A Ita Pwopwpwonuta Iei Letipen Kot?

“Letipom epwe pwopwpwonuta won pwal fonufan, ussun an a fen pwopwpwonuta lon lang.”​—Mattu 6:10, New World Translation.

JULIO me Christina ra mmen riaffou lupwen ra katol maloon fomon me lein nour kewe lupwen a karelo waar we chitosa. Emon mi sakau a ppurei waar we, iwe, a ppwung. Marcos, nour we alimonun, ese malo pokiten an aramas ekiewu me lon ewe ekkei, nge a wesewesen watte karen inisin, iwe, a fis tterin ren, nge esap tongeni mo seni. Ena at tiu ierin. Seman we a fokkun letipechou. A sotun aururu pwisin i me an we famili ren an apasa pwe “Sipwe weweiti pwe iei letipen Kot, ese lifilifil ika minne epwe torikich epwe murinno are ngau are met kkan mwo.”

Lupwen a fis ena sokkun mettoch mi fokkun eriaffou, a chok pwal ina ussun meefien chommong. A iei ussun ar ekiek: ‘Ika Kot a unusen manaman me a tongeikich, iwe, ese mwaal minne a fen fis epwe ochiitikich, inaamwo ika mi weires ach sipwe weweiti ena mettoch.’ En mi tipeeu ngeni ar na ekiek?

Fan chommong, ewe ekiek pwe letipen Kot minne chok epwe fis, ese lifilifil ika epwe och are ngau, a longolong won alon Jises, ewe mi nom lon minne aramas ra eita ngeni ewe Iotekin ach Samol, ewe mi mak asan. Letipen Kot a pwopwpwonuta lon lang, ika met? Ika sipwe iotek pwe ‘Letipom epwe pwopwpwonuta won fonufan,’ esap pwe sia fen apasa nge minne epwe fiffis won fonufan, ina letipen Kot?

Chommong ra tipemwaramwar ussun ena ekiek. Me rer nge ena ekiek a ita wewe ngeni pwe Kot ese afanni meefien forian kewe, weween, kich aramas. A iei ussun ar kapas eis: ‘Pwata emon Kot mi tong a tipeni pwe epwe tottori aramas mettoch mi fokkun eriaffou? Ika Kot a mochen aiti ngenikich eu lesen, ita ifa ena lesen sipwe kaeo? Eli a ina ussun meefiom.

Iei makkeien pwiin Jises we, ewe chon kaeo Jemes, ussun ena mettoch: “Emon esap apasa fansoun an sosot, ‘Ai sosot a feito me ren Kot’; pun esor emon mi tongeni oturukapa Kot, o Kot esap oturukapa emon.” (Jemes 1:13) Minne mi ngau ese kan popu seni Kot. Ina minne, a ffat pwe sap minne letipen Kot mettoch meinisin mi fiffis won fonufan lon ei fansoun. Ewe Paipel a pwal kapas ussun letipen aramas, letipen ekkewe muu, iwe, pwal mwo ngeni letipen ewe Tefil. (Jon 1:13; 2 Timoti 2:26; 1 Piter 4:3) En mi tipeeu ngeni pwe minne a fis ngeni an Julio me Christina we famili esap letipen emon Kot mi nonnom lang, nge mi ur ren tong?

Iwe, ifa chok weween alon Jises lupwen a aiti ngeni noun kewe chon kaeo ar repwe eani ei iotek: ‘Letipom epwe pwopwpwonuta’? Ita ina eu tingor pwe lon ekkoch chok fansoun Kot epwe apwonueta letipan won fonufan, are Jises a fen aiti ngenikich pwe sipwe iotek ren och mettoch mi lap seni me murinno seni ena, weween, och sokkun siwil aramas meinisin repwe tongeni apilukulukoch ngeni? Sipwe nengeni minne a pwal mak lon Paipel.

[Credit Line]

Car: Dominique Faget-STF​/AFP​/Getty Images; child: FAO photo​/B. Imevbore