Luku Epwe Tongeni Achikarata Ekkewe mi Semmwen?

LUPWEN sia semmwen, sipwe kutta alillis pwe sipwe chikarsefalita. Eni, ka fen silei seni Paipel pwe fan chommong Jises Kraist a awesalo chommong sokkopaten semmwen, iwe, a alisi chommong chon semmwen. Ifa ussun an a fis an achikarata aramas? Iwe, ewe Paipel a apasa pwe a fis ren ewe “manamanen Kot.” (Luk 9:42, 43; Fofor 19:11, 12) Ina minne, an Kot we ngun mi fel a efisi ewe angangen achikara aramas, nge sap chok lukuen ewe emon. (Fofor 28:7-9) Ina pwata Jises ese kutta seni ekkewe mi semmwen ar repwe akkom pwarata ar luku i pwe repwe chikarsefal.

Eni kopwe eis: ‘Esap chuen fis ewe angangen achikarata aramas ren ewe manamanen Kot, are epwe fissefal ewe angangen achikarata aramas Jises a pin fori? Mei wor apilukuluk allim fan iten ekkewe mi riaffou ren metekin inisir are ren sokkun semmen resap tongeni chikar seni?’

Ewe Paipel a awewei pwe lon an Kot we fonufan sefo mi pwung, ewe manamanen Kot epwe forisefalli ewe sokkun angangen achikarata aramas Jises a fen fori atun a nonnom won fonufan. Ekkewe Chon Pwarata Jiowa lon sopwum we repwe pwapwa le aiti ngonuk ifa ussun me inet Kot epwe apwonueta minne ekkewe mi tipin achikarata aramas ren luku resap fokkun tongeni fori​—amoielo ekkewe semmwen meinisin me pwal malo. Ewer, Kot “epwe aukatiu mala, pwe esap chuen wor tori feilfeilachok.”​—Aisea 25:8.