Pwata Noun Jiowa kewe Chon Pwarata Ra Lilliwilituk?

WON UNUSEN fonufan noun Jiowa kewe Chon Pwarata ra sinnelo ren ar tinikken lon ewe angangen afalafal imw-me-imw. Ekkoch aramas ra mochen silei ewe popun ekkewe Chon Pwarata ra lilliwilitir, akkaeuin, ika ra fen era pwe rese mochen auseling ngeni ewe poraus ekkewe Chon Pwarata ra afalafala. Ruuecho taropwe seni Rusia repwe awewei ewe popun.

Masha, emon fopwul mi 19 ierin lon Khabarovsk, a apasa: “Enlet, me lom, ua fokkun su seni ekkewe Chon Pwarata Jiowa lupwen ra etto afalafal.” Iwe nge, mwirin an alleani ekkoch chassi, forien ekkewe Chon Pwarata, a siwili meefian. Masha a makkei: “A fokkun amwarar me asaramaei, nge akkaeuin, a siwili ai ekiek ussun ei otot. Ekis me ekis ua poputa le weweiti ewe popun aramas ra manau.”

Seni ewe telinimwen Ussuriysk, orun 50 mail ennefen seni Vladivostok, Svetlana a makkei: “Ua koran poputa le alleani The Watchtower me Awake! A fokkun lamot ekkeei chassi lon ach ei fansoun. Ua pwapwaesini meinisin ekkewe poraus. Ra fokkun amwarar, kaitoch, me ra asaramaei ussun chommong mettoch. Kilisou chapur! Kilisou chapur ren ami nonnom won fonufan me ami foffori ei angang mi kirokiroch me lamot watte.”

Ekkewe Chon Pwarata Jiowa won unusen fonufan ra ekilapei an ewe aposel Paul kapas eis: “O ifa usun ar repwe [aramas] rong, are esor emon chon afalafal?” (Rom 10:14) Pwata kese aea fitu chok minich le auseling lupwen ekkewe Chon Pwarata repwe chuuruk? Eni kopwe pwal pwapwaesini ewe poraus mi aururu letipach lon an Kot we Kapas, ewe Paipel.