Akkachocho Le Pwarata Kirokiroch Lon Ei Fonufan Mi Ur Ren Oput

“Ewe mettoch mi murinno lon aramasen fonufan, iei ar pwarata kirokiroch.”​—ÄN SALOMON FOS 19:22, New World Translation.

1. Pwata epwe tongeni weires ach sipwe pwarata kirokiroch?

 EN MI meefi pwe en emon aramas mi kirokiroch? Ika ina, epwe tongeni an epwe weires om kopwe manau lein chon fonufan lon ei fansoun. A enlet pwe lon ewe Paipel, a mak pwe kirokiroch och “uwaan ewe ngun mi fel,” nge pwata a mmen weires an aramas pwarata kirokiroch lon pwal mwo nge ekkewe fonu mi ussun ita fonuen chon Kraist? (Kalesia 5:22) Ussun sia fen kuna lon ena eu lesen mi akkom mwen ei, poluen ena kapas eis a pwalo lon minne ewe aposel Jon a makkei​—weween, unusen fonufan a nom fan nemenien emon ngun mi kirikiringau, Setan ewe Tefil. (1 Jon 5:19) Jises Kraist a apasa pwe Setan “ewe sou nemenemen fonufan.” (Jon 14:30) Ina popun, chon fonufan ra kan lapalapeni lapalapen ena emon mi nemeniir, nge i emon mi u ngeni Kot, iwe, fansoun meinisin a eani ekiek mi mwanesol me kirikiringau.​—Efisus 2:2.

2. Ikkefa ekkewe popun epwe tongeni weires ach sipwe pwarata kirokiroch?

² Lupwen aramas ra kirikiringau ngenikich, letipach a mmen osukosuk ren. Eli sipwe kuna kirikiringau seni chon oruch kewe mi oputakich me seni ekkan aramas sise sissileer, are pwal mwo nge seni chienach kewe me chon le imwach kewe mi mwaallilo lon ar ekiek. Weiresin ach chuuri aramas mi sorosorongau me ekkewe mi puchorun song me okoun lefiler a kan efisata letipengau. An aramas pwarata ena sokkun kirikiringau epwe tongeni asongakich, iwe, eli sipwe ekiekin enniwili  ngeni aramas ar kewe foffor mi pwarata kirikiringau. Ena mettoch epwe tongeni efisata osukosuk lon pekin ngun are pekin aion.​—Rom 12:17.

3. Met sokkun osukosuk watte ra kan sotuni an aramas mochen pwarata kirokiroch?

³ Eli ekkewe lapalap mi eriaffou won unusen fonufan repwe pwal aweiresi ach tufichin pwarata kirokiroch. Ren chok awewe, chon fonufan ra kan meefi riaffou pokiten alon me fofforun chon furio, me an aramas tufichin aea ekkewe pisekin maun, awewe chok ren ewe sokkun pakutang mi tufichin nnielo chommong aramas. Pwal och, fite milion aramas ra mwelele, iwe, ra mmen osupwang ren aner mongo, imwer, ufer, me alillis lon pekin safei. A weires ngeni aramas ar repwe pwarata kirokiroch ika esor ar apilukuluk.​—Än Salomon Afalafal 7:7.

4. Ifa ewe ekiek mi mwaal aramas repwe tongeni eani lupwen repwe ekiekin pwarata kirokiroch?

⁴ A mecheres an aramas ekieki pwe pwarataan kirokiroch a lamot kisikis me eli ena lapalap esissinnen aramas mi nisimwa. Emon epwe tongeni meefi pwe aramas ra turunufasei i, akkaewin, ika resap afanni meefian. (Kol Fel 73:2-9) Iwe nge, ewe Paipel a awora ngenikich emmwen mi pwung lupwen a apasa pwe “Eu kapasen paluen mi pwetete a awesi lingeringer, nge eu kapas pochokul a afisata song.” (Än Salomon Fos 15:1) Mosonoson me kirokiroch ruu me lein ekkewe lapalap mi kapachelong lon uwaan ewe ngun mi fel, iwe, ir mi ririfengen me ra awora watte alillis lon fansoun weires.

5. Ikkefa ekkoch kinikinin lon manauach a lamot ach sipwe pwarata kirokiroch?

⁵ Pokiten kich chon Kraist, a mmen lamot ngenikich pwarataan uwaan an Kot we ngun mi fel, iwe, epwe murinno ach sipwe ekieki ifa ussun sipwe tongeni pwarata eu me lein ekkena lapalap, weween, kirokiroch. Sipwe tufichin pwarata kirokiroch lon ei fonufan mi ur ren oput? Ika ina, ifa ussun sipwe tongeni pwarata pwe sise kan mut ngeni ekiekin Setan an epwe pinei ach pwarata kirokiroch, akkaewin, lon fansoun weires? Sipwe kaeo ifa ussun sipwe tongeni pwarata kirokiroch lon ach famili, lon ach leenien angang, lon sukul, lein chon oruch kewe, lon ach angangen afalafal, me pwal lein chienach kewe chon luku.

Pwarataan Kirokiroch lon Ach Famili

6. Pwata pwarataan kirokiroch lon ach famili a fokkun lamot, me ifa ussun sipwe tongeni pwarata ena lapalap?

⁶ Ren ach sipwe tufichin kuna feioch me emmwen seni Jiowa, a lamot ach sipwe uwaani uwaan ewe ngun mi fel me akkamaarata uwaan. (Efisus 4:32) Sipwe annefota lamoten pwarataaan kirokiroch lein chon ach famili. Lon fofforur kewe ran me ran, emon mwan me puluwan we repwe pwarata kirokiroch me tong lefiler me pwal ngeni nour kewe. (Efisus 5:28-33; 6:1, 2) Ena sokkun kirokiroch epwe pwalo lon lapalapen an chon ewe famili fosfengen, iwe, ekkewe nau repwe asamolu me sufoliiti semer me iner, me ewe sam me in repwe pwarata pwe ra aucheani nour kewe. Sipwe muttir apunga chon ach famili ika repwe fori mettoch mi murinno, nge sipwe mmang le apwunguur ika repwe mwaallilo.

7, 8. (a) Met sokkun foffor sipwe tumunukich seni ren ach sipwe tufichin pwarata kirokiroch mi enlet lon ach famili? (b) Ifa ussun porausfengen mi murinno a kan apochokkula an chon eu famili ririfengen? (c) Ifa ussun kopwe tongeni pwarata kirokiroch lon om famili?

 ⁷ Pwarataan kirokiroch lon ach famili a wewe ngeni ach appiru ei fon seni ewe aposel Paul: “Nge iei oupwe chok likitalo ekkeei mettoch meinisin: chou, song, ekiekingau, esiit, o kapas mi limengau seni lon auemi.” Iteiten ran meinisin, chon Kraist lon eu famili repwe kapasfengen fan sufol. Met popun? Pun porausfengen mi murinno, iei longolongun eu famili mi pochokkul me aumanau. Ika epwe wor tipefesen, sipwe akukkunalo ewe osukosuk ren ach sotuni le pwakini minne sia tipefesen won, nge esap ren ach ekiekin pwarata pwe sia pwung lon ewe anini. Ika chon eu famili ra pwapwa, iwe, ra kan achocho ngeni ar repwe awattei kirokiroch me kisaseu lefiler.​—Kolose 3:8, 12-14.

⁸ Kirokiroch a nom lon tettelin ekiekoch me a ameef ngenikich pwe sia mochen fori minne epwe ochiiti aramas. Ina minne, sia kan achocho ngeni ach sipwe tipemecheresin pwarata fofforoch, sufol, me alillisoch ngeni chon le imwach kewe. Wiisen meinisin chon ewe famili ar repwe pwarata ewe sokkun kirokiroch ewe famili epwe iteuoch ren. Iwe mwiriloon, sap minne ewe famili epwe chok kuna feioch seni Kot, nge repwe pwal mwareiti ewe Koten kirokiroch, Jiowa, lon ewe mwichefel me pwal lon sopwur we.​—1 Piter 2:12.

Pwarataan Kirokiroch lon Ach Leenien Angang

9, 10. Awewei mwo ekkoch osukosuk epwe tongei piita lon ach leenien angang me ifa ussun sipwe tongeni pwakiniir ren ach pwarata kirokiroch.

⁹ Ren chon Kraist mi angang iteiten ran, eli repwe kuna sossotun ar repwe pwarata kirokiroch ngeni chiener kewe chon angang. Eli emiisfengen lefilen chon angang epwe tongeni efisata osukosuk, osukosuken om kopwe tongeni towu seni om angang pokiten an emon chienom chon angang eani foffor mi otuputup are tipachchem sola, iwe, epwe aitengauok mwen mesen noum we pos. (Än Salomon Afalafal 4:4) Esap mecheres ach sipwe pwarata kirokiroch fan ena sokkun lapalap. Iwe nge, ika sipwe chechchemeni pwe a kan pwung ach sipwe pwarata kirokiroch, iwe, chon angang ngeni Jiowa repwe achocho ren ukuukun ar tufich pwe repwe siwili letipen ir kewe mi sorosorongau. Eli ach pwarata pwe sia kan ekkekieki ussur epwe awora alillis ren ena mettoch. Eli kopwe tongeni pwarata pwe ka lolilen ika epwe samau chienom na chon angang are chon an famili. Om eis ussur me chon an famili epwe tongeni amurinnolo ekiekin ewe emon. Ewer, chon Kraist repwe pi ifa ussun repwe tongeni alapalo tipeeu me kinamwe ukuukun ar tufich. Fan ekkoch och kapas sipwe uwawu fan kirokiroch, nge mi pwarata pwe sia tongeer me ekiekiir epwe akukkunalo ewe osukosuk.

¹⁰ Lon pwal ekkoch fansoun, eli emon pos epwe sotuni le eriani noun kewe chon angang pwe repwe fiti an ekiek, iwe, eli epwe ereni meinisin pwe repwe fiti och minen achechchemenien ewe muu are och minen apwapwa fan iten och mettoch  ese tipeeu ngeni Paipel. Lupwen mwelien letipen emon chon Kraist esap mut ngeni an epwe fiti, eli epwe efisata anini. Lon ena atun, sipwe mirit ika sisap titchiki ewe popun epwe mwaal ach sipwe tipeeu ngeni mochenin ewe pos. Popun, pun me ren ekiekin ekkewe rese fiti lukuen ewe chon Kraist, a pwung minne a fen kkotota. (1 Piter 2:21-23) Eli fan kirokiroch kopwe tongeni awewei ewe popun om kosap fiti ewe mettoch. Kosap polueni ar kapasen esiit ren om eani kapasen esiit. A murinno an chon Kraist appiru ei fon mi murinno seni Rom 12:18: “Are mi tufich, ukukun minne oua tongeni, oupwe kinamwefengen me aramas meinisin.”

Pwarataan Kirokiroch lon Sukul

11. Met popun epwe tongeni weires ngeni ekkan kukkun ar repwe pwarata kirokiroch ngeni chiener kewe chon sukul?

¹¹ Epwe tongeni an epwe weires ngeni ekkan kukkun ar repwe pwarata kirokiroch ngeni chiener kewe chon sukul. Fan chommong, ekkan kukkun ra mochen pwe repwe itepwa lein chon sukul. Ekkoch at ra kan eani foffor mi asikesik pwe repwe iteuoch lein chon sukul me ra pwal mimmina ekkoch leir lon sukul. (Mattu 20:25) Pwal fitemon sarafo ra efich ar repwe asika ar tipachchem, angochur lon pekin urumot are lon pwal fitu mettoch. Lupwen ra asika tufichir kewe, fan chommong ra kirikiringau ngeni chiener kewe chon sukul pokiten ar eani ewe ekiek mi mwaal pwe ena mettoch epwe atekiereta lein chon sukul. Chon Kraist sarafo repwe tumunu pwe rete appiru chokana. (Mattu 20:26, 27) Ewe aposel Paul apasa pwe “tong a mosonottam me kirokiroch” me tong “ese sikasini, ese lamalam tekia.” Ina minne, wiisen chon Kraist ar resap appiru lapalapangauen ekkewe mi kirikiringau, nge repwe kamwochunnuk won an Paipel kewe fon lon ar kewe foffor ngeni chiener kewe chon sukul.​—1 Korint 13:4.

12. (a) Met popun epwe tongeni weires ngeni ekkan kukkun ar repwe pwarata kirokiroch ngeni nour kewe sense? (b) Ekkan kukkun repwe tongeni kuna alillis seni io lupwen fansoun weires epwe tongeni amwokutuur pwe repwe pwarata kirikiringau?

¹² Ekkewe kukkun repwe pwal kirokiroch ngeni nour kewe sense. Chommong chon sukul ra kan pwapwa ika repwe tongeni aosukosuka nour kewe sense. Ra kan ekieki pwe ir mi tipachchem ika repwe atai an chon sukul sufoliiti ekkewe sense ren ar fori ekkewe sokkun mettoch mi atai allukun sukul. Ren ar eani kapasen amosok, eli repwe tongeni luki pwal fitemon pwe repwe appiruur. Ika emon chon Kraist kukkun esap appiruur, eli repwe esiita are kirikiringau ngeni. An chon Kraist kukkuna ekkena sokkun mettoch lon unusen ewe ierin sukul epwe sotuni ar ekiekin pwarata kirokiroch. Iwe nge, chechchemeni mwo pwe a  fokkun lamot ach sipwe tuppwol lon wiisach we, wiisen chon angang ngeni Jiowa. Sipwe wesewesen luku pwe i epwe akkalisikich ren an we ngun mi fel lon ekkena fansoun weires lon manauach.​—Kol Fel 37:28.

Pwarataan Kirokiroch ngeni Chon Oruch kewe

13-15. Met epwe tongeni eppetikich seni ach pwarata kirokiroch ngeni chon oruch kewe, me ifa ussun sipwe tongeni pwakini ekkena minen eppet?

¹³ Ika ka nonnom lon eu imw, lon eu apartment, are lon pwal eu leeni, kopwe tongeni pi ika ifa ussun kopwe tufichin pwarata kirokiroch me om ekieki nonnomun chon orum kewe. Nge pwal ina eu mettoch ese lien mecheres om kopwe fori.

¹⁴ Epwe ifa ussun ika chon orum kewe repwe apap ngonuk pokiten an a sokkolo om einang, fonuom, are om lamalam? Epwe ifa ussun ika repwe kapas pochokkul ngonuk are amonungau ngonuk? Pokiten en emon chon angang ngeni Jiowa, om pwarata kirokiroch ukuukun om tufich epwe atoto feioch. Epwe pwalo pwe mi sokkolo lapalapochum, iwe, ka enletin mwareiti Jiowa​—nge ina i ewe emon mi nampa eu le pwarata kirokiroch. Kosap tongeni silei ika epwe siwil ekiekin chon orum we pokiten om pwarata kirokiroch. Eli epwe tufich an epwe wililo, iwe, wiliiti emon chon mwareiti Jiowa.​—1 Piter 2:12.

¹⁵ Ifa ussun sipwe tongeni pwarata kirokiroch? Iei eu mettoch sipwe tongeni fori: Chon ach famili meinisin repwe pwarata uwaan ewe ngun mi fel lon ar kewe foffor meinisin. Eli chon oruch kewe repwe kuna ena mettoch. Fan ekkoch, eli sipwe tufichin alisi chon oruch kewe. Chechchemeni mwo pwe kirokiroch a wewe ngeni ach sipwe wesewesen foffori met epwe ochiiti aramas.​—1 Piter 3:8-12.

Pwarataan Kirokiroch lon Ach Angangen Afalafal

16, 17. (a) Pwata a lamot pwarataan kirokiroch lon ach angangen afalafal? (b) Ifa ussun sipwe tongeni pwarata kirokiroch lon ekkewe fitu keangen lon ach angangen afalafal?

¹⁶ Kirokiroch epwe pwapwaalo fansoun meinisin  lon ach angangen afalafal lupwen sipwe achochopok le afalafal ngeni aramas lon imwer, lon ar leenien angang, me pwal lon leenien chulap. Sipwe chechchemeni pwe kich chon tupuni Jiowa, ewe mi pwarata kirokiroch fansoun meinisin.​—Ekistos 34:6.

¹⁷ Met epwe kapachelong lon ach achocho le pwarata kirokiroch lon ach angangen afalafal? Awewe chok, ika sipwe afalafal le pukopuken al, sipwe tongeni pwarata kirokiroch ika epwe mwoch ach kapas me sipwe pi pwe sisap aosukosuka aramas lupwen sipwe fos ngeniir. Chommong aramas ra kan feffetal lepekin alen fetalin chitosa, ina minne, sipwe pi pwe site eppeti leenien fetalin aramas. Pwal eu, ika sipwe afalafal lon leenien sopai, sipwe pwarata kirokiroch ren ach amwocha ach poraus, pun sipwe chechchemeni pwe chon sopai ra kan akkalisi chon etto kamo.

18. Ifa lamoten ewe mettoch mirit fan iten ach sipwe tufichin pwarata kirokiroch lon ach angangen afalafal?

¹⁸ Lon ewe angangen afalafal imw me imw, sipwe mirit. Esap kon ttam ach nonnom ren imwen emon ika a ngau ran. En mi tongeni meefi ika emon a fen chipwang are pwal mwo nge mangau pokiten a ekis ttam ach nom ren? Eli lon fonuom, Chon Pwarata Jiowa ra tottori imwen chon sopwur fan chommong. Ika ina, kopwe pwarata pwe ka afanni meefier, iwe, fansoun meinisin kopwe pwarata kirokiroch me sorosoroch. (An Salomon Fos 17:14) Kopwe auseling ngeni ewe popun emon esap tongeni etiwa om afalafal. Chechchemeni mwo pwe neman pwal emon brother are sister epwap chuuri i fan eu. Ika kopwe chuuri emon mi oro arochongau, kopwe achocho le pwarata kirokiroch ngeni. Kosap leuwommong le fos ngeni are fochafoch ngeni, nge kopwe fos pwotete. Emon chon Kraist mi kirokiroch esap mochen asonga emon pwe ete poputa anini. (Mattu 10:11-14) Eli eu ran ena emon epwe auseling ngeni ewe poraus allim.

Pwarataan Kirokiroch lon Ach kewe Mwich

19, 20. Pwata pwarataan kirokiroch a lamot lon ach mwichefel, me ifa ussun sipwe tongeni pwarata ena lapalap?

¹⁹ A pwal lamot ach sipwe pwarata kirokiroch ngeni chienach kewe chon luku. (Ipru 13:1) Pokiten kich mi kapachelong lon eu mwicheich mi pwelli unusen fonufan, mwicheichen pwipwi, a fokkun lamot ach sipwe pwarata kirokiroch lon ach kewe foffor meinisin lefilach.

²⁰ Ika fitu mwichefel ra aeafengenni eu Kingdom Hall, a lamot an epwe wor kirokiroch lefiler meinisin me repwe sufolfengen lefiler. Emiisfengen ese kan alapalo tipeeu lupwen repwe akkota fansoun mwich me tettelin limelim are ika epwe wor angang won ewe leenien mwich. Sipwe pwarata kirokiroch me fairo inaamwo ika fan ekkoch epwe wor tipefesen. Epwe ina ussun kirokiroch epwe nemeni fofforuch kewe meinisin, iwe, Jiowa epwe enletin efeiochu ach ekiekin fori met epwe ochiiti aramas meinisin.

Pwapwpwarata Kirokiroch Fansoun Meinisin

21, 22. Me ren minne a mak lon Kolose 3:12, epwe pposolo letipach fan iten ach sipwe fet?

²¹ Kirokiroch, iei eu lapalap mi watte lamotan, ina minne, a kan kku mettoch meinisin lon manauach. Ina popun, sipwe apachalong lon lapalapach, lapalapen chon Kraist. Pwarataan kirokiroch ngeni aramas meinisin epwe eu mettoch sipwe eorenalo.

²² Amwo oukich meinisin sipwe kirokiroch ngeni aramas iteiten ran meinisin, iwe, epwe ina ussun ach sipwe apwonueta ei kapas seni ewe aposel Paul: “Iwe, ami, usun noun Kot mi filita, ami kena mi fel o achengicheng, oupwe pwilitalong womi umoumoch, kirokiroch, tipetekison, mosonoson, o songomang.”​—Kolose 3:12.

En mi Chechchemeni

• Pwata a mmen weires ngeni chon Kraist ar repwe pwarata kirokiroch?

• Pwata a lamot pwarataan kirokiroch lon ach famili?

• Pwata epwe tongeni an epwe weires ach sipwe pwarata kirokiroch lon sukul, lon ach leenien angang, me pwal ngeni chon oruch kewe?

• Awewei mwo ifa ussun chon Kraist repwe tongeni pwarata kirokiroch lon ar angangen afalafal.

[Ekkewe Kapas Eis fan Iten ewe Lesen]

[Sasing lon pekin taropwe 12]

Pwarataan kirokiroch ren meinisin chon eu famili epwe alapalo tipeeu me alillisfengen

[Sasing lon pekin taropwe 13]

Kopwe tongeni pwarata kirokiroch ika epwe uri emon chienom chon angang are chon an famili och semmwen

[Sasing lon pekin taropwe 14]

Jiowa a kan peppeni ir kewe mi tuppwol le pwarata kirokiroch, inaamwo ika aramas repwe esiiter

[Sasing lon pekin taropwe 15]

Kaworen alillis ngeni emon chon orum lon fansoun osupwang eu fofforun kirokiroch