Sise Tongeni Weweiti Ukuukun Lapalapen Jiowa

“Jiowa mi lapalap me a fich ngeni ach sipwe mwareiti i, me sise tongeni weweiti ukuukun an a lapalap.”​—KÖLFEL 145:3, New World Translation.

1, 2. Ifa lapalapen Tafit kewe, me ifa an ekiek ussun i pwisin lupwen a chechchemeni Kot?

 EWE emon a makkei Kol Fel 145 emon mi itefoulo. Lupwen i emon chok at, a nnielo emon mwanemmong sounfiu. Lupwen a wiliiti emon king, a akkufu chommong lon maun. Itan Tafit, me i ewe oruemonun kingen Israel. Itefouloon Tafit ese wes ren an malo. Pwal mwo nge ikenai fite milion aramas ra chuen ekis silei ussun porausan.

² Inaamwo ika mi lapalap fofforun kewe nge, Tafit a eani ekiek tekison ussun pwisin i. A eani ei kol ussun Jiowa: “Lupwen ua nennengeni om kewe lang, forien autun poum, ewe maram me ekkewe fuu ka fen forata, meeta lamoten aramas nge ka fen ekieki, pwal ewe noun aramas nge ka tumunu?” (Kol Fel 8:3, 4, NW) Tafit ese ekieki pwe i mi fokkun lapalap nge a apasa pwe Jiowa a amanaua i seni ekkewe chon oput. “Kopwe ngeniei om we ttitin maunen amanau, me om we tipetekison a atekiaeita.” (2 Samuel 22:1, 2, 36, NW) Jiowa a pwaralo tipetekison ren an umoumoch ngeni chon tipis, me Tafit a fokkun kilisou fan iten an Jiowa kirokiroch i pwisin ese fich ngeni.

‘Upwe Mwareituk, Ai Kot O Ai King’

3. (a) Ifa an Tafit ekiek ussun wiisan king? (b) Ifa ukuukun watteen an Tafit mochen mwareiti Jiowa?

³ Inaamwo ika Tafit a fen seikita king me ren Kot nge, an ekiek pwe Jiowa wesewesen ewe kingen Israel. Tafit a apasa: “Ai Samol mi Lapalap, om chok ewe mwu, en ka tekia o nemeni meinisin.” (1 Kronika 29:11) Me a ifa me watteen an Tafit aucheani an Jiowa nemenem! Tafit a eani kol: “Upwe mwareituk, ai Kot o ai King, o upwe mwareiti itom feilfeilo, feilfeilo chok. Iteiten ran upwe mwareituk, o mwareiti itom feilfeilo, feilfeilo chok.” (Kol Fel 145:1, 2) Tafit a mochen mwareiti Jiowa Kot unusen ewe ran tori feilfeilo chok.

4. Kol Fel 145 a pwari menni poraus mi mwakel?

⁴ Kol Fel 145 a polueniochu minne Setan a tipi ngeni Kot, pwe Kot emon sou nemenem mi maicha me a eriani aramas. (Keneses 3:1-5) Ei kol mi fel a pwal pwarata an Setan  kapas chofana pwe chokkewe mi alleasochisi Kot ra chok fori pokiten ewe feioch, nge sap pokiten ra tongei Kot. (Hiop 1:9-11; 2:4, 5) Chon Kraist mi enlet ra ussun chok Tafit ren ar polueni met Setan a tipimwaal ngeniir. Ra aucheani ar apilukulukun manau tori feilfeilo chok fan nemenemen ewe Muu pokiten ra mochen mwareiti Jiowa feilfeilo chok. Fite milion aramas ra fen poputa le fori ena. Ra eani lukuluk won an Jises we asor, ra fen fangolo manauer ngeni Jiowa me papatais, me ra angang me fel ngeni Jiowa pokiten ra tongei i.​—Rom 5:8; 1 Jon 5:3.

5, 6. Ineet sia tufichin efeiochu me mwareiti Jiowa?

⁵ Ekieki mwo chommongun ach kewe tufich le efeiochu me mwareiti Jiowa pokiten kich noun kewe chon angang. Sia tongeni fori lon iotek lupwen sia alleaani poraus mi achungu letipach lon an we Kapas, ewe Paipel. Sia tongeni mwareiti me kilisou ngeni Jiowa lupwen sia kaeo an kewe foffor ngeni aramas are lupwen sia ingelo ren kinikinin forian kewe mi amwarar. Sia pwal efeiochu Jiowa lupwen sia fos ussun letipan ren chiechiach chon luku atun a fiffis mwich are lupwen sia chok fosfengen. Ren enletin, ekkewe “fofor murinno” meinisin sia fori fan iten Muun Kot repwe mwareiti Jiowa.​—Mattu 5:16.

⁶ Kanoto chok, ekkeei foffor murinno ra kapachelong kautaan chommong leenien fel ren noun Kot kewe aramas, lon ekkewe fonu mi wongau. Lape-ngeni ei angang a tufich pokiten ewe alillis mi kawor seni chon luku lon ekkewe ekkoch fonu. Ekkoch chon Kraist ra pwisin feilo ngeni ekkewe fonu mi wongau ren ar repwe alisata kautaan ekkewe Kingdom Hall. Ewe foffor murinno mi lamot seni meinisin ina ach mwareiti Jiowa ren ach afalafala ewe kapas allim ussun Muun we. (Mattu 24:14) Ekkewe ekkoch wokisin lon Kol Fel 145 ra pwaralo ukuukun an Tafit aucheaani me mwareiti Kot, ewe king, me lapalapen an nemenem. (Kol Fel 145:11, 12) Om ekiek ussun lapalapen an Kot nemenem fan tong a ussun chok an Tafit? Me en mi kan foffos ngeni aramas ussun Muun we?

Porausen An Kot Foffor Mi Lapalap

7. Apasawu eu popun mi lapalap sipwe mwareiti Jiowa.

⁷ Kol Fel 145:3 a awora eu popun mi lamot sipwe mwareiti Jiowa. Tafit a eani kol: “Ewe SAMOL mi chok lapalap, o sipwe fakkun mwareiti i chapur; pun sise tongeni kuna ukukun an lapalap.” An Jiowa lapalap ese aukuk. Aramas rese tongeni unusen kuna, weweiti, are aukuuku. Nge sipwe kuna feioch seni ach pwungupwung won ekkewe poraus mi anneta pwe Jiowa mi fokkun lapalap.

8. Met sipwe kaeo ussun lapalapen me manamanen Jiowa seni lang me fonufan?

⁸ Sotun chechchemeni eu fansoun ka fen towau seni saramen eu telinimw le pwin me ka fen neta lang. Kese fen mairu ren chommongun ekkewe fuu mi tittin lon ewe lang mi chchol? Kese fen mochen mwareiti Jiowa pokiten forutaan ekkewe fuun lang a pwalo pwe a fokkun lapalap? Met ka fen kuna eu kukkun kinikinin ekkewe fuu lon ewe mwichen fuu ikewe ia a nonnom ie ach ei fonufan. Pwal och, aramas ra esissin pwe a wor lap seni ipuku bilion mwichen fuu, nge sia tongeni kuna ulungat me leir chok ika esor pongkio. Pwungun pwe ekkewe fuu me mwichen fuu sise tongeni alleaaniir ra pwarata watteen an Jiowa manaman me ra affata pwe Jiowa a fokkun lapalap.​—Aisea 40:26.

9, 10. (a) Ikkefa ekkewe kinikinin lapalapen Jiowa ra pwalo ren Jises Kraist? (b) Ifa ussun an Jises manausefal epwe kku ach luku?

⁹ Ekieki mwo pwal ekkoch poraus mi affata pwe Jiowa mi fokkun lapalap​—ekkewe poraus mi weneiti Jises Kraist. An forata Noun we me an nouni i noun “sousile angang,” ra pwarata pwe Jiowa a fokkun lapalap. (An Salomon Fos 8:22-31) An Jiowa tong mi lapalap a pwalo ren an fangolo noun we alaemon, ewe asor a mooni kepichiloon chon fonufan. (Mattu 20:28; Jon 3:16; 1 Jon 2:1, 2) Aramas rese tongeni  weweiti lingen ewe inisin ngun esap tongeni malo Jiowa a fori fan iten Jises lupwen a amanauata i.​—1 Piter 3:18.

¹⁰ An Jises manausefal a pwaralo chommong popun Jiowa a eita ngeni ewe Kot mi fokkun lapalap lupwen a amanauata Jises. Ese mwaal Kot a fen atufichi an Jises chechchemeni ewe angang a fisita ren forutaan ekkewe mettoch sia kuna me chokkewe sise tongeni kuna. (Kolose 1:15, 16) Ekkeei mettoch ra kapachelong ekkewe chonlang, ewe lang, ewe fonufan mi uwaoch, me ekkewe sokkopaten monumanau meinisin won fonufan. Jiowa ese chok atufichisefalli an Jises chechchemeni ewe uruwo mi unus ussun manau lon lang me won fonufan a kuna mwen a feitiu fonufan nge, a pwal atufichi an chechchemeni ekkewe mettoch Jises a kuna lupwen i emon mwan mi unusoch won fonufan. Ewer, an Jises manausefal a anneta pwe Jiowa mi fokkun lapalap. Pwal och, ena foffor mi fokkun lapalap a tongeni anneta ngenikich pwe aramas mi malo mi tongeni manausefal. Ach luku a pochokkulelo lupwen sia weweiti pwe Kot a tongeni amanauata ekkewe fite, fite milion aramas a chechchemeni lon tupuwan mi unusoch.​—Jon 5:28, 29; Fofor 17:31.

Angang Mi Amwarar Me Foffor Mi Manaman

11. Menni angangen Jiowa Kot mi lapalap a poputa lon Pentekos 33 C.E.?

¹¹ Mwirin an Jises manausefal, Jiowa a fen fori chommong angang mi lapalap me amwarar. (Kol Fel 40:5) Lon Pentekos 33 C.E., Jiowa a efisata eu minefoon muu, ewe “Israelin Kot,” ren noun Kraist kewe chon kaeo mi kepit ren ngun mi fel. (Kalesia 6:16) A fokkun lapalap watteeloon ei minefoon muu lon pekin ngun won fonufan. Inaamwo ika a fis eu angangen rikilo mi emmwen ngeni fisitaan Kirisentom mwirin maloon noun Jises kewe aposel nge, Jiowa a chuen fori mettoch mi amwarar ren an epwe efisi pwonuetaan an we kokkot.

12. Met a letelo ngenikich ren kaworen Paipel lon ekkewe kapasen aramas mi lapalap meinisin?

¹² Ren chok awewe, Jiowa a tumunu unusen ewe Paipel me a siwil ngeni ekkewe fos watte won fonufan meinisin. Fan chommong ekkewe aramas mi mochen chiyakuni Paipel ra fori ar angang fan riaffou me noun Setan kewe chon angang ra tongeni nniirelo. Ren enletin, ewe Paipel esap tongeni siwil ngeni lap seni 2000 fosun fonufan ika ena angang esap letipen ewe Kot mi fokkun lapalap, Jiowa, ewe sise tongeni kuna ukuukun an lapalap!

13. Seni 1914, ifa ussun a fen pwalo pwe Jiowa mi fokkun lapalap ren poraus mi weneiti Muun we?

¹³ A fen pwalo pwe Jiowa mi fokkun lapalap ren pwonuetaan letipan ussun Muun we. Ren chok awewe, lon 1914 a popueta nemenemen Noun we Jises Kraist ussun chok king lon lang. Ekis chok mwirin, Jises a maunei Setan me noun kewe timon. Ra fen koturutiu seni lang tori fonufan ikewe ie ra witiwit iei mwen repwe koturulong lon ewe pwang mi alollon. (Pwarata 12:9-12; 20:1-3) Seni ena fansoun, a lapelo ewe riaffou mwaal won noun Jises kewe mi kepit. Iwe nge, Jiowa a fen apochokkuleereta atun ei fansoun an Jises nonnom le monomon.​—Mattu 24:3; Pwarata 12:17.

14. Ifa an Jiowa angang mi amwarar a fisita lon 1919, met a fen pwonuta ren ena angang?

 ¹⁴ Lon ewe ier 1919, Jiowa a fori pwal eu angang mi pwalo pwe a fokkun lapalap. A amanaua noun Jises kewe mi nukunuma lon pekin ngun. (Pwarata 11:3-11) Seni ena fansoun, ekkewe mi kepit ra tinikken le afalafala ewe kapas allim pwe ewe Muun Kot a fen fisita lon lang. Pwal ekkoch mi kepit ra ionfengen pwe epwe unus choochoon ewe 144,000. (Pwarata 14:1-3) Ren angangen noun Jises kewe mi kepit, Jiowa a isetiu longolongun eu “fonufan sefo,” eu mwichen aramas won fonufan mi pwung. (Pwarata 21:1) Nge met epwe fis ngeni ewe “fonufan sefo” lupwen ekkewe aramas mi kepit meinisin ra fen feita lang?

15. Ekkewe chon Kraist mi kepit ra emmweni menni angang, me met mwiriloon ewe angang?

¹⁵ Lon 1935, mei wor ekkewe lesen mi lamot lon ei chassi minen August 1 me August 15, ussun “ewe mwich mi fakkun lapalap,” lon Pwarata sopwun 7. Ekkewe chon Kraist mi kepit ra poputa le kutta me chiechi ngeni chiechier chon fel seni muu, einang, sokkun aramas, me sokkun kapas meinisin. Aramasen ei “mwich mi fakkun lapalap” repwe manau seni ewe “riaffou mi lapalap,” me ar apilukuluk pwe repwe kuna manau esemuch lon Paratis ussun chok aramasen ewe “fonufan sefo.” (Pwarata 7:9-14) Pokiten ewe afalafal ussun ewe Muu me ewe foruloon chon kaeo ekkewe chon Kraist mi kepit ra achocho ngeni, lap seni wonu milion ra eani ewe apilukulukun manau esemuch lon eu paratis won fonufan. Io epwe lingelo pokiten sopwochun ei angang a fiffis fan an Setan me an we otot mi ppwor u ngeni? (1 Jon 5:19) Jiowa chok mi tongeni apwonueta ei angang ren an nounou an we ngun mi fel.​—Aisea 60:22; Sekaraia 4:6.

Amwararen Lingen Jiowa Me Tekian

16. Met popun chon fonufan rese tongeni kuna ‘lingen me tekian Jiowa’ ren meser?

¹⁶ Ese lifilifil lapalaper, aramas resap monukalo porausen an Jiowa kewe “angang mi amwarar” me an kewe “fofor mi manaman.” Tafit a makkei: “Eu tappin aramas repwe mwareiti om kewe angang ngeni pwal eu tappin, o repwe arongafeili om kewe fofor mi manaman. Upwe ekieki usun lingen o auchean om manaman, o pwal usun om angang mi amwarar. Aramas repwe arongafeili manamanen om kewe fofor mi aniuaniu, o ngang upwe arongafeili usun tekiom.” (Kol Fel 145:4-6) Iwe nge, ifa ukuukun an Tafit silei ussun lingen Jiowa, pun “Kot emon ngun” me aramas rese tongeni kuna i ren meser?​—Jon 1:18; 4:24.

17, 18. Ifa ussun an Tafit kilisou ren ‘lingen tekian Jiowa’ a lapalapelo?

¹⁷ Inaamwo ika Tafit ese tongeni kuna Kot nge, a chuen tongeni alapalo an weweiti tekian Jiowa me ukuukun an a fich ngeni sufol. Ren chok awewe, a tongeni alleaani ewe poraus lon ewe Paipel ussun an Jiowa kewe foffor mi manaman, ussun chowean kataaloon ewe fonufan mi ngau ren eu nooter. Ese mwaal Tafit a fen kuna ifa ussun Jiowa a asaua an Isip kewe kot mi chofana me ifa ussun a angasalo Israel seni ar fotek lon Isip. Ekkena sokkun foffor ra pwarata pwe Jiowa mi fokkun lapalap me a fich ngeni sufol.

¹⁸ An Tafit weweiti tekian Jiowa a lapelo, sap chok seni alleaan ewe Paipel nge seni an ekkekiekifichi ussun ewe poraus mi mak lon. Neman a fen ekkekiekifichi ussun met a fen fisita lupwen Jiowa a ngeni Israel ewe Alluk. A wor chopulap me inefi, kuchu mi chchol, me ttikimmongun rappwa. Ewe Chuuk Sainai a chechchech me otuot a towu seni. Chon Israel ra nonnom unukkun ewe chuuk me ra rongorong “ekkewe engol alluk” seni lukalapen ewe ekkei me kuchu, lupwen Jiowa a fos ngeniir ren noun we chonlang. (Tuteronomi 4:32-36; 5:22-24; 10:4; Ekistos 19:16-20; Fofor 7:38, 53) Met ra kuna me rongorong a pwalo ngeniir pwe Jiowa mi fokkun lapalap! Letipen chokkewe mi tongei an Kot we Kapas epwe chung ren ‘lingen me  auchean an manaman,’ lupwen ra ekkekiekifichi ussun ekkeei poraus. A nom rech ewe Paipel unus ikenai, me a kapachelong sokkopaten langepwi mi ling ra menlapei pwe Jiowa mi fokkun lapalap.​—Isikiel 1:26-28; Taniel 7:9, 10; Pwarata, sopwun 4.

19. Met epwe alapalo ach kilisou ren tekian Jiowa?

¹⁹ Tafit a pwal tongeni ingelo ren watteen an tekian Jiowa seni an kaeo ekkewe alluk Kot a fen ngeni Israel. (Tuteronomi 17:18-20; Kol Fel 19:7-11) Alleasochis ngeni an Jiowa kewe alluk a atekiata muun Israel me a aimulo Israel seni ekkewe ekkoch aramas. (Tuteronomi 4:6-8) Ussun chok Tafit, sipwe alapalo ach weweiti ukuukun tekian Jiowa lupwen sia akkalleaani, ekkekiekifichi, me kakkaeo ewe Paipel.

Lapalapen Kot Kewe Ra Pwarata Pwe I Mi Lapalap!

20, 21. (a) Kol Fel 145:7-9 a affata pwe Jiowa mi fokkun lapalap pokiten met? (b) Ifa ussun lapalapen Jiowa kewe lon ekkeei wokisin ra kku chokkewe mi tongei Jiowa?

²⁰ Sia fen kaeo pwe ekkewe wonu wokisin akkom lon Kol Fel 145 ra fen ngenikich ekkewe popun sipwe mwareiti Jiowa mi weneiti forian kewe mi pwarata pwe i mi fokkun lapalap. Wokisin 7 tori 9 ra menlapei ifa ussun Kot mi lapalap pokiten lapalapan kewe. Tafit a kol: “Repwe chok niinalo kapas usun iteuochun om murinno chapur, o repwe leuwommong o kol usun om pung. Ewe SAMOL i mi kirokiroch o umoumoch, i mi songommang o a ur ren tong enlet. Ewe SAMOL a chok murinno ngeni aramas meinisin, o an kirokiroch a nom won mettoch meinisin minne a fori.”

²¹ Ikei Tafit a akkom menlapei murinnoon me pwungun Jiowa​—ekkewe lapalap Setan a efisi tipemwaramwar ussur. Ifa ussun ekkeei lapalap ra kku chokkewe mi tongei Kot me anomuur fan an nemenem? Iwe, murinnoon Jiowa me ewe pwungun an nemenem ra wato chengel ngeni aramas mi fel ngeni i me rese tongeni ukutiu seni ar mwareiti i. Pwal och, Jiowa a murinno ngeni “aramas meinisin.” Amwo an murinno epwe alisi pwal chommong ar repwe aier me wiliiti chon fel ngeni ewe Kot mi enlet atun a chuen tufich.​—Fofor 14:15-17.

22. Awewei mwo an Jiowa kewe foffor ngeni noun kewe chon angang.

²² Tafit a pwal aucheani ekkewe lapalap Kot a pwisin menlapei lupwen a “lu seni Moses o kokko, ‘Ngang ewe Samol mi Lapalap, ngang ewe Samol mi Lapalap, ngang eman Kot mi eani umoumoch me kirikiroch, ua songomang, ua pwal woun tong me allukuluk.’” (Ekistos 34:6) Ina popun Tafit a tongeni apasa: “Ewe SAMOL i mi kirokiroch o umoumoch, i mi songomang o a ur ren tong enlet.” Inaamwo ika Jiowa emon Kot mi fokkun lapalap nge, a sufoliiti noun kewe chon angang won fonufan ren an kirokiroch ngeniir. Jiowa a ur ren umoumoch, me a mochen omusalo chon tipis mi aier pokiten an Jises asor. Jiowa a pwal songommang, pun a mut ngeni noun kewe chon angang nafochun fansoun ar repwe akkufu ekkewe apwangapwang mi tongeni pinei ar nonnom lon ewe fonufan sefo mi pwung.​—2 Piter 3:9, 13, 14.

23. Ifa ewe lapalap sipwe kaeo lon ewe lesen mwirin ei?

²³ Tafit a atekiata an Kot kirokiroch mi tong, are an tong mi tuppwol. Iwe, ekkewe lusun wokisin lon Kol Fel 145 ra aiti ngenikich ifa ussun Jiowa a pwaralo ei lapalap me ifa ussun noun kewe chon angang mi tuppwol ra polueni an kirokiroch mi tong. A ina met sipwe fos ussun lon ewe lesen mwirin ei.

Ifa Ussun Kopwe Polueni?

• Ineet me ifa ussun sia tongeni mwareiti Jiowa “unusen ewe ran”?

• Ikkefa ekkoch poraus mi anneta pwe sise tongeni unusen weweiti ukuukun an Jiowa mi lapalap?

• Ifa ussun sia tongeni alapalo ach kilisou fan iten tekian Jiowa?

[Ekkewe Kapas Eis fan Iten ewe Lesen]

[Sasing lon pekin taropwe 8]

Ekkewe mwichen fuu lon lang ra pwarata pwe Jiowa mi fokkun lapalap

[Sasing lon pekin taropwe 8]

Seni Anglo-Australian Observatory, sasing ren David Malin

[Sasing lon pekin taropwe 10]

Ifa ussun poraus mi weneiti Jises Kraist a pwarata pwe Jiowa mi fokkun lapalap?