Ewe Paipel A Tongeni Alisata Om Pupulu

PUPULU​—ren ekkoch, ewe kapas a efisi ar ekiek mi apwapwa. Nge ren pwal ekkoch, a efisi letipechou. Emon fefin a era: “Ua meefi touau seni puluei we lon pekin memeef ussun ita nge am mi mufesen. Fansoun meinisin, ua meefi ppos me alaemon chok nge meit ika am mi chuen pupulufengen.”

Met a efisata touaufesenin ruuemon mi pin pwonetiu pwe repwe tongfengen lefiler me achenifengennir? Iei eu mettoch, nafangauen ar weweiti met a kapachelong lon pupulu. Emon sou mak lon pekin safei a apasa: “Aramas ra pupulu, nge rese fokkun kaeo ussun me mwan.”

Pwungun ewe poraus pwe chokisikis chok ra eani ena sokkun sile a pwalo lon eu kaeo ren The National Marriage Project, minen ewe Rutgers University lon New Jersey, U.S.A. Emon meilapen ewe kaeo a makkei: “Chommong aramas lon ei kaeo ra mammaarita lon eu famili, ikewe ie semer kkewe me iner rese pwapwa lon ar pupulufengen are ra fen mufesen. Ra fokkun sileifichi lapalapen eu pupulu mi sopwongau, nge rese silei ifa lapalapen eu pupulu mi murinno. Ekkoch ra chok apasa pwe eu pupulu mi murinno, ina epwe ‘mwaalfesen me an semei kkewe me inei pupulu.’”

Nge ifa ussun ekkewe Chon Kraist, achiou pwe esor wor osukosuk lon ar kkewe pupulu? Aapw. Pwungun pwe a lamot ngeni ekkoch chon Kraist lon ewe aeuin senturi ei kapasen fon, a era, “kosap kutta om kopwe mu seni” om pupulu. (1 Korint 7:27) A ffat pwe lon iteiten pupulu meinisin lefilen ruuemon aramas rese unusoch, epwe fisita osukosuk fan ekkoch, nge a kawor alillis. Ekkewe mwan me puluwer repwe tongeni amurinnolo ar pacheochfengen ren ar repwe apwonueta ekkewe popun alongolongun alluk lon ewe Paipel.

Pwungun, sap minne ewe Paipel eu puk mi for fan iten chok an epwe alisata pupulu. Iwe nge, pokiten a mak fan emmwenien ewe Emon mi poputani pupulu, sipwe tongeni luku pwe an kewe popun alongolongun alluk repwe alisikich. Ren ewe soufos Aisea, Jiowa Kot a apasa: “Ngang ewe Samol mi Lapalap om we Kot. Ua aiti ngonuk mine kopwe feioch ren, ua pwal emweni ngonuk ewe al kopwe fetal won. Amwo kopwe auselinga ai kewe alluk! Murin om kinamwe epwe wewe ngeni eu chanpupu, nge om pwung epwe wewe ngeni nomongun lematau.”​—Aisea 48:17, 18.

A fen poputa le kukkunutiu ewe tong lefilemi me puluwom we? En mi meefi pwe ka kalapus lon eu pupulu ese chuen wor tong lon? Emon fefin mi pupulu 26 ier a apasa: “Use tongeni awewei ukukun watten metekin letipei ei sokkun pupulu a efisata. A chok cheuch fansoun meinisin.” Iwe, ese och om kopwe chok mokurechou fan ei sokkun pupulu ese pwakini om osupwang, iwe, pwata kese achocho le fori och? Ewe poraus mwirin ei epwe aiti ngeni ekkewe mwan pupulu me ekkewe fin pupulu ifa ussun ekkewe kapasen emmwen lon Paipel repwe tongeni alisata ar pupulu lon eu chok kinikin mi auchea​—ar pwonfengen.