Kapas Eis Seni Chon Allea

Mwirin ewe Noter, Noa a assalo seni ewe waimw emon lisom, iwe, a liwinto ren “echo chon ira olif.” Ia ewe lisom a kuna me ie ewe echo chon ira?

Ewe Paipel a erenikich pwe “ewe koluk a chok feita, feita, feita won fanufan tori ekewe chuk mi fokun tekia seni chuk meinisin ra kokola.” (Keneses 7:19) Lupwen konuken ewe noter a moretiu, fan ulungat Noa a assalo emon lisom​—mwirin iteiten eu wiik. Lon ewe oruuan fansoun, ewe lisom a liwinto ren “echo chon ira olif mi manau. Iei minne Noa a silei pwe ewe konuk a morola seni won fanufan.”​—Keneses 8:8-11.

Pwungun pwe ikenai, sise tongeni silei ukuukun ttamen ewe fansoun eu kinikinin fonufan a nom fan ewe koluk, pun ese mwaal a fen siwil lapalapen sonosonon fonufan ren ewe noter. Iwe nge, a naf ukuukun ttamen an ewe konuk pwonuelo lap ngeni ekkewe fonu meinisin pwe chommong ira ra malo. Iwe nge, eni ekkoch ira rese malo, iwe, ra tufichin puksefalita minefoon chon ira lupwen ewe konuk a kukkunutiu.

Ussun ewe iraan olif, The New Bible Dictionary a apasa: “Ika a pokuetiu, minefoon fasar epwe pukuta seni waran we, pwe epwe tufich pwe limefoch minefoon ira repwe tongeni marita seni. A ina ussun ekkewe iraan olif mi lukun ma.” A “ussun ita nge ese tongeni molo manamanan,” iei alon The New Schaff​—Herzog Encyclopedia of Religious Knowledge. Esor emon aramas ikenai epwe tongeni silei titchikin porausen ewe noter, awewe chok, ifa ukuukun watten kenen me pwichikaren konukin ewe noter. Ina popun, sisap tongeni sileifichi ifa ussun epwe kku ekkewe iraan olif me ekkewe ekkoch ira.

Iwe nge, ekkewe iraan olif rese tongeni manau lon eu leeni mi fou, awewe chok, won eu chuuk mi tekia. Iwe, a kan marita lon ekkewe leeni fan 3,000 fit, ikkewe pwichikaran epwe lap seni 50 degree Fahrenheit. Iwe, ewe puk The Flood Reconsidered, a apasa: “Ina minne, Noa a tongeni mirititi seni ewe chon ira mi manau pwe ewe konuk a fen morelo seni ekkewe lemonun chuuk mi tekison.” Mwirin eu wiik lupwen Noa a assalo ewe lisom, ese liwin, iwe, a pwarata pwe a chommongelo ira me ekkewe leenien asoso fan iten ewe lisom.​—Keneses 8:12.