Ewe Popun Aramas Ra Kan Feffel

“CHON fiti ewe lamalam Presbyterian lon ewe Republic of Korea a lap seni chon fiti ena pekin lon America won arapakan fan ruuanu.” Eli chommong repwe mairu ren ena poraus lon ewe chassi Newsweek, pun a lap ngeni aramas ar ra ekieki pwe ekkeei lamalam, iter Confucian me Buddhist ra kon choufetal lon Korea. Lon ei fansoun, chon sai ngeni ena fonu repwe kuna chommong ita “lamalamen Kraist” ikewe ie, nge a kan pacheta won ar kewe imwen fel ekkan esissin mi parapar tenkiin, esissinnen irapenges. Lon Raninfel, sia kan kuna ekkan aramas, akkaruuemon are akkaulumon, ar ra feffetal ngeni ekkewe imwen fel, nge ra ukkuwei Paipel. Me ren eu pekin kaeo lon 1998, arapakan 30 percentin chon Korea ra fiti lamalamen Katolik are Pirostan, nge ena ukuukun a lap seni ekkewe mi era pwe ir chon Buddhist.

Lon ei fansoun, sise kan kukkuna ena ukuukun chochoon aramas ar ra feffel iteitan. Nge, sanne a fiffis lon chok Korea, pwe pwal lon fitu fonuen Asia, iwe, lon pwal Africa me Latin America. Pwata chommong ra chuen apasa pwe ra luku Kot lupwen an a choufetal an aramas tenechepwak ngeni lamalam? Pwata aramas ra kan feffel?

Eu pekin kuttaen an aramas memmeef itan Gallup a pwarata pwe lap seni esopw me lein chon feffel lon Korea ra kutta met epwe atoto kinamwe ngeni manauer me ina epwe eu na aulungatin leir ra aneanei ar repwe kuna manau esemuch mwirin malo, iwe, eu na engolun leir ra aneanei an epwe pochokkul inisir, ar repwe pisekisek, me an epwe pwonuta minne repwe achocho ngeni.

Chommong aramas lon China ra kan kito ngeni ekkewe imwen fel pun ra aneanei ar repwe kuna och mettoch an epwe atufichi ar osupwang lon pekin ngun, nge ena osupwang a fis pun ewe kokkotun alapalo angangen sopai a kan sissiwili ewe ekiek ussun an Communist nemenem. Iteiten ier, fite, fite milion kapiin Paipel a kan for me ainetfetal lon China, me a ussun ita nge aramas ra kan tinikken le alleani Paipel ussun ar ra fen pin alleani makkeien Mao we kukkun puk mi parapar me lom.

Ekkena poraus meinisin ra pwarata pwe inaamwo ika chommong aramas ra chuen luku Kot, nge a lap me leir ra akkom ekieki met sokkun feioch repwe tongeni feiochuni lon chok ei atun, nge rese kan ekieki met epwe fis lon lon mwach kkan are pwal mwo nge ekieki ussun Kot.