Aweween Ewe Manmocho Me Esissinnan

EN MI pwapwaiti om kutta poluen eu esissin mi monomon? Ren om kopwe fori, kopwe kutta ekkewe minen alillis mi alisata om polueni. Kot a awora ekkewe poraus ussun ewe nampa 666, iten, are esissinnen ewe manmocho lon Pwarata sopwun 13 lon ewe Paipel.

Lon ei lesen, sipwe atittina ruaanu minen alillis​—pisekin pwarata mi lamot​—repwe pwaralo weween esissinnen ewe manmocho. Sipwe pwungupwung won (1) fan ekkoch ifa ussun a filita ekkewe it lon ewe Paipel, (2) met ewe manmocho a wewe ngeni, (3) weween an ewe 666 a iteni “nampaan emon aramas,” me (4) weween nampa 6 me weween an a makketiu fan ulungat, 600 kapach 60 kapach 6, are 666.​—Pwarata 13:18.

Ekkewe It Lon Paipel​—Mei Wor Weweer

Fan chommong ekkewe it lon Paipel mi sokkolo lamoter, akkaewin lupwen Kot a awora ewe it. Ren chok awewe, pokiten Apram epwe wiliiti semelapen ekkewe muu, Kot a siwili itan ngeni Eperiam, weween “Semen Chommong.” (Keneses 17:5) Kot a ereni Josef me Meri pwe repwe eita ngeni nour we Jises, weween “Jiowa I Amanau.” (Mattu 1:21; Luk 1:31) Fan tipeeu ngeni ena it mi sokkolo weween, Jiowa a atufichi ach amanau ren an Jises afalafal me an malo ussun chok eu asor.​—Jon 3:16.

Ina popun, ewe it seni Kot, 666, epwe liosueta lapalapen ewe manmocho me ren Kot. Iwe, ren ach sipwe weweiti lapalapan kewe, sia wiisen weweiti met ewe manmocho a liosueta me kaeo ussun an kewe foffor.

Ewe Manmocho A Pwalo

Ewe puken Taniel a asaramakich ussun weween ekkewe manmocho lon Paipel. Mei wor aweween “fomon monumanau mi watte” lon sopwun 7​—emon laion, emon pear, emon lepart, me emon manmocho mi aniuaniu ren ngiin mecha. (Taniel 7:2-7) Taniel a erenikich pwe ekkeei manmocho ra liosueta “ekkewe king,” are ekkewe muu mi tattapwefengenniir le nemeni fonu watte.​—Taniel 7:17, 23.

The Interpreter’s Dictionary of the Bible a apasa pwe ewe manmocho lon Pwarata 13:1, 2, a lapalapeni lapalapen ekkewe fomon manmocho lon an Taniel langepwi . . . Weween pwe ewe aemonun manmocho lon Pwarata a liosueta manamanen ekkewe muu meinisin won fonufan mi u ngeni Kot.” Ei luku a letelo ren met a mak lon Pwarata 13:7: “A pwal mumuta ngeni i pwe epwe nemeni iteiten einang, me sokkun aramas, me sokkun kapas, me mu meinisin.”

Ewe Paipel a pwal apasa pwe “ewe traikon [Setan] a fang ngeni i an we manaman, o an we leenien motun king, o an we nemenem mi chapur.” (Pwarata 12:9; 13:2) Ina ewe popun an aramas nemenem eu kokkot seni ewe Tefil me lapalapen ekkewe muu ra nikinikin lapalapen emon manmocho. (Jon 8:44) Pokiten etipetipaen ewe Tefil, ese fen wor emon aramas are eu an aramas kewe kokkot a tongeni  wato kinamwe me lukulukoch mi nomofoch fan iten aramas. *​—Jon 12:31.

“Nampaan Emon Aramas”

Ewe aulungatin minen alillis mi alisata ach weweiti weween 666 a kawor ren an ena nampa mi eiten ngeni “nampaan emon aramas.” Ei poraus ese tongeni weneiti emon chok aramas, pun Setan​—sap emon aramas​—a nemeni ewe manmocho. (Luk 4:5, 6; 1 Jon 5:19; Pwarata 13:2, 18) Iwe, nampaan ewe manmocho “nampaan emon aramas,” are an esissin, epwe alisata ach weweiti pwe ewe manmocho a wewe ngeni och mettoch aramas ra kapachelong lon, nge esap ekkewe ngun are timon, me ekkoch lein lapalapan kewe lapalapen aramas. Ikkefa ekkena lapalap? Ewe Paipel a polueni: “Pun aramas meinisin ra tipis, o rese mo tori ewe lingen Kot.” (Rom 3:23) An ewe manmocho “nampaan emon aramas” a affata pwe ekkewe muun aramas ra lapalapeni lapalapen aramas rese unusoch me tipis.

Iwe, pokiten sia silei met ewe manmocho a wewe ngeni me sia fen miritiiti ekiekin Kot ussun, iei sia tongeni atittina ewe saingoon kinikinin ei esissin mi monomon​—ewe nampa 6 me ewe popun a makketiu fan ulungat​—weween pwe 666, are 600 kapach 60 kapach 6.

Wonu Mi Mak Fan Ulungat​—Met Popun?

Lon ewe Paipel, ekkoch nampa mei wor weweer mi sokkolo lamoter. Ren chok awewe, fan chommong ewe nampa fisu a liosueta minne mi unus, are unusoch me ren Kot. Sia chechchemeni pwe a wor fisu ‘ran,’ are fansoun mi langattam, lon ewe wiik Kot a unusen apwonueta an forata ekkewe sokkopaten mettoch won fonufan. (Keneses 1:3–​2:3) An Kot kewe “pwon” ra ussun chok silifer mi fen limochulo “fan fisu,” weween pwe ra unusen limoch. (Kol Fel 12:6; An Salomon Fos 30:5, 6) Ewe soufos a ereni Naaman, ewe a uri rupun pwotur pwe epwe tutu fan fisu lon ewe chanpupu Jorotan, me mwirin epwe unusen chikar.​—2 King 5:10, 14.

Wonu a wewe ngeni eu mi aimu seni fisu. Esap ina eu nampa mi fich ngeni an epwe lisoueta och mettoch ese unusoch, och mettoch mi ta me ren Kot? Fokkun ewer! (1 Kronika 20:6, 7) Pwal och, wonu mi makketiu fan ulungat, 666, a wesewesen menlapei ukuukun an ese unusoch. Ena luku a letelo ren ewe poraus mi affata pwe 666 “nampaan emon aramas,” ussun chok sia fen kaeo. Ina popun, uruwoon ewe manmocho, an we ‘nampaan aramas,’ me ewe nampa 666 ir meinisin ra menlapei eu mettoch​ —me ren Jiowa, ewe manmocho a unusen solap, a unusen kkuf.

Ewe Esissin A Pwalo

Muttir chok mwirin pwaloon ewe poraus ussun ewe nampa 666, ewe puken Pwarata a aporausakich ussun 144,000 noun ewe Lam, Jises Kraist. Mei wor itan me iten Seman, Jiowa, won chamwer. Ekkeei it ra esilei ngeni aramas pwe ir noun Jiowa me noun Noun we, me ra pwapwa le pwarata ussur. Ussun we chok, chokkewe mei wor esissinnen ewe manmocho wor, ra pwarata pwe ir noun ewe manmocho chon angang. Ina popun ewe esissin, ika a nom won peliemwanin pour are won chamwer, a liosueta pwe chokkewe mei wor ewe esissin ra fel ngeni are alisata ekkewe pekin nemenem won fonufan mi lapalapeni lapalapen manmocho. Chokkewe mei wor ewe esissin ra ffang ngeni “Sisar” minne an Kot. (Luk 20:25; Pwarata 13:4, 8; 14:1) Ifa ussun? Ren ar ngeni ewe muu, esissinnen ewe muu, me an ewe muu minen maun, ewe sokkun asamol mi nikinikin fel. Ra kutta seniir apilukulukoch me ar amanau. Ika mei wor och ar fel ngeni Kot, a pop seni auer chok sap seni letiper.

Mi mwaalfesen me ena minne ewe Paipel a pesekich: “Ousap apilukuluku ekkewe samol, are emon aramas, pun esor alilis me rer. Lupwen ar ngasangas a feil seni ir, repwe liwinlo ngeni en me an pwul; lon ewe chok ran ekiekin letiper kewe repwe poutmwalilo.” (Kol Fel 146:3, 4) Chokkewe mi etiwa ena fon mi auchea resap lichipung lupwen ekkewe muu rese tongeni apwonueta alon ar kewe pwon are lupwen ekkewe sou nemenem mi foummong me itefoulo ra turutiu.​—An Salomon Fos 1:33.

Sap minne ekkewe chon Kraist mi enlet rese alisi aramas mi osupwang. Ra esilei porausen ewe eu chok muu a tongeni awesalo an aramas kewe osukosuk​—ewe muu ra tupuni, Muun Kot.​—Mattu 24:14.

Muun Kot​—Ewe Eu Chok Apilukuluk Fan Iten Aramas

Lupwen Jises a nonnom won fonufan, a menlapei Muun Kot lon an afalafal. (Luk 4:43) Lon an we iotek, ewe a iteni Iotekin Ach Samol, Jises a aiti ngeni noun kewe ifa ussun repwe iotek pwe Muun Kot epwe feito, me fan iten fisitaan letipen Kot won fonufan. (Mattu 6:9, 10) Ei Muu epwe nemeni unusen fonufan esap seni eu telinimw won fonufan nge seni lang. Ina popun Jises a eita ngeni ena muu “ewe muun lang.”​—Mattu 11:12.

Muun Kot epwe wato kinamwe fan iten meinisin noun kewe aramas mi alleasochis. (Kol Fel 37:11, 29; 46:8, 9) Jises, Kingen ewe Muu, epwe akkufu Setan, ina eu mettoch emon aramas ese tongeni fori. Pwal mwo nge letipechou, metek, me malo repwe morolo. A ifa me amwararen manauen chokkewe ese wor reer esissinnen ewe manmocho!​—Pwarata 21:3, 4.

[Pwóróus fan]

[Pwoor lon pekin taropwe 5]

Ekkewe Minen Alillis Fan Iten Ach Sipwe Esinna Weween 666

1. Fan chommong ekkewe it lon Paipel repwe affata lapalapen are manauen emon, ussun chok ren Eperiam, Jises, me pwal chommong. Pwal ussun chok iten are nampaan ewe manmocho a liosueta lapalapan kewe.

2. Lon ewe puken Taniel, ekkewe manmocho ra liosueta ekkewe muu are nemenemen aramas mi tattapwefengenniir. Ewe manmocho lon Pwarata 13:1, 2 a liosueta ewe kkotun nemenem won fonufan Setan a amanaua me nemeni.

3. An ewe manmocho “nampaan emon aramas,” a affata pwe minne ewe manmocho a liosueta minen aramas, sap ekkewe timon. Ina popun a wor ren ewe manmocho minne aramas ra kkuf ren pokiten rese unusoch me pokiten ir chon tipis.

4. Me ren Kot, ewe nampa wonu, eu mi aimu seni fisu, ewe nampa lon Paipel mi unus are unusoch, a wewe ngeni och mettoch ese unusoch. Ewe esissin 666 a menlapei ena nafangau ren an a makketiu fan ulungat.

[Credit Line]

Semirit mi echik: UNITED NATIONS/Sasing F. GRIFFING

[Sasing lon pekin taropwe 6]

An aramas nemenem a unusen sopwongau, me a fich pwe a liosutiu ren ewe nampa 666