Fansoun an Epwe Wesewesen Pwonuta

Pwon Meinisin

U RUWOON aramas a ur ren pwonomwakken. Fan chommong ekkan muu rese apwonueta ekkewe atipeeu ra fen sainei fan iten ar resap maun, iwe, ra emmwen ngeni nour kewe aramas ekkan maun mi fokkun aniuokkus. Iei alon Napoleon: “Ekkewe muu ra apwonueta ar kewe pwon fan chok erian, are lupwen repwe tongeni kuna och feioch seni.”

Nge ifa ussun ekkan pwon seni aramas? A ifa me watteen ach lichipung lupwen emon ese apwonueta an pwon ngenikich! A akkaewin enlet ena ika sia silei me luku emonna. Pwungun pwe eli aramas resap tufichin apwonueta ar kewe pwon are resap mochen apwonueta.

A fet watte sokkofesenin an aramas kewe pwon me an Kot kewe! An Kot kewe pwon ra unusen wenechar me nukunukoch. Repwe wesewesen pwonuta. Aisea 55:11 a weneiti an Kot we kapas mi nukuchar, iwe, iei alon: “Iei usun ai kapas esap liwinto rei fan pon, pwe epwe afisata mine ua tipeni o apwonueta mine ua akunou ngeni.”

Iwe, epwe fet ach ekiek ussun an Kot kewe pwon mi mak lon ewe Paipel? Sipwe tongeni wesewesen lukuur. Ren chok awewe, iei makkeien ewe aposel Jon: “Nengeni, ewe imwen Kot a nom ren aramas. Pwisin i epwe nonnom rer, o ir repwe noun aramas, o Kot epwe pwisin nonnom rer. I epwe tolu seni meser chonun meser meinisin, o esap chuen wor kechiu, are akurang, are metek, pun ekkewe mettochun lom ra fen morelo.” (Pwarata 21:3, 4) Kopwe tongeni pwapwaesini ekkena feioch ika fofforum epwe tipeeu ngeni alon Jises ei: “Iei weween manau esemuch, ar kakkaeo pwe repwe silei en, ewe emon chok Kot mi enlet, me ewe emon ka akunoulo, Jises Kraist.”​—Jon 17:3.