Jiowa Mi Lapalap Lon Tong Mi Tuppwol
Jiowa Mi Lapalap Lon Tong Mi Tuppwol
“Jiowa mi . . . lapalap lon kirokiroch mi tong.”—KÖLFEL 145:8, NW.
1. A ifa me watteen an Kot tong?
“KOT mi tong.” (1 Jon 4:8) Ena poraus mi achungu letipach a anneta pwe an Kot nemenem a alongolong won tong. Pwal mwo ekkewe ir rese alleasochisi Kot ra feioch seni ewe akkar me ewe ran Jiowa a awora fan an tong! (Mattu 5:44, 45) Pokiten an Kot tong fan iten ewe fonufan, pwal mwo nge chon koputan ra tongeni aier, kul ngeni, me angei manau esemuch. (Jon 3:16) Iwe nge, sia arap ngeni ewe fansoun lupwen Jiowa epwe ataielo chokkewe rese mochen ukutiu seni fofforingaueer, ewe fansoun lupwen aramas mi tongei i repwe tongeni pwapwaesini manau esemuch lon eu minefoon fonufan mi pwung.—Kol Fel 37:9-11, 29; 2 Piter 3:13.
2. Menni kinikinin an Jiowa tong a pwalo ngeni chokkewe mi fen fangolo manauer ngeni i?
2 An Jiowa tong fan iten chokkewe mi fel ngeni i a mmen auchea me a nomofoch. Ei sokkun tong a awewe won ren eu kapas lon fosun Ipru mi siwil ngeni “kirokiroch mi tong,” are “tong mi tuppwol.” King Tafit lon Israel loom a fokkun aucheaani an Kot kirokiroch mi tong. Pokiten met a pwisin kuna lon manauan me seni an ekkekiekifichi an Kot foffor ngeni aramas, Tafit a tongeni koluwu fan lukulukoch: “Ewe SAMOL i mi . . . ur ren tong enlet (kirokiroch mi tong/tong mi tuppwol, NW).” —Kol Fel 145:8.
Esissinnata Noun Kot Kewe Mi Tuppwol
3, 4. (a) Ifa ussun Kol Fel 145 a alisata ach esinna noun Jiowa kewe mi tuppwol? (b) Ifa ussun noun Kot kewe mi tuppwol repwe “efeiochu” i?
3 Hanna, inen ewe soufos Samuel, a apasa ussun Jiowa Kot: “Iwe, a tumwunu manauen noun kewe mi allukuluk (tuppwol, NW).” (1 Samuel 2:9) Io ekkewe “mi tuppwol”? King Tafit a polueni ena kapas eis. Mwirin an mwareiti lapalapen Jiowa kewe mi amwarar a apasa: “Om kewe aramas mi fel (tuppwol, NW) meinisin repwe mwareituk (efeiochuk, NW).” (Kol Fel 145:10) Neman kopwe ekieki ifa ussun aramas ra tongeni efeiochu Jiowa? Ra fori ren ar mwareiti i are ren ar kapas och ussun i.
4 Noun Jiowa kewe aramas mi tuppwol ra sinnelo ren ifa ussun ra aea auer ren ar repwe kapas och ussun i. Lupwen ra kunoufengen are fiti an chon Kraist kewe mwich, ifa itelapen ar poraus? Ina an Kot we Muu! Noun Kot kewe mi tuppwol ra tipeeu ngeni ekiekin Tafit lupwen a koluwu: “Repwe aporausa usun lingen muum we, o repwe pwal aporausa usun om manaman.”—Kol Fel 145:11.
5. Ifa ussun sia silei pwe Jiowa a afanni an noun kewe mi tuppwol kapas ussun i?
5 Jiowa mi auseling lupwen noun kewe mi tuppwol ra mwareiti i? Ewer, a fokkun afanni met ra apasa. Lon eu oesini a weneiti fel mi enlet lon ach ei fansoun, Malakai a makkei: “Murin, chokewe mi niuokusiti ewe Samol mi Lapalap ra kapasfengen lefiler, nge ewe Samol mi Lapalap a afaliir o auselinga ar kapas. A wor eu puken achechem me fan mesan, a makelong iten chokewe mi niuokusiti i, ewe Samol mi Lapalap, o chechemeni itan.” (Malakai 3:16) Jiowa a fokkun pwapwa lupwen noun kewe mi tuppwol ra kapas och ussun i, me a chechchemeniir.
6. Menni angang a alisikich le esinna noun Kot kewe mi tuppwol?
6 Noun Jiowa kewe chon angang mi tuppwol ra pwal sinnelo ren ar pwora me achocho le fos ngeni chokkewe rese fel ngeni ewe Kot mi enlet. Pwungun pwe noun Kot kewe mi tuppwol ra ‘esinei ngeni aramas porausen [an Kot] kewe fofor mi manaman, o pwal poraus usun [muun we] me an we lingoch chapur.’ (Kol Fel 145:12) En mi kukkutta me alamota ekkewe tufich mi suuk ngonuk le fos ngeni aramas ussun an Jiowa nemenem? An nemenem esap ussun ewe nemenemen aramas epwe muttir morolo. An nemenem epwe nomofocholo. (1 Timoti 1:17) Mi fokkun atapwalapwal pwe aramas repwe kaeo ussun an Jiowa nemenem epwe nomofocholo me angang fan iten ena nemenem. Tafit a koluwu: “Muum we eu mu esemuch, o nemeniom epwe nonnom lon ekkewe tappin aramas meinisin.”—Kol Fel 145:13.
7, 8. Met a fis lon 1914, me ifa ewe pisekin annet mi anneta pwe Kot a nemenem iei ren Muun Noun we?
7 A fen lapelo ewe lamoten ach sipwe fos ussun an Jiowa nemenem seni 1914. Lon ena ier, Kot a efisata ewe Muun Messaia lon lang fan nemenien Jises Kraist, Noun Tafit. Iei ussun Jiowa a apwonueta an we pwon pwe an Tafit nemenem epwe nukucharelo tori fansoun ese kauk.—2 Samuel 7:12, 13; Luk 1:32, 33.
8 Pisekin annet pwe Jiowa a nemenem ren Muun Noun we, Jises Kraist, a pwa ren pwoppwonuetaan ewe esissin pwe Jises a nonnom. Kinikinin ewe esissin mi lamot seni meinisin a wewe ngeni ewe angangen noun Kot kewe mi tuppwol. Jises a oesini: “Iwe, ei kapas allim usun ewe mu epwe esineifeili won unusen fonufan, pwe epwe pwar ngeni einang meinisin. Iwe, a ina sopolon.” (Mattu 24:3-14) Pokiten noun Kot kewe mi tuppwol ra angang weires le apwonueta ena oesini, lap seni wonu milion mwan, fefin, me semirit ra foffori ei angang mi fokkun amwarar me esap fissefal. Arapakan chok chokkewe mi u ngeni Muun Jiowa repwe malo.—Pwarata 11:15, 18.
Kukkuna Feioch Seni An Jiowa Nemenem
9, 10. Ifa sokkofesennin Jiowa me ekkewe sou nemenem won fonufan?
9 Ika kich chon Kraist mi fen fangolo manauach ngeni Kot, ach chiechioch me ewe Samol mi Tekia Jiowa a atoto ngenikich chommong feioch. (Kol Fel 71:5; 116:12) Ren chok awewe, Kot a pwapwa rech me sia arap ngeni lon pekin ngun pokiten sia niueiti Kot me sia achocho le foffori minne mi pwung. (Fofor 10:34, 35; Jemes 4:8) Mi mwaalfesen ena me an ekkewe sou nemenem won fonufan. Ra kan chiechi ngeni aramas mi foummong, ussun chowean meilapen sounfiu, chon business mi wouoch, are aramas mi angangoch lon basket are yakiu me sou kol me aramas lon kachito. Me ren ewe simpung lon Afrika, Sowetan, emon nouwis lon ewe muu a awewe won ekkewe leeni mi woungau lon fonuan: “Ua weweiti ewe popun lape-ngenikich sise mochen feilo ngeni ekkena leeni. Sise mochen ekiek ussun ekkena sokkun osukosuk. Mwelien letipach a weiresilo me sia sau pokiten ekkewe sedan mi liwinimmong sia wawa.”
10 Pwungun pwe ekkoch nouwisin muu ra wesewesen lolileniesini nonnomun chokkewe ra nemeni. Nge pwal mwo nge ekkewe nouwis mi tongei aramas lap seni meinisin rese kon lien silei me chiechioch ngeni ekkewe aramas fan nemenier. Iwe, sipwe tongeni eis: Mei wor emon sou nemenem mi kon tongei ekkewe aramas fan nemenian meinisin pwe epwe muttir feilo alisi emon me emon leir lon ar osupwang? Ewer, mei wor. Tafit a makkei: “Ewe SAMOL epwe amwochata ir meinisin ekkewe repwe turutiu, o epwe awenacharata ir meinisin ekkewe mi pworetiu.”—Kol Fel 145:14.
11. Ikkefa ekkewe sossot a tori noun Kot kewe mi tuppwol, me met a alisiir?
11 Noun Jiowa Kot kewe mi tuppwol ra kuna chommong sossot me osukosuk pokiten rese unusoch me pokiten ra nonnom lon eu fonufan mi nom fan nemenien Setan, “ewe mi ingau.” (1 Jon 5:19; Kol Fel 34:19) Chon Kraist ra kuna riaffou mwaal. Ekkoch ra riaffou pokiten semmwen mi chou are pokiten a fen malo attonger kewe. Fan ekkoch, mwaallin noun Jiowa kewe mi tuppwol a efisata ar “pworetiu” fan letipechou. Nge ese lifilifil ewe sokkun sossot ra toriir, Jiowa a mmonleta le awora auruur me pochokkul lon pekin ngun ngeni emon me emon leir. A wewe chok me an ewe King Jises Kraist tongei ekkewe aramas mi tuppwol a nemeni.—Kol Fel 72:12-14.
Mongo Mi Murinno Lon Ewe Fansoun Mi Fich Ngeni
12, 13. Ifa ukuukun watteen kaworen Jiowa fan iten “minne mi manau meinisin”?
12 Pokiten an kirokiroch mi tong, Jiowa a awora minne noun kewe chon angang ra osupwang ren. Kaworan a kapachelong mongo mi murinno. King Tafit a makkei: “Mesen aramas meinisin ra nennengonuk, pun ka fafangoto aner mongo fansoun meinisin. Ka suukalo poum, o ka amotalo mettoch meinisin minne mi manau.” (Kol Fel 145:15, 16) Pwal mwo nge lon fansoun osukosuk watte, Jiowa a tongeni awora anen noun kewe “mongo iteiten ran.”—Luk 11:3; 12:29, 30.
13 Tafit a apasa pwe “minne mi manau meinisin” repwe mot. An poraus a kapachelong ekkewe man. Ekkewe sokkopaten monun leset, matchang, me man toto won fonufan resap tongeni ngasangaselong asapwal me ani mongo ika esap fan iten chommongun an ewe fonu me saat ira me fetil. (Kol Fel 104:14) Iwe nge, Jiowa a awora minne ra osupwang ren.
14, 15. Ifa ussun mongo lon pekin ngun a kawor ikenai?
14 Aramas ra sokko seni ekkewe man pokiten mei wor ar kewe osupwang lon pekin ngun. (Mattu 5:3) A ifa me amwararen an Jiowa amotalo noun kewe mi tuppwol lon pekin ngun! Mwen an malo, Jises a pwon pwe “ewe chon angang mi tuppwel o tipatchem” epwe alisi noun Jises kewe ren aner “mongo” lon ewe fansoun mi fich ngeni. (Mattu 24:45) Lusun ewe 144,000 aramas mi kepit ra wewe ngeni ewe chon angang mi tuppwol ikenai. Jiowa a fokkun awora chommong mongo lon pekin ngun reer.
15 Ren chok awewe, lape-ngeni noun Jiowa kewe aramas iei ra kuna feioch seni eu Paipel mi titchik me pwung lon pwisin ar fos. A mmen watte ewe feioch seni ewe New World Translation of the Holy Scriptures! Pwal och, fite milion puk me chassi mi alisata kaeoon Paipel ra kawor lon lap seni 300 kapasen fonufan. Unusen ei mongo lon pekin ngun a efeiochu chon fel mi enlet won unusen fonufan. Io a fich ngeni ach sipwe mwareiti pokiten ekkeei mettoch meinisin? Jiowa Kot. Ren an kirokiroch mi tong wachemuk, a fen atufichi an ewe chon angang mi tuppwol awora ewe “mongo” lon ewe fansoun mi fich. Ren kaworan, “mettoch meinisin minne mi manau” lon ei paratis lon pekin ngun repwe mot. Me noun Jiowa kewe ra chengel pokiten ar apilukulukun kuna eu siwil mi lapalap won fonufan lupwen a wiliiti eu paratis!—Luk 23:42, 43.
16, 17. (a) Awewei mwo ifa ussun ekkoch mongo lon pekin ngun a fen kawor lon ewe fansoun mi fich? (b) Ifa ussun Kol Fel 145 a pwaralo meefien noun Jiowa mi tuppwol ussun ewe popun alongolongun kapwung Setan a eppiieta?
16 Ekieiki mwo eu fansoun a fen kawor mongo lon pekin ngun lon ewe fansoun mi fich ngeni. Atun 1939, ewe Oruuen Maunen Fonufan a poputa lon Iurop. Lon ena ier, mei wor poraus, itelapan “Neutrality,” lon The Watchtower minen November 1, 1939. Pokiten ena poraus mi ffat, Chon Pwarata Jiowa won unusen fonufan ra kuna ewe lamoten ar resap pekini eu pekin lon ewe maun lefilen ekkewe muu. Ekkewe muun fonufan me ruu pekin ra songeitiir atun ekkewe wonu ierin ewe maun. Iwe nge, inaamwo ika a ffor ekkewe alluk mi pinei ar fel me ra riaffou mwaal nge, noun Kot kewe aramas mi tuppwol ra likiitu le afalafala ewe kapas allim ussun ewe Muu. Seni 1939 ngeni 1946, ra feioch ren eu lapeloon chon afalafal won 157 percent. Pwal och, porausen ar tuppwol atun ewe maun a chuen alisi aramas ar repwe esinna menni lamalam mi pwung.—Aisea 2:2-4.
17 Esap chok pwe ewe mongo lon pekin ngun a kawor lon ewe fansoun mi fich ngeni nge, a pwal amotalo chokkewe mi ani. Lupwen ekkewe muun fonufan ra maunfengen atun ewe Oruuen Maunen Fonufan, a fen kawor ngeni noun Jiowa kewe aramas poraus mi alisata ar annefota och mettoch mi lamot lap seni pwisin ar amanau. Jiowa a alisata ar weweiti eu popun alongolongun kapwung unusen lang me fonufan a kapachelong lon, mi weneiti an Jiowa pwungun nemenem. A mmen apwapwa ach silei pwe emon me emon Chon Pwarata Jiowa a apwonueta wiisan le aitochulo an Jiowa pwungun nemenem me pwaralo pwe Setan ewe Tefil a kapas chofona, ren an tuppwol! (An Salomon Fos 27:11) Noun Jiowa kewe mi tuppwol ra sokko seni Setan, ewe chon pweni lapalapen an Jiowa nemenem. Ir ra likiitu le esileifeili: “Ewe SAMOL i mi pung lon an kewe al meinisin.”—Kol Fel 145:17.
18. Ifa ewe mongo lon pekin ngun mi fich me murinno a kawor kanoto chok?
18 Porausen pwal eu mongo lon pekin ngun a kawor lon ewe fansoun mi fich ina ewe puk Draw Close to Jehovah, a fen katowu lon ekkewe fite puku “Chon Esilefeili Ewe Muu Mi Tinikken” District Mwichelap a fis won unusen fonufan lon 2002/03. Ei puk a kawor ren “ewe chon angang mi tuppwel o tipatchem” a ffor ren Chon Pwarata Jiowa, me a menlapei an Jiowa Kot kewe lapalap mi amwarar, kapachelong chokkewe mi eiteita lon Kol Fel 145. Ei puk epwe eu minen alillis mi lamot lon kalisitaan noun Kot kewe mi tuppwol ar repwe akkarap ngeni i.
Eu Fansoun Sipwe Akkarap Ngeni Jiowa
19. Menni fansoun mi lamot a arap ngenikich, me met sia tongeni fori?
19 Sia akkarap ngeni eu fansoun mi lamot lon kapwunguloon ewe popun alongolongun kapwung ussun an Jiowa pwung le nemenem. Ussun chok a fen oesini lon ewe puken Isikiel sopwun 38, Setan epwe muttir apwonueta wiisan, “Kok seni ewe fonuen Makok.” Epwe tooki noun Jiowa kewe aramas won unusen fonufan. Setan epwe achocho ren unusen an pochokkul le ataielo tuppwolun noun Kot kewe mi tuppwol. Lap seni me loom, chon fel ngeni Jiowa repwe tingor alillis, repwe sio ngeni. Epwe lamot mwaal ar niueiti me tongei Kot? Aapwi, pun Kol Fel 145 a apasa: “Ewe SAMOL a chok arap ngeni ir meinisin ekkewe mi kokori i, ngeni ir meinisin ekkewe mi kokori i ren enlet. Epwe apwonueta minne ir ekkewe mi niuokusiti i ra mochen, epwe pwal rong ar pupuchor, o epwe amanaua ir. Ewe SAMOL a chok tutumunu ir meinisin ekkewe mi tongei i; nge epwe nielo ir meinisin ekkewe mi ingau.”—Kol Fel 145:18-20.
20. Ifa ussun ekkewe kapas lon Kol Fel 145:18-20 repwe netelo lon mwach kkan?
20 Epwe chung letipach lupwen sia meefi pwe Jiowa a arap ngenikich me lupwen sia kuna manamanan wachemuk lupwen a ataielo chokkewe mi ngau meinisin! Lon ena fansoun mi arap ngenikich, Jiowa epwe auselinga chokkewe mi “kokori i ren enlet.” Esap auselinga chon likotupotup. An Kot we Kapas a affata pwe esap wor lamoten an ekkewe aramas mi ngau kokkori itan atun ewe sopwoloon lupwen rese tongeni fori och.—An Salomon Fos 1:28, 29; Mika 3:4; Luk 13:24, 25.
21. Ifa ussun noun Jiowa kewe mi tuppwol repwe pwaralo ar chengel lupwen ra nounou ewe it mi pin?
21 Iei ewe fansoun mi atapwalapwal fan iten chokkewe mi niueiti Jiowa ar repwe “kokori itan ren enlet.” Noun kewe mi tuppwol ra chengel lupwen ra nounou itan lon ar kewe iotek me lupwen ra uwau poraus atun ar kewe mwich. Ra nounou ewe it mi pin lupwen ra porausfengen. Ra pworacho le esilei iten Jiowa we lon ar angangen afalafal.—Rom 10:10, 13-15.
22. Met popun a fokkun lamot ach sipwe u ngeni ekiekin me mochenin fonufan?
22 Ika sipwe chuen feioch seni ach chiechioch me Jiowa Kot, a mmen lamot ach achocho le u ngeni minne a tongeni apwangapwangalo ach pochokkul lon pekin ngun, ussun chowean tongen pisek, kunou mi limengau, chipwang le omusalo tipisin aramas, are tunaloon an aramas kewe osupwang. (1 Jon 2:15-17; 3:15-17) Ekkeei sokkun foffor me lapalap ra tongeni emmwen ngenikich tipis watte me lo, lo, lo, poutuloon an Jiowa we chen. (1 Jon 2:1, 2; 3:6) Sipwe tipatchem ika sia chechchemeni pwe Jiowa a sopweilo le pwaralo an kirokiroch mi tong, are tong mi tuppwol ngenikich ika sia akkamwochu ach tuppwol ngeni i.—2 Samuel 22:26.
23. Ifa ewe mettoch mi amwarar a wikkiiti noun Jiowa kewe mi tuppwol?
23 Amwo sipwe annefota ekkewe mettoch mi amwarar noun Jiowa kewe mi tuppwol repwe pwapwaiti lon mwach kkan. Ren ach fori ena, sia apilukulukun kapachelong lein chokkewe repwe atekiata, efeiochu, me mwareiti Jiowa “iteiten ran” tori “feilfeilo chok.” (Kol Fel 145:1, 2) Amwo sipwe ‘iseis pwisin kich lon ewe tongen Kot, [me] witiwiti umoumochun ach Samol Jises Kraist ngeni ewe manau esemuch.’ (Juta 20, 21) Lon ei fansoun sia kukkuna feioch pokiten lapalapen Semach lon lang mi fokkun amwarar, kapachelong an kirokiroch mi tong a pwarata ngeni chokkewe mi tongei i. Amwo letipach epwe ussun chok letipen Tafit lupwen a apasawu ekkewe saingoon kapas lon Kol Fel 145: “Auei epwe apasata ai mwareiti ewe SAMOL, o fituk meinisin repwe fakkun mwareiti itan we mi fel feilfeilo, feilfeilo chok.”
Ifa Ussun Kopwe Polueni?
• Ifa ussun Kol Fel 145 a alisikich le esinna noun Kot kewe mi tuppwol?
• Ifa ussun Jiowa a “amotalo mettoch meinisin minne mi manau”?
• Met popun a lamot pwe sipwe akkarap ngeni Jiowa?
[Ekkewe Kapas Eis fan Iten ewe Lesen]
[Sasing lon pekin taropwe 15]
Noun Jiowa kewe chon angang ra pworacho le alisi aramas ar repwe silei ussun lingen an nemenem
[Sasing lon pekin taropwe 16]
Jiowa a apochokkula me emmweni noun kewe mi tuppwol mi iotek fan iten alillis