Pwata Sipwe Ikkiotek Iteitan?

“Oupwe ikkiotek. Oupwe kilisou fansoun meinisin.”​—1 TESALONIKA 5:17, 18, New World Translation.

1, 2. Ifa ussun Taniel a pwarata pwe a aucheani iotek, me ifa ussun an a kku an riri ngeni Kot?

 EWE soufos Taniel a eoreni an epwe iotek ngeni Kot fan ulungat iteiten ran. Epwe fotopukutiu ren ewe asamocho lon eu rumw asan mi sap ngeni ewe telinimwen Jerusalem, iwe, epwe kan iotek. (1 Kings 8:46-49; Taniel 6:10) Pwal mwo nge lupwen a katou allukun ewe king mi pinei an aramas iotek ngeni emon lukun Tarius, ewe Kingen Mitia, nge Taniel ese ekiekin ukutiu seni an ikkiotek. Ese lifilifil ika epwe feiengau are esap, nge ena mwan mi eoreni iotek a ikkiotek ngeni Jiowa iteitan.

² Met ekiekin Jiowa ussun Taniel? Lupwen ewe chonlang Kapriel a feitiu pwe epwe polueni eu me lein an Taniel kewe iotek, a apasa pwe i “mi fokkun achengicheng me ren,” are “fokkun chen me ren.” (Taniel 9:20-23) Lon an Isikiel we oesini, Jiowa a apasa pwe Taniel, i emon mwan mi pwung. (Isikiel 14:14, 20) Lon anein manauan, an Taniel kewe iotek a efisata an ririoch ngeni an Kot, iwe, Tarius a pwal esinna ena mettoch.​—Taniel 6:16.

3. Ussun an a pwalo ren kunaen emon misineri, ifa ussun iotek epwe tongeni alisikich le akkamwochu ach tuppwol?

³ Ach ikkiotek iteitan epwe pwal tongeni alisikich le uppwos fan sossot. Awewe chok, ekieki mwo ussun Harold King, emon misineri lon Saini, a kalapus nimu ier nge a alaemon chok lon an we leenien fotek. Iwe, Brother King a apasa ussun minne a fis ngeni: “Inaamwo ika ua imufesen seni chienei kewe, nge esor emon epwe tongeni aimufeseniei seni Kot . . . Iwe, fan mesen chokewe mi fetalelo lukun ai we leenien fotek, ua fotopukutiu fan ulungat iteiten ran, iwe, ua ikkiotek me chechemeni  Taniel, atewe ewe Paipel a kapas ussun. . . . A ussun ita nge lon ekkena fansoun, an Kot we ngun a emmweni ai ekiek ngeni ekkewe poraus mi murinno me akinamwei letipei. Met ren watten ewe pochokkul lon pekin luku me aururuun letipei iotek a atoto ngeniei!”

4. Ikkefa ekkewe kapas eis ussun ewe mettoch iotek sipwe kaeo lon ei lesen?

⁴ Ewe Paipel a apasa: “Ousap ukutiu seni iotek. Oupwe kilisou fansoun meinisin.” (1 Tesalonika 5:17, 18) Pokiten ei kapasen fon, sipwe ekieki ussun ekkeei kapas eis: “Pwata sipwe ekieki ussun lapalapochun ach kewe iotek me fan fite sipwe iotek? Ikkefa ekkewe popun sipwe arap ngeni Jiowa iteitan? Iwe, met sipwe fori ika sia meefi pwe ese fich ach sipwe iotek ngeni Kot pokiten ach kkewe apwangapwang?

Amarata Chiechifengen Ren Iotek

5. Ifa ewe chiechi mi sokkolo aucheaan iotek a kan alisikich ach sipwe pwapwaiti?

⁵ Kopwe mochen pwe Jiowa epwe meefi pwe en emon chiechian? A ina ussun an a fos ussun Eperiam. (Aisea 41:8; Jemes 2:23) Jiowa a mochen ach sipwe amarata ena sokkun ririoch ngeni i. A pwal mwo nge etiwakich ach sipwe arap ngeni. (Jemes 4:8) Ena kapasen etiwatiw ese amwokutukich ach sipwe ekiekifichi ussun ewe mettoch iotek mi sokkolo aucheaan lap seni meinisin? A fokkun weires ach sipwe fori eu appointment pwe sipwe fos ngeni emon meilapen muu, are fen weires seni ena, ach sipwe chiechi ngeni! Iwe nge, ewe Chon Forata mettoch meinisin a peseikich ach sipwe arap ngeni lon iotek iteiten fansoun sia mochen are fansoun a lamot ngenikich. (Kol Fel 37:5) Ach ikkiotek epwe alisikich ach sipwe ririoch ngeni Jiowa.

6. Ifa ewe lesen an Jises we leenien appiru a aiti ngenikich ussun lamoten ach sipwe “ikkiotek”?

⁶ Iwe nge, a fokkun mecheres ach sipwe likitalo iotek! Aurekin manauach iteiten ran epwe tongeni aosukosukakich pwe sisap kan foffos ngeni Kot. Jises a pesei noun kewe chon kaeo ar repwe “ikkiotek,” iwe, pwisin i a foffori ena. (Mattu 24:41, NW) Inaamwo ika a kan angang weires seni lesosor tori lepwin, nge a kan akkaea fansoun pwe epwe fos ngeni Seman we lon lang. Fan ekkoch, Jises a pwata “unumweiran, lupwen esaamo ranilo,” fan iten an epwe iotek. (Mark 1:35) Lon pwal ekkoch fansoun, a alaemonulo lepwin pwe epwe kapas ngeni Jiowa. (Mattu 14:23) Jises a kan akkota fansoun pwe epwe ikkiotek, iwe, epwe murinno ach sipwe pwal fori ussun chok.​—1 Piter 2:21.

7. Ikkefa ekkewe lapalap lon manauach epwe tongeni amwokutukich ach sipwe foffos ngeni Semach we lon lang iteiten ran?

 ⁷ Mei wor chommong fansoun fich ach sipwe pwisin iotek lon eu me eu ran lupwen sipwe kuna osukosuk, sossot, me kefil. (Efisus 6:18) Lupwen sipwe kutta an Kot emmwen lon iteiten kinikinin manauach, epwe mammarita ach chiechi ngeni i. Lupwen ruuemon chiechi repwe angangfengen won ar kkewe osukosuk, ese pochokkuleta ririin ar chiechifengen? (An Salomon Fos 17:17) Iwe, epwe pwal pochokkuleta ach ririfengen me Jiowa lupwen sipwe lukuluk won Jiowa me pwisin kuna an alillis.​—2 Kronika 14:11.

8. Seni porausen Nehemaia, Jises, me Hana, met sia weweiti ussun ttamen ach kewe iotek?

⁸ Sipwe fokkun pwapwa pwe Kot ese aukuku ttamen ewe fansoun me fan fite sipwe tongeni fos ngeni lon iotek! Nehemaia a muttir iotek lon letipan me mwen an epwe tingorei ewe kingen Persia. (Nehemaia 2:4, 5) Jises a pwal eani eu iotek mi mwochomwoch atun a tingorei Jiowa an epwe awora ngeni ewe manaman pwe epwe amanauasefallita Lasares. (Jon 11:41, 42) Iwe nge, Hana, a “sopwela le iotek” lupwen a siongau ngeni. (1 Samuel 1:12, 15, 16) Pwisin ach kewe iotek repwe tongeni mwoch are ttam me ren ukukun watten ach osupwang me pwal lapalapen nonnomuch.

9. Pwata epwe kapachelong lon ach kewe iotek ach kilisou me ach mwareiti Jiowa ren mettoch meinisin a foffori fan asengesich?

⁹ Chommong iotek lon ewe Paipel ra pwarata kilisou ren wisen Jiowa mi unusen tekia me pwal an kewe foffor mi amwarar. (Ekistos 15:1-19; 1 Kronika 16:7-36; Kol Fel 145) Lon eu langepwi, ewe aposel Jon a kuna 24 elter​—iteiten ekkewe chon Kraist mi kepit lon leenier lon lang​—mi mwareiti Jiowa, iwe, ra apasa: “Mi fich ngonuk, ach Samol o ach Kot, pwe kopwe angei ling o iteuoch o manaman, pun ka fen forata mettoch meinisin, o mettoch meinisin a fis o a nom ren letipom.” (Pwarata 4:10, 11) A pwal wor popun ach sipwe mwareiti ewe Chon Forata mettoch meinisin iteitan. Ekkewe sam me in repwe fokkun pwapwa lupwen nour we epwe apasa an kilisou seni lon letipan pokiten ar fori och mettoch fan asengesin! Ach aucheani an Jiowa kkewe fofforun kirokiroch me ach pwarata enletin ach kilisou epwe amurinnolo lapalapen ach kewe iotek.

“Ousap Ukutiu seni Iotek”​—Pwata?

10. Ifa wisen iotek lon ach apochokkulata ach luku?

¹⁰ A lamot ngeni ach luku ach sipwe ikkiotek iteitan. Mwirin an eani eu kapas monomon ussun lamoten ar repwe “fakkun iotek,  o resap ukutiu seni,” Jises a eis: “Nge ifa usun ewe Noun-Aramas, epwe kuna luku won fonufan, lupwen an epwe waroto?” (Luk 18:1-8) Iotek seni lon ewe letip epwe amarata luku. Lupwen ewe semelap Eperiam a fen chinnapelo nge esaamwo nounou, a fos ngeni Kot ussun. Lon an polueni, Jiowa a akkom ereni an epwe neta lang me alleani ekkewe fu, ika a tufich ngeni. Iwe mwirin, Kot a alukuluku ngeni Eperiam: “Iei ussun mwirimwirum kana repwe chommong.” Ifa mwiriloon? Eperiam a “luku ewe Samol mi Lapalap o kuna pwung me ren Kot pokiten an lukuluk.” (Keneses 15:5, 6) Ika sipwe suuki letipach ngeni Jiowa lon iotek, nguuri an kewe kapasen alukuluk lon ewe Paipel, me alleasochisi i, iwe, epwe apochokkulata ach luku.

11. Ifa ussun iotek epwe tongeni alisikich le pwakini ach kewe osukosuk?

¹¹ Iotek epwe pwal tongeni alisikich ach sipwe pwakini ach kewe osukosuk. Mei wor osukosuk watte lon manauom me a weires lapalapan? Ewe Paipel a erenikich: “Kopwe chok likiti ngeni ewe Samol osom we, o epwe amwochuk; esap mut ngeni emon pwe epwe amwokutu ekkewe aramas mi pung.” (Kol Fel 55:22) Lupwen a fokkun chou minne sipwe filata, sipwe tongeni appiru an Jises we pisekin nengeni. Unusen eu pwin a alaemonulo le iotek me mwen an epwe seikata noun kewe 12 aposel. (Luk 6:12-16) Iwe, lon ewe pwinin me mwen an epwe malo, Jises a kon achocho le iotek pwe “pwichin a suputiu won pwul, usun chok supusupun cha mi lap.” (Luk 22:44) Ifa mwiriloon? “Kot a auselinga i pokiten an menniniti i.” (Ipru 5:7) Ach kewe tingormau repwe alisikich le mokurechou fan osukosuk watte me sossot weires.

12. Ifa ussun ewe alen iotek a pwarata pwe Jiowa a tongeikich?

¹² Iei pwal eu popun sipwe arap ngeni Jiowa ren ach ikkiotek ngeni, pun I epwe pwal arap ngenikich. (Jemes 4:8) Lupwen sipwe suuki letipach ngeni Jiowa lon iotek, sise kan meefi pwe a lolileniesini ach kkewe osupwang me a tongeikich? Sipwe en me pwisin kuna an Kot chen. Jiowa ese awisa ngeni pwal emon an epwe auseling ngeni eu me eu iotekin noun kewe chon angang, ussun Semer we lon lang. (Kol Fel 66:19, 20; Luk 11:2) Iwe, a pwal etiwakich ach sipwe ‘likiti ngeni i ach kewe aurek meinisin, pun a tongeikich.’​—1 Piter 5:6, 7.

13, 14. Ikkefa ekkewe popun sipwe ikkiotek iteitan?

¹³ Iotek epwe tongeni efisi watteloon ach tinikken lon ewe angangen afalafal me apochokkulakich  lupwen sipwe ekiekin ukutiu pokiten an aramas tenechepwak. (Foffor 4:23-31) Iotek epwe pwal tongeni tumunukich seni “ekkewe tipatchem-sola an ewe tefil.” (Efisus 6:11, 17, 18) Lupwen epwe weires ach sipwe pwakini ekkewe osukosuken ran me ran, sipwe tongeni tittingorei Kot an epwe apochokkulakich. A kapachelong lon ewe iotekin ach Samol Jises ewe tingor pwe Jiowa epwe “angasakichelo seni ewe mi ingau,” Satan, ewe Tefil.​—Mattu 6:13, NW.

¹⁴ Ika sipwe ikkiotek fan iten alillis pwe sipwe nemenifichi ach mecheresin foffori minne mi mwaal, sipwe kuna an Jiowa alillis ngenikich. Sia eani ei kapasen alukuluk: “Kot mi tuppwel, o esap mut ngenikemi sokkun sossot mi lap seni ami tufich, nge ren ekkewe sossot, epwe forata alen angasakemilo, pwe oupwe tongeni pworacho ngeni.” (1 Korint 10:13) Ewe aposel Paul a pwisin kuna an Jiowa alillis lon chommong sokkopaten lapalapen manauan. A apasa: “Ngang mi tufich ren mettoch meinisin lon ewe emon mi apochokkulaei.”​—Filipai 4:13; 2 Korint 11:23-29.

Ikkiotek Inaamwo Ika A Wor Ach kewe Apwangapwang

15. Met epwe tongeni fis lupwen ach kewe foffor rese tipeeu ngeni an Kot kkewe alluk?

¹⁵ Ren an Kot epwe auseling ngeni ach kewe iotek, epwe lamot ach sisap tunalo ewe kapasen fon lon an Kot we Kapas. Ewe aposel Jon a makkei, “Minne sipwe tingor, sipwe angei me ren, pun sia alleasochisi an kewe alluk, o forata minne epwe pwapwa ren.” (1 Jon 3:22) Nge met epwe tongeni fis lupwen ach foffor ese tipeeu ngeni minne Kot epwe kutta senikich? Atam me If ra okop mwirin ar we ra tipis lon ewe malamalen Ichen. Eni kich mi pwal mochen opelo “seni mesen Jiowa” me ukkutiu seni ach sipwe iotek. (Keneses 3:8) Klaus, emon elter mi saifetal mi lipwakoch, a apasa, “Ua kuna pwe arapakan iteiten fansoun meinisin, iei ewe aeuin foffor-mwaal ekkewe mi riki seni Jiowa me an we mwicheich ra fori, ra ukkutiu seni ar ikkiotek.” (Ipru 2:1) A ina ussun José Ángel. A apasa: “Ukukun arapakan wanu ier, use kon lien ikkiotek ngeni Jiowa. Ua meefi pwe ese fich ngeniei ai upwe fos ngeni, inaamwo ika ua chuen meefi pwe I Semei we lon lang.”

16, 17. Eani ekkoch poraus mi pwarata ifa ussun ikkiotek epwe tongeni alisikich le pwakini apwangapwang lon pekin ngun.

¹⁶ Eni ekkoch leich sia meefi pwe ese fich ngenikich ach sipwe ikkiotek pokiten ach apwangapwang lon pekin ngun are pokiten ach turutiu lon och foffor-mwaal. Nge ina ewe fansoun fich ach sipwe kutta alillis ren iotek. Sona a su seni wisan we. Nge ‘lon an riaffou a kori Jiowa, iwe, A polueni i. Seni lon luken Seol, Sona a kokko ren alillis, iwe, Jiowa a rongorong leuwan.’ (Sona 2:2) Jona a iotek, Jiowa a polueni an iotek, me Sona a pochokkulsefal lon pekin ngun.

¹⁷ José Ángel a pwal ikkiotek fan iten alillis. A chechemeni: “Ua suuki letipei me tingormau pwe epwe omusaeilo. Iwe, a enletin alisiei. Use luku pwe upwe tongeni liwiniiti ewe enlet ika esap ren alillisin iotek. Iei, ua kan ikkiotek iteiten ran, iwe, ua pwal pwapwaesini ekkena fansoun.” Epwe murinno ach sipwe meefi pwe sipwe tufichin foffos ngeni Kot ussun ach kewe foffor-mwaal me pwal tipetekison le tingorei i an epwe omusalo tipisich. Lupwen King Tafit a pwarata an kkewe tipis, Jiowa a omusalo tipisin kkewe. (Kol Fel 32:3-5) Jiowa a mochen alisikich, nge sap apwungungauakich. (1 Jon 3:19, 20) Iwe, iotekin ekkewe elter lon ewe  mwichefel repwe tongeni alisikich lon pekin luku, pun “a manaman” ar kewe iotek.​—Jemes 5:13-16.

18. Met noun Kot kewe chon angang repwe tongeni lukuluku, ese lifilifil ifa ukukun touauen ar rikilo?

¹⁸ Menni sam esap alisi noun we at mi kutta alillis me kapasen emmwen seni i mwirin an a foffor-mwaal? Ewe kapas monomon ussun ewe at mi mwalechelo a pwarata pwe ese lifilifil ifa ukukun touauen ach rikilo, nge Semach we lon lang epwe pwapwa lupwen sipwe liwinsefalliti. (Luk 15:21, 22, 32) Jiowa a pesei meinisin ekkewe mi rikilo ar repwe kokko ngeni i, “pun a muttir le omusala tipis.” (Aisea 55:6, 7) Inaamwo ika Tafit a fori ekkoch tipis watte, nge a kokko ngeni Jiowa, iwe, a apasa: “Kot, kopwe chok auseling ai iotek, o kosap pwisin opelo seni ai ei iotekin tingor!” Iwe, a pwal apasa: “Lekuniol o lesesor o leolowas, ua chok apasata ai kewe riaffou o ua ngungures, iwe, epwe rong leuwei.” (Kol Fel 55:1, 17) A fokkun alukuluku pwe epwe pwal auseling ngenikich.

19. Pwata sisap meefi pwe pokiten ussun ita nge ese polu ekkoch iotek, weween, Kot ese achenikich?

¹⁹ Met sipwe fori ika ese muttir polu ach we tingor? Iwe, epwe lamot ach sipwe pii ika ach tingor a tipeeu ngeni letipen Jiowa me sia eani fan iten Jises. (Jon 16:23; 1 Jon 5:14) Ewe chon kaeo Jemes a kapas ussun ekkoch chon Kraist ese polu ar kewe iotek pun ra “tingormwal.” (Jemes 4:3) Iwe nge, sisap muttir ekieki pwe pokiten ese muttir polu ach kewe iotek, weween, Kot ese pwapwa rech. Fan ekkoch Jiowa epwe mut ngeni noun kkewe chon fel mi tuppwol ar repwe ikkiotek ussun ar osukosuk ren och fansoun me mwen an epwe polueni. Jises a apasa: “Oupwe titingorei, o epwe ngenikemi.” (Mattu 7:7) Ina minne, a lamot ach sipwe “ikkiotek.”​—Rom 12:12.

Iotek Iteitan

20, 21. (a) Pwata a lamot ach sipwe ikkiotek lon ekkeei “ranin le sopolon”? (b)  Met sipwe kuna lupwen sipwe arap ngeni an Jiowa we leenien motun chen iteiten ran?

²⁰ A chochommongelo ekkewe sossot me osukosuk lon ekkeei “ranin le sopolon,” mi sinnelo ren “fansoun weires.” (2 Timoti 3:1) Iwe, epwe mecheres ach sipwe ekilapei ach kewe osukosuk. Iwe nge, ach ikkiotek epwe alisikich le alamota ekkewe mettochun ngun lon manauach, nge meit ika epwe tottorikich osukosuk, sossot, me ekkewe minen apilukulukungau. Ach kewe iotek ngeni Jiowa iteiten ran repwe tongeni atoto ewe alillis mi lamot ngenikich.

²¹ Jiowa, ewe “Chon Auseling ngeni iotek,” esap kon osukosuk pwe esap tongeni auseling ngenikich. (Kol Fel 65:2) Iwe, epwe pwal lamot sisap meefi pwe sia kon osukosuk watte pwe sisap tongeni foffos ngeni. Ach chiechi ngeni Kot a kon auchea lap seni mettoch meinisin. Iwe, sisap fokkun meefi pwe a chok lamot kisikis. “Iwe, sipwe chok pworacho le arap ngeni an we leenien motun chen, pwe sipwe angei unoumoch o pwal kuna chenin alillis lon fansoun ach osupwang.”​—Ipru 4:16.

Ifa Ussun Kopwe Polueni?

• Met sia kaeo seni ewe soufos Taniel ussun aucheaan ewe mettoch iotek?

• Ifa ussun sipwe tongeni apochokkulata ach chiechi ngeni Jiowa?

• Pwata sipwe ikkiotek iteitan?

• Pwata sisap mut ngeni ach meefi lamotengau an epwe eppeti ach ikkiotek ngeni Jiowa?

[Ekkewe Kapas Eis fan Iten ewe Lesen]

[Sasing lon pekin taropwe 12]

Nehemaia a eani eu iotek mi chok mwochomwoch lon letipan me mwen an a fos ngeni ewe king

[Sasing lon pekin taropwe 13]

Hana a “sopweilo le iotek ngeni Jiowa”

[Sasing lon pekin taropwe 14]

Jises a iotek unusen eu pwin me mwen an epwe seikata noun kewe 12 aposel

[Sasing lon pekin taropwe 16]

Chommong fansoun iotek a sussuuk ngenikich lon eu me eu ran