Ekkewe Pwon Kopwe Tongeni Lukuluk Won

NOUN Kot we soufos Maika a silei pwe a wor chommong pwon sise tongeni lukuluk won. Lon ranin we, aramas rese tongeni lukuluk won pwal mwo nge an chiechier kewe pwon. Maika a ouroura aramas: “Kosap anomu om lukuluk won chon arum, kosap pwal luku chiechiom. Kopwe pwal tumwunu mine ka apasa me fan mesen pwuluom.”​—Mika 7:5.

Maika a tipemwaramwareiti ekkewe pwon meinisin pokiten nonnomun fonuan? Aapw! A pwari pwe a unusen lukuluk won an Jiowa Kot kewe pwon. Maika a makkei: “Nge ngang upwe neta ngeni ewe Samol mi Lapalap. Upwe osukusuku Kot ai we Chon Amanau. Ai Kot epwe auselingaei.”​—Mika 7:7.

Met popun a mmen watte an Maika lukuluk won an Kot kewe pwon? Pokiten an silei pwe Jiowa a apwonueta an kewe pwon fansoun meinisin. Mettoch meinisin Kot a pwon ngeni samasamen Maika me loom a fokkun fisita. (Mika 7:20) An Jiowa tuppwol me loom a ngeni Maika eu longolong fan  iten an lukuluk won an Kot kewe pwon lon mwach kkan.

“Esap Wor Eu Me Leir Esap Pwonueta”

Ren chok awewe, Maika a silei pwe Jiowa a fen angasalo Israel seni ar kichiniwel lon Isip. (Mika 7:15) Josua a fen kuna ei ngas me a pesei chienan chon Israel ar repwe eani lukuluk won an Kot kewe pwon meinisin. Pwata? Josua a achema ngeniir: “Ami meinisin oua silei seni lelukemi me letipemi, pwe ewe Samol mi Lapalap a ngenikemi ekewe mettoch mi murina meinisin a pwon ngenikemi. Iteiten ekewe pwon a eani ngenikemi ra pwonueta, nge esap wor eu me leir esap pwonueta.”​—Josua 23:14.

Chon Israel ra silei pwe Jiowa a fen fori mettoch mi amwarar fan iter. A apwonueta an pwon ngeni semelaper Eperiam, emon mi niueiti Kot, pwe mwirimwirin kewe repwe chommongolo me choochoor epwe ussun chok choochoon ekkewe fuun lang, me repwe fonueni ewe fonuen Kenan. Jiowa a pwal ereni Eperiam pwe mwirimwirin kewe repwe riaffou 400 ier nge repwe liwiniiti Kenan ‘lon aruanun tettel mwirimwirin.’ Iwe, ekkeei mettoch meinisin ra fen fisita.​—Keneses 15:5-16; Ekistos 3:6-8.

Chon Isip ra etiwaochu Israel lon ranin noun Jekop we Josef. Nge mwirin, ra nouni Israel kichiniwel me ra erianiir le fori angang weires fan riaffou. Nge, mwirin a fen wor ruaanu tettelin aramas, poputa seni ewe fansoun ar feilong Isip, mwirimwirin Eperiam ra fen ngaselo seni an Isip eriaffouur, ussun chok minne Kot a pwon ngeniir. *

Ren 40 ier mwirin ena fansoun, Jiowa a chuen anneta ngeni chon Israel pwe a apwonueta an kewe pwon fansoun meinisin. Lupwen chon Amelek ra tooki Israel, Kot a fiu fan iten noun kewe aramas me a tumunur. A fen atufichi manauer ren kaworen mettoch meinisin ra osupwang ren lon ewe 40 ier ra fetalfeil lon ewe fonu poon. Lo, lo, lo, ra fonueni ewe Fonu Mi Pwonetiu. Lupwen Josua a enniwili fofforun Jiowa kewe ngeni mwirimmwirin Eperiam, a tongeni apasa fan an lukuluk: “Ekewe pwon meinisin ewe Samol mi Lapalap a eani ngeni ekewe chon Israel ra pwonueta. Esap wor eu me leir esap pwonueta.”​—Josua 21:45.

Apochokkula Om Lukuluk Won An Jiowa Kewe Pwon

Ifa ussun en kopwe apochokkula om lukuluk won an Jiowa kewe pwon ussun chok Maika me Josua ra fori? Iwe, ifa ussun ka fen apochokkula om lukuluk won aramas? Kopwe kaeo ussur ren ukuukun om tufich. Ren chok awewe, kopwe tongeni kaeo ukuukun ar tuppwol ren om nengeni ifa ussun ra apwonueta ar kewe pwon. Ren lapeloon om sileer, om lukuluk wor a pwal lapelo. Iwe, epwe pwal ina ussun om apochokkula om lukuluk won an Kot kewe pwon.

Kopwe tongeni apochokkula om lukuluk won an kewe pwon ren om pwungupwung won forian kewe me ekkewe alluk mi nemeni ir. Chon science ra lukuluk won ekkeei alluk. Ra lukuluk won ekkewe alluk mi nemeni ifa ussun efou cell epwe aimufesen me chommongolo pwe a fisita ekkewe fite trilion cell lon inisum. Pwungun pwe ekkewe alluk mi  nemeni manaman me ekkewe mettochun lang me fonufan ra fen fisita ren emon Sou Fori Alluk sia tongeni lukuluk won. Ren enletin kopwe tongeni lukuluk won an kewe pwon, ussun chok ka lukuluk won ekkewe alluk mi nemeni forian kewe.​—Kol Fel 139:14-16; Aisea 40:26; Ipru 3:4.

Jiowa a nounou Aisea, pilon Maika we, lupwen a awewe won kokkotochun ekkewe fansoun won fonufan me ewe rokopwalin konik mi amwarar, ren an epwe affata lukulukochun an kapas. Iteiten ier a pungutiu ewe ran. Ewe ran a achochonu ewe ppwul me a atufichi an aramas amorafeili pwikil me kini uwaar. Iei ussun Jiowa a apasa: “Iwe, usun ran me snow ra pungutiu me lang, nge resap liwinta, pwe repwe mwo achonu pwul o arasi fanu o apwuku ira, epwe pwal wor fotan chon fofot me enen chon mongo, iei usun ai kapas esap liwinto rei fan pon, pwe epwe afisata mine ua tipeni o apwonueta mine ua akunou ngeni.”​—Aisea 55:10, 11.

Ekkewe Pwon Ussun Paratis Sia Tongeni Lukuluk Won

Atittinen forien Kot kewe a tongeni apochokkula lukuluk won ewe Chon Forata, nge esap naf ika ka mochen kaeo ekkewe pwon, kinikinin ekkewe “kapas” ra fen towu seni auen Kot. Ika kopwe kaeo ussur ren om kopwe lukuluk wor, kopwe wiisen atittina ewe poraus lon ewe Paipel a pop seni ngunun Kot ussun letipan fan iten ewe fonufan me ussun an kewe foffor me aramas.​—2 Timoti 3:14-17.

Ewe soufos Maika a lukuluk won an Jiowa kewe pwon. Ewe poraus mi pop seni ngunun Kot a nonnom reom a lapalap seni an Maika we. Lupwen ka alleaani ewe Paipel me ekkekiekifichi porausan, en pwal kopwe amaaraata om lukuluk pwe an Kot kewe pwon repwe pwonueta. Ekkeei pwon rese chok weneiti mwirimwirin Eperiam nge chon fonufan meinisin. Jiowa a pwon ngeni ena mwan mi niueiti i: “Chon ekewe mwu won unusen fanufan repwe feioch me ren mwirimwirum kana, pun en ka aleasochis ngeni ai kapas.” (Keneses 22:18) Ewe mi lamot seni meinisin lein ‘mwirimwirin’ Eperiam kewe ina i ewe Messaia, Jises Kraist.​—Kalesia 3:16.

Ren Jises Kraist, Jiowa epwe efeiochu chon fonufan mi alleasochis. Met Jiowa a fen pwon fan iten ach ei fansoun? Poluen ena kapas eis a fen mak lon Mika 4:1, 2: “Iwe, lon ewe fansoun epwe feito, ewe chuk ia a nom ie imwen ewe Samol mi Lapalap epwe fefeita o nukunuk, epwe pwal tekia seni chuk meinisin, nge chon ekewe mwu won fanufan repwe mwicheto ren. Iwe, chomong aramas seni ekewe mwu repwe feito o apasa, ‘Ousipwe feita won chukun ewe Samol mi Lapalap ren imwen an Jakop we Kot. I epwe aiti ngenikich mine sipwe fori, pwe sipwe tongeni fori letipan.’”

Chokkewe mi kaeo letipen Jiowa repwe “amani nour ketilas o awiliir ngeni pisekin tu pwul, nge wokur siles repwe awiliir ngeni naifen otot.” Esap chuen wor an aramas ekiekin maun. Ekiselo chok fonufan epwe masou ren aramas mi wenechar, nge esap wor emon mi mochen aniuokkusuur. (Mika 4:3, 4) Ewer, an Kot we Kapas a pwon pwe Jiowa epwe toluelo seni fonufan aramas ingau meinisin ren Muun we fan an Jises nemenem.​—Aisea 11:6-9; Taniel 2:44; Pwarata 11:18.

Pwal mwo nge chokkewe mi riaffou me malo me loom pokiten an aramas u ngeni Kot, repwe manausefal pwe repwe tongeni alamota ewe tufichin manau tori feilfeilo chok won fonufan. (Jon 5:28, 29) Setan me noun kewe timon, chokkewe ra ekkefisata foffor ingau, resap  chuen nonnom, me uwan an Atam tipis repwe morolo ren an Jises asor. (Mattu 20:28; Rom 3:23, 24; 5:12; 6:23; Pwarata 20:1-3) Iwe, met epwe fis ngeni chon fonufan mi alleasochis? Iwe, repwe kuna ewe feiochun manau esemuch ren pochokkulen inisir won eu fonufan a fen wiliiti paratis!​—Kol Fel 37:10, 11; Luk 23:43; Pwarata 21:3-5.

Mwa met ren amwararen ekkeei pwon! Nge kopwe tongeni lukuluk wor? Pwungun pwe ewer. Esap ir pwon seni aramas mi mochen alillisoch nge ese naf ar manaman le apwonueta ekkewe pwon. Ir ekkewe pwon seni ewe Kot mi Unusen Manaman, ewe Kot ese tongeni kapas chofana, ewe Kot “ese amanga an kewe pwon.” (2 Piter 3:9; Ipru 6:13-18) Kopwe tongeni unusen lukuluk won ekkewe pwon meinisin lon ewe Paipel pun ra feito seni Jiowa, ewe “Kot mi tuppwel.”​—Kol Fel 31:5.

[Pwóróus fan]

[Sasing lon pekin taropwe 6]

“Iteiten ekewe pwon a eani ngenikemi ra pwonueta, nge esap wor eu me leir esap pwonueta.”​—JOSUA 23:14

[Sasing lon pekin taropwe 4]

Jiowa a apwonueta an kewe pwon ngeni Israel lon ewe Setipar me lon ewe fonu poon

[Sasing lon pekin taropwe 7]

Jiowa a apwonueta an pwon ngeni Eperiam. Mwirimwirin, Jises Kraist, epwe wato feioch ngeni aramas