‘Akkaea An Kot We Kapas Fan Pwung’
‘Akkaea An Kot We Kapas Fan Pwung’
“Kopwe achocho ren unusen tufichum pwe kopwe uoch mwen Kot, emon chon angang esap sau ren och mettoch, emon mi akkaea ewe kapas mi enlet fan pwung.”—2 TIMOTY 2:15, New World Translation.
1, 2. (a) Pwata a lamot ngeni chon angang ekkan pisekin angang? (b) Menni angang chon Kraist ra foffori, me ifa ussun ra kan pwarata pwe ra kukutta akkom ewe Muu?
A LAMOT an epwe wor pisekin angang ren ekkan chon angang pwe repwe tufichin awesochu en me an angang. Iwe nge, esap naf an epwe chok nom rer och sokkun pisekin angang, ese lifilifil. A lamot ngeni emon chon angang ewe sokkun pisekin angang mi fichiiti an angang, nge epwe pwal pwung lapalapen an aea. Ren chok awewe, ika kopwe aueta eu kukkun sooko me ka mochen chufolu ruuefoch ira, esap naf an epwe chok nom reom efoch ama me ekkoch chufol. Epwe fokkun weires om kopwe sotun amanalong efoch chufol lon efoch ira ika kese silei aean ama. Nge ika a pwung lapalapen ach aea pisekin angang, sipwe tufichin apwonueta ach kewe angang, iwe, sipwe pwapwa ren minne sipwe forata.
2 Pokiten kich chon Kraist, a wor eu angang sipwe wiisen fori. Ena angang a nampa eu lamotan. Jises Kraist a pesei noun kewe chon kaeo pwe repwe ‘kutta akkom ewe muu.’ (Mattu 6:33) Ifa ussun sipwe tongeni fori ena mettoch? Aewin, ren ach pwarata tinikken lon ewe angangen afalafala porausen ewe Muu me ewe angangen forata chon kaeo. Oruuan, ren ach eani longolongun ach angangen afalafal ewe Kapasen Kot. Iwe, aulungatin, ren ach eani foffor mi murinno. (Mattu 24:14; 28:19, 20; Fofor 8:25; 1 Piter 2:12) Ren ach sipwe lipwakoch me pwapwa lon wiisach na, wiisen chon Kraist, a lamot an epwe nom rech pisekin angang mi murinno me ach sipwe silei ifa ussun sipwe aeafichiir. Lon wiisan we, wiisen emon chon angang ngeni Kraist, ewe aposel Paul a isetiu eu leenien appiru mi sokkolo ochchun ren ena mettoch, iwe, a pesei chienan kewe chon luku pwe repwe appiru i. (1 Korint 11:1; 15:10) Ina minne, met sipwe tongeni kaeo seni Paul, chienach chon angang?
Paul—Emon Chon Afalafal mi Tinikken, Chon Afalafala Porausen ewe Muu
3. Pwata sipwe tongeni apasa pwe ewe aposel Paul emon chon angang mi tinikken fan iten ewe Muu?
3 Met sokkun chon angang Paul? A wesewesen tinikken. Paul a angang weires, iwe, a esilefeili ewe poraus allim lon eu watte leeni lemenen ewe Mediterranean. Iei alon ena aposel mi achocho le angang ussun ewe popun an a mwasangasang le esilefeili porausen ewe Muu: “Inaamo ika ua arongafeili ewe kapas allim, nge esap wor lamoten ai sikasini ren, pun iei wisei. Riaffou ngeniei are usap arongafetalei ewe kapas allim!” (1 Korint 9:16) Paul a ita ekiekin an epwe amanaua pwisin i chok? Aapw. Sap minne a ekieki pwisin manauan chok. Nge, a mochen pwe aramas meinisin repwe feioch seni ewe poraus allim. Iei makkeian: “Ua fori mettoch meinisin fan iten ewe poraus allim, pwe upwe tongeni esilei ngeni pwal fitemon.”—1 Korint 9:23, NW.
4. Menni pisekin angang chon Kraist ra kon aucheani lap seni meinisin?
4 Ewe aposel Paul emon chon angang mi tipetekison me a miritiiti pwe esap tongeni fori an angang ren an luku pwisin tufichin kewe. Ussun chok an a lamot ngeni emon chon taiku efoch ama, iwe, a pwal lamot ngeni Paul ewe sokkun pisekin angang mi fichiiti i ren an epwe tufichin ffotukalong lon letipen chon auseling an Kot kewe poraus mi enlet. Ifa ewe pisekin angang a akkaewin aea? Ina an Kot we Kapas, ewe Paipel mi Fel. Iwe, pwal ussun chok, unusen ewe Paipel, iei akkaewin ewe pisekin angang sia kan akkaea le forata chon kaeo.
5. Ren ach sipwe chon afalafal mi lipwakoch, a pwal lamot ach sipwe fori met me lukun ach uwawu wokisin seni Paipel?
5 Paul a silei pwe ren an epwe akkaea an Kot we Kapas fan pwung, esap naf an epwe chok apasawu ekkoch wokisin seni. A aea “kapasen etipetip.” (Fofor 28:23) Ifa ussun? A aeafichi an Kot we Kapas mi fen makketiu le etipetipa aramas pwe repwe luku poraus mi enlet ussun ewe Muu. A aea kapas mi pwung me tetteloch ngeniir. Ren ulungat maram lon eu sinakok lon Efisus, Paul a “afalafala me etipetipa aramas ussun ewe muun Kot.” Inaamwo ika ekkoch ra “achemaua letiper me resap luku,” nge a wor fitemon mi auseling. Pokiten an Paul angangen afalafal lon Efisus, “kapasen Jiowa a mammaarita me pochokkuleta.”—Fofor 19:8, 9, 20.
6, 7. Ifa ussun Paul a alingalo an angangen afalafal, me ifa ussun sipwe tongeni pwal fori ussun chok?
6 Lon wiisan we, wiisen emon chon afalafala porausen ewe Muu fan tinikken, Paul a ‘alingalo an angangen afalafal.’ (Rom 11:13) Ifa ussun? Ese ekiekin atekiatai pwisin i me ese pwal sau ren an aramas silei pwe i emon chienen Kot chon angang. Nge, a meefi pwe an angangen afalafal eu wiis mi fokkun tekia. Paul a angoch me silelap le aea an Kot we Kapas. An angang mi uwaoch eu minen pesepes ngeni chienan kewe, iwe, a amwokutuur pwe repwe apwonuetafichi ar angangen afalafal. A pwal ina ussun an a lingelo an angangen afalafal.
7 Ussun Paul, sipwe tongeni alingalo ach angang lon wiisach we, wiisen chon afalafal, ren ach aeafichi fan chommong ewe Kapasen Kot. Lon meinisin refirefin ach angangen afalafal, sipwe ekiekin uwawu och wokisin seni ewe Paipel ngeni aramas meinisin. Ifa ussun sipwe tongeni fori ena mettoch me pwal aea kapasen etipetip? Sipwe ekieki ekkeei ulungat mettoch mi lamot: (1) Eppieta an Kot we Kapas lon eu lapalap mi amwokutu aramas ar repwe sufoliiti. (2) Sipwe affata me awewefichi minne Paipel a apasa fan fairo me kapas pwotete. (3) Lapalapen ach uwawu poraus seni Paipel epwe pwung me tetteloch pwe aramas repwe luku ewe poraus.
8. Ikkefa ekkewe pisekin angang mi nom rech lon ei fansoun fan iten ewe angangen afalafala porausen ewe Muu, me ifa ussun ka fen aea ekkena pisekin angang?
8 Lon ei fansoun, mi nom ren chon afalafala porausen ewe Muu ekkan pisekin angang ese nom ren Paul lon an angangen afalafal. A kapachelong ekkewe puk, chassi, brochure, handbill, tract, me ekkewe teip, video, me cd aramas repwe tongeni auseling ngeni me katol. Pwungun pwe ewe nampa eu pisekin angang, iei ewe Paipel, iwe, a lamot ach sipwe akkaea fan pwung ena pisekin angang mi sokkolo aucheaan.
Ach Angangen Afalafal Epwe Longuni An Kot we Kapas
9, 10. Met sipwe tongeni kaeo seni an Paul we fon ngeni Timoti ussun aean an Kot we Kapas?
9 Ifa ussun sipwe tongeni aea an Kot we Kapas pwe epwe ussun eu pisekin angang mi fokkun murinno? Ren ach auseling ngeni alon Paul ngeni chienan we chon angang Timoti: “Kopwe achocho ren unusen tufichum pwe kopwe uoch mwen Kot, emon chon angang esap sau ren och mettoch, emon mi akkaea ewe kapas mi enlet fan pwung.” (2 Timoti 2:15, NW) Met weween “akkaea ewe kapas mi enlet fan pwung”?
10 Ewe kapasen Kriik mi afou ngeni ‘akkaea fan pwung’ a wesewesen wewe ngeni “poku wenewen” are “poku efoch al mi wenewenelo.” Ena kapas a mak lon ewe Tesin Kriik lon chok an Paul we fon ngeni Timoti. Sipwe pwal tongeni aea ena kapas le awewei an emon ttu efoch warawar mi wenewenelo lon eu atake. Ika emon sou atake epwe ttu efoch warawar mi rikirik, epwe ina eu mettoch epwe sau ren. Ren an epwe “emon chon angang esap sau ren och mettoch,” Paul a achchema ngeni Timoti pwe esap mumuta och kapas mi rikilo seni ekkewe afalafal mi enlet lon an Kot we kapas. Timoti esap mut ngeni pwisin an kewe ekiek ar repwe alapalapa minne epwe asukula ngeni aramas. An angangen afalafala me asukula aramas epwe longuni chok ewe Paipel. (2 Timoti 4:2-4) Epwe ina ussun aramas mi wenechar letiper repwe eani an Kot ekiek won mettoch meinisin, nge resap fiti ekiekin ewe fonufanen lukun. Mi enlet ena lon pwal ei fansoun.
Epwe Murinno Fofforuch
11, 12. Ifa ussun fofforuch a kan kku ach akkaea an Kot we Kapas fan pwung?
11 Esap naf ach sipwe chok akkaea an Kot we Kapas fan pwung ren ach ekkesilefeili an kewe poraus mi enlet, nge pwal och mettoch epwe pacheta. Fofforuch epwe pwal tipeeu ngeni. “Kich chienen Kot chon angang,” ina minne, sisap chon angang mi likotuputup. (1 Korint 3:9) Iei alon an Kot we Kapas: “Iwe, en ewe chon afalafala ekkewe ekkoch aramas, pwata kose pwisin afalafalok? En ewe chon afalafala aramas pwe rete sola, nge ifa usun, kopwe sola? En ewe chon apasa pwe resap lisou, nge ifa usum, kopwe lisou? En chon oput ununun anu, nge ifa usum, kopwe solani ekkewe imwen felin anu?” (Rom 2:21, 22) Ina popun, lon wiisach we, wiisen chon angang ngeni Kot lon ei fansoun, sipwe tongeni aea an Kot we kapas fan pwung ren ach auseling ngeni ei fon: “Luku Jiowa ren unusen letipom me kosap eani apilukuluk won pwisin sileiom. Kopwe afanni i lon meinisin fofforum kewe, iwe, pwisin i epwe awenechara om kewe al.”—An Salomon Fos 3:5, 6.
12 Met sipwe ekiekin kuna seni ach akkaea an Kot we Kapas fan pwung? Ekieki mwo ifa ussun manamanen an Kot we Kapas epwe tongeni kku manauen ekkan aramas mi wenechar letiper.
A Nom Ren An Kot we Kapas Ewe Manamanen Siwili Manauen Aramas
13. Met epwe tongeni fis pokiten an emon akkapwonueta an Kot we Kapas?
13 Lupwen aramas ra luku pwe an Kot we Kapas a wenewenen pwung, ewe poraus lon a kan tufichin amwokutuur are achunguur pwe repwe siwili manauer lon och lapalap mi fokkun amwarar. Paul a kuna minne an Kot we kapas a tufichin fori me ifa ussun a efisata lapalap mi murinno lon manauen ir kewe mi wiliiti chon Kraist lon Tesalonika lom lom. Iei minne, iei alon ngeniir: “Am aisap ukutiu seni kilisou ngeni Kot, pun lupwen ami oua angei ewe kapasen Kot, ewe oua rong senikem, ouse angei usun kapasen aramas chok, pwe usun kapasen Kot mi enlet, ewe mi pwal angang leimi chon luku.” (1 Tesalonika 2:13) Ren ekkena chon Kraist—me pwal fokkun pwungun ren meinisin noun Kraist kewe chon kaeo mi enlet—an aramas tipachchem mi fokkun kisikis ese akkarap ngeni tipachchemen Kot, pwe an tipachchem a fokkun tekia seni meinisin. (Aisea 55:9) Chon Tesalonika ra “angei ewe kapas allim lon riaffou chapur eti pwapwa me ren ewe Ngun mi Fel,” iwe, ra wiliiti leenien appiru ngeni chiener kewe chon luku.—1 Tesalonika 1:5-7.
14, 15. Ifa ukuukun manamanen ewe poraus seni an Kot we Kapas, iwe, pwata a ina ussun?
14 An Kot we Kapas a manaman, ussun chok ewe emon ena Kapas a popu seni, Jiowa. A feito seni “ewe Kot mi manau,” nge “ekkewe lang ra foruta” seni kapasan, iwe, fansoun meinisin ena kapas epwe ‘apwonueta minne a fen titiilo ren.’ (Ipru 3:12; Kol Fel 33:6; Aisea 55:11) Iei alon emon sou kaeo Paipel: “Kot ese aimulo pwisin i seni an we Kapas. Sap minne a amam an kapas pwe epwe ussun ita nge ina och mettoch mi feito me ekis. . . . Ina minne, esap ina och mettoch mi lamotongau ngeni, iwe, esap fan eu an esap meefi minne epwe fis ngeni; pun a ririfengen me ewe Kot mi manau.”
15 Ifa ukuukun manamanen ewe poraus mi popu seni an Kot we Kapas? A mmen wesewesen watte an manaman. Iwe, a pwung makkeien Paul ei: “Ewe kapasen Kot mi manau o manaman, a ken seni sokkun katilas meinisin mi ken me ruu epek, o a tu ngeni tori aimufeseni manau o ngun, o pwal ekkewe kailen chuu me masouen chuu o a pwal tongeni apungu ekkewe ekiek o mochenian letipach.”—Ipru 4:12.
16. Ifa ukuukun an Kot we Kapas tufichin siwili manauen emon?
16 Ewe poraus lon an Kot we Kapas mi fen makketiu a “ken seni sokkun katilas meinisin mi ken me ruu epek.” Ina popun, a kon watte an manamanen tikilong lon letipen aramas pwe a manaman seni meinisin pisekin angang aramas repwe tufichin forata. An Kot we Kapas a kan tikilong leutun aramas, iwe, a tufichin siwili letiper are sorosorur me epwe nemeni ekiekir me minne ra tongei, iwe, epwe awiliirelo ngeni ewe sokkun chon angang mi murinno me tuppwol ngeni Kot. A ifa me watteen manamanen ena pisekin angang!
17. Awewei mwo ewe manamanen an Kot we kapas, manamanen siwili manauen aramas.
17 Ewe Kapasen Kot a kan pwarawu wesewesen lapalapen emon aramas me leutun ika a sokko seni minne a pwisin ekieki ussun lapalapan are minne a mut ngeni aramas ar repwe kuna me lukun. Fan ekkoch emon aramas mi ngau epwe tongeni tukumi wesewesen masouen letipan ren an lapalapeni lapalapen emon aramas mi kirokiroch are ammafel me lukun. Aramas mi ngau ra kan mwakeleta lapalaper me lukun pokiten a ngau ar kewe ekiek. Aramas mi lamalam tekia ra tipin mosonoson nge ra fokkun efich an aramas repwe mwareitiir. Iwe nge, ren an pwarawu minne a wesewesen nom lon letipen aramas, manamanen an Kot we Kapas epwe tongeni amwokutu aramas mi tipetekison pwe repwe poutalo lapalaper minen lom me ‘pwilitalong ewe lapalap sefo, ewe mi foruta me ren letipen Kot lon minne mi enletin pwung me tuppwol.’ (Efisus 4:22-24) Ekkewe afalafal lon an Kot we Kapas epwe pwal tongeni awilalo ekkewe mi nisimwa pwe repwe wiliiti Chon Pwarata mi pwora fan iten Jiowa me chon afalafal mi tinikken, chon afalafala porausen ewe Muu.—Jeremaia 1:6-9.
18, 19. Ren om aea och poraus seni ekkeei wokisin are pwisin kunaom lon ewe angangen afalafal, affata mwo ifa ussun ekkewe kapas mi enlet lon Paipel a tongeni siwili ekiekin aramas.
18 Ewe manaman lon an Kot we Kapas, manamanen siwili aramas, a kan amurinnolo aramas ekis meinisin. Ren chok awewe, chon afalafala ewe Muu seni Phnom Penh, Cambodia, ra kan afalafal lon ewe sopw Kompong Cham fan ruu iteiten maram. Mwirin an rongorong an ekkoch nouwiisin lamalam esiita Chon Pwarata Jiowa, emon sounpetak lon ena leeni a akkota pwe epwe chufengen me ekkewe Chon Pwarata lupwen repwe liwiniti ena sopw. Neminnewe a eisiniir chommong kapas eis ussun apwapwaan holiday, me a auselingoch lupwen ra afalafal ngeni seni Paipel. Iwe, a kota: “Iei ua silei pwe ese pwung minne chienei kewe sounpetak ra apasa ussumi! Ra era pwe ami ouse nounou Paipel, nge lon ei sossoran a ina chok ewe puk oua nounou!”
19 Ena fefin a sopweilo an porausfengen me ekkewe Chon Pwarata lon Paipel me ese ukutiu seni, inaamwo ika a rong pwe epwe katowu seni wiisan we, wiisen sounpetak. A ereni emon chienan ussun an kakkaeo lon Paipel, iwe, emonna a pwal poputa le kaeo Paipel ren alillisin ekkewe Chon Pwarata. Chienan na a kon mwasangasang ren minne a kakkaeo pwe lon eu fansoun an fiti fel, a kota, “Ou feito kaeo Paipel ren alillisin Chon Pwarata Jiowa!” Ekiselo mwirin, a towu seni an we lamalam. Chienan we, ewe mi fen pin wiisen sounpetak me lom fitifengen me pwal fitemon ra poputa le kaeo Paipel ren alillisin Chon Pwarata Jiowa.
20. Ifa ussun porausen emon fefin lon Ghana a affata watte manamanen an Kot we Kapas?
20 A pwal ffatolo manamanen an Kot we Kapas ren porausen Paulina, emon fefin lon Ghana. Emon mi afalafala porausen ewe Muu full-time a kaeo ngeni neminna lon ewe puk Sile Mi Emmwen Ngeni Manau Esemuch. * Puluwen Paulina we a puluweni lap seni emon, ina minne, a kuna lamoten an epwe siwili manauan, nge puluwan we me meinisin mararin kewe ra eriaffou neminna pokiten ar u ngeni. Semelapan we, emon mi wiiseni wiisen soukapwung lon ewe kapwung tekia me elter lon pekin lamalam, a sotuni le etipetipa i ren an aeamwaalli Mattu 19:4-6. A ussun ita pwe ewe soukapwung a silelap, nge Paulina a muttir weweiti pwe ina och foffor mi ussun an Setan aeamwaalli ekkoch wokisin lon Paipel lupwen a sotuni Jises Kraist. (Mattu 4:5-7) A chemeni alon Jises we mi ffatoch ussun pupulu, pwe a affata nge Kot a forata emon mwan me emon fefin, nge esap emon mwan me fitemon fefin, iwe, ekkena ruuemon, nge esap ita ulumon, repwe wiliiti eu futuk. Neminna a fori minne a fen filata, iwe, a mumuta ngeni an epwe mufesen me ewe mwan mi puluweni lap seni emon. Ekiselo mwirin, a pwapwa pokiten an wiliiti emon chon afalafal mi papatais, chon afalafala porausen ewe Muu.
Sopweilo Ach Akkaea An Kot we Kapas Fan Pwung
21, 22. (a) Pokiten kich chon esilefeili porausen ewe Muu, sia mochen pwe letipach epwe pposolo fan iten met? (b) Met sipwe kaeo ussun lon ena eu lesen mwirin ei?
21 An Kot we Kapas mi makketiu wesewesen eu pisekin angang mi manaman sipwe tongeni aea le alisi aramas pwe repwe siwili manauer ren ar repwe forata ar ririoch ngeni Jiowa. (Jemes 4:8) Ekkan chon angang mi silelap ra akkaea pisekin angang le forata mettoch mi murinno, iwe, pwal ussun chok, amwo epwe pposolo letipach fan iten ach sipwe achocho ngeni ach sipwe silelap le akkaea an Kot we Kapas, ewe Paipel, lon wiisach we me ren Kot, wiisen chon afalafala porausen ewe Muu.
22 Ifa ussun sipwe tongeni angangochulo le akkaea ewe Paipel lon ach angangen forata chon kaeo? Akkom, sipwe alapalo ach kewe tufich pwe sipwe lipwakoch lon wiisach we, wiisen sense. Kopwe mwo nengeni ena eu lesen mwirin ei, pun a affata ifa ussun sipwe tongeni asukula me alisi aramas fan iten ar repwe tipemecheresin etiwa porausen ewe Muu.
[Pwóróus fan]
^ Forien Chon Pwarata Jiowa.
En Mi Chechchemeni?
• Ikkefa ekkewe pisekin angang mi kawor ngeni chon esilefeili porausen ewe Muu?
• Ifa ussun Paul a isetiu eu leenien appiru lon an angang fan iten ewe Muu?
• Met sokkun mettoch a kapachelong lon ach akkaea an Kot we Kapas fan pwung?
• Ifa ukuukun manamanen an Jiowa we Kapas, ewe mi fen makketiu?
[Ekkewe Kapas Eis fan Iten ewe Lesen]
[Sasing lon pekin taropwe 6]
Ekkoch pisekin angang chon Kraist ra kan akkaea lon ewe angangen esilefeili porausen ewe Muu