“Kopwe Pwapwaesini Jiowa”

“Kopwe pwapwaesini Jiowa, o epwe ngonuk mochenin letipom kewe.”​—KÖLFEL 37:4, NW.

1, 2. Io Popunlapen pwapwa enlet, me ifa ussun King Tafit a kapas ussun?

 “RA PWAPWA, ir kewe mi ekkekieki ussun minne ra osupwang ren lon pekin ngun, . . . Ra pwapwa, ir mi umoumoch, . . . Ra pwapwa, ir mi efisata kinamwe.” Ir me pwal wonu ekkewe ekkoch lapalapen ekkewe mi pwapwa, ina amwararen poputaan an Jises we Afalafal mi itefoulo won ewe Chuuk, makkeien emon sou makkei ewe Kapas Allim itan Mattu. (Mattu 5:3-11) Alon Jises kewe ra alukuluku ngenikich pwe mei tufich ach sipwe kuna pwapwa.

² Echo kol mi pin, makkeien King Tafit seni Israel lom lom, a kapas ussun Popunlapen pwapwa enlet, Jiowa. Tafit a apasa: “Kopwe pwapwaesini Jiowa, o epwe ngonuk mochenin letipom kewe.” (Kol Fel 37:4, NW) Nge met epwe efisi ach “pwapwaesini” ach silelo Jiowa me lapalapan kewe? Ifa ussun ach ekkekieki ussun minne a fen fori me met epwe pwal fori fan iten an epwe apwonueta an kokkot epwe atufichi om apilukulukun kuna “mochenin letipom kewe”? Ach kaeofichi Kol Fel 37, wokisin 1 tori 11, epwe awora poluan.

“Kosap Lolowo”

3, 4. Ussun an a mak lon Kol Fel 37:1, ifa an Tafit we kapasen fon, iwe, pwata a fich ach sipwe apwonueta ikenai?

³ Sia nonnom lon eu “fansoun weires,” iwe, a kan choufetalelo fofforingau. Sia fen kuna pwonuetaan alon ewe aposel Paul, a era: “Ekkewe chon likotupotup repwe chok alapalo ar fofor-ingau, ra otupu ekkoch, nge ekkoch ra pwal otupu ir.” (2 Timoti 3:1, 13) Epwe fokkun mecheres ach sipwe meefi letipechou lupwen sipwe kuna pwe ussun ita nge ekkewe mi ingau ra win me wouoch! Ekkena mettoch repwe tongeni arikalo ach ekiek pwe ach mammasa lon pekin ngun esap chuen ffatafatoch. Nengeni ifa ussun ewe kapasen le poputaan lon Kol Fel 37 a esilei ngenikich ussun ei minen efeiengau, a era: “Kosap pwisin eriaffouk pokiten ekkewe aramas mi ingau, kosap lolowo ngeni ekkewe chon fofor-ingau.”

⁴ Ekkewe chon repotei porausen fonufan ra kan ekkesilei ngenikich porausen chommong fofforun pwungungau. Ekkoch chon sopai mi pworongau ra foffori minne mi mwaal nge rese kuna kapwung. Ekkoch chon atai alluk ra foffor-mwaal ngeni ekkewe mi tumunungau. Polis rese aresini are kalapusei chommong chon nielo aramas. Meinisin ekkena porausen pwungungau repwe tongeni asongakich me atai kinamween letipach. An ekkewe chon fofforingau ita feioch epwe tongeni pwal mwo nge efisi ach lolowoitir. Nge ach songeta epwe amurinnolo ewe  lapalapengau? Ach sipwe lolowoiti pisekisekin ekkewe mi ngau epwe siwili minne epwap fis ngeniir? Apwi! Iwe, ese fokkun wor popun ach sipwe “pwisin eriaffoukich.” Pwata?

5. Pwata a alollofengenni ekkewe mi ngau me fetil?

⁵ Ewe sou kol a polueni: “Pun repwe muttir pwaselo usun chok fetil, o pwal usun chok chon petewel mi arauarau.” (Kol Fel 37:2) A lingoch fetil mi arauarau mi keran pwukuta, nge repwe muttir pwaselo me malo. Epwe pwal ina ussun ekkewe chon foffor-ingau. Esap nomofochelo wouochur. Lupwen repwe malo, ekkewe pisek ra angeimwaali seni ar kewe foffor mi pworongau resap alisiir. Le sopwolon, iteiten aramas meinisin repwe kuna minne epwe fich ngenir. Paul a makkei: “Pun liwinin tipis malo.” (Rom 6:23) Le sopwolon, ekkewe chon fofforingau me ekkewe rese pwung repwe kuna ena “liwiniir”, ina chok. A ifa me watten lamotengauen ena sokkun alen manau!​—Kol Fel 37:35, 36; 49:16, 17.

6. Ifa ewe lesen sipwe tongeni kaeo seni Kol Fel 37:1, 2?

⁶ Iwe, sipwe ita mut ngeni winnen ekkewe chon fofforingau mi nonnom fansoun mwochomwoch an epwe aosukosukakich? Iei ewe lesen seni Kol Fel 37 wokisin eu me ruu: Kesap mut ngeni wouochur an epwe arikikukelo seni om angang ngeni Jiowa. Iwe nge, kopwe pwapwaesini feiochum lon pekin ngun me akkachocho ngeni.​—An Salomon Fos 23:17.

“Kopwe Chok Luku Jiowa O Fori Minne mi Murinno”

7. Pwata sipwe eani lukuluk won Jiowa?

⁷ Ewe sou kol a peseikich: “Kopwe chok luku ewe Samol, o fori minne mi murinno.” (Kol Fel 37:3a) Lupwen sipwe osukosuk ren aurek are pwal mwo nge tipemwaramwar, epwe lamot ach sipwe unusen eani lukuluk won Jiowa. I chok ewe Emon epwe awora ngenikich lukulukoch mi unus lon pekin ngun. Iwe, Moses a makkei, “Atewe mi nonnom fan nemenien Ewe mi Fakkun Tekia, atewe mi nonnom fan nurun Ewe mi Manaman Chapur.” (Kol Fel 91:1) Lupwen sipwe osukosuk ren lapaloon fofforun ipweri alluk lon ei ototen mettoch, epwe lamot ach sipwe alapalo ach lukuluk won Jiowa. Ika sipwe ipwenuk, sipwe meefi kilisou ika emon chienach we epwe alisikich. Iwe, pwal ussun chok, lupwen sipwe achocho le feffetal lon luku, epwe lamot an Kot alillis ngenikich.​—Aisea 50:10.

8. Ifa ussun ach fiffiti ewe angangen afalafal an Chon Kraist epwe tongeni alisikich pwe sisap kon osukosuk ren winnen ekkewe mi ngau?

⁸ Iei eu minen alillis pwe sisap kon osukosuk ren winnen ekkewe mi ingau, ach sipwe akkachocho le kukkutta me akkalisi ekkewe mi ussun chok siip pwe repwe silei ewe enlet ussun an Kot kokkot. Lon ei fansoun lapaloon fofforingau, a lamot ach sipwe fiffiti ewe angangen alisi ekkewe ekkoch. Ewe aposel Paul a apasa: “Nge ousap tenechepwak ngeni ami fofor-murinno, are ami liffang ngeni ekkewe aramas mi osupwang, pun ekkeei sokkun asor mi apwapwai Kot.” Ewe “fofor-murinno” mi lapalap seni meinisin, ina ach afalafala ekkewe ekkoch ewe kapas allim mi amwarar ussun an Kot we Muu. Ach angangen afalafal, ina enletin eu “asoren mwareiti Kot.”​—Ipru 13:15, 16; Kalesia 6:10.

9. Awewei mwo an Tafit we kapasen pesepes pwe sipwe “nonnom lon ewe fonu.”

⁹ Tafit a sopweilo le apasa: “Kopwe nonnom lon ewe fonu o om kewe foffor epwe fiti tuppwol.” (Kol Fel 37:3b, NW) “Ewe fonu” lon ranin Tafit a wewe ngeni ewe fonu Jiowa a ngeni Israel, ewe Fonuen Pwon. Lon fansoun an Salomon  nemenem, kiannin ewe fonu a popu seni ewe fonuen Tan, ennefenin ewe fonu tori Beer-sheba le oorun ewe fonu. A ina leenien Israel. (1 Kings 4:25) Ikenai, ese lifilifil ia sia nonnom ie won fonufan, nge sia pwapwaesini ewe apilukulukun mwachkkan lupwen unusen fonufan epwe wiliti eu paratis lon eu fonufan sefo mi pwung. Nge lon ei fansoun, sia nonnom fan lukulukoch lon pekin ngun.​—Aisea 65:13, 14.

10. Ifa mwiriloon lupwen ach kewe “foffor epwe fiti tuppwol”?

¹⁰ Met epwe fis lupwen ach kewe “foffor epwe fiti tuppwol”? Eu mwitun mi mak fan emmwenien Kot a achema ngenikich: “Eman aramas mi allukuluk epwe wor an feioch mi somwola.” (An Salomon Fos 28:20) Ach likiitu lon ewe angangen afalafala ewe kapas allim ese lifilifil ia sia nonnom ie ngeni aramas meinisin ukukun ach tufich epwe enletin atoto rech feioch seni Jiowa. Awewe chok, 40 ier lom, Frank me puluan we, Rose, ra fiti ewe angangen pioneer lon eu telinimw ennefenin ewe fonuen Scotland. Mwen warotoon ekkewe pupulu, chokewe mi fen etiwa ewe enlet me lom ra fen rikilo. Iwe nge, ekkewe pupulu rese apilukulukungau, nge ra poputa ar angangen afalafal me foralo chon kaeo. Iei a wor eu mwichefel mi pochokkul lon ena telinimw. Iwe, Jiowa a enletin efeiochu tuppwolun ekkeei pupulu. Fan tipetekison, Frank a awewei, “Iei ewe feioch mi lapalap seni meinisin, am mi chuen nonnom lon ewe enlet me am mi chuen tongeni angang ngeni Jiowa.” Ewer, lupwen ach kewe “foffor epwe fiti tuppwol,” sipwe kuna me aucheani chommong feioch.

“Kopwe Pwapwaesini Jiowa”

11, 12. (a) Ifa ussun sipwe tongeni “pwapwaesini Jiowa”? (b) Ifa ewe mettoch kopwe achocho ngeni ren om pwisin kakkaeo, iwe, met mwiriloon?

¹¹ Ren ach sipwe apochokkula ach ririoch ngeni Jiowa me akkamwochu ach lukuluk won i, epwe lamot ach sipwe “pwapwaesini Jiowa.” (Kol Fel 37:4a) Epwe ifa ussun sipwe fori ena mettoch? Inaamwo ika a kon weires manauach, nge sisap chok ekkekieki ussun aurekin pwisin manauach, nge sipwe ekilapei Jiowa. Sipwe tongeni fori ena mettoch ren ach awora fansoun fan iten ach sipwe alleani an we Kapas. (Kol Fel 1:1, 2) En mi pwapwaesini om akkalleani Paipel? Iwe, epwe ina ussun ika kopwe allea fan iten om mochen alapalo om sile Jiowa. Pwata kese ekis kaulo mwirin om alleani eu kinikin me pwisin eisinuk, ‘Met ei poraus a aiti ngeniei ussun Jiowa?’ Eni epwe alisuk ika epwe wor reom eu puken makkei poraus are fitacho taropwe atun kopwe alleani ewe Paipel. Lupwen kopwe ekis kaulo me ekieki ussun weween ewe poraus ka fen alleani, makketiu eu poraus mi achema ngonuk ussun eu me lein lapalapen Kot kewe mi murinno. Lon pwal echo kol, Tafit a koluni: “Iwe, kapasen auei, o ekiekin letipei, epwe minen apwapwa chok mwen mesom, Samol, en mi ai achau, o ai chon alisi.” (Kol Fel 19:14) Ach ekilapei an Kot we Kapas epwe eu minen “apwapwa” ngeni Jiowa me pwal ngenikich.

¹² Epwe ifa ussun sipwe tongeni kuna pwapwa seni ach kakkaeo me ach ekkekiek won? Iwe, sipwe tongeni achocho le alapalo ach sile ussun Jiowa me an kewe foffor. Ach foffori ena mettoch epwe alapalo ach kilisou. Iwe, Tafit a alukuluku ngeni ir mi pwung, Jiowa “epwe ngonuk mochenin letipom kewe.” (Kol Fel 37:4b) Iei ewe sokkun luku a amwokutu ewe aposel Jon an epwe makkei ekkeei kapas, a era: “Iei ewe apilukuluk allim mi nonnom rech lon i: are sia tingor och mettoch usun letipan, iwe, epwe auselingakich. O are sia meefi pwe epwe auselingakich ren ekkewe mettoch meinisin minne sia tingor,  iwe, sia pwal meefi pwe sia fen angei ekkewe mettoch sia tingor seni i.”​—1 Jon 5:14, 15.

13. Lon ekkewe ier mi kanoto, ifa ussun ewe angangen afalafala ewe Muu a feffeita lon chommong fonu?

¹³ Pokiten kich chon tuppwol, sipwe akkaeuin pwapwaesini pwonuetaan pwungun an Jiowa we nemenem. (An Salomon Fos 27:11) Letipach esap urelo ren pwapwa lupwen sipwe rongorong porausen an pwich kewe angangen afalafal mi amwarar lon ekkewe fonu mi pin nom fan nemenemengauen emon sou nemenem? Sia fokkun mochen kuna met sokkun ngaselo epwe fisita me mwen an epwe muchulo ei otot. Chommong noun Jiowa kewe chon angang mi nonnom lon ekkewe fonuen notou ikkewe ese eppet angangen Chon Kraist ie ra tinikken le afalafal ngeni ekkewe chon ekis chon sukul, chon choisa, me ekkewe ekkoch mi etto nonnom ie me pwapwaesini ar tufichin pwisin filata ar lamalam. Sia fokkun aneanei pwe lupwen ekkena chon ekis repwe liwiniiti wesetan fonuer, ikkewe ekkewe sou nemenem ra pinei angangen chon Kraist ie, repwe sopweilo le mut ngeni saramen ewe enlet an epwe tittinoch lon ewe rochopwak ikkewe ie ussun ita nge esap tongeni saramalo ie.​—Mattu 5:14-16.

“Kopwe Likitalo Alom ngeni Jiowa”

14. Ifa ekkewe pisekin pwarata pwe sipwe tongeni eani lukuluk won Jiowa?

¹⁴ A ifa me watten ach meefi ngaselo ach sipwe silei pwe epwe tongeni wesilo ach kewe chourek! Ifa ussun? Tafit a apasa: “Kopwe likitalo alom ngeni ewe Samol; kopwe luku i, o epwe pwisin fori.” (Kol Fel 37:5) Lon ach kewe mwichefel, a nafoch ekkewe pisekin pwarata pwe sipwe tongeni eani lukuluk won an Jiowa alillis. (Kol Fel 55:22) Ir kewe meinisin mi fiti ewe angangen afalafal full-time, awewe chok, ekkewe pioneer, ekkewe elter mi saifetal, ekkewe misineri, are ekkewe chon angang lon Bethel, repwe tongeni pwarata ussun an Jiowa tumun ngeniir. Pwata kese fos ngeni ekkoch leir me eisinir ifa ussun Jiowa a alisiir? Ese mwaal kopwe rongorong chommong poraus mi pwarata pwe pwal mwo nge lon ekkewe fansoun weires, ese nafengau an Jiowa alillis. Iteiten fansoun meinisin a kan awora minne a lamot ngeni manauach.​—Kol Fel 37:25; Mattu 6:25-34.

15. Ifa ussun pwungun noun Kot kewe aramas a pwapwalo?

¹⁵ Lupwen sipwe unusen eani lukuluk won Jiowa, sipwe pwal tongeni kuna pwonuetaan alon  ewe sou kol: “Epwe pwarawu om pwunguoch pwe epwe usun saram, nge om pwung pwe epwe usun tinen akkaren leolowas.” (Kol Fel 37:6) Fan chommong, aramas repwe tipi-mwaal ngeni kich Chon Pwarata Jiowa. Nge Jiowa a suuki mesen ir mi letip-wenechar pwe epwe alisiir le weweiti pwe ach angangen afalafal a popu seni ach tongei Jiowa me chon oruch kkewe. Iwe, inaamwo ika aramas ra wewengaueiti ach kkewe foffor murinno, nge ewe enlet epwe pwapwalo. Jiowa epwe alikiitukich fan ekkewe sokkopaten osukosuk me riaffou meinisin. Mwiriloon, pwungun noun Jiowa kkewe aramas a tittin ussun chok ttinen akkaren leolowas.​—1 Piter 2:12.

“Kopwe Fanafanala . . . O Likiitu le Witiwiti I”

16, 17. Ussun an a mak lon Kol Fel 37:7, met epwe fich lon ei fansoun, iwe, pwata?

¹⁶ Iei alon ewe sou kol mwirin: “Kopwe fanafanala me fan mesen ewe Samol mi Lapalap o likiitu le witiwiti i. Kosap achouuk ren ekkewe aramas mi pisekisekilo, pwal ren chok ewe mi afisata an rawangau.” (Kol Fel 37:7) Iei, Tafit a menlapei lamoten ach sipwe witiwiti Jiowa fan mosonottam pwe epwe mwokutukut. Inaamwo ika esaamwo war muchuloon ei otot, nge esap ina eu popun ach sipwe ngunungunungau. Sise fen kuna pwe umoumochun me mosonottamen Jiowa ra watte lap seni minne sia akkom ekieki? Iwe, ifa ussuch iei, sipwe pwal pwarata pwe sipwe tongeni witiwit fan mosonottam me likiitu lon ewe angangen afalafal? (Mark 13:10) Iei ewe fansoun sipwe tumunukich seni foffor ese pwung mi tongeni atai ach pwapwa me lukulukuoch lon pekin ngun. Iei ewe fansoun ach sipwe alapalo ach u ngeni etipetipaen an Satan we fonufan. Iwe, iei pwal ewe fansoun ach sipwe akkamwochu ewe manau mi limelimoch pwe sisap aingaua ach uoch mwen mesen Jiowa. Sipwe sopweilo le poutalo ekiek mi limengau ussun fofforun sikepwach me ti senikich ekkewe sokkun foffor ese fich ngeni emon mwan an epwe fori ngeni emon fefin are ngeni pwal mwo nge pwal emon mwan me met kana.​—Kolose 3:5.

¹⁷ Tafit a fonoukich: “Kopwe tumunuk seni song, o likitalo om lingeringer! Kosap pwisin eriaffouk, pun le sopolon mi chok ingau. Pun epwe poku ir ekkewe mi ingau; nge ekkewe ra witi ewe SAMOL repwe fonueni ewe fonu.” (Kol Fel 37:8, 9) Ewer, fan luku sipwe tongeni witiwiti ewe fansoun​—iei a fen arapoto​—lupwen Jiowa epwe toluelo seni fonufan fofforingau meinisin me ir mi wisen forir.

“A Ekis Chok Fansoun”

18, 19. Ifa ussun Kol Fel 37:10 a apochokkulok?

¹⁸ “A ekis chok fansoun, o ir ekkewe mi ingau resap chuen nom; inaamo ika ka nengenifichi lon leenier, nge resap chuen chok nom ikewe.” (Kol Fel 37:10) Ekkena kapas ra fokkun apochokkulakich iei atun sia feffetal ngeni muchuloon ei otot me mwiringauen an aramas pwisin nemenemenir lukun Jiowa! Ra sopwongau meinisin ekkewe sokkun muu are nemenem aramas ra fen sotuni. Iwe iei, sia arap ngeni ewe fansoun an Kot we nemenem epwe liwinsefal, ewe Muun Jiowa fan poun Jises Kraist. Epwe unusen nemeni mwokutukutun fonufan me limetau meinisin ekkewe mi u ngeni an Kot we Muu.​—Taniel 2:44.

¹⁹ Lon ewe fonufan sefo fan an Kot we Muu, inaamwo ika kopwe kutta “emon mi ingau” nge kosap kuna. Enlet, lon ena fansoun epwe muttir ninnilo chokewe mi u ngeni Jiowa. Iwe, esap chuen wor emon mi fiu ngeni an nemenem are ese anomu pwisin i fan an Kot nemenem. Meinisin chon orum kewe repwe tipeeufengen lon ar mochen apwapwai Jiowa. A ifa me watten ewe lukulukoch epwe fisita​—esap wor loks are minen pinipinin asam are asamocho, iwe, esap pwal wor minne epwe atai ach unusen lukuluk me pwapwa!​—Aisea 65:20; Mika 4:4; 2 Piter 3:13.

20, 21. (a) Io “ekkewe mi mosonoson” lon Kol Fel 37:11, me ia repwe kuna me ia “watten ar kinamwe”? (b) Ikkefa ekkewe feioch sipwe kuna ika sipwe appiru ewe Tafit mi Lapalap?

 ²⁰ Iwe, “ekkewe mi mosonoson repwe fonueni ewe fonu.” (Kol Fel 37:11a) Nge io ekkena “chon mosonoson”? Ewe kapas mi affou ngeni “mosonoson” a popu seni eu kapas mi wewe ngeni “atekisonatiu.” Ewer, “ekkewe mi mosonoson” a wewe ngeni ir kewe mi witiwit won Jiowa fan tipetekison pwe epwe apwungalo meinisin ekkewe pwungungau mi fen toriir. “Repwe pwapwaesini watten ar kinamwe.” (Kol Fel 37:11b) Pwal mwo nge lon ei fansoun, sia kukkuna watten kinamwe lon ewe paratis lon pekin ngun mi nom ren ewe mwichefelin Chon Kraist mi enlet.

²¹ Inaamwo ika sisaamwo ngaselo seni osukosuken manauach, nge sia kan alillisfengen me aururu ekkewe mi letipechou. Mwiriloon, a mammarita menemenoch mi enlet lein noun Jiowa kewe aramas. Ren tong, ekkewe brother mi seikita ngeni ewe wis chon mammasa ra awora alillis ren minne a lamot ngenikich lon pekin ngun​—me fan ekkoch, pwal mwo nge lon pekin inis, iwe, a atufichikich le likiitu atun sipwe kuna riaffou-mwaal fan iten minne mi pwung. (1 Tesalonika 2:7,11; 1 Piter 5:2, 3) A ifa me watten aucheaan ei kinamwe! Mei pwal wor ach apilukulukun manau esemuch lon ewe Paratis mi kinamwe mi chok arapoto. Iwe, sipwe appiru ewe Tafit mi Lapalap, Kraist Jises, iwe, an tinikken fan iten Jiowa a amwokutu i an epwe angang ren tuppwol tori muchuloon manauan. (1 Piter 2:21) Ren ach sipwe fori ena, sipwe pwapwa me mwareiti ewe emon sia kan meseikkeiti, ina I ach Kot, Jiowa.

Kopwe Tongeni Polueni?

• Ikkefa ekkewe lesen en mi fen kaeo seni Kol Fel 37:1, 2?

• Ifa ussun kopwe tongeni “pwapwaesini Jiowa”?

• Ifa ekkewe pisekin pwarata pwe sipwe tongeni eani lukuluk won Jiowa?

[Ekkewe Kapas Eis fan Iten ewe Lesen]

[Sasing lon pekin taropwe 21]

Chon Kraist resap ‘lolowoiti ekkewe chon fofor-mwaal’

[Sasing lon pekin taropwe 22]

“Luku Jiowa o fori minne mi murinno”

[Sasing lon pekin taropwe 23]

Pwapwaesini Jiowa ren om kopwe alapalo om sile ussun i ukukun om tufich

[Sasing lon pekin taropwe 24]

“Ekkewe mi mosonoson repwele fonueni ewe fonufan”