

¹⁶ Sipwe akkaewin chechchemeni alon An Salomon Fos 27:11: “Nei, kopwe tipachem o apwapwai lelukei, pwe upwe tongeni palueni atewe mi aitengauaei.” Iwe, ekkena mettoch ra fiffis pun seni lom lom, a wor ewe popun alongolongun kapwung fan iten io a wor an pwuung le nemeni mettoch meinisin. Inaamwo ika a wenewenen chuukuta ekkewe pisekin annet mi kawor me ren ir kewe mi pwarata ar tuppwol ngeni Jiowa lon ekkewe fitepuku ier ra lo, nge Setan ese ukutiu seni an turunufasei Jiowa ussun an we a fori lon fansoun an we a manau ewe mwan mi pwung itan Jop. (Hiop 1:9-11; 2:4, 5) Esor tipemwaramwar pwe a fen kon lapalo kitipopoon Setan fan iten saingoon an sotuni le pwarata pwe a pwung alon, pun iei a fen pappachu an Kot we Muu, iwe, a wor aramas mi tuppwol ngeni me chon tupunian won unusen fonufan. Chokana repwe tuppwol ngeni Kot ese lifilifil met sokkun minen eppet are mettoch mi weires epwe toriir? Ina eu kapas eis emon me emon noun Jiowa chon angang epwe pwisin polueni.—Pwarata 12:12, 17.

17. Ifa weween alon Jises lupwen a apasa pwe “iei fansoun ami oupwe pwarata”?

¹⁷ Lupwen Jises a kapas ngeni noun kewe chon kaeo ussun ekkewe mettoch epwe fis le atun “ewe sopwoloon ei otot minen lom,” a uwawu pwal eu popun Jiowa a mut ngeni noun kewe chon angang ar repwe kuna riaffou. Iei alon ngeniir: “Repwe walo ami mwen ekkewe king o ekkewe kepina pokiten itei. Nge iei fansoun ami oupwe pwarata.” (Mattu 24:3, 9; Luk 21:12, 13) Jises a wiisen chon pwarata mwen mesen Erot me Pontius Pailat. Paul a pwal kekilo mwen “ekkewe king me kepina.” Fan an ewe Samol Jises Kraist emmwen, Paul a sotun uwawu kapasen pwarata ngeni ewe sou nemenem mi pochokkul seni meinisin lon ena fansoun lupwen a apasa pwe “Upwe pwisin tingor ngeni Sisar.” (Fofor 23:11; 25:8-12) Pwal ussun chok lon ei fansoun, fan chommong ekkewe fansoun weires ra fen efisata kapasen pwarata mi murinno ngeni ekkan nouwiis are sokkun aramas meinisin ese lifilifil. *

18, 19. (a) Ifa ussun ach likiitu fan sossot epwe efeiochukich? (b) Ikkefa ekkewe kapas eis sipwe kaeo ussun lon ena eu lesen mwirin ei?

¹⁸ Iwe saingoon, ach likiitu fan sossot me riaffou epwe tongeni efeiochukich. Ifa ussun? Ewe chon kaeo Jemes a achchema ngeni chienan kewe chon Kraist ussun ei mettoch: “Ami pwii kena, oupwe ekieki pwe minen pwapwa enlet fansoun ekkewe sosot mesemesekkis epwe torikemi, pun oua sinei pwe sosotun ami luku epwe efisata ami likiitu.” Ewer, riaffou epwe tongeni amurinnolo ach luku me apochokkula ach likiitu. Ina minne, sise kan niueiti riaffou, me sise kan sotun su seni are aukatiu riaffou ren ach fori och mettoch ese tipeeu ngeni Paipel. Nge sia kan alleasochisi an Jemes ei fon: “Iwe, likiitu epwe unusochulo lon ami manau, pwe oupwe unusoch o iteuoch, o manauemi esap osupwang ren och mettoch.”—Jemes 1:2-4.

¹⁹ Inaamwo ika an Kot we Kapas a akkalisikich le weweiti ewe popun noun Kot kewe chon angang mi tuppwol ra kan kuna riaffou me ewe popun Jiowa a mutata ena mettoch, nge sap minne a mecheres ach sipwe likiitu fan riaffou. Met epwe tongeni apochokkulakich pwe sipwe likiitu fan? Met sipwe tongeni fori ika aramas repwe eriaffoukich? Sipwe kaeo ussun ekkena mettoch mi lamot lon ena eu lesen mwirin ei.

[Ekkewe pwóróus fan]

^ Pi Ewe Leenien Mas, minen December 15, 1995, pekin taropwe 27-9; April 15, 1994, pekin taropwe 16-17; me Awake!, minen December 22, 1993, pekin taropwe 6-13.

^ Pi Awake!, minen January 8, 2003, pekin taropwe 3-11.

En Mi Tongeni Awewei?

• Jises akkaewin emon martyr fan iten an epwe fet?

• A fet chon Kraist lon ewe aewin senturi lupwen aramas ra eriaffouur?

• Ussun Piter a awewei, pwata aramas ra eriaffou ekkewe popun chon Kraist?

• Ikkefa ekkewe popun Jiowa a mutata an aramas eriaffou noun kewe chon angang?

[Ekkewe Kapas Eis fan Iten ewe Lesen]