Lon Fansoun Mwach, Esap Wor Atai Alluk Won Fonufan

ANCHANGEI, ika en mi tongeni, eu fonufan ikkewe ie esap wor chon atai alluk ie! Esap chuen wor lamoten polis, leenien kalapus, are ekkewe kokkot mi mommong fan iten ar repwe apwungu ekkewe chon atai alluk. Epwe eu fonufan ikkewe ie aramas meinisin repwe sufoliiti manauen me pisekin ekkewe ekkoch ie. En mi ekieki pwe esap tufich an epwe fis? Eni epwe ina ussun om ekiek, nge ei siwil mi amwarar a wesewesen pwonetiu lon ewe Paipel. Pwata sise kaeo met ewe Paipel a oesini ussun atai alluk me ekkewe ekkoch fofforingau won ei fonufan?

Lon ewe puken Kol Fel, sia alleani: “Kosap pwisin eriaffouk pokiten ekkewe aramas mi ingau, kosap lolowo ngeni ekkewe chon fofor-mwal! Pun repwe muttir pwaselo usun chok fetil, o pwal usun chok chon petewel mi arauarau. Nge ir ekkewe mi mosonoson repwele fonueni ewe fonu, o repwe pwapwaesini chommongun ar pisek.” (Kol Fel 37:1, 2, 11) Pwungun pwe ese wor emon epwe tongeni pinei Kot pwonuetaan ei pwon me ekkewe ekkoch an Kot kewe pwon mi murinno.

Kot epwe aea an we Muu pwe epwe efisata ekkeei feioch. Lon ewe iotekin ach we Samol, Jises Kraist a aiti ngeni noun kewe chon kaeo pwe repwe iotek pwe ena Muu epwe feito me letipen Kot epwe pwonuta “won fonufan usun chok lon lang.” (Mattu 6:9, 10) Ekiselo chok, fan ena Muu, esap wor emon won fonufan epwe ekiekin atai alluk pokiten woungau, nemenemengau, are an aramas akkapwonueta chok pwisin letiper. Nge, an Kot we Kapas a apasa: “Sokkun mongo mi chommong epwe nonnom lon ewe fonu; epwe paepaefeil won ekkewe chukuchukuta.” (Kol Fel 72:16) Iwe, Jiowa Kot epwe awora ngeni aramasen fonufan meinisin ekkewe mettoch mi murinno, nge esap muchulo. Iwe, minne a lamot lap seni ena, an aramas kkewe foffor repwe popu seni ar tongei Kot me chon orur kkewe, iwe, esap fissefal osukosuk won ei fonufan pokiten chon atai alluk.