“Ousap Iokfengen Me Ekkewe Aramas Mi Lukulukumang”

KOPWE TONGENI kuna lon ei lios pwe ewe kamel me ewe atemwanin kou rese kinamwe le angangfengen. Ewe iok a aririfengenniir a eriaffou ir me ruuemon pokiten ewe iok a ffor fan iten ruuemon man mi lollo chok saisiir me pochokkuler. Pokiten Kot a tongei ekkewe man aramas ra aea fan iten angang, a ereni ekkewe chon Israel: “Kosap achufengeni eman atemwanin kow me eman aas le tuw pwul.” (Tuteronomi 22:10) Ena kapasen alongolongun alluk epwe pwal weneiti emon atemwanin kow me emon kamel.

Emon chon atake ese kan eriaffou noun kewe man. Nge ika ese nom ren ruuemon atemwanin kou, eli epwe iokfengenni ruuemon man a nonnom ren. Ese mwaal ina met ewe chon atake lon ewe 19en senturi lon ewe lios a fori. Pokiten sokkofesennin saisiir me chouur, ewe man mi apwangapwang epwe weires le angang me epwe lapelo angangen ewe man mi pochokkul.

Ewe aposel Paul a nounou ewe kapas awewe ussun iokfengennin ruuemon man mi sokkofesen saissir pwe epwe aitingenikich eu lesen mi lamot. A apasa: “Ousap iokfengen me ekkewe aramas mi lukulukumang. Pun meeta pung o mwal repwe tongeni angangfengen won? Are meeta saram epwe tongeni chiechi ngeni rochopwak?” (2 Korint 6:14) Ifa ussun emon chon Kraist a tongeni iokfengen me ekkewe aramas mi lukulukummang?

Epwe fis ika emon chon Kraist a puluweni emon chon lukun. Ar pupulu epwe aweiresi ir me ruuemon pokiten resap tipeeu ussun chommong luku mi fokkun lamot.

Lupwen Jiowa a poputani pupulu, a awisa ngeni ewe fefin wiisen ‘chon alillis.’ (Keneses 2:18.) Ussun we chok, ren ewe soufos Malakai, Kot a eita ngeni ewe fin pupulu emon ‘chiechi.’ (Malakai 2:14) Ewe Chon Forikich a mochen pwe ekkewe chon pupulu repwe angangfengen lon pekin ngun, ekifengenni oser kewe me pwapwafengen ren ekkewe feioch.

Ren an emon chon Kraist pupulu “lon chok ewe Samol,” a pwarata sufol ngeni ewe fon seni Semach lon lang. (1 Korint 7:39) Ei mettoch epwe isetiu eu longolong fan iten pupulu mi tipeeu, mi tongeni mwareiti me alingalo Kot lupwen ekkewe ruuemon mi pupulu ra angang ngeni Kot lon eu ‘chiechi mi enlet’ mi sokkolo aucheaan.​—Filipai 4:3.

[Credit Line]

Kamel me atemwanin kou: Seni ewe puk La Tierra Santa, Volume 1, 1830