“Unusen Apwonueta Om Angangen Afalafal”

“Unusen apwonueta om angangen afalafal.”​—2 TIMOTY 4:5, Byington.

1, 2. Inaamwo ika ekkewe chon Kraist meinisin ir chon uwei kapas allim nge, met ekkewe elter repwe fori me ren ewe Paipel?

 EN EMON chon esileifeili ewe Muu? Ika pwe wuu, kopwe kilisou ngeni Jiowa fan iten ei wiis mi murinno. En emon elter lon ewe mwichefel? Ina pwal eu feioch seni Jiowa. Nge sise mochen monuki pwe esap sukul tekia are ach angoch le fos a atufichikich fan iten ewe angangen afalafal are fan iten wiisach le tumunu ewe mwichefel. Jiowa a atufichikich fan iten ewe angangen afalafal, me ekkoch mwan ra eani ewe wiis overseer pokiten ra fichiiti met ewe Paipel a apasa ussun emon a mochen eani ena wiis.​—2 Korint 3:5, 6; 1 Timoti 3:1-7.

² Ekkewe chon Kraist mi fangolo manauer ngeni Kot meinisin ir chon uwei kapas allim, nge akkaewin a lamot ngeni ekkewe elter ar repwe isetiu eu leenien appiru mi murinno lon ewe angangen afalafal. Kot me Jises, me chiener Chon Pwarata Jiowa ra aucheaani ekkewe elter “mi angang weires ren kapas o ren afalafal.” (1 Timoti 5:17; Efisus 5:23; Ipru 6:10-12) Fansoun meinisin, a lamot pwe aitien emon elter epwe alisata an ekkewe chon auseling pochokkul lon pekin ngun, pokiten ewe aposel Paul a ereni ewe overseer itan Timoti: “Pun ekkan fansoun epwe feito lupwen resap chuen likiitu lon afalafal murinno, nge, pokiten selinger mi pwerik, repwe ionifengenni ren pwisin ir ekkoch sounpetak ra pwisin tipeni, o repwe okullu selinger seni minne mi enlet, nge repwe kul ngeni ekkewe tutunlapen rochopwak. Nge en, kopwe chok ononoto ren mettoch meinisin, o likiitu fan riaffou; kopwe fori angangen sounpetakin ewe kapas allim, o kopwe apwonueta wisom.”​—2 Timoti 4:3-5.

3. Met a lamot pwe luku mi chofona rese atai pochokkulen ewe mwichefel lon pekin ngun?

³ Ren afalafal mi chofona ete ataielo an ewe mwichefel pochokkul lon pekin ngun, a lamot pwe emon overseer epwe alleasochisi an Paul we fon: “Kopwe chok anonoto ren mettoch meinisin, . . . kopwe unusen apwonueta wiisom.” (2 Timoti 4:5, Byington) Ewer, emon elter epwe ‘unusen apwonueta wiisan.’ Epwe unusen fori wiisan. Emon elter mi unusen apwonueta an angangen afalafal a tumunuochu wiisan kewe meinisin me ese likitaalo ekkoch are a ekis chok angang won. Ena esin mwan a tuppwol lon pwal mwo nge mettoch mi kisikis.​—Luk 12:48; 16:10.

4. Met epwe tongeni alisikich pwe sipwe unusen apwonueta ach angangen afalafal?

⁴ Ach unusen apwonueta wiisach esap chok wewe ngeni lapeloon ewe fansoun sia afalafal nge a lamot ach nounoufichi ach fansoun. Filataan met repwe achocho ngeni me pwonuetaan ena kokkot iteiten maram epwe alisata sopwochun chon Kraist meinisin lon ewe angangen afalafal. Ren emon elter epwe alapalo an angangen afalafal, a lamot an akkotaochu manauan, amurinnoolo an schedule me a lamot an silei menni angang epwe tongeni awiisa ngeni emon me ifa ussun epwe fori. (Ipru 13:17) Iwe, emon elter mi kuna sufol a apwonueta wiisan, ussun chok Nehemaia a angang le autasefal ewe tittin Jerusalem. (Nehemia 5:16) Noun Jiowa kewe chon angang meinisin repwe fiffiti ewe angangen afalafala ewe Muu.​—1 Korint 9:16-18.

5. Ita met meefiach ussun ewe angangen afalafal?

 ⁵ A ifa me apwapwaan ach angangen esileifeili ewe Muu mi nemenem lon lang! Sia fokkun aucheaani wiisach le afalafala ewe kapas alllim won unusen fonufan mwen warotoon ewe sopwoloon. (Mattu 24:14) Inaamwo ika sise unusoch, an Paul kewe kapas a apochokkulakich: “Am aua akamwochu ei pisek auchea usun chok lon sepi pwul, pwe epwe chok pwarata pwe pochokkulen ewe manaman mi nonnom ren Kot, sap ren kich.” (2 Korint 4:7) Ewer, ach angang epwe tongeni murinno​—nge ren chok ewe pochokkul me tipatchem Kot a awora.​—1 Korint 1:26-31.

Pwarata Lingen Kot

6. Ifa ussun Israel loom a sokko seni Israel lon pekin ngun?

⁶ Paul a kapas ussun ekkewe chon Kraist mi kepit lupwen a apasa pwe Kot a “alipwakochukem pwe am aupwe sounpetakeni ewe pwon sefo.” Ewe aposel a apopofengenni ewe pwon sefo an ewe Israel lon pekin ngun ren Jises me ewe pwon loom an Israel ren Moses. Paul a pwal apasa pwe lupwen Moses a feitiu seni won ewe Chuuk Sainai fan ewe sileit fau mi mak won ekkewe Engol Alluk,won mesan we a fokkun saramaram me ekkewe chon Israel rese tongeni atola i. Nge lo, lo, lo, mei wor och mettoch mi chou a fisita pokiten “letiper kewe a poroingauelo” me eu nikotuupwon a pwoluelo letiper. Iwe nge, lupwen ra kul ngeni Jiowa ren unusen letiper, ewe nikotuupwon a sarifilo seniir. Paul a pwal kapas ussun wiisen chokkewe lon ewe pwon mi fo le afalafal, a apasa: “Kich meinisin, . . . sia nennengeni lingen ewe Samol ren mesach sap pwoluelo.” (2 Korint 3:6-8, 14-18; Ekistos 34:29-35) Noun Jises “ekkoch siip” ikenai ra pwal eani wiiser mi auchea le pwarata lingen Jiowa.​—Jon 10:16.

7. Ifa ussun aramas repwe tongeni attina lingen Kot?

⁷ Ifa ussun aramas rese unusoch repwe tongeni attina lingen Kot, lupwen esor emon epwe tongeni kuna mesan me manau mwirin? (Ekistos 33:20) Iwe, fengen me lingen Jiowa, a pwal wor lingen an kokkot le aitochu pwungun an nemenem ren Muun we. Ekkewe poraus mi enlet ra weneiti Muun we, ir kinikinin ekkewe “manamanen Kot” chokkewe mi angei ewe ngun mi fel lon Pentekos 33 C.E. ra poputa le esileifeili. (Fofor 2:11) Ren alillisin ewe ngun, ra tongeni unusen apwonueta ewe angangen afalafal Kot a awiisa ngeniir.​—Fofor 1:8.

8. Paul a uppos le fori met lon ewe angangen afalafal?

⁸ Paul a apposa letipan pwe esap wor och mettoch epwe pinei i seni an unusen apwonueta an angangen afalafal. A makkei: “Pokiten mi wor rem ei sokkun angang me ren umoumochun Kot, am ausap tilikop. Am aua fen poutalo ekkewe foforun le monomon mi asau. Am ausap mo ani tipatchem-mwal, o am ausap pwal amwalilo ewe kapasen Kot, nge ren am afata am kapas usun ewe mi enlet, am aua chok mochen pwisin itochulo ngeni letipen aramas meinisin fan mesen Kot.” (2 Korint 4:1, 2) Pokiten ewe “angang” Paul a kapas ussun, ewe enlet a pwapwalo me  saram lon pekin ngun a choufetal lon ekkewe fonu towau.

9, 10. Ifa ussun sipwe tongeni attina lingen Jiowa?

⁹ Paul a mak ussun ewe Popun saram lon pekin aion me pekin ngun: “Pun Kot, ewe mi apasa, ‘Saram epwe tin lon rochopwak.’ A pwal atina lon letipach, pwe epwe ngenikich ewe saramen sineilap usun ewe lingen Kot seni won-mesen Kraist.” (2 Korint 4:6; Keneses 1:2-5) Pokiten sia fen angei wiisach noun Kot chon afalafal, sipwe tumunu ach limoch pwe sipwe tongeni pwaralo lingen Jiowa.

¹⁰ Ekkewe aramas mi nonnom lon rochopwak rese tongeni kuna lingen Jiowa are liosun seni Jises Kraist, ewe Moses mi Lapalap. Nge pokiten kich noun Jiowa kewe chon angang, sia angei ewe saram mi lingemwarar seni ewe Paipel me attina ena saram ngeni aramas. Pwe chokkewe mi nonnom lon rochopwak lon pekin ngun resap ninniilo, a lamot ngeniir saram seni Kot. Iwe, ren pwapwa me tinikken, sia alleasochisi ewe allukun Kot pwe sipwe attina saram seni lon rochopwak ngeni lingen Jiowa.

Attina Om Saram Lupwen Ka Kaeo Paipel Ngeni Aramas

11. Met Jises a apasa ussun ach atiina saram, me ifa ussun sipwe tongeni fori ena lon ach angangen afalafal?

¹¹ Jises a ereni noun kewe chon kaeo: “Ami saramen fonufan. Eu telinim a nom won chukuchukuta ese tongeni epwe monelo. Resap appula eu lamp o isetiu fan sepi, pwe won leenian, o epwe asarama meinisin mi nom lon ewe im. Iei usun ami saram epwe pwapwalo ngeni aramas, pwe repwe kuna ami fofor murinno o mwareiti Sememi we mi nonnom lang.” (Mattu 5:14-16) Ach kewe foffor murinno ra tongeni amwokutu aramas le alingalo Kot. (1 Piter 2:12) Me ekkewe sokkopaten kinikinin ach angangen afalafal ra atufichikich an epwe chommong ach fansoun le attina ach saram. Eu mettoch sia achocho ngeni ren ach sipwe pwarata saram lon pekin ngun seni an Kot Kapas, ina ach kaeo Paipel ngeni aramas. Iei eu angang mi fokkun lamot pwe sipwe unusen apwonueta ach angangen afalafal. Ikkefa ekkewe minen alillis repwe alisikich pwe sipwe achungu letipen chokkewe mi kukkutta ewe enlet sia kaeo ngeni?

12. Ifa ussun iotek a riri ngeni ach kaeo ngeni aramas?

¹² Ach iotek ngeni Jiowa ussun ei mettoch a pwarata pwe sia fokkun mochen kaeo ngeni aramas. A pwal pwarata pwe sia miritiiti ewe lamoten ach alisi aramas ar repwe angei sile ussun Kot. (Isikiel 33:7-9) Jiowa epwe auselinga ach kewe iotek me epwe efeiochu ach achocho lon ewe angangen afalafal. (1 Jon 5:14, 15) Nge sise chok iotek pwe sipwe kuna emon a mochen kaeo ewe Paipel. Mwirin sia poputaani ewe kaeo, iotek me ach ekkekieki ussun ekkewe mettoch mi lamot ngeni ewe chon kaeo epwe alipwakochulo ach kaeo ngeni.​—Rom 12:12.

13. Met epwe tongeni alisikich pwe sipwe lipwakochulo le kaeo ngeni aramas?

¹³ A lamot ach sipwe ammonlatafichi fan iten eu me eu lesen pwe sipwe lipwakoch le kaeo ngeni aramas. Ika sia meefi pwe sia tufichingau, epwe alisikich ika sipwe atola ifa ussun ewe Congregation Book Study overseer a eani ewe lesen iteiten wiik. Fan ekkoch, eli sipwe tongeni mwin me ekkewe chon afalafal mi angangoch le kaeo ngeni aramas. Pwungun pwe sipwe akkaewin kaeo ussun ekiekin Jises me lapalapen an asukula aramas.

14. Ifa ussun sipwe tongeni achungu letipen ewe chon kaeo?

¹⁴ Jises a pwapwaesini an foffori letipen Seman we lon lang me an kakkapas ngeni aramas ussun Kot. (Kol Fel 40:8) Jises a mosonoson me a sopwoch le achungu letipen chokkewe mi auseling ngeni. (Mattu 11:28-30) Ina popun sipwe achocho le achungu letipen nouch kewe chon kaeo. Ren ach sipwe fori, lupwen sipwe ammonlata sipwe ekieki ifa ussun ewe poraus epwe weneiti ewe chon kaeo. Ren chok awewe, ika emonnewe ese kon lien silei ewe Paipel, eli sipwe akkom aiti ngeni ewe popun ewe Paipel mi enlet. Weween pwe  sipwe alleaani me awewei chommong wokisin seni Paipel.

Alisi Ekkewe Chon Kaeo Pwe Repwe Weweiti Ekkewe Kapas Awewe

15, 16. (a) Ifa ussun sipwe tongeni alisi emon chon kaeo lupwen ese weweiti eu kapas awewe lon ewe Paipel? (b) Met sipwe tongeni fori ika eu kapas awewe lon ewe puk mi weires ngeni ewe chon kaeo an epwe weweiti?

¹⁵ Eli emon chon kaeo Paipel ese silei eu kapas awewe mi mak lon ewe Paipel. Ren chok awewe, eli ese weweiti alon Jises lupwen a kapas ussun ewe lamp won leenian we. (Mark 4:21, 22) Jises a kapas ussun eu lamp aramas ra nounou loom loom mei wor echo wickan a loolo ren oil. Ra iseta ena esin lamp won leenian pwe epwe tongeni asarama unusen ewe imw. Epwe lamot research ussun “Lamp” me “Lampstand” lon eu puk ussun Insight on the Scriptures ika epwe ffat an Jises kapas awewe. * A ifa me murinnoon ach kaeo lupwen emon a weweiti me pwapwaiti ewe awewe sia fen ammonlata!

¹⁶ Eli eu puken awewei Paipel a nounou eu kapas awewe a weires le weweiti. Sotun le awewei, are nounou pwal eu kapas awewe. Eli eu puk a menlapei ewe lamoten poluoch me kokkotfengen lon pupulu. Ren om kopwe awewei ena, kopwe tongeni fos ussun emon mwan a nikamwaunulo won ewe nikamwaun. A epichalo ewe nikamwaun me a lukuluk pwe chienan epwe supuri i. Are kopwe tongeni awewei ewe lamoten poluoch me kokkotfengen ren an aramas angang fan tipeeu le atinepowu ekkewe ppwor seni efoch mota.

17. Met sipwe tongeni kaeo seni Jises ussun kapas awewe?

¹⁷ A lamot om kopwe ammonlata ika kopwe nounou pwal eu kapas awewe. Nge, ach mmonleta iei ussun a pwarata ach tongei ewe chon kaeo. Jises a nounou kapas awewe mi mecheres pwe epwe awewei ekkewe poraus mi weires. Sia kuna ifa ussun lon ewe Afalafal won ewe Chuuk, me ewe Paipel a pwarata pwe aitian kewe ra achungu letipen chokkewe mi auseling ngeni. (Mattu 5:1–​7:29) Jises a awewei ekkewe poraus fan mosonottam pokiten a tongei aramas.​—Mattu 16:5-12.

18. Menni kapasen pesepes a kawor ussun ekkewe wokisin ra mak lon nouch kewe puk?

¹⁸ Ach tongei aramas epwe amwokutukich le ‘awewefengen won ekkewe wokisin.’ (Fofor 17:2, 3, NW) Iwe, a lamot ach kaeo fiti iotek me ach nounou ekkewe puk me chassi mi kawor seni “ewe chon angang mi tuppwel o tipatchem.” (Luk 12:42-44) Ren chok awewe, mei wor chommong wokisin lon ewe puk Sile Mi Emmwen Ngeni Manau Esemuch. * Ese mak porausen ekkoch pokiten rese kuch lon ewe puk. Atun ewe kaeo, a lamot ach sipwe alleaani me awewei ekkoch lein ekkeei wokisin popun pun aitiach kewe ra alongolong won an Kot we Kapas, me a watte an manaman. (Ipru 4:12) Atun ewe kaeo suuki ewe Paipel me alleaani ekkoch ekkewe wokisin mi mak lon ekkewe parakraf. Alisi ewe chon kaeo le cheki met ewe Paipel a apasa ussun eu poraus are ifa ussun epwe alisata an filioch. Achocho le aiti ngeni ifa ussun epwe feioch seni an alleasochisi Kot.​—Aisea 48:17, 18.

 Eani Ekkewe Kapas Eis Epwe Efisaata An Epwe Ekiek

19, 20. (a) Ifa lamoten ach nounou ekkewe kapas eis mi lukeato meefien aramas lupwen sia kaeo ngeniir? (b) Met sipwe tongeni fori ika a lamot ach sipwe pwungupwungsefal ussun eu poraus?

¹⁹ An Jises lipwakoch le eani kapas eis a alisi aramas le ekiek. (Mattu 17:24-27) Ika sia eani ekkewe kapas eis pwe sipwe silei meefian nge ekkewe kapas eis resap asaua ewe chon kaeo, met a polueni epwe tongeni pwalo an ekiek ussun eu poraus. Eli sipwe kuna pwe a chuen eani ekkewe luku rese tipeeu ngeni ewe Paipel. Ren chok awewe, eli a luku ewe Trinitas. Lon sopwun 3, ewe puk Sile a apasa pwe ewe kapas “Trinitas” ese mak lon ewe Paipel. A mak lon ewe puk ekkewe wokisin mi pwarata pwe Jiowa a sokko seni Jises me ewe ngun mi fel ina an Kot we manaman, nge esap emon. Eli ach alleaani me poraus ussun ekkeei wokisin epwe naf. Nge epwe ifa ussun ika ese naf? Eli lupwen oua kaeosefal, oupwe ekis kaeo ussun ei poraus seni pwal eu puken Chon Pwarata Jiowa, ussun chok ewe brochure Should You Believe in the Trinity? Mwirin, oupwe tongeni poputasefalli ami kaeo lon ewe Sile puk.

²⁰ Nge ifa ussun ika an ewe chon kaeo polueni mi amairu are a alichipwungukich? Ika ewe poraus a weneiti suppwa are pwal och mettoch a weires ngeni ewe chon kaeo, eli sipwe tongeni sopweilo ewe kaeo nge sipwap poraus ussun ekkena mettoch lon pwal eu fansoun. Ach silei pwe ewe chon kaeo a chuen un suppwa epwe atufichikich le kutta ekkoch poraus lon eu puk are chassi epwe tongeni alisi i le feffeita lon pekin ngun. Lupwen sia achocho le achungu letipen ewe chon kaeo, sipwe tongeni tingor pwe Jiowa epwe alisi i le maarita lon pekin ngun.

21. Met epwe tongeni fisita ika sia siwili lapalapen ach asukula aramas pwe epwe fich ngeni osupwangen emon me emon chon kaeo?

²¹ Ese mwaal pwe mmonloch me alillis seni Jiowa epwe alisikich le siwili ach asukula aramas pwe epwe fich ngeni minne ewe chon kaeo a osupwang ren. Lo, lo, lo, eli sipwe tongeni alisi i le alapalo tong mi alollon fan iten Kot. Eli sipwe pwal tongeni amaaraata an sufoliiti me aucheaani an Jiowa we mwicheich. Me a ifa me murinnoon lupwen ewe chon kaeo Paipel a miritiiti pwe “enlet Kot mi nonnom remi”! (1 Korint 14:24, 25) Ina popun, amwo sipwe lipwakoch le kaeo ngeni aramas me fori ukuukun ach tufich le alisi aramas pwe repwe wiliiti noun Jises kewe chon kaeo.

Eu Pisek Auchea Sipwe Acheni

22, 23. Met a lamot ika sipwe unusen apwonueta ach angangen afalafal?

²² Ren ach unusen apwonueta ach angangen afalafal, a lamot ach sipwe lukuluk won ewe pochokkul Kot a awora. Lupwen Paul a kapas ussun ewe angangen afalafal, a mak ngeni chienan kewe chon Kraist mi kepit: “Am aua akamwochu ei pisek auchea usun chok lon sepi pwul, pwe epwe chok pwarata pwe pochokkulen ewe manaman mi nonnom ren Kot, sap ren kich.”​—2 Korint 4:7.

²³ Ese lifilifil ika kich mi kepit are sia choni ekkewe “ekkoch siip,” nge kich ekkewe sepi pwul mi apwangapwang. (Jon 10:16) Iwe nge, Jiowa a tongeni ngenikich ewe pochokkul mi lamot pwe sipwe apwonueta wiisach ese lifilifil menni osukosuk a torikich. (Jon 16:13; Filipai 4:13) Ina popun sipwe unusen lukuluk won Jiowa, aucheaani ach angang mi auchea, me unusen apwonueta ach angangen afalafal.

[Ekkewe pwóróus fan]

Ifa Ussun Kopwe Polueni?

• Met ekkewe elter repwe tongeni fori pwe repwe unusen apwonueta ar angangen afalafal?

• Ifa ussun sipwe tongeni angangochulo le kaeo ngeni aramas?

• Met kopwe fori ika emon noum chon kaeo ese weweiti eu kapas awewe are a osupwangen pwal ekkoch alillis ussun eu poraus?

[Ekkewe Kapas Eis fan Iten ewe Lesen]

[Sasing lon pekin taropwe 24]

Ekkewe elter chon Kraist ra wiisen sense lon ewe mwichefel me alisi chiener kewe chon luku lon ewe angangen afalafal

[Sasing lon pekin taropwe 26]

Sia attina saram lupwen sia lipwakoch le kaeo ngeni aramas