“Oupwele Kilisou”
“Oupwele Kilisou”
“Iwe, ewe kinamwe an Kraist epwe nemeni lon letipemi . . . Iwe, oupwele kilisou.”—KOLOSE 3:15.
1. Ifa sokkofesennin lefilen ewe mwichefelin Chon Kraist me ewe fonufan fan nemenien Satan?
LON EKKEWE 94,600 mwichefelin Chon Pwarata Jiowa won unusen fonufan, sia kuna eu ngunun kilisou. Iteiten mwich meinisin ra poputa me muchulo ren eu iotek mi kapachelong kapasen kilisou ngeni Jiowa. Fan chommong, sipwe rongorong “kilisou chapur,” “mi nonnom reom,” me met kana seni ekkewe kukkun me ekkewe watte, ekkewe mi keran choni Chon Pwarata Jiowa me pwal ekkewe mi chonir seni chok me lom, fansoun repwe mwichfengen me pwapwafengen. (Kol Fel 133:1) A ifa me watten sokkofesennin ena seni maichaan ir kewe ‘rese silei Jiowa me rese alleasochisi ewe kapas allim’! (2 Tesalonika 1:8) Sia nonnom lon eu otot ikewe aramas rese meefi kilisou ie. Iwe, sise mairu ren ena lupwen sipwe ekieki ussun io ewe koten ei fonufan—Satan ewe Tefil, ewe mi akkaeuin apochokkulata ewe ekiekin apwonueta pwisin letipach, iwe, an lamalam tekia me ngunun lukumach a etipetipa aramas meinisin!—Jon 8:44; 2 Korint 4:4; 1 Jon 5:19.
2. Ifa ewe kapasen ourour a lamot ach sipwe alleasochis, me ikkefa ekkewe kapas eis sipwe kaeo ussun?
2 Pokiten sia nonnom lon an Satan fonufan, a lamot ach sipwe tumunu pwe an kkewe ekiek-mwaal esap aingauelo ach ekiek. Lon ewe aewin senturi, ewe aposel Paul a achema ngeni ekkewe Chon Kraist lon Efisus: “Oua fetal lon lom, lon pungun ei fonufan, lon pungun i mi samoluni manamanen asapwal, ewe ngun mi akangang iei lon ekkewe aramas mi lukumach. Nge lom, kich meinisin sia pwal manaueni ei sokkun manau lon mochenian fitukach, sia chok apwonueta mochenian fitukach o pwisin letipach. Iwe, lapalapen manauach a wewe ngeni lapalapen manauen ekkewe repwe kuna liwinin ingau, usun chok aramas meinisin.” (Efisus 2:2, 3) Mei pwal enlet ren chommong ikenai. Iwe, ika ina, epwe ifa ussun sipwe akkamwochu eu ngunun kilisou? Met sokkun alillis Jiowa a kan awora ngenikich? Ifa ussun sipwe tongeni pwarata pwe kich mi enletin meefi kilisou?
Ekkewe Popun Sipwe Kilisou
3. Met popun sia kilisou ngeni Jiowa?
3 Sipwe kilisou ngeni Jiowa Kot, ewe chon Forikich me Popun manauach, akkaewin lupwen sipwe ekieki ussun chommongun an liffang ngenikich. (Jemes 1:7) Iteiten ran, sia apasa ach kilisou ngeni Jiowa pwe sia manau. (Kol Fel 36:9) Lupwen sipwe nennefetal ekis meinisin, sia kukkuna chommong forien Jiowa kewe, awewe chok, ewe akkar, ewe maram, me ekkewe fu. Chommongun minen fonufan mi lamot ngeni manauen aramas (minerals), masouen lon asepwal sia ngasangaseri a ukukoch nofitin, me kokkotun ekkewe mettochun fonufan me lang mi rokopwel, ir meinisin ra pwarata watten ach liwinimmang ngeni Semach mi tong lon lang. King Tafit a eani ewe kol: “Samol, ai Kot, ka fen alapalo om kewe fofor mi amwarar o om kewe ekiek ngenikem; esor emon mi usun chok en! Are upwe pwarata o aporausa usun foforum kewe, repwe chommong seni minne aramas ra tongeni alleani.”—Kol Fel 40:5.
4. Pwata sipwe kilisou ngeni Jiowa ren ewe chiechifengen sia pwapwaesini lon ach kewe mwichefel?
4 Inaamwo ika sise wesewesen nonnom lon eu paratis, nge noun Jiowa kkewe chon angang ikenai ra pwapwaesini ar nonnom lon eu paratis lon pekin ngun. Lon ach kewe Kingdom Hall me ach kewe mwichelap, sia kuna uwan an Kot we ngun mi angang lon chienach kewe chon luku. Pwungun pwe lupwen repwe afalafal ngeni aramas mi lukulukummang are esor ar lamalam, ekkoch chon Pwarata ra aitir alon Paul lon noun we taropwe ngeni ekkewe chon Kalesia. Ra akkom kapas ussun “ekkewe angangen fituk” me eisini ekkewe chon auseling met ra fen kukkuna. (Kalesia 5:19-23) Lap ngeni aramas meinisin ra tipeeu pwe a ina ussun lapalapen aramas ikenai. Lupwen ra aitir uwan an Kot we ngun mi fel [lon Kalesia] me etiwaar ngeni ewe Kingdom Hall lon sopwuur we pwe repwe pwisin kuna pisekin pwarata, chommong ra muttir apasa: “Enlet, Kot mi nonnom remi.” (1 Korint 14:25) Iwe, esap chok pwapwalo lon ewe Kingdom Hall. Ese lifilifil ia kopwe sailo ie, nge lupwen kopwe chuuri emon me lein lap seni ekkewe wonu milion Chon Pwarata Jiowa, kopwe pwal kuna ena ngunun pwapwa me chengel. Enlet, ei chiechifengen mi aufichikicheta, ina eu popun ach sipwe kilisou ngeni Jiowa, ewe emon mi awora an we ngun pwe epwe tufichin fis.—Sefanaia 3:9; Efisus 3:20, 21.
5, 6. Ifa ussun sipwe tongeni pwarata ach kilisou fan iten an Kot we liffang mi lapalap seni meinisin, ewe moon kepich?
5 Ewe liffang mi lapalap seni meinisin, ewe liffang mi murinno seni meinisin Jiowa a ngenikich, ina Noun we, Jises; ren i, Kot a awora ewe moon kepich. Ewe aposel Jon a makkei: “Are iei usun an Kot tongeikich, iwe, sipwe fakkun tongfengen lefilach.” (1 Jon 4:11) Ewer, sipwe pwarata ach kilisou ren ewe moon kepich, esap chok ren ach sipwe kapas ussun ach tong me kilisou ngeni Jiowa, pwe pwal ren ach sipwe manaueni ewe sokkun manau mi pwarata tong ngeni ekkewe ekkoch.—Mattu 22:37-39.
6 Sipwe tongeni alapalo ach sile ussun lapalapen ach pwarata kilisou ren ach sipwe kaeo ussun an Jiowa kewe foffor ngeni Israel lom lom. Ren ewe Alluk a ngeni ena muu ren Moses, Jiowa a aiti ngeni ekkewe aramas chommong lesen. Ren “lapalapen tipatchem me enlet ra nom lon ewe alluk,” sipwe tongeni kaeo chommong lesen mi alisikich le apwonueta an Paul we kapasen fon: “Iwe, oupwele kilisou.”—Rom 2:20; Kolose 3:15.
Ulungat Lesen Seni ewe Allukun Moses
7. Ifa ussun ewe kokkotun leengol a atufichi an ekkewe chon Israel pwarata ar kilisou ngeni Jiowa?
7 Lon ewe Allukun Moses, Jiowa a aiti ngeni Israel ulungat alen pwarata enletin ar kilisou fan iten an kkewe foffor-murinno. Aeuin, mei alluk pwe aramas repwe watiu leengol. Eu na aengolun uwaan ewe fonu, fengen me “leengol seni ekewe kow me sip meinisin,” repwe “pin fan iten ewe Samol mi Lapalap.” (Lifitikos 27:30-32) Lupwen ekkewe chon Israel ra alleasochis, Jiowa a fokkun efeiochur. “‘Oupwe uwato unusen ami leengol lon ewe imwenfel, pwe epwe wor mongo lon imwei we. Ren ei oupwe sotuniei ika usap suki ekewe asammwachon lang fan itemi o ninatiu womi chomong sokun feioch mi somwola.’”—Malakai 3:10.
8. Met a asokkolo an aramas eani asor seni lon pwisin letiper me ewe kokkotun leengol?
8 Oruuan, lukun ewe allukun leengol, Jiowa a akkota pwe ekkewe chon Israel repwe tongeni eani asor seni lon letiper. A alluku ngeni Moses an epwe apasa ngeni ekkewe chon Israel: “Lupwen oupwe eni mongon ewe fanu, oupwe aimwuela eu kinikin seni, pwe eu asor ngeni ewe Samol mi Lapalap.” Ekkoch ekkewe “foun wiich mi fo” repwe “eani asor ngeni ewe Samol mi Lapalap,” iwe, repwe ina ussun seni eu tappin aramas tori eu tappin. Nengeni pwe ese titchiki ifa ukuukun watten ewe asorun mwenuwa. (Numperis 15:18-21) Nge lupwen ekkewe chon Israel repwe eani eu asorun kilisou, a alukuluk ngenir pwe repwe kuna feioch seni Jiowa. Sia pwal kuna ena kokkot lon an Isikiel we langepwi ussun ewe imwenfel. Sia alleani: “Iwe, mwen uan fotar ira meinisin, pwal sokun asor meinisin ra uwato repwe an ekewe souasor. Repwe pwal ngeni ekewe souasor mwen uwaer pilawa seni mwen uan fotar wiich, pwe feioch epwe nonom won imwer.”—Isikiel 44:30.
9. Ifa ewe lesen Jiowa a awora seni ewe kokkotun rusi minne ekkewe chon ras ra likitalo?
9 Aulungatin, Jiowa a akkota ewe fofforun rusi minne ekkewe chon ras ra likitalo. Jiowa a alluku ngeniir: “Iwe, lupwen oupwe kini resin fanuemi, ousap kiniela uan tanipimi tori kiannin, ousap pwal rusifengeni mine a turutiu seni kiniemi wiich. Ousap kiniela uan fotami iran wain meinisin, ousap pwal rusi ekewe uan iran wain mi morotiu lon tanipimi. Oupwe likitirela fan iten ekewe chon woungau me ekewe chon ekis, pun ngang ewe Samol mi Lapalap ami we Kot.” (Lifitikos 19:9, 10) Pwal ussun chok ewe oruuan, ese titchik aukuukun watten minne epwe eani asor. Emon me emon chon Israel epwe pwisin filata ifa ukuukun watten fotar epwe likiti ngeni ekkewe mi woungau. King Salomon, ewe king mi tipachem, a awewei: “Eman aramas mi kichioch ngeni chon woungau a fangala ngeni ewe Samol mi Lapalap, nge i epwe liwini ngeni liwinin an fofor.” (An Salomon Fos 19:17) Iwe, Jiowa a aitir umoumoch me tong ngeni ekkewe mi osupwang.
10. Met mwiriloon lupwen ekkewe chon Israel rese pwarata kilisou?
10 Jiowa a efeiochu ekkewe chon Israel lupwen ra alleasochisi le uwoto leengol, pwal pwisin eani asor seni lon letiper, me awora alillis ngeni ekkewe mi woungau. Nge lupwen ekkewe aramasen Israel rese pwarata ar kilisou, a pout senir an Jiowa chen. Iwe, a emmwen ngeni kiteter me lo, lo, ar repwe eolo. (2 Kronika 36:17-21) Iwe, ikkefa ekkewe lesen ngenikich?
Pwarataan Ach Kilisou
11. Ifa ewe akkaewin alen pwarata ach kilisou ngeni Jiowa?
11 A pwal kapachelong eu “asor” lon ach mwareiti Jiowa me pwarataan ach kilisou.” Pwungun, kich Chon Kraist sise nom fan ewe Allukun Moses, iwe, sisap eani asorun man are fotach kewe. (Kolose 2:14) Iwe nge, ewe aposel Paul a pesei ekkewe chon Ipru Chon Kraist: “Iwe, fan iten Jises, sipwe iseta ach asorun mwareiti Kot, iei ewe asor: uwan tinauach mi mwareiti itan.” Ren ach aea tufichich me pisekich kewe le iseta ach asorun mwareiti Kot lon ewe angangen afalafal are fan iten “ewe mwich mi lap,” pwiich kkewe Chon Kraist, sipwe tongeni pwarata ach kilisou ngeni Semach we mi tong lon lang, Jiowa Kot. (Kol Fel 26:12) Ren ach sipwe fori ena, met sipwe tongeni kaeo seni lapalapen an ekkewe chon Israel ra pwarata ar kilisou ngeni Jiowa?
12. Ren ach sipwe ekieki ussun wiisach, wiisen chon Kraist, met sia kaeo seni ewe kokkotun leengol?
12 Aewin, ussun sia fen apasa, esap filien aramas ika repwe apwonueta ewe kokkotun leengol; a wor wiisen emon me emon chon Israel ar repwe apwonueta. Iwe, kich Chon Kraist, mei wor wiisach ach sipwe fiffiti ewe angangen afalafal me fiffiti ekkewe mwich an Chon Kraist. Esor ach pwung ach sipwe filata ika sipwe foffori ekkena mettoch are sisap. Lon an we oesini mi lapalap ussun ewe fansoun sopwolon, Jises a apasa: “Iwe, ei kapas allim usun ewe mu epwe esilefeili won unusen fonufan, pwe epwe pwar ngeni einang meinisin. Iwe, a ina sopolon.” (Mattu 24:14; 28:19, 20) Ren an chon Kraist kkewe mwich, ewe aposel Paul a mak fan emmwenien ngunun Kot, a era: “O sipwe ekiekifichi usun ach sipwe apochokkula emon me emon lefilach lon tong o fofor-murinno. O sisap ukutiu seni ach mwichfengen, usun ekkoch ra fori, nge sipwe alolofengennikicheta, o alapalo ach achocho ngeni, pwe oua nengeni pwe ewe Ran a arapoto.” (Ipru 10:24, 25) Sipwe pwarata ach kilisou ngeni Jiowa lupwen sia nguuri wiisach ren pwapwa, wiisen ach sipwe afalafal me mwichfengen me pwich kewe iteitan, fan ewe ekiek pwe ina eu wis mi sokkolo aucheaan.
13. Ifa ewe lesen sia kaeo seni ewe kokkotun an aramas eani asor me ren pwisin letiper me ewe kokkotun rusi minne ekkewe chon ras ra likitalo?
13 Pwal eu, sipwe feioch seni ach kaeo pwal ruu kokkot ekkewe chon Israel ra pwarata ar kilisou ren—an aramas pwisin filata minne repwe asoresini me ewe fofforun rusifengenni minne ekkewe chon ras ra likitalo. Lon ewe kokkotun leengol, mi affat ewe ukuukun mettoch aramas repwe asoresini, nge lon ewe kokkotun an aramas pwisin filata minne repwe asoresini me ewe kokkotun an ekkewe chon ras likitalo minne rese rusifengenni fan iten ekkewe mi osupwang, ese affat lon ewe alluk minne emon epwe asoresini. Nge ra mut ngeni ukuukun alollolun kilisou lon letipen emon chon angang ngeni Jiowa an epwe amwokutu i. Iwe, pwal ussun chok ena, inaamwo ika sia weweiti pwe iei wiisen iteiten chon angang ngeni Jiowa ach sipwe fiffiti ewe angangen afalafal me fiffiti ekkewe mwich an Chon Kraist, nge sia kan foffori ren unusen letipach seni ach mochen fori? Sia ekieki pwe ra atufichi ach sipwe pwarata ach kilisou ren mettoch meinisin Jiowa a fen fori fan asengesich? Kich mi fiffitir ukukun ach tufich? Are sia chok fori fan osopwisek pun ina chok wiisach? Pwungun pwe emon me emon epwe pwisin polueni ekkeei kapas eis. Ewe aposel Paul a apasa: “Nge iteiten aramas epwe pwisin pi en me angangan; iwe, itan epwe popu seni pwisin i, nge esap seni emon.”—Kalesia 6:4.
14. Met Jiowa a kutta senikich lon ach angang ngeni i?
14 Jiowa Kot a sileifichi lapalapen nonnomun manauach. A silei ifa ukuukun ach tufichin fori mettoch. Iwe, a aucheani ekkewe asor, watte me kukkun, noun kewe chon angang ra eani seni lon letiper. Esap kutta pwe epwe lollo chok minne sipwe asoresini, iwe, esap pwal tufich ena. Lupwen a kapas ussun an aramas repwe eani liffang, ewe aposel Paul a ereni ekkewe chon Korint Chon Kraist: “Pun are emon mi mochen, epwe achengichengilo ren minne a wor ren, sap ren minne esor ren.” (2 Korint 8:12) Ei kapasen emmwen a pwal weneiti ach angang ngeni Kot. Sap minne ukuukun watten minne sipwe fori epwe nemeni ika Jiowa epwe etiwa ach angang ngeni, nge epwe alongolong won lapalapen ach foffori—ren chengel me pwal ren unusen letipach.—Kol Fel 100:1-5; Kolose 3:23.
Amaarata me Akkamwochu ewe Ngunun Pioneer
15, 16. (a) Ifa ewe riri lefilen ewe angangen pioneer me ach kilisou? (b) Ifa ussun ekkewe rese tongeni pioneer repwe tongeni pwarata ewe ngunun pioneer?
15 Sipwe tongeni pwarata kilisou ngeni Jiowa ren ach sipwe fiti ewe angangen afalafal full-time, iwe, epwe atoto rech pwapwa me menemenoch. Pokiten ar tongei Jiowa me ar kilisou fan iten an kirokiroch, chommong noun kkewe chon angang mi fen fangelo manauer ngeni ra siwili nonnomun manauer fan iten ar repwe alapalo ar angang ngeni Jiowa. Ekkoch ra tufichin fiti ewe angangen regular pioneer, iwe, ra eani 70 aua iteiten maram lon ewe angangen afalafala ewe kapas allim me aiti ngeni aramas ewe enlet. Ren pwal ekkoch, ese tufich ena pokiten nonnomun manauer, ina pwata fan ekkoch ra akkota ar fansoun pwe repwe fiti ewe wiis auxiliary pioneer ukukun 50 aua fan eu maram.
16 Nge ifa ussun chommong chon angang ngeni Jiowa mi rese tongeni fiti ewe angangen regular are auxiliary pioneer? Repwe tongeni pwarata ar kilisou ren ar amaarata me akkamwochu ewe ngunun pioneer. Ifa ussun? Ren ar repwe apochokkulata ekkewe mi tongeni pioneer, ren ar repwe fotukalong lon letipen nour kewe ar mochen fiti ewe angangen pioneer, me pwal ren ar repwe fiffiti ewe angangen afalafal ukukun ar tufich. Minne sipwe fori lon ewe angangen afalafal epwe alongolong won alollolun ewe kilisou lon letipach ren minne Jiowa a fen fori me lom, minne a foffori iei, me pwal minne epwap fori fan asengesich.
Pwarata Kilisou Ren “Om Fang ngeni seni Woum”
17, 18. (a) Ifa ussun kopwe tongeni pwarata om kilisou ren “om fang ngeni seni woum”? (b) Met Jises a aapsa ussun asorun ewe fefin mi ma seni puluan, iwe, pwata?
17 An Salomon Fos 3:9, a apasa: “Kopwe asamolu ewe Samol mi Lapalap ren om fang ngeni seni woum, pwal ren mwen kiniom uan ira meinisin.” Noun Jiowa kewe chon angang rese chuen eani asor ewe leengol. Iwe nge, Paul a mak ngeni chon ewe mwichefelin Korint: “Emon me emon epwe fori usun minne a filata lon pwisin letipan, sap usun chok minen maicha are minen eriani; pun Kot a tongei ir mi pwapwaiti fangelo.” (2 Korint 9:7) Ach pwisin awora monien alillis fan iten ewe angangen afalafala ewe Muu won unusen fanufan a pwal pwarata ach kilisou. Ach meefi kilisou epwe amwokutukich ach sipwe foffori ena, eni sipwe isetiu och iteiten wiik, ussun chok ekkewe Chon Kraist me lom ra foffori.—1 Korint 16:1, 2.
18 Esap ukuukun ewe moni sipwe liffang epwe pwarata ach kilisou ngeni Jiowa. Nge epwe pwapwalo lon ach ngunun fangelo. Iei ewe mettoch Jises a kuna lupwen aramas ra isenalong ar liffang lon ewe pworun iseis moni lon ewe imwenfel. Lupwen Jises a kuna emon fefin mi woungau a “isenalong ruu moni kisikis,” a apasa: “Enlet, ei fefin mi woungau mi ma puluan a isenalong lap senir meinisin. Pun ir meinisin ra isenalong seni ar pisekisek, nge seni chok an neminan woungau a fen isenalong pisekin meinisin minne epwe manau ren.”—Luk 21:1-4.
19. Pwata epwe murinno ach sipwe atittina ekkewe alen pwarata ach kilisou?
19 Amwo ita ei lesen ren ifa ussun sipwe tongeni pwarata ach kilisou epwe amwokutukich ach sipwe atittina ach kewe fofforun pwarata ach kilisou. Sipwe tongeni alapalo ach asorun mwareiti Jiowa me pwal awora monien alillis fan iten ewe angangen afalafal won unusen fonufan? Ukuukun ach sipwe fori ena, sipwe tongeni lukuluk pwe Semach we mi tong me kisaseu, Jiowa, epwe fokkun pwapwa pwe sia pwarata ach kilisou ngeni.
En mi Chechemeni?
• Ikkefa ekkewe popun sipwe kilisou ngeni Jiowa?
• Ikkefa ekkewe lesen sia kaeo seni ewe kokkotun leengol, ewe kokkotun an aramas eani asor me ren en me letipan, me ewe kokkotun rusi minne chon ras ra likitalo?
• Ifa ussun sipwe amaarata ewe ngunun pioneer?
• Ifa ussun kopwe tongeni pwarata om kilisou ngeni Jiowa ren “om fang ngeni seni woum”?
[Ekkewe Kapas Eis fan Iten ewe Lesen]
[Sasing lon pekin taropwe 27]
“Meinisin sokkun liffang mi murinno, o meinisin sokkun minen liffang mi unusoch, ra chok seni won”
[Sasing lon pekin taropwe 28]
Ikkefa ekkewe ulungat lesen seni ewe Alluk a pwapwalo ikei ie?
[Sasing lon pekin taropwe 30]
Ikkefa ekkewe asor sipwe tongeni eani?