An Io Kewe Pwon Kopwe Tongeni Lukuluk Won?

“AN kewe pwon ra fokkun lapalap, ussun chok lapalapan me loom mi lapalap; nge an kewe foffor ra ussun chok lapalapan iei, chero.”​—King Henry the Eighth, makkeien William Shakespeare.

Ekkewe pwon mi lapalap Shakespeare a mak ussun ir an emon nouwisin lamalam lon England itan Thomas Wolsey, emon mi foummong lon muun England atun ewe 16en senturi. Ekkoch repwe apasa pwe an Shakespeare awewe a pwal weneiti lape-ngeni ekkewe pwon sia rongorong ikenai. Fan chommong aramas ra rongorong chommong pwon nge ekkewe pwon rese pwonuta. Ina popun sia tongeni weweiti ewe popun ra tipemwaramwareiti ekkewe pwon meinisin.

Lichipung Fan Chommong

Atun ewe maun lon ekkewe fonuen Balkan a poputa lon 1993, ewe United Nations Security Council a apasa pwe ewe telinimw itan Srebrenica lon Bosnia epwe “eu leeni fan am tumun.” A ussun ita pwe aramas mi tongeni lukuluk won minne chommong muu ra pwon ngeniir. Fite ngerou chon Muslim mi fen su seni fonuer ra lukuluk won ena pwon. Nge, ena pwon ese tongeni pwonuta. (Kol Fel 146:3) Fan July, 1995, sounfiu ra tooki ewe fonu me ra asuolo ekkewe sounfiu seni UN me ra maunei ewe telinimw. Lap seni 6,000 chon Muslim rese chuen nom, me 1,200 chon Muslim ra nniniilo nge sap ir sounfiu.

A tepetep ekkewe pwon rese pwonuta lon kinikinin manauen aramas meinisin. Aramas ra meefi pwe ra fen tupulo ren ekkewe “chommong appio mi chofana mi etipetipeer le mooni sokkopaten pisek,” ra rongorong ikenai. Ra lukulukummang pokiten ekkewe “fite ngerou pwon canditate ra pwonei atun ar campaign nge rese pwonuta.” (The New Encyclopædia Britannica, Volume 15, pekin taropwe 37) Nouwisin lamalam rese apwonueta ar kewe pwon le tumunu ekkewe soulang nge ra kirikiringau ngeniir. Pwal mwo nge lein ekkewe aramas mi eani wiiser sense me tokter​—chokkewe ra ussun ita tongei me alisi aramas​—mei wor chokkewe mi tumunungau ngeni wiiser ren ar churi are pwal mwo nge nnielo ekkewe aramas ra ussun ita alisiir. Ina popun ewe Paipel a erenikich pwe sisap lukuluk won ekkewe  poraus meinisin sia rongorong!​—An Salomon Fos 14:15.

Ekkewe Pwon Mi Pwonueta

Pwungun pwe chommong aramas ra achocho le apwonueta ar kewe pwon, me fan ekkoch a mmen watte met ra fangolo fan iten ar repwe apwonuureta. (Kol Fel 15:4) Ar kapas a ussun chok eu pwon mi nukunuk, repwe apwonueta. Ekkoch ra mochen apwonueta ar kewe pwon. Ra mochen apwonuureta nge rese tongeni. Nonnomun aramas mi tongeni ataielo ekkewe kokkot mi fokkun murinno.​—Än Salomon Afalafal 9:11.

Ese lifilifil ewe popun nge, a weires ngeni chommong aramas ar repwe lukuluk won an emon pwon. Eu kapas a ppiita: Mei wor ekkoch pwon sia tongeni lukuluk won? Ewer. Sia tongeni lukuluk won ekkewe pwon lon an Kot we kapas, ewe Paipel. Pwata kese kaeo met ewe lesen mwirin ei a apasa? Neman om luku mwirin ewe kaeo epwe ussun chok lukuen fite milion aramas, pwe sia tongeni lukuluk won an Kot kewe pwon.

[Credit Line]

AP Sasing​/Amel Emric