Ami Kana Sarafo, Ua Fofforatiu Longolongun Manauemi Ren Mwach Kkan?

“Ua silefichi ai kewe ekiek ngenikemi, . . . ekiekin kinamwe, nge esap riaffou, pwe upwe ngenikemi manauoch lon mwach kkan me eu apilukuluk mi murinno.”​—JEREMAIA 29:11,NW.

1, 2. Ifa ussun epwe tongeni sokkofesen ekiekin aramas ussun ierin sarafo?

 A LAP me lein ekkewe watte ar ra ekieki pwe ierin sarafo eu fansoun mi fokkun murinno. Ra chechchemeni ewe pochokkul me mwasangasang a nom rer le sarafoor. Ra ekieki fan pwapwa ewe fansoun lupwen ese lien wor angang repwe wiisen fori me ewe fansoun ra tongeni kukkunoufetal me ar aneanoch ngeni ekkewe chommong mettoch repwe tongeni fori lon ekkewe fite, fite ier lon lusun manauer.

² Neman a sokkolo ekiekin ami kana sarafo. Eli oua osukosuk pokiten weiresin ami pwakini ekkewe siwil mi fiffis lon manauen sarafo lon pekin memmeef me aion. Lon sukul, eli epwe pochokkul an chienemi kewe sotuni le alapalapa fofforumi. Eli oua kan achocho le fiffiu ngeni sossotun safeien opuchopuch, sakau, me foffor mi sikepwach. Mi pwal tori chommong leimi sossot mi weneiti ach imulo seni fofforun peni mwuun fonufan are pwal och mettoch mi kku ami luku. Ewer, epwe tufich pwe ierin sarafo epwe eu fansoun weires. Nge ina eu fansoun mi suuk ngonuk chommong mettoch mi auchea. Ina minne, iei ewe kapas eis mi weneituk: Kopwe alamota ekkena mettoch?

Pwapwaiti Fansoun le Sarafoom

3. Ifa ewe fon me kapasen ourour Solomon a uwawu fan iten sarafo?

³ Ekkewe mi watte ierir repwe eronuk pwe fansoun sarafo ese lien ttam, iwe, mei pwung alor. Lon ekkoch chok ier, kosap chuen emon sarafo. Ina minne, kopwe pwapwaiti sarafoom! Ina ewe fon seni King Solomon, iwe, iei alon: “En alual, kopwe pwapwa le alualum, letipom epwe meseik lon fansoun om alual. Kopwe chok fori mine letipom a tipeni o mesom a kuna.” Iwe nge, iei an Solomon ourour ngeni sarafo: “Iei mine kopwe atoaualo ourek seni letipom, kopwe pwal ti seni inisum mine a ngau.” A pwal apasa pwe “Lealualum me lepochokulom a pon chok.”​—Än Salomon Afalafal 11:9, 10.

4, 5. Pwata ekkan sarafo repwe mirit ika repwe akkammon fan iten ekkan fansoun repwe feito? Awewei mwo.

⁴ En mi weweiti alon Solomon? Ren chok awewe, ekieki mwo emon sarafo mi angei eu watteen liffang, eli och alemwir. Epwe fetei? Epwe tongeni nounou meinisin ena moni fan iten mettoch mi apwapwa​—ussun chok ewe nau mi mwalechelo lon an Jises we kapas awewe. (Luk 15:11-23) Nge met epwe fis lupwen ewe moni epwe itelo? Eli epwe mengiringir pokiten an asolapa! Nge, sipwe era pwe a aea ena liffang fan iten an epwe mmonleta ngeni mwach kkan ren an isoni och. Iwe, lo, lo, lupwen epwe kuna alillis seni minne a fen iseis, om ekiek nge epwe mengiringir pokiten an ese aitalo noun moni fan iten ekkewe minen apwapwa le sarafoon? Aapwi!

⁵ Kopwe eani ewe ekiek pwe ekkewe ierin le sarafoom eu liffang seni Kot pwe ina pwungun. Ifa ussun kopwe aea ena liffang? Kopwe tongeni asolapa unusen om pochokkul me mwasangasangom fan iten pwisin om pwapwa, weween, kopwe chok kukkunoufetal iteitan, nge esap wor fansoun mmonleta ngeni fansoun mwach. Nge ika kopwe fori ena mettoch, ena fansoun “lealualum me lepochokulom” epwe wesewesen eu fansoun mi “pon chok.” Epwe fen murinno om kopwe  aea ekkena ierin le sarafoom fan iten om kopwe mmonleta ngeni fansoun mwach!

6. (a) Menni fon seni Solomon a awora emmwen fan iten sarafo? (b) Met Jiowa a mochen fori fan iten sarafo, me ifa ussun ekkan sarafo repwe tongeni kuna feioch seni ena mettoch?

⁶ Solomon a uwawu eu kapasen alongolongun alluk mi tongeni alisuk le aeafichi ekkena ierin le sarafoom. Iei alon: “Chechchemeni mwo ewe Chon For mi Lapalap lon ekkewe ranin le aluwolum.” (Än Salomon Afalafal 12:1, NW) Ina ewe ki mi emmwen ngeni sopwoch​—weween, akkauseling ngeni Jiowa me foffori letipan. Jiowa a ereni chon Israel lom lom minne a mochen fori fan asengesir: “Ua silefichi ai kewe ekiek ngenikemi, . . . ekiekin kinamwe, nge esap riaffou, pwe upwe ngenikemi manauoch lon mwach kkan me eu apilukuluk mi murinno.” (Jeremaia 29:11) Jiowa a pwal mochen ngonuk “manauoch lon mwach kkan me eu apilukuluk mi murinno.” Ika kopwe chechchemeni i lon om kewe foffor, ekiek, me kokkot, ena manauoch lon mwach kkan me ena apilukuluk mi murinno repwe wesewesen pwonuta reom.​—Pwarata 7:16, 17; 21:3, 4.

“Akkarap ngeni Kot”

7, 8. Ifa ussun sarafo repwe tongeni akkarap ngeni Kot?

⁷ Jemes a peseikich pwe sipwe chechchemeni Jiowa ren makkeian ei: “Oupwe arap ngeni Kot, iwe, epwe arap ngenikemi.” (Jemes 4:8) Jiowa ewe Chon For, ewe Epinkepiisom lon lang, iwe, mi fichiiti an aramas fel ngeni me mwareiti i. (Pwarata 4:11) Iwe nge, ika sipwe arap ngeni i, i epwe arap ngenikich. Ena sokkun tong ese kan achungu letipom?​—Mattu 22:37.

⁸ A wor fitu mettoch sipwe tongeni akkarap ngeni Jiowa ren. Ren chok awewe, iei alon ewe aposel Paul: “Oupwe likiitu lon iotek, oupwe pwal mamasa lon, eti kilisou.” (Kolose 4:2) Weween, sipwe achocho ngeni ach sipwe eorenalo ach sipwe ikkiotek iteitan. Kopwe meefi pwe esap naf om kopwe chok apasa amen mwirin an emon wiisen iotek fan itom, awewe chok ren semom are emon chienom chon Kraist lon ewe mwichefel. Ka fen pwarawu ngeni Jiowa masouen le alollolun letipom me ereni i ussun minne ka ekieki, minne ka niu ren, me ekkewe osukosuk watte mi tottoruk? Ka fen ereni i ussun ekkewe mettoch kopwe fen sau le kapas ngeni aramas ussun? Ewe sokkun iotek mi wenechar nge mi popu seni wesewesen letipom epwe atoto kinamwe. (Filipai 4:6, 7) Ra alisikich le akkarap ngeni Jiowa me repwe ameef ngenikich pwe a akkarap ngenikich.

9. Ifa ussun sarafo repwe tufichin akkauseling ngeni Jiowa?

 ⁹ Pwal eu mettoch sipwe tufichin akkarap ngeni Jiowa ren a pwalo lon ekkeei kapas mi fel: “Kopwe auseling ngeni kapasen ourour o etiwa kapasen fon, pwe kopwe tipachem lon kan fansoun repwe feito.” (An Salomon Fos 19:20) Ewer, ika kopwe akkauseling ngeni Jiowa me akkalleasochisi i, kopwe fofforatiu longolongun manauom ren mwach kkan. Ifa ussun kopwe tongeni pwarata pwe en mi akkauseling ngeni Jiowa? Ese mwaal ka fiffiti an chon Kraist kewe mwich me akkauseling ngeni ekkewe poraus mi kakkatowu seniir. Ka pwal “asamolu semom me inom” ren om fiffiti an ewe famili kaeo lon Paipel. (Efisus 6:1, 2; Ipru 10:24, 25) A murinno ena. Nge, en mi pwal ‘akkaimulo fansoun’ ren mmonletaan ekkewe mwich, ren om akkallea Paipel, me pwal ren om kukuttafichi poraus lon Paipel? En mi akkachocho le apwonueta minne ka akkalleani pwe om feffetal epwe ussun ‘emon aramas mi tipachchem’? (Efisus 5:15-17; Kol Fel 1:1-3) Ika en mi foffori ena, iwe, en mi akkarap ngeni Jiowa.

10, 11. Ikkefa ekkewe feioch mi lapalap sarafo repwe angei lupwen repwe akkauseling ngeni Jiowa?

¹⁰ Lon ekkewe kapasen le poputaan ewe puken An Salomon Fos, ewe sou mak a awewei popun an a mak ena puken Paipel. Iei alon: “Aramas repwe tipachem o silei ourourer, repwe weweiti ekewe kapas mi alolol, repwe angei ourourer seniir pwe repwe mirititi mine repwe fori, repwe eani pwung, let o wenechar. Iwe, mirit epwe tori chokewe mi wewemang, nge silelap me mirit epwe tori ekewe sarafo.” (An Salomon Fos 1:1-4) Ina minne, lupwen kopwe akkalleani me akkapwonueta kapasen An Salomon Fos​—me pwal lusun masouen Paipel​—kopwe akkamaarata pwung me tipewen, me Jiowa epwe pwapwaiti om akkarap ngeni i. (Kol Fel 15:1-5) Ika kopwe akkamaarata weweoch, tipachchem, silelap, me mirit, epwe pwung minne kopwe apwungalo are filata lon manauom.

¹¹ Mi mwaal ach ekiekin kuna ekkan sarafo ar repwe ina ussun le mwokutukut fan mirit? Aapw, pun chommong chon Kraist sarafo ra kan ina ussun. Ina minne, aramas ra sufoliitiir me ‘rese mangaueitiir pokiten ir sarafo.’ (1 Timoti 4:12, NW) A pwung an semer me iner mwareitiir, me Jiowa a apasa pwe ra akkapwapwai letipan. (An Salomon Fos 27:11) Inaamwo ika mi kukkun ierir, nge repwe tongeni eani lukuluk mi pochokkul pwe ekkeei kapas mi fel ra weneitiir: “Akkatola mwo ewe emon mi limoch manauan me nennengeni ewe emon mi wenechar, pun manauen ena mwan epwe kinamwe lon mwach kkan.”​—Kol Fel 37:37, NW.

Kopwe Filioch

12. Ifa eu mettoch mi fokkun lamot sarafo repwe filata, me pwata minne repwe filata epwe kku manauer fansoun langattam?

¹² A wor chommong sokkun kefil le atun ierin sarafo, me ekkoch me lein ekkewe mettoch kopwe filata repwe kku manauom fite, fite ier mwirin. Kefiloch epwe atoto manau mi pwapwa me sopwoch. Kefilingau epwe tongeni angaua unusen manauom. Ekieki mwo letin ena poraus ren ruu me lein ekkewe mettoch kopwe filata. Iei ewe aewin: Met sokkun aramas kopwe chiechi ngeni? Pwata a lamot ena? Iwe, iei alon ewe mwiitun mi fel: “Eman mi chiechi ngeni aramas mi tipachem epwe tipachemela, nge eman mi chiechi ngeni ekewe chon tiparoch epwe feiengau.” (An Salomon Fos 13:20) Weween, sipwe lapalapeni lapalapen chienach kewe ika ir mi tipachchem are tiparoch. Ka mochen an epwe ifa ussun lapalapom?

13, 14. (a) Lukun ach wesewesen nonnom ren are fiti aramas, ifa pwal och weween ei kapas chiechi? (b) Ifa ewe ekiek mi mwaal sarafo resap eani?

¹³ Ika kopwe ekieki ussun chiechiom, neman kopwe ekieki ussun om fiffiti aramas. A pwung ena, nge pwal fitu mettoch ra kapachelong. Ika kopwe katol eu tv prokram, auseling ngeni nikattik, alleani eu puk, katol kachito, are pi ekkoch poraus won ewe Internet, ekkena mettoch chiechiom. Ika ekkena chiechi ra apochokkula foffor mi mwanesol me foffor mi sikepwach are peppeseok pwe kopwe un safeien opuchopuch, sakau, are fori pwal och mettoch mi u ngeni an Paipel kewe kapasen alongolongun alluk, iwe, en mi chiechi  ngeni “ekewe mi umwes,” nge ekiekir pwe esor Jiowa.​—Kol Fel 14:1.

¹⁴ Eli ka meefi pwe pokiten ka fiffiti an chon Kraist kewe mwich me ka fiffiti angangen ewe mwichefel, iwe, kosap feiengau ren ewe sokkun kachito mi wor chommong foffor mi mwanesol lon are ekkewe sokkun kol mi ngingioch nge mi oro ngau kapaser. Eli ka meefi pwe esap wor ngauen om kopwe ekis nennelong lon ewe sokkun Web site mi ffich sasingin fofforun lisowu mwaal won ewe Internet. Ewe aposel Paul a eronuk pwe en mi mwaal! Iei alon: “Chienach mi ingau repwe alimengaualo ach kewe fofor murinno.” (1 Korint 15:33) A solap pwe chommong chon Kraist sarafo mi tufichoch ra fen lapangauolo pokiten ar filigauei chiechier. Ina minne, kopwe apposa letipom pwe kopwe su seni ekkena sokkun chiechi. Ika kopwe fori ena mettoch, epwe pwonuta reom an Paul ei fon: “Ousap appiru pwomen fonufan, nge oupwe wililo ren asefosefallin letipemi, pwe oupwe pwarata minne letipen Kot, minne mi murinno o fich o unusoch.”​—Rom 12:2.

15. Ifa ewe oruuen mettoch sarafo repwe filata, me fan ekkoch ifa ussun repwe kuna osukosuk ren ena mettoch?

¹⁵ Iei ewe oruuen mettoch kopwe filata. Epwe war ewe fansoun lupwen kopwe filata met kopwe fori lupwen epwe much om sukul. Ika ka nonnom lon eu fonu ikewe mi nafangau angang ie, eli kopwe atapwalen eani ewe sokkun mi nampa eu murinnoon e suuk ngonuk. Ika ka nonnom lon eu fonu mi watte wouun, eli chommong sokkun angang repwe suuk ngonuk, iwe, ekkoch leir repwe wenewenen paani letipom. Pokiten ar wesewesen ekieki feiochum, eli noum kewe sense are semom me inom repwe peseok om kopwe achocho ngeni eu sokkun angang epwe atoto reom nukunukoch lon pekin moni, are epwe pwal mwo nge apisekisekuk. Iwe nge, eli om kaeo fan iten ena angang epwe wesewesen akukkunatiu ewe fansoun kopwe angang fan iten Jiowa.

16, 17. Awewei mwo ifa ussun ekkan wokisin seni Paipel repwe tongeni alisi sarafo pwe repwe eani ekiek mi mirit ussun met sokkun angang repwe eani?

¹⁶ Chechchemeni mwo pwe kopwe pi an ewe Paipel emmwen mwen om kopwe apwungalo och mettoch. Ewe Paipel a peseikich pwe sipwe angang fan iten tufichin manauach, weween, a affata pwe ina wiisach. (2 Tesalonika 3:10-12) Nge, pwal fitu mettoch ra kapachelong. Sia peseok pwe kopwe alleani ekkan wokisin fan me ekieki ifa ussun repwe tongeni alisi ami kana sarafo pwe oupwe itepok me ruuepek lupwen oupwe filata och angang: An Salomon Fos 30:8, 9; Än Salomon Afalafal 7:11, 12; Mattu 6:33; 1 Korint 7:31; 1 Timoti 6:9, 10. Mwirin om alleani ekkena wokisin, en mi weweiti an Jiowa ekiek won ena mettoch?

¹⁷ Ach angang fan iten tufichin manauach esap akkom mwen ach angang ngeni Jiowa. Ika epwe naf om kopwe fiti high school ren om kopwe tufichin eani ekkoch angang mi murinno, iwe, a och ena. Ika epwe lamot om kopwe sopwei om sukul wesin om fiti high school, ina eu mettoch kopwe kapas ngeni semom me inom ussun. Iwe nge, kosap monuki “ekkewe mettoch mi sokkolo lamoter”​—weween, ekkewe mettochun ngun. (Filipai 1:9, 10) Kosap mwaallilo ussun Paruk, noun Jeremaia we sou mak. Ena mwan ese chuen aucheani wiisan we, iwe, a ‘kutta mettoch mi watte fan pwisin itan.’ (Jeremaia 45:5) A monuki ren och fansoun pwe esor och ‘mettoch mi watte’ won fonufan epwe tongeni apochokkula  an riri ngeni Jiowa are amanaua i lupwen Jerusalem epwe talo. A pwal ina ussuch lon ei fansoun.

Akkaucheani Mettochun Ngun

18, 19. (a) A lap me lein chon oruch kewe ar ra kuna osupwang pokiten met, me epwe fet meefiach ussur? (b) Met popun chommong rese meefi pwe ir mi osupwang lon pekin ngun?

¹⁸ Ka fen kuna sasingin ekkan semirit lon ekkan fonu ikewe mi fiffis lengita ie? Ika ina, ese mwaal ka wesewesen tongeer. A pwal ita ina ussun om tongei chon orum? Pwata epwe ina ussun meefiom? Popun, pun a lap me leir ra pwal echik. Ra echik pokiten an a fiffis ewe lengita an Amos ei oesini a kapas ussun: “Epwe war ewe fansoun lupwen upwe tinato lengita won ewe fanu. Esap eu echiken mongo ika kakan koluk, nge i eu mwonen an aramas repwe mochen rong an ewe Samol mi Lapalap kapas. Ngang Kot ewe Samol mi Lapalap ua kapas.”​—Amos 8:11.

¹⁹ A enlet pwe a lap me lein ir mi riaffou ren ena lengita lon pekin ngun rese meefi pwe ra “woungau lon ngun.” (Mattu 5:3) Chommong rese meefi echik lon pekin ngun. Eli ekkoch ra meefi pwe mi watte aner mongo. Nge ika ina meefier, ra ina ussun pokiten ar akkaea “tipatchemen fonufan,” ewe mi lamotongau, nge a kapachelong tongen pisek, ekiek mi sokkopat lon pekin science, memmeef ussun met a pwung me mwaal, me met kanan mwo. Ekkoch ra meefi pwe “tipatchemen” fonufan iei a alamotengaua an Paipel kewe afalafal. Iwe nge, “chon ei fonufan rese mo sinei Kot ren ar tipatchem.” Tipachchemen fonufan esap alisuk le akkarap ngeni Kot. Ina och mettoch “mi chok puch fan mesen Kot.”​—1 Korint 1:20, 21; 3:19.

20. Pwata esap pwung ewe ekiekin appiru aramas ika esap ir chon fel ngeni Jiowa?

²⁰ Lupwen ka nengeni ekkena sasing, sasingin ekkena semirit mi echik, ka mochen om kopwe ussur? Aapwi! Iwe nge, ekkoch sarafo lon ar kewe famili, familien chon Kraist, ra pwarata pwe ra mochen ar repwe ussun ekkana aramas mi echik lon pekin ngun. Neman ekkena sarafo ra meefi pwe ekkewe sarafoon lukun ra foffori minne chok ra mochen, me a mmen apwapwa manauer. Ra kan monuki pwe ekkena sarafo ra towau seni Jiowa. (Efisus 4:17, 18) Ra pwal monuki pwunungauen an aramas echik lon pekin ngun. Pwopwotiuen sarafo lukun tiper me feiengauen lisowu mwaal, suupwa, sakau, me safeien opuchopuch lon pekin aion me letip ekkoch leir. Echik lon pekin ngun a kan efisata ewe ngunun lukumach, apilukulukungau, me manau mi kkotongau.

21. Ifa ussun sipwe tongeni tumunukich seni ach eani ekkewe ekiek mi mwaal e nom ren chokewe rese fel ngeni Jiowa?

²¹ Ina popun, lupwen ka nonnom lein chienom kewe chon sukul, nge esap ir chienom chon fel ngeni Jiowa, kosap kkuf ren ar kewe ekiek. (2 Korint 4:18) Ekkoch repwe esiita mettochun ngun. Ekkewe minen afetalalo poraus repwe pwal efisata poraus mi orukoruk, iwe, epwe ussun ita esor ngauen lisowu mwaal, unupuch, are kapas mi ngau. Kopwe fiffiu ngeni ena sokkun poraus. Kopwe chok fiffiti ekkewe aramas mi ‘akkamwochu luku me mwelien letip mi murinno.’ Fansoun meinisin kopwe pippi pwe epwe wor chommong mettoch kopwe “fori lon angangen ewe Samol.” (1 Timoti 1:19; 1 Korint 15:58) Kopwe achocho le angang lon ewe Kingdom Hall me pwal lon ewe angangen afalafal. Atun om fiffiti sukul, kopwe auxiliary pioneer fan fite. Ika kopwe akkapochokkula ekiekum lon pekin ngun ren om foffori ena mettoch, iwe, kosap nikatuttum.​—2 Timoti 4:5.

22, 23. (a) Met popun fan chommong minne chon Kraist sarafo repwe filata aramas resap weweitiir? (b) Sia peppesei ekkan sarafo ar repwe fet?

²² Neman om nennengeni mettoch meinisin fan alillisin Paipel epwe emmwenuk pwe kopwe  filata ekkewe sokkun mettoch aramas resap weweiti. Ren chok awewe, a wor emon chon Kraist sarafo mi fokkun tipachchem lon an kewe lesenin sukul meinisin me a mmen angoch lon pekin nikattik. Lupwen a sochungio, a fiti seman we lon an angangen alimelima kinasen lon imw pwe epwe tufichin achocho ngeni ewe angang a fen filata, angangen emon chon afalafal full-time, are pioneer. Noun kewe sense rese wekewe mwo ekis ika met popun an fili ena angang, nge ika ka fen arap ngeni Jiowa, esor ach tipemwaramwar pwe en mi weweiti met popun an fori ena mettoch.

²³ Lupwen kopwe ekieki ifa ussun kopwe akkaea om kewe tufich, tufichum le sarafoom, kopwe ‘iseni, fan asengesin pwisin en, eu longolong mi murinno ngeni ewe fansoun epwe feito, pwe kopwe amwochu o manaueni ewe manau mi enlet.’ (1 Timoti 6:19) Kopwe apposa letipom fan iten om kopwe ‘chechchemeni ewe Chon For mi Lapalap,’ ewe mi foruketa, le sarafoom​—me pwal lon unusen manauom meinisin. Epwe chok ina ussun kopwe tufichin fofforatiu eu longolong fan iten ewe sokkun manau mi unusen murinno lon mwach kkan, nge ena manau esap much.

Met Om Ekiek?

• Menni fon mi fel a kan alisi sarafo le akkota minne repwe fori lon mwach kkan?

• Ekkan sarafo repwe tongeni “akkarap ngeni Kot” ren ar foffori met sokkun mettoch?

• Ikkefa ekkoch mettoch sarafo repwe filata an epwe kku manauer lon fansoun epwe feito?

[Ekkewe Kapas Eis fan Iten ewe Lesen]

[Sasing lon pekin taropwe 23]

Kopwe mut ngeni pwisin mochenum an epwe aitalo unusen pochokkulom me mwasangasangom le sarafoom?

[Sasing lon pekin taropwe 25]

Chon Kraist sarafo mi mirit ra kan nenneoch lon pekin ngun