Ifa Ussun Kopwe Apochokkulata Om Pupulu

A NCHANGEI mwo eu imw mi ta pokiten tumunungauen chon ewe imw. Ewe penit a morelo, a ngau osun we, me rese pwal otot lukun. Ese mwaal, ei imw a ngangauelo ren ekkoch molumol mi fen fis lon ekkewe ier ra lo, me an chon ewe imw tumunungaua. Iwe met, ita repwe chok ataielo? Eni, aapw. Ika a pochokkul longolongun me uren ewe imw, eni epwe tufich ar repwe forisefalli.

Lapalapengauen ewe imw a achema ngonuk ussun om pupulu? Eni ren fitu ier ekkewe molumol, lon kapas awewe, a kku ami ririin pupulu. Eni emon leimi are fen ami me ruuemon oua ekis tumunungaua pochokkulen ami pupulufengen. Eni ka eani meefien Sandy. Mwirin 15 ierin pupulu, a apasa: “Esor och lefilem, chilon chok, am mi pupulufengen. Iwe, ese naf.”

Inaamwo ika a ikina ussun om pupulu, nge kesap muttir ekieki pwe oupwele wes. Eni epwe tufich ami oupwe forisefalli ami pupulu. Nge epwe alongolong won ifa ukukun watten ami mochen apwonueta ami pwonfengen lefilemi me amwochu ami pupulufengen. Ami akkachocho ngeni fengen me ami wesewesen mochen epwe tongeni alukuchara ewe pupulu lon ekkewe fansoun weires. Nge met weween ami pwonfengen? Iwe, ifa ussun ewe Paipel epwe tongeni apochokkulata ena pwonfengen?

Pwonfengen A Pwal Wewe ngeni Pwonuetaan Wisach

Pwonfengen a wewe ngeni ach sipwe nguuri eu wis. Fan ekkoch, ewe kapas a weneiti och pwon lefilen aramas lukun pupulu, awewe chok, eu atipeeu lon pekin sopai.

Inaamwo ika ewe mettoch pupulu esap ussun chok eu atipeeu lon pekin sopai, ikewe ie esap kapachelong ach kkewe memeef, nge mei chuen wor lamoten ach sipwe apwonueta wisach. Ese mwaal, ami me puluom we oua fen pwonfengen mwen mesen Kot me aramas pwe oupwe nonnomfengen, ese lifilifil met epwe fis. Jises a apasa: “Ewe Chon Fori aramas me le popun a fori mwan me fefin, o a apasa, ‘Iei minne, emon mwan epwe likitalo seman me inan o epwe pacha ngeni puluan.’” Iwe, Jises a pwal apasa: “Iwe, minne Kot a apachafengenni, aramas resap aimufeseni.” (Mattu 19:4-6) Ina minne, lupwen epwe piita och osukosuk, ami me puluom we oupwe lukuchar lon ami achocho le apwonueta  ewe pwonfengen lefilemi. * Emon fefin a apasa: “Mwirin chok am ause chuen ekiekin mufesen, a poputa le murinnolo lapalapen am pupulu.”

Iwe nge, epwe kapachelong lon ewe mettoch pwonfengen lon pupulu och mettoch mi lamot lukun ach sipwe chok apwonueta wisach. Iwe, met ena?

Angangfengen

Pwonfengen lon pupulu ese wewe ngeni pwe esap wor tipefesen lefiler. Lupwen epwe fis tipefesen, epwe lamot repwe fokkun mochen pwakini ewe osukosuk. Jises a apasa ussun ewe mwan me puluan we: “Resap chuen ruemon pwe emon chok.”

Met weween om kopwe “emon chok” me puluwom we? Ewe aposel Paul a makkei pwe “iei usun ren mwan, pwe repwe tongei puluer usun chok pwisin inisir.” (Efisus 5:28, 29) Iwe, ami oupwe “emon chok” a wewe ngeni pwe kopwe tumunufichi manauen puluwom we ussun chok pwisin manauom.

Ekkoch chon pupulu mi pwapwangau ra nonnomfengen fan iten chok nour kewe are tufichin manauer lon pekin moni. Inaamwo ika a murinno ar repwe nonnomfengen, nge chechemeni pwe oupwe achocho ngeni an epwe wor ami pacheochfengen lon tong, nge sap chok ami nonnomfengen.

Foffor mi Pennukuolo Pwisin Ach kkewe Mochen

Lon ewe sokkun pupulu mi sopwoch me apwapwa, ewe mwan me fefin repwe pennukuolo pwisin letiper fan iten ar repwe foffori minne epwe murinno ngeni puluwer we. Ifa ussun kopwe tongeni pwarata ena sokkun ekiek? Ese pwung om kopwe eani ei sokkun kapas eis lon lelukom, ‘Met ngang upwe tongeni angei seni ei ririfengen?’ nge epwe fen och om kopwe pwisin eisinuk, ‘Met ngang won inisi ua foffori fan iten ai upwe apochokkula ai pupulu?’ Atittina om kewe foffor lon ewe wiik a fen lo. Fan fite ka eani eu fofforun kirokiroch fan iten chok puluom we? Lupwen puluom we a mochen porausfengen, en mi akkauseling​—nge meit ika kese kon lien mochen? Fitu minen apwapwa oua forfengenni pun a apwapwai letipen puluwom we inaamwo ika kese kon lien pwapwaiti?

Om eani ena esin foffor epwe apochokkula ami ririin pupulu pun epwe pwarata pwe ka aucheani om pupulu me mochen an epwe likiitu.

Eani Ewe Ekiek Pwe Epwe Likiitu Om Pupulu

A lamot ngeni Jiowa ewe lapalap itan tuppwol. Enlet, ewe Paipel a apasa: “Ka allukuluk ngeni ir mi allukuluk.” (2 Samuel 22:26) Ach sipwe tuppwol ngeni Kot epwe pwal wewe ngeni ach sipwe tuppwol ngeni ewe kokkotun pupulu a poputani.​—Keneses 2:24.

Ika ami me puluom we oua tuppwolfengen, oupwe meefi lukulukoch pwe ami pupulu epwe likiitu. Lupwen oupwe anchangei ussun ekkewe maram me ier lon mwach kkan, oupwe kuna pwe ami oupwe chok nonnomfengen.

Lon om we ranin apupulu, ka eani eu pwon ngeni emon mi manau​—puluwom we. A enlet pwe ena mettoch epwe wesewesen kku ekiekum me fofforum, pwe en emon chon pupulu. Kese tipeeu pwe kopwe mochen nonnom ren puluom we, esap pokiten chok ka wesewesen luku pwe ewe kokkotun pupulu mi fel nge pwal pokiten ka tongei ewe emon ka pulueni?

[Pwóróus fan]

[Pwoor lon pekin taropwe 5]

Lon Pupulu, Epwe Kapachelong lon Ami Pwonfengen . . .

● Lamoten Om Kopwe Apwonueta Wisom “Kopwe apwonueta mine ka pwon. A murina om kosap pwon, lap seni om kopwe pwon, nge kosap apwonueta.”​—Än Salomon Afalafal 5:4, 5.

● Angangfengen “Ruoman ra feioch seni eman chok . . . Pun lupwen eman a turula, chienan epwe apwatai.”​—Än Salomon Afalafal 4:9, 10.

● Pennukuolo Pwisin Letipach “Pwapwaan liffang mi lap seni pwapwaan angei.”​—Foffor 20:35.

● Ekieki Ussun Mwach Kkan “Tong . . . a likiitu fan mettoch meinisin.”​—1 Korint 13:4, 7.