‘Kopwe Fori Angangen Sounpetakin Ewe Kapas Allim’

‘Kopwe chok ononoto ren mettoch meinisin, . . . kopwe fori angangen sounpetakin ewe kapas allim.’​—2 TIMOTY 4:5.

1. Ifa ewe angang Jises a awiisa ngeni noun kewe chon kaeo?

 ITEN Jiowa we me an kewe kokkot ra esilesilfeil won unusen fonufan. A iei ussun pokiten noun Kot kewe aramas mi fen fangolo manauer ngeni Kot ra fen aucheaani ewe angang Jises Kraist a awiisa ngeni noun kewe chon kaeo lupwen a apasa: “Oupwe feilo asoulangalo chon fonu meinisin, oupwe papataisir fan iten ewe Sam, me ewe Nau, me ewe Ngun mi Fel, oupwe afalafaler pwe repwe alleasochisi mettoch meinisin minne ua alluku ngenikemi.”​—Mattu 28:19, 20.

2. Ifa ewe emmwen ewe overseer Timoti a angei, me ifa ussun ekkewe overseer chon Kraist repwe tongeni apwonueta ar angangen afalafal?

² Noun Jises kewe chon kaeo lon ewe aewin senturi ra aucheaani ena angang. Ren chok awewe, ewe aposel Paul a pese ngeni chienan we emon overseer chon Kraist, Timoti: “Kopwe fori angangen sounpetakin ewe kapas allim, o kopwe apwonueta wisom.” (2 Timoti 4:5) Ikenai, emon overseer a tongeni apwonueta an angangen afalafal ren an achocho le esileifeili ewe Muu, ren an fiffiti ewe angangen afalafal. Ren chok awewe, ewe Congregation Book Study overseer a wiisen emmweni ewe angangen afalafal me asukula aramas. Paul a apwonueta wiisan le esileifeili ewe kapas allim, me a alillis le asukula aramas fan iten ewe angangen afalafal.​—Fofor 20:20; 1 Korint 9:16, 17.

 Chon Uwei Kapas Allim Mi Achocho Me Loom

3, 4. Ikkefa kunaen Filip ussun chok emon chon uwei kapas allim?

³ Ekkewe popun chon Kraist ra sinnelo pokiten ar achocho le uwei kapas allim. Ekieki mwo ewe chon uwei kapas allim itan Filip. I emon lein ekkewe “fumon mwan mi itoch, mi ur ren ewe Ngun o pwal ren tipatchem” mi filita pwe repwe aineti mongo fan iten ekkewe fefin mi ma puluwer mi eani fosun Ipru me Kris lon Jerusalem. (Fofor 6:1-6) Mwirin a wes ena wiis mi sokkolo aucheaan me ekkewe chon kaeo chiloon chok ekkewe aposel ra kupetfesen pokiten riaffou mwaal, Filip a feilo ngeni Sameria. Ikena ie a afalafala ewe kapas allim me ewe ngun mi fel a atufichi i le asuolo ekkewe ngun mi ngau me apochokkula ekkewe mi pechema me mok. Chommong chon Sameria ra etiwa porausen ewe Muu me ra papatais. Lupwen ekkewe aposel lon Jerusalem ra rongorong met a fis, ra tiinalo ekkewe aposel Piter me Jon ngeni Sameria pwe chokkewe ra keran papatais repwe tongeni angei ngun mi fel.​—Fofor 8:4-17.

⁴ Mwirin, ngunun Kot a emmweni Filip pwe epwe chuuri ewe iunok seni Itiopia won ewe aal ngeni Kasa. Mwirin an Filip awewe mi ffat ussun an Aisea we oesini, ei mwan “noun ewe finesamolun Itiopia itan Kandeisia chon souan mi tutumunu pisekin kewe meinisin” a luku Jises Kraist me a papatais. (Fofor 8:26-38) Mwirin, Filip a feilo ngeni Asotus me mwirin ngeni Seseria pwe epwe “afalafala ewe kapas allim lon ekkewe telinim meinisin.” (Fofor 8:39, 40) A fokkun isetiu eu leenien appiru mi murinno ren an foffori angangen emon chon uwei kapas allim!

5. Fomon noun Filip kewe fopwul ra akkaewin silelo ren met?

⁵ Filip a chuen fori ewe angangen afalafal lon Sesaria 20 som ier mwirin. Lupwen Paul me Luk ra nonnom lon imwan we, “mi wor ren atewe fomon fopul lipich resaamo pupulu, o ra tongeni oesini.” (Fofor 21:8-10) Ra fen kait lon pekin ngun, ra tinikken lon ewe angangen afalafal, me ra pwal mwo nge tongeni oesini. An ekkewe sam me in tinikken lon ewe angangen afalafal epwe tongeni etipetipaochu nour kewe at me nengngin ikenai pwe repwe pwal achocho ngeni ewe angangen chon uwei kapas allim lon unusen manauer.

Chon Uwei Kapas Allim Mi Achocho Ikenai

6. Ifa ussun ekkewe chon uwei kapas allim lon ewe aewin senturi ra sopwoch?

⁶ Lon an Jises Kraist we oesini mi lapalap ussun ranich me ewe fansoun sopwolon, a apasa: “Nge ewe kapas allim epwe fakkun akkom le esinei ngeni einang meinisin.” (Mark 13:10) Ewe sopwoloon epwe fis mwirin ewe kapas allim a fen esilesilfeil “won unusen fonufan.” (Mattu 24:14) Lupwen Paul me ekkewe ekkoch ra esileifeili ewe kapas allim lon ewe aewin senturi, chommong ra wiliiti chon luku, me chommong mwichefel ra foruta lon ekkewe fonu fan nemenien muun Rom. Ekkewe elter mi wiisen emmweni ekkeei mwichefel ra fiti pwiir kewe lon ewe angangen uwei kapas allim me ra awatteelo ewe angangen afalafal ekis meinisin. An Jiowa kapas a mammaarita me a fokkun pworacho lon ekkena ran, ussun chok a fis ikenai pokiten fite milion Chon Pwarata Jiowa ra fori ewe angangen chon uwei kapas allim. (Fofor 19:20) En emon lein ekkewe chon mwareiti Jiowa mi pwapwa?

7. Met sokkun angang ekkewe chon esileifeili ewe Muu ra foffori ikenai?

⁷ Chommong chon afalafala ewe Muu ikenai ra alamota ar tufichin alapalo wiiser lon ewe angangen afalafala ewe kapas allim. Fite ngerou ra eani ewe wiis misineri me fite puku ngerou ra uwei kapas allim ussun chok regular me auxiliary pioneer. Me a ifa me murinnoon ewe angang ekkewe mwan, fefin, me semirit ra fori lupwen ra tinikken le eani wiiser chon afalafala ewe Muu mi achocho! Pwungun pwe noun Jiowa kewe aramas meinisin ra pwapwaiti ar feioch watte lupwen ra angang ngeni afar me afar ussun chok chon Kraist mi uwei kapas allim.​—Sefanaia 3:9.

8. Met sokkun angangen esissina aramas a fiffis iei, me ren io?

⁸ Kot a fen awiisa ngeni noun Jises kewe chon  kaeo mi kepit wiiser le esileifeili ewe kapas allim won unusen fonufan. Noun Jises “ekkewe ekkoch siip”, nge choochoor a chok lallapelo, ra fitiir lon ei angangen esileifeili kapas allim. (Jon 10:16) Lon eu oesini, ei angangen amanaua aramas a alollofengen me makken eu esissin won chamwen chokkewe mi letipeta me kechiu ren ekkewe foffor mi anioput a fiffis iei. Ekiselo chok, ekkewe mi ngau repwe talo. Iwe, a ifa me watteen wiisach mi auchea le uwei poraus enlet mi amanaua aramas ngeni chon fonufan meinisin!​—Isikiel 9:4-6, 11.

9. Ifa ussun sipwe tongeni alisi ekkewe minefo lon ewe angangen afalafal?

⁹ Ika sia fen fiffiti ewe angangen uwei kapas allim ren fansoun langattam, ese mwaal sipwe tongeni alisi ekkewe minefo lon ewe mwichefel. Fan ekkoch, eli sipwe tongeni mwin lon ewe angangen afalafal. Chokkewe mi eani ewe wiis elter repwe fori ukuukun ar tufich le aufichieta chiener kewe chon luku lon pekin ngun. Angangen ekkewe overseer mi tipetekison epwe tongeni alisi chommong pwe repwe wiliiti chon uwei kapas allim mi tinikken me uwaoch.​—2 Piter 1:5-8.

Afalafal Imw Me Imw

10. Met sokkun leenien appiru mi murinno Kraist me noun kewe chon kaeo loom ra isetiu lon ewe angangen afalafal?

¹⁰ Jises Kraist a isetiu eu leenien appiru mi murinno fan iten noun kewe chon kaeo ren an ussun chok emon chon uwei kapas allim. An Kot we Kapas a apasa ussun ewe angangen Kraist me noun kewe aposel: “A fetalfeil lon ekkewe telinim lapalap o telinim kisikis, a afalafalfeili ewe kapas allim ussun muun Kot. O ekkewe engol-me-ruuemon ra fiti i.” (Luk 8:1) Nge ifa ussun ekkewe aposel? Mwirin ewe ngun mi fel a niitiu lon Pentekos 33 C.E., “iteiten ran meinisin, rese mo ukutiu seni ar afalafala o apasata pwe Jises ewe Kraist, lon ewe imwen fel, o pwal lon pwisin leenier.”​—Fofor 5:42.

11. Me ren Fofor 20:20, 21, met ewe aposel Paul a fori lon an angangen afalafal?

¹¹ Pokiten an Paul achocho le uwei ewe kapas allim, a tongeni ereni ekkewe elter chon Kraist seni Efisus: “O use mo amwochu senikemi och mi lamot ngenikemi, pun ua chok kapas ngenikemi, o afalafala ngenikemi, lon mwich pwal lon imwemi.” Lupwen Paul a ‘afalafal imw me imw,’ a chok chuuri imwen chienan kewe chon fel ngeni Jiowa, ren an epwe alisi ekkewe chon luku? Aapw, pokiten a pwal awewei: “Ua pwarata ngenikemi, re Jus o pwal re Kris, usun aier ngeni Kot, o luku ngeni ach Samol Jises Kraist.” (Fofor 20:20, 21) Ese lamot ngeni chokkewe mi fen fangolo manauer ngeni Jiowa alillis ussun “aier ngeni Kot, o luku ngeni ach Samol Jises Kraist.” Paul a alisi ekkewe elter chon Kraist lon Efisus ren ewe angangen afalafal imw me imw me a aiti ngeni ekkewe rese luku ussun aier me luku. Lupwen Paul a fori ena mettoch, a appiru met Jises a fen fori me loom.

12, 13. Met noun Jiowa kewe aramas ra fori ussun ar pwuung le afalafal, nge mi tipeeu ngeni Filipai 1:7?

¹² Ewe angangen afalafal imw me imw a tongeni weires. Ren chok awewe, ekkoch ra mangau lupwen sia chuuriir lon imwer ren poraus lon Paipel. Nge sise mochen pwe aramas repwe mangau. Nge, ewe angangen afalafal imw me imw a alongolong won ewe Paipel, me ach tongei Kot me chon oruch kewe a amwokutukich le afalafal ngeni aramas lon imwer. (Mark 12:28-31) Ren ach sipwe ‘tumunu me alukuchara’ ach pwungun afalafal imw me imw, sia fen feilo ngeni imwen kapwung, kapachelong ewe Kapwung Mi Tekia Seni Meinisin lon Merika. (Filipai 1:7) Arapakan fansoun meinisin sia win lon ekkewe kapwung. Ren chok awewe, alleaani mwo porausen ei kapwung sia win lon:

¹³ “Ainetfetallin ekkewe tract eu angang ekkewe misineri ra eani seni me loom pwe repwe uwei kapas allim​—eu angang a poputa seni ewe fansoun a keran ffor ewe mwesinen ffor puk. Sokkopaten lamalam ra fen eani ei sokkun afalafal mi sopwoch ren chommong ier. Ei sokkun afalafala kapas allim a fiffis ikenai ren ekkewe lamalam mi tiinalo chon afalafal mi choni ewe lamalam ngeni fite ngerou aramas lon imwer me ra chuuriir pwe repwe winneni aramas ngeni ar luku. . . . Me ren ewe First Amendment  [ngeni ewe United States Constitution] lamoten ei angangen afalafal a lollo ngeni an aramas fel lon ekkewe imwen fel me afalafal lon fel.”​—Murdock v. Pennsylvania, 1943.

Pwata Sipwe Chok Akkafalafal?

14. Ifa ussun ach angangen afalafal a tongeni alisi aramas?

¹⁴ Mei wor chommong popun sipwe akafalafal imw me imw. Iteiten fansoun sia chuuri emon aramas, sia sotun le fotuki efou foun enlet seni Paipel. Ren ach chuurisefalli aramas, sia sotun achochonu met sia fen fotuki. Iei ussun a watte ewe alillis mi kawor ekis me ekis. Paul a fen makketiu: “Ngang, ua fotukatiu, Apollos a achochonu, nge Kot a fen amarata.” (1 Korint 3:6) Ina popun sipwe sopweilo le ‘fotuki me achochonu,’ ren lukuluk pwe Jiowa ‘epwe amaaraata.’

15, 16. Met popun sia lilliwiniti aramas lon imwer?

¹⁵ Sia fori angangen chon uwei kapas allim pokiten manauen aramas ra alongolong won. Ren ach afalafal sipwe tongeni amanaua pwisin kich me chokkewe mi auselingakich. (1 Timoti 4:16) Ika sia silei pwe emon epwe feiengau, sipwe ekis chok sotun le alisi? Aapwi! Pokiten ach afalafal epwe tongeni amanaua ekkewe aramas, sia lilliwiniiti aramas lon imwer. Nonnomun aramas a chok sissiwil. Eli emon ese tongeni auseling lon eu fansoun pokiten a osukosuk epwe tipemecheres le auselinga porausen Paipel lon pwal eu fansoun. Eli sipwe chuuri pwal emon chon ewe famili lupwen sia liwin, me sipwe tongeni porausfengen rer ussun ewe Paipel.

¹⁶ Esap chok nonnomun manauer nge pwal meefier epwe tongeni siwil. Ren chok awewe, eli maloon atongan epwe tongeni amwokutu emon le auselinga porausen ewe Muu. Sia mochen aururu emonnewe, ammeef ngeni osupwangan lon pekin ngun, me aiti ngeni ifa ussun epwe tongeni pwakini.​—Mattu 5:3, 4.

17. Ifa ewe aewin popun sia afalafal?

¹⁷ Ewe popun mi lamot seni meinisin sia afalafal imw me imw are fiti pwal ekkoch kinikinin ach angangen afalafal, ina ach mochen esileifeili iten Jiowa we. (Ekistos 9:16; Kol Fel 83:18) A ifa me watteen ewe feioch lupwen ach uwei kapas allim a alisi chon tongei enlet me pwung ar repwe wiliiti chon mwareiti Jiowa! Ewe soumak kol mi fel a koluwu: “Ekkewe aluwol me ekkewe fopul meinisin, ekkewe mi chinnap me ekkewe semirit! Repwe mwareiti iten ewe SAMOL, pun itan we chok mi tekia; an we ling mi tekia seni fonufan o pwal seni lang.”​—Kol Fel 148:12, 13.

Esilefeili Kapas Allim A Efeiochukich

18. Ifa ussun sia kuna feioch seni ach fori ewe angangen uwei kapas allim?

¹⁸ Ach fori angangen chon uwei kapas allim a efeiochukich lon chommong mettoch. Ach uwei ewe kapas allim imw me imw a alisikich le amaaraata tipetekison, akkaewin lupwen emon a song me ese mochen etiwakich. Ren ach wiliiti chon uwei kapas allim mi lipwakoch, a lamot ach sipwe appiru Paul, emon a ‘lapalapeni lapalapen sokkun aramas meinisin ngeni sokkun aramas meinisin, pwe epwe liapeni ekkoch aramas.’ (1 Korint 9:19-23) Ach lipwakochulo lon ewe angangen afalafal a alisata ach fos fan mirit. Ren ach apilukuluku Jiowa me ach filiochu met sipwe apasa, sipwe tongeni apwonueta an Paul we fon: “Fansoun meinisin ami kapas epwe umoumoch, o epwe anno ren salt, pwe oupwe sinei meeta oupwe polueni ngeni emon me emon.”​—Kolose 4:6.

19. Ifa ussun ewe ngun mi fel a alisi ekkewe chon uwei kapas allim?

¹⁹ Ewe angangen uwei kapas allim a pwal amwokutukich le lukuluk won an Kot we ngun mi fel. (Sekaraia 4:6) Mwirin, uwan kewe​—“tong, pwapwa, kinamwe, mosonoson, kirokiroch, lipwakoch, luku, tipefesir, forfichi”​—repwe pwapwalo lon ach angangen afalafal. (Kalesia 5:22, 23) A kku ach foffor ngeni aramas, pokiten ach apwonueta alon emmwenien ewe ngun a alisikich le pwarata tong, me wiliiti aramas mi pwapwa me kinamwe, mosonoson me kirokiroch, pwaralo lipwakoch, luku, tipefesir me forfichi lupwen sia afalafala ewe kapas allim.

20, 21. Ikkefa ekkewe ekkoch feioch a torikich ika sia tinikken le uwei kapas allim?

²⁰ Pwal eu feioch a torikich lupwen sia uwei  kapas allim, sia meefi meefien aramas. Lupwen aramas ra erenikich ussun ar kewe osukosuk​—semmwen, esor ar angang, osukosuk lon famili​—sise wiliiti emon couselor, nge sia aufichiireta me aururuur ren ekkewe wokisin seni Paipel. Sia tongei ekkewe aramas mi fen chunulo lon pekin ngun nge ra tongei minne mi pwung. (2 Korint 4:4) A mmen apwapwa ach sipwe tongeni awora alillis lon pekin ngun ngeni chokkewe “mi fil ngeni manau esemuch”!​—Fofor 13:48.

²¹ Ach fiffiti ewe angangen uwei kapas allim a alisikich le akkomwa ekkewe mettoch lon pekin ngun. (Luk 11:34) A mmen murinno ach fori ena pokiten ika sise fori, eli sipwe tongeni tup ren sossotun ach sipwe akkomwa pisek, eu sossot mi choufetal fan chommong won ei fonufan. Ewe aposel Jon a pese ngeni ekkewe chon Kraist: “Ousap tongei fonufan, are ekkena mettoch mi nonnom lon fonufan. Are emon a tongei fonufan, iwe, esor ewe tongen Semach lon i. Pun ekkena mettoch meinisin mi nonnom lon fonufan, mochenia-ingauen fituk, mochenia-ingauen mesach, o lamalam tekian ach pisek, ese mo popu seni ewe Sam, pwe seni chok fonufan. Iwe, fonufan epwe morelo, o pwal an kewe mochenia-ingau; nge i mi fori letipen Kot epwe nonnom feilfeilo chok.” (1 Jon 2:15-17) Ach achocho le uwei kapas allim me ach angang watte lon angangen ewe Samol epwe alisikich ach sisap tongei ewe fonufan.​—1 Korint 15:58.

Iseni Pisekimi Lon Lang

22, 23. (a) Menni pisek ekkewe chon Kraist chon uwei kapas allim ra iseni? (b) Ifa ussun ewe lesen mwirin ei epwe alisikich?

²² Ach tinikken le afalafala ewe Muu a wato feioch mi nomofochelo. Jises a pwarata ei mettoch lupwen a apasa: “Ousap iseni pisekimi won fonufan, ikewe macholap me paarang ra ani me ie, o chon sola ra atai o solani me ie. Nge oupwe iseni pisekimi lon lang, ikewe macholap me paarang resap ani me ie, o chon sola resap atai are solani me ie. Pun ikewe pisekum a nom ie, ina letipom epwe pwal nom ie.”​—Mattu 6:19-21.

²³ Amwo sipwe iseni pisekich lon lang, pokiten esor eu wiis mi lap seni ach tupuni ewe Epinikepisom Jiowa ach Samol ussun chok noun Chon Pwarata. (Aisea 43:10-12) Atun sia apwonueta wiisach ussun noun Kot kewe chon afalafal, ese mwaal sia meefi ussun chok emon fin Kraist, 90 som ierin mi apasa ussun an angang mi ttam ngeni Kot: “Lon unusen ai angang ua kilisou ngeni Jiowa ren an etiwa ai angang inaamwo ika mei chommong ai kewe apwangapwang, me ua iotek pwe i epwe Semei mi tong tori feilfeilo.” Ika sia pwal aucheaani ach riri ngeni Kot, sipwe mochen unusen apwonueta ach angangen uwei kapas allim. Ewe lesen mwirin epwe alisikich me weweiti ifa ussun sipwe tongeni unusen apwonueta ach angangen afalafal.

Ifa Ussun Kopwe Polueni?

• Pwata sipwe fori angangen chon uwei kapas allim?

• Met kopwe tongeni apasa ussun angangen chon uwei kapas allim me loom me ikenai?

• Pwata sia afalafal imw me imw?

• Ifa ussun sia pwisin feioch lupwen sia fori ewe angangen chon uwei kapas allim?

[Ekkewe Kapas Eis fan Iten ewe Lesen]

[Sasing lon pekin taropwe 18]

Ikenai mei wor chon uwei kapas allim mi chengel ussun chok Filip me noun kewe fopwul

[Sasing lon pekin taropwe 22]

Ifa ussun ka feioch lupwen ka esilei ewe kapas allim ngeni aramas?