Mwelien Letip Mi Wenechar

LUPWEN Charles a liwinlo ngeni imwan seni an leenien angang lon eu university lon Kenya, a poutulo noun we cell phone. Lon Kenya, cell phone mi chuen watte liwinir.

Charles a apasa: “Use ekieki pwe emon epwe eniwili nei we phone.” Iwe nge, fitu ran mwirin, a fokkun ruko lupwen ewe branch ofes an Chon Pwarata Jiowa lon Kenya a kori i won phone. Ese tongeni luku lupwen ewe ofes a ereni i pwe epwe feito me angei noun we cell phone! Ra ereni i pwe emon Chon Pwarata Jiowa mi afalafal full-time a fiti ewe waa Charles a wawa me a kuna ewe phone. Ewe chon afalafal a uwei ewe phone ngeni ewe branch ofes ren an epwe kutta an io ewe phone, me lo, lo, lo, ekkewe chon angang mi volunteer lon ewe ofes ra silei pwe ewe phone noun Charles pokiten ewe nampa a pwalo lon ewe phone.

Lon ewe taropwe Charles a mak ngeni ewe branch ofes, a apasa: “Ua fokkun kilisou fan iten ami achocho le kuttaei inaamwo ika mi weires. Ua fokkun kilisou ngeni ekkewe aramas lon ami mwicheich mi kuna ewe cell phone, me kutta ika noun io, me eniwili ngeniei. Esor chommong aramas mi wenechar ikenai, nge a mmen murinno pwe mi wor ekkoch aramas ir wesewesen Chon Pwarata Jiowa.”

Chon Pwarata Jiowa ra sinnelo ekis meinisin pokiten ar wenechar. Ra appiru ewe aposel Paul, ewe a apasa: “Pun am aua meefi pwe letipem mi chok limelimoch, o am aua fakkun mochen manauesini manau mi murinno lon mettoch meinisin.” (Ipru 13:18; 1 Korint 11:1) Ra miritiiti pwe ena esin foffor a alingalo Jiowa Kot, ussun chok Jises a apasa: “Iei usun ami saram epwe pwapwalo ngeni aramas, pwe repwe kuna ami fofor murinno o mwareiti Sememi we mi nonnom lang.”​—Mattu 5:16.