Sipwe Iotek Ngeni Ekkewe Chonlang Fan Iten Alillis?

MEI pwung ach tingor alillis seni ekkewe chonlang lon fansoun osukosuk? Chommong ra ekieki pwe mei pwung. Ren enletin, ewe New Catholic Encyclopedia a apasa: “Emon a iotek ngeni . . . ekkewe chonlang . . . nge fan iten chok ar repwe affor lefilach me Kot.” Sipwe iotek ngeni ekkewe chonlang pwe repwe affor fan itach?

An Kot we Kapas a makkei iten ruuemon chok noun Kot chonlang mi tuppwol, Maikiel me Kapriel. (Taniel 8:16; 12:1; Luk 1:26; Juta 9) Pokiten ekkeei it ra nonnom lon ewe Paipel, sia miritiiti pwe emon me emon chonlang a sokkolo lapalapan ren pwisin itan, nge esap ir eu sokkun manaman chok. Nge, ekkoch chonlang rese mochen pwaralo iter. Ren chok awewe, lupwen Jekop a eisini iten ewe chonlang a chuuri i, ewe chonlang ese mochen pwari. (Keneses 32:29; Soukapwung 13:17, 18) Ese lisitiu iten ekkewe chonlang lon ewe Paipel, pwe aramas resap kon atenekiir.

Eu me lein wiisen ekkewe chonlang ina wiiser le uwei poraus seni Kot ngeni aramas. Ren enletin, ewe kapas “chonlang” lon fosun Ipru me Krik a wewe ngeni “chon uwei poraus.” Iwe nge, ekkewe chonlang rese affor lefilen Kot me aramas, esap ir chon affor mi uwei ekkewe iotek ngeni ewe leenien motun ewe Mi Tekia Seni Meinisin. Kot a fen akkota pwe sipwe iotek ngeni i lon iten Noun We, Jises Kraist, ewe mi apasa: “Minne oupwe tingor ren Semei fan itei epwe ngenikemi.”​—Jon 15:16; 1 Timoti 2:5.

Jiowa Kot ese kon osukosuk le auselingakich ika sia arap ngeni lon pwung. Ewe Paipel a alukulukukich: “Ewe SAMOL a chok arap ngeni ir meinisin ekkewe mi kokkori i, ngeni ir meinisin ekkewe mi kokkori i ren enlet.”​—Kol Fel 145:18.