Lupwen Letipen Kot Epwe Pwonuta won Fonufan

LUPWEN Jises a aiti ngeni noun kewe chon kaeo pwe repwe iotek, “Letipom epwe pwonueta won fonufan usun chok lon lang,” a kapas seni pwisin kunaen, ussun emon mi pin nonnom lon lang ren ewe Sam. (Mattu 6:10; Jon 1:18; 3:13; 8:42) Me mwen an a manau won fonufan, Jises a kuna ewe fansoun lupwen mettoch meinisin mi fisita lon lang me won fonufan ra tipeeu ngeni letipen Kot. Ina eu fansoun pwonuetaan chommong angang mi apwapwa.​—An Salomon Fos 8:27-31.

Kot a akkom forata ekkewe ngun, ekkewe chonlang mi manaman. Mei wor en me pwisin letipan? Ewer, iwe, le poputaan fonufan, ekkena “noun Kot kewe chonlang meinisin ra mweireir fan pwapwa.”​—Hiop 38:7.

Mwirin an a foruta fonufan, Kot a ammolnata ewe fonufan fan iten aramas, iwe mwirin, a forata ekkewe akkaemonun mwan me fefin. Ifa letipen Kot ngeni popuch kkewe me mwirimwirir kkewe? Me ren Keneses 1:28: “Kot a efeiochuur o ureniir, ‘Oupwe nounou o achomongakemi pwe fanufan epwe masou remi o nom fan nemeniemi. Oupwe nemeni ekewe ikenen leset me ekewe mansusu me monun won unusen fanufan.’”

Ina ewe fansoun letipen Kot a pwonuta lon lang me pwal won fonufan. Nge a fisita eu fofforun u ngeni letipen Kot. Iwe, a poputa eu fansoun lolilen me letipechou mi ttam, iwe, a efisata osukosuk watte ussun letipen Kot ngeni aramas. Iwe, a kku kich meinisin. Iwe, ifa ena fofforun u ngeni?

Letipen Kot Atun eu Fansoun U Ngeni

Emon me lein ekkewe chonlang mi manaman a kuna pwe epwe tufichin eppeti an epwe pwonuta letipen Kot fan iten aramas, iwe, a ekiekin pwisin kuna winnan ren. Eni a ekieki pwe ika epwe tongeni amwokutu ewe popun pean aramas ar repwe auseling ngeni nge sap ngeni Kot, epwe eriani Kot an epwe mutata pwal eu nemenem mi u ngeni. Mei fich pwe mwirin och fansoun, ena chon u ngeni a iteni Setan, weween, “Chon U Ngeni.”​—Hiop 1:6.

Ren an epwe apwonueta mochenin letipan, Setan a fos ngeni ewe fefin. A pesei an epwe tunalo letipen Kot me nemeni pwisin i, iwe, a ereni: “Ousap fokun mala. . . . Oupwe wewe ngeni Kot o silei mine a och pwal mine a ngau.” (Keneses 3:1-5) Me ren ewe fefin, alon Satan na a ussun ita nge eu minen ngaselo, iwe, a luku pwe an auseling ngeni epwe ita amurinnolo manauan. Mwirin, a etipetipa puluan we an epwe fiti i.​—Keneses 3:6.

Esap ina letipen Kot ngeni ewe pean aramas. Iwe, epwe sopwongau. Kot a fen erenir pwe ena alen alleasolap epwe atoto ngenir malo. (Keneses 3:3) Pwal eu, resap chuen unusoch, iwe, mwirimwirir kkewe repwe alemwiri apwangapwangen inis me malo. (Rom 5:12) Setan ese tongeni amoielo minne epwe fiffis ngeni aramas.

Minne a fis a efisata ekkoch kapas eis a lamot ar repwe polu: Aramas repwe tongeni “wewe ngeni Kot, o silei mine a och pwal mine a ngau,” ussun Setan a apasa? Weween, ika epwe naf fansoun, sipwe tufichin apwungalo  minne epwe pwung me minne epwe mwaal, minne epwe efeiochukich me efeiengauakich, lon kinikinin manauach meinisin? Mi fich ngeni Kot an aramas repwe alleasochisi, pun an nemenem a murinno seni meinisin? Epwe ifa ussun kopwe polueni ekkeei kapas eis?

Mei wor eu chok mettoch epwe apwungalo ekkena popun alongolongun kapwung mwen mesen forien Kot kewe meinisin mi mirit: Mut ngeni ir kewe mi kutta ar repwe pwisin uta lon ar nemenem ar repwe sotun pii ika epwe sopwoch ar imulo seni Kot. An epwe chok niirelo esap awesalo ekkewe popun alongolongun kapwung. An epwe mutata nafochun fansoun pwe repwe pwisin nemenemeniir epwe awesochuelo ewe osukosuk pun mwiriloon ar imulo seni Kot epwe pwapwalo.

A muttir ffataffatoch mwiriloon an aramas pwisin filata alen manauer lon uruwoon aramas. Orun 1,500 ier mwirin forutaan aramas, “Chon fanufan ra fokun foforingau fan mesen Kot o eani foforun mwaneson ekis meinisin.” (Keneses 6:11) A lamot an epwe fis och angang pwe esap talo fonufan. Kot a mwokutukut ren an efisi ewe noter me pwal ren an tumunu ewe eu chok famili mi pwung mi chuen manau​—Noa, puluan we, noun kkewe at, me puluer kkewe. (Ken. 7:1) Kich meinisin mwirimwirir kkewe.

Seni ena fansoun lon uruwoon aramas tori ikenai, Kot a awora emmwen fan iten ekkewe mi enletin mochen silei letipan. Iwe, a mak lon ewe Paipel ekkena poraus. (2 Timoti 3:16) Fan tong, a mut ngeni ekkewe aramas mi tuppwol ar repwe riri ngeni i, me pwal mwo nge wiliti chienan kewe. (Aisea 41:8) A ifa me watten ach kilisou ren ei alillis!

‘Letipom Epwe Unusen Pwonueta’

Minne Kot a fen fori tori iei, esap ina chok ukukun letipan we fan iten aramas. Ren an nounou kapas mi wenewen, ewe soufos Taniel a makkei: “Iwe, lon fansoun mwun ekewe king, ewe Koten lang epwe aueta eu mwu esap tongeni tala. . . . Iwe, ei mwu epwe ataiela o arosala ekewe lusun mwu, nge epwe pusin nom tori feilfeilachok.” (Taniel 2:44) Ei oesini a kapas ussun muchuloon ei ototen mettoch ikenai mi lipwakingau, me an ewe Muun Kot are nemenem ren Kot epwe wii. Met ren ochchun ei kapas allim! Epwe morelo ekkewe fitikoko me nafangauen tong mi auralo fonufan ren fofforun mwanesol me tufichin aingaua fonufan.

Inet epwe fis ekkeei mettoch? Noun Jises kewe chon kaeo ra eisini: “Inet epwe fis ekkeei mettoch, o meeta esisinen om liwinsefal pwal sopolon ei fansoun?” Lon eu kinikinin poluan, Jises a apasa: “Iwe, ei kapas allim usun ewe mu epwe esineifeili won unusen fonufan, pwe epwe pwar ngeni einang meinisin. Iwe, a ina sopolon.”​—Mattu 24:3, 14, NW.

Aramas ra fen silei pwe ei angangen afalafal a fis won unusen fonufan. Ewe Muu Jises a apasa epwe esilefeil, ina ewe chok Muu a aiti ngenikich sipwe ioteki, a era: “Muom epwe feito, letipom epwe pwonueta, won fonufan usun chok lon lang.” (Mattu 6:10) Ewer, ena Muu, ina ewe mettoch Kot epwe aea le apwonueta an we kokkot, me letipan, ngeni aramas me ewe fonufan.

Met weween ena mettoch? Sipwe mut ngeni Pwarata 21:3, 4 an epwe polueni: “O ua rong eu mongungu mi leuwommong seni won ewe leenien motun king, o a apasa: ‘Nengeni, ewe imwen Kot a nom ren aramas. Pwisin i epwe nonnom rer, o ir repwe noun aramas, o Kot epwe pwisin nonnom rer. I epwe tolu seni meser chonun meser meinisin, o esap chuen wor malo, esap pwal chuen wor kechiu, are akurang, are metek, pun ekkewe mettochun lom ra fen morelo.’” Iwe, lon ena fansoun, letipen Kot epwe wesewesen pwonuta won fonufan ussun chok lon lang​—unusan. * Kesap mochen om kopwe fiti?

[Pwóróus fan]