Sipwe Pwora Ussun Jeremaia
Sipwe Pwora Ussun Jeremaia
“Anomu om apilukuluk won Jiowa; kopwe pwora me letipom epwe pochokkul. Ewer, anomu om apilukuluk won Jiowa.”—KÖLFEL 27:14, New World Translation.
1. Ifa ewe feioch mi lapalap a nom ren Chon Pwarata Jiowa?
CHON PWARATA JIOWA ra nonnom lon eu paratis lon pekin ngun. (Aisea 11:6-9) Lon ei fonufan mi ur ren fitikoko, ra nonnomfengen me chiener kewe chon Kraist lon ussun ita eu leeni lon pekin ngun, nge mi sokkolo aucheaan, me ra kinamwefengen me Jiowa Kot, iwe, pwal lefiler. (Kol Fel 29:11; Aisea 54:13) Iwe, ar we paratis lon pekin ngun a kan lapalapalo. Meinisin mi ‘foffori letipen Kot ren unusen ngunur’ ra akkawora ar alillis le akkalapalo ena paratis. (Efisus 6:6) Ifa ussun? Ren ar atipeeufengenni manauer me ekkewe kapasen alongolongun alluk lon Paipel me pwal ren ar akkasukula aramas pwe repwe pwal ina ussun, nge, a ina ussun ar ekketiwer pwe repwe kuna ekkewe feioch mi lapalap seni ena paratis.—Mattu 28:19, 20; Jon 15:8.
2, 3. Chon Kraist mi enlet ra kan likiitu fan met sokkun mettoch?
2 Iwe nge, sap minne ach nonnom lon eu paratis lon pekin ngun a wewe ngeni pwe esap tottorikich sossot. Sisaamwo unusoch me a tottorikich riaffoun samau, chinnap, iwe lo, lo, malo. Pwal och, iei sia kukkuna pwonutaan ekkewe oesini mi kapas ussun “ekkewe ranin le sopwoloon.” (2 Timoti 3:1) Maun, ipweri alluk, samau, lengita, me pwal fitu sokkun mettoch mi weires ra ekkeriaffou aramas meinisin, iwe, ekkena mettoch ra pwal tottori Chon Pwarata Jiowa.—Mark 13:3-10; Luk 21:10, 11.
3 Me lukun ekkena mettoch, sia pwal miritiiti pwe inaamwo ika sia kan nukunukoch lon ach we paratis lon pekin ngun, nge kich mi chuen kuna koputach seni ir kewe mi nom lukun. Iei an Jises kapasen ourour ngeni noun kewe chon kaeo: “Pokiten ami ouse mo chon fonufan, pun ua fen filata ami seni fonufan, iwe, ina popun ewe fonufan a chok oput ami. Oupwe chok chechemeni ewe kapas ngang ua fen apasa ngenikemi, ‘Emon chon angang esap lap seni noun we masta.’ Are ra eriaffouei, repwe pwal eriaffoukemi.” (Jon 15:18-21) A pwal ina ussuch lon ei fansoun. A lap me lein aramas ar rese weweiti are aucheani lapalapen ach fel ngeni Kot. Ekkoch ra esiitakich, takirikich, are pwal mwo nge oputakich, ussun Jises a fen ourourakich. (Mattu 10:22) Fan chommong, ekkewe minen aporaus ra amwaalli are mwakeleta porausen ach ei pekin. (Kol Fel 109:1-3) Ewer, mi tottorikich meinisin mettoch mi weires, me eli ekkoch leich repwe letipechoulo. Ifa ussun sipwe tufichin likiitu?
4. Sia kan kutta me ia alillis fan iten ach sipwe tufichin likiitu?
4 Jiowa epwe alisikich. Iei makkeien ewe sou kol fan an lang emmwen: “Chommong sokkun riaffou repwe tori emon mi pung; nge ewe SAMOL epwe chon angasalo i senir meinisin.” (Kol Fel 34:19; 1 Korint 10:13) Chommong leich repwe tongeni anneta pwe ika sipwe luku Jiowa ren unusen letipach, epwe apochokkulakich pwe sipwe tufichin likiitu fan sokkun riaffou meinisin. Ach tong ngeni i me ewe chengel mi nom mwach ra kan alisikich le fiu ngeni letipechou me niuokkus. (Ipru 12:2) Ina minne, lon fansoun mi fokkun weires, sia chuen uppos.
An Kot we Kapas a Apochokkula Jeremaia
5, 6. (a) Ikkefa ekkewe poraus mi nom rech, porausen ekkewe chon fel mi enlet mi tufichin likiitu lon fansoun weires? (b) Met meefien Jeremaia lupwen a kefilita pwe epwe wiiseni wiisen soufos?
5 Lon porausen uruwo meinisin, noun Jiowa kewe chon angang mi tuppwol ra fen kuna chengel, inaamwo ika a toriir fansoun weires. Ekkoch leir ra manau lon fansoun apwung lupwen Jiowa a pwari an song ngeni ekkewe rese tuppwol. Jeremaia me ekkoch pilon kewe ra nom lein chokewe mi tuppwol le fel ngeni Kot, iwe, pwal chon Kraist lon ewe aewin senturi. Ekkena poraus lon uruwo ra mak lon Paipel pwe sipwe pochokkuleta rer, me sipwe tongeni silei chommong mettoch ren ach kakkaeo ussur. (Rom 15:4) Ren chok awewe, ekieki mwo porausen Jeremaia.
6 Lupwen a kukkun ierin, Jeremaia a filita pwe epwe wiisen soufos lon Juta. Sanne a mecheres wiisan na. Chommong ra fel ngeni kot chofona. Inaamwo ika Josaia a tuppwol, ewe mi wiisen king lupwen Jeremaia a popueta an angangen afalafal, nge meinisin ekkewe king mi tapwoto mwirin rese tuppwol, me a lap me lein ir kewe mi wiisen asukula ekkewe aramas—weween, ekkewe soufos me samol fel—rese peppeni minne mi enlet. (Jeremaia 1:1, 2; 6:13; 23:11) Iwe, met meefien Jeremaia lupwen Jiowa a fili pwe epwe wiisen soufos? A niu! (Jeremaia 1:8, 17) Jeremaia a chemeni minne a meefi me le poputaan: “Ua ura, ‘Ai Kot Samol mi Lapalap, nengeni, usap sile fos, pun ngang eman mi chok ier kukun.’”—Jeremaia 1:6.
7. Met ekiekin aramas ussun an Jeremaia angang lon an we leenien afalafal, me ifa meefian ussun ena mettoch?
7 A lap me lein ekkewe aramas Jeremaia a afalafal ngeniir ra tenechepwak, iwe, fan chommong a mmen pochokkul an aramas u ngeni. Lon eu fansoun, Pasur, emon samol fel, a posapei, iwe, a era pwe epwe fofo. Jeremaia a awewei meefian lon ena fansoun: “Ua apasa, ‘Usap chuen founi iten ewe Samol mi Lapalap ika kapas fan itan.’” Eli fan ekkoch a pwal ina ussun meefiom—weween, ka ekiekin fangeta. Nengeni mwo minne a alisi Jeremaia pwe epwe likiitu. Iei alon: “Murin om kapas a usun chok ekkei mi ku me lon lelukei, a pwourur me lechui. Ua resin apwosalong, nge usap chuen tongeni.” (Jeremaia 20:9) A pwal ina ussun an a achunguk an Kot kewe kapas?
Chienen Jeremaia kewe
8, 9. (a) Met mwaallin ewe soufos Uria, me met a fis mwirin? (b) Met popun Paruk a letipechou, me met a alisi i?
8 Jeremaia ese alaemon chok lon an angangen soufos. A wor fitemon chienan, me neman letipan a pochokkuleta rer. Iwe nge, fan ekkoch chienan kewe rese mirit. Ren chok awewe, emon chienan soufos itan Uria a uwei kapasen apwung ngeni Jerusalem me Juta “lon ititin chok ekewe kapas Jeremaia a eani.” Iwe nge, lupwen King Jehoiakim a apasa pwe Uria epwe nninniilo, ena soufos a sulo Isip pokiten an niuokkus. Nge minne a fori ese amanaua. Noun ewe king kewe chon angang ra chei, ra turufi, ra aliwinalo Jerusalem, iwe, a nninniilo ikewe ie. Neman Jeremaia a ruko ren ena mettoch!—Jeremaia 26:20-23.
9 Pwal emon chienen Jeremaia noun we seker itan Paruk. Paruk a mmen alillisoch ngeni Jeremaia, nge lon eu fansoun a pwal urungau lon pekin ngun. A poputa le ngunungunungau pwe iei alon: “Feiengauei, pun ewe Samol mi Lapalap a achu riafou ngeni ai weires. Ua malulu ren ai ngungu, nge esap wor ai kinamwe.” Pokiten an letipengau, a poputa le kisikisilo an Paruk aucheani mettochun ngun. Nge fan kirokiroch Jiowa a awora ngeni Paruk fon mi mirit, iwe, a wenecharsefal an ekiek. Mwirin, Jiowa a affata ngeni pwe esap nninniilo lupwen Jerusalem epwe talo. (Jeremaia 45:1-5) Ese mwaal letipen Paruk a pochokkuleta lupwen a uweneta lon pekin ngun!
Jiowa a Peppeni Noun we Soufos
10. Ikkefa an Jiowa kewe pwon ngeni Jeremaia, pwonen an epwe peppeni i?
10 Nge a lamot seni mettoch meinisin pwe Jiowa ese likitalo Jeremaia. A weweiti meefien noun na soufos me a awora ewe pochokkul me alillis mi lamot ngeni. Ren chok awewe, le poputaan an Jeremaia angangen afalafal lupwen a apasa pwe a tipemwaramwar ussun an tufichin apwonueta wiisan, iei alon Jiowa ngeni: “Kosap niuokusitiir, pun ngang upwe etuk o tumwunuk. Ngang ewe Samol mi Lapalap ua kapas.” Iwe, mwirin an awewei ngeni noun na soufos wiisan we, Jiowa a ereni pwe “Ir repwe maun ngonuk, nge resap tongeni akufuk, pun ngang ua etuk pwe upwe tumwunuk. Ngang ewe Samol mi Lapalap ua kapas.” (Jeremaia 1:8, 19) A ifa me watteen an a aururu letipan! Iwe, mi enlet alon Jiowa ngeni.
11. Pwata sia silei pwe Jiowa a apwonueta an we pwon, pwonen an epwe peppeni Jeremaia?
11 Ina minne, mwirin an ekkewe aramas foti Jeremaia me ar anomu lukun pwe aramas repwe esiita, iei alon fan an lukuluk mi pochokkul: “Nge en, ai Samol mi Lapalap, ka nom rei usun chok eman sounfiu mi pochokul. Iei mine ekewe chon eriafouuei repwe chepetek, resap tongeni akufuei. Repwe fokun sau.” Lon ekkewe ier mwirin, lupwen aramas ra sotuni le nnielo Jeremaia, Jiowa a peppeni i, iwe, ussun chok Paruk, Jeremaia ese nninniilo me ese fotek lupwen Jerusalem a talo, nge ekkewe mi eriaffou i me ekkewe mi tunalo an kewe kapasen ourour ra malo are kekilo ngeni Papilon.
12. Inaamwo ika epwe tottorikich mettoch mi aletipechoukich, nge met sipwe chechchemeni?
12 Ussun Jeremaia, lon ei fansoun chommong Chon Pwarata Jiowa ra kuna fansoun riaffou. Ussun a fen mak mesemwan, ekkoch ekkena riaffou ra fisita seni pwisin apwangapwangach kewe, me fitu ra fisita pokiten ekkewe sokkopaten fitikoko won fonufan, iwe, pwal fitu ra popu seni chon u ngeni ach angang. Ekkena riaffou repwe tongeni aletipechoukich. Ussun Jeremaia, eli epwe war eu fansoun lupwen epwe wor ach tipemwaramwar ussun ach tufichin likiitu. A enlet pwe sipwe tongeni ekiekin kuna fansoun letipechou fan ekkoch. Ewe mettoch letipechou a kan sotuni ukuukun alollolun ach tong ngeni Jiowa. Ina minne, sipwe apposa letipach pwe sisap mut ngeni letipechou an epwe aukatiu ach angang ngeni Jiowa pwe a ina ussun Uria. Nge, sipwe appiru Jeremaia me luku ren unusen letipach pwe Jiowa epwe peppenikich.
Ifa Ussun Sipwe Tongeni Akukkunalo Letipechou
13. Ifa ussun sipwe tongeni tapwelo mwirin ewe leenien appiru Jeremaia me Tafit ra isetiu?
13 Jeremaia a kan ikkiotek ngeni Jiowa Kot, iwe, a pwari ngeni meefian kewe mi alollol me a tittingor pwe epwe apochokkula i. Ina eu leenien appiru mi murinno sipwe tapwelo mwirin. Tafit, emon mi manau lom lom, a pwal anomu an lukuluk won ewe chok emon Chon Awora pochokkul, iwe, iei makkeian: “SAMOL, kopwe rong ai keei kapas, kopwe auseling ai siongau. Kopwe rong ngingin ai koko, ai King, o ai Kot, pun ua iotek ngonuk.” (Kol Fel 5:1, 2) Porausen manauen Tafit a affata pwe fan chommong Jiowa a polueni an Tafit kewe iotekin tingoren alillis. (Kol Fel 18:1, 2; 21:1-5) Iwe, pwal ussun chok, lupwen mettoch mi weires epwe chounikich are a ussun ita ese pwak ach kewe osukosuk, ach kulliti Jiowa lon iotek me ach suuki letipach ngeni epwe kan aururukich. (Filipai 4:6, 7; 1 Tesalonika 5:16-18) Sap minne Jiowa esap mochen auseling ngenikich. Nge, a affata pwe ‘a tongeikich.’ (1 Piter 5:6, 7) Iwe nge, esap pwung ach sipwe iotek ngeni Jiowa, nge mwirin, sisap auseling ngeni alon, ika met?
14. Mei fet meefien Jeremaia pokiten an rong alon Jiowa ngeni i?
14 Ifa ussun Jiowa a kan fos ngenikich? Pwal ekieki mwo Jeremaia. Pokiten Jeremaia emon soufos, Jiowa a fos ngeni. A iei ussun an Jeremaia awewei ifa ussun alon Kot a kku letipan: “Ua iseis lon lelukei om kewe kapas, lupwen ra toriei. Om kapas a fis pwe ai pwapwa, lelukei a meseik ren, pun itom a fou woi, ai Kot Samol mi Unusen Manaman.” (Jeremaia 15:16) Ewer, Jeremaia a pwapwa pokiten iten Kot we a fou won, me alon a auchea ngeni ena soufos. Ina minne, ussun ewe aposel Paul, Jeremaia a mwotoresin esileilo ewe poraus a wiisen angei.—Rom 1:15, 16.
15. Ifa ussun sipwe tongeni ffotukalong lon letipach alon Jiowa, me ach ekieki met sokkun poraus epwe apposa letipach pwe sisap fanafanelo?
15 Jiowa ese foffos ngeni aramas lon ei fansoun. Iwe nge, a nom rech alon Kot kewe lon ewe Paipel. Ina popun, ika sipwe tinikken le kaeo Paipel me ekilapei minne sia kakkaeo, alon Kot kewe repwe pwal wiliiti ‘pwapwaan me chengelin’ letipach. Epwe pwal tufich ach sipwe mmeseik pokiten ach esileilo iten Jiowa lupwen sipwe uwei ngeni aramas ekkena kapas. Esap nama senikich fan eu pwe esor pwal eu mwichen aramas mi ekkesilefeili iten Jiowa we won fonufan lon ei fansoun. Noun kewe Chon Pwarata chok ra ekkesilefeili poraus allimen utaan an Kot we Muu me akkasukula aramas mi mosonoson pwe repwe noun Jises Kraist chon kaeo. (Mattu 28:19, 20) A fet watteen feiochuch! Pokiten a mmen watte ewe wiis Jiowa a fen awiisa ngenikich fan tong, ita met popun sipwe fanafanelo chok?
Sipwe Tuttumunu ewe Mettoch Chiechi
16, 17. Mei fet ekiekin Jeremaia ussun ewe mettoch chiechi, me ifa ussun sipwe tongeni appiru i?
16 Jeremaia a kapas ussun pwal eu mettoch mi alisi i pwe epwe pwora. Iei alon: “Use mottiu lein ekkewe chiechi mi eani chuupwutak me takirita ren. Pokiten poum ua fen mottiu alaemon chok, pun ka fen auraeilo ren kapasen apwung.” (Jeremaia 15:17, NW) Jeremaia a efich an epwe alaemon chok lap seni an epwe ngauolo manauan ren chiechi mi ngau. A pwal chok ina ussun ach ekiek lon ei fansoun. Sisap monuki an ewe aposel Paul kapasen ourour pwe “Chienach mi ingau repwe alimengaualo ach kewe fofor murinno,” pwal mwo nge ekkewe foffor murinno sia fen akkeani fite, fite ier.—1 Korint 15:33.
17 Chiechi mi ngau repwe tongeni mut ngeni ngunun fonufan an epwe alimengaua ach ekiek. (1 Korint 2:12; Efisus 2:2; Jemes 4:4) Ina minne, sipwe alapalo ach tufichin miritiiti poraus fan iten ach sipwe esinna chiechi mi ngau me unusen aimukichelo seniir. (Ipru 5:14) Ika Paul a manau won fonufan lon ei fansoun, om ekiek nge met epwe ereni emon chon Kraist mi kakkatol kachitoon foffor mi sikepwach are kachito mi ur ren fofforun nni aramas are ewe sokkun urumot mi ur ren ussun ita fofforun kaweten aramas? Epwe ifa ussun an epwe fonou emon brother mi ekiekin chiechi ngeni ekkan aramas won ewe Internet, nge ese kan sissileer? Epwe fet an ekiek ussun emon chon Kraist mi kakkatol tv are urumot won ekkewe minen fitio fite, fite awa, nge ese akkawora fansoun fan iten an epwe kaeo Paipel?—2 Korint 6:14b; Efisus 5:3-5, 15, 16.
Nonnom Chok lon ewe Paratis lon Pekin Ngun
18. Met epwe alisikich pwe sipwe pochokkul lon pekin ngun?
18 Sia kan aucheani ach paratis lon pekin ngun. Lon ei fansoun, esor och mettoch won unusen fonufan mi akkaekis mwo ussun ena paratis. Pwal mwo nge chon lukun ra kapas ussun ewe tong, kisaseu, me kirokiroch chon Kraist ra pwarata lefiler. (Efisus 4:31, 32) Nge, a akkaewin lamot lon ei fansoun pwe sipwe fiffiu ngeni letipechou. Chiechi mi murinno, iotek, me eu kokkotun kaeo repwe tongeni alisikich pwe sipwe pochokkul lon pekin ngun. Ekkena mettoch repwe apochokkulakich pwe sipwe tufichin likiitu fan sossot meinisin fan unusen ach lukuluk won Jiowa.—2 Korint 4:7, 8.
19, 20. (a) Met epwe alisikich pwe sipwe tufichin likiitu? (b) Ena eu lesen mi tapwoto a weneiti io, me epwe pwal auchea ngeni io?
19 Esap fan eu ach sipwe mut ngeni chokewe mi oput ewe poraus sia ekkesilefeili seni Paipel ar repwe aniuokkusukich me akukkunalo ach luku. Ekkewe mi fiffiu ngenikich ra wesewesen fiffiu ngeni Kot, ussun chok ekkewe mi eriaffou Jeremaia. Resap pworaitikich. Jiowa a mmen pochokkul seni ekkewe mi u ngenikich, iwe, iei alon ngenikich: “Kopwe apilukuluku Jiowa; kopwe pwora me letipom epwe pochokkul. Ewer, apilukuluku Jiowa.” (Kol Fel 27:14) Fan ach apilukuluku Jiowa le alollolun letipach, amwo epwe pposolo ekiekich pwe sisap fangeta lon ach foffori minne mi murinno. Amwo epwe pochokkul ach lukuluk pwe sipwe kini uwa mi murinno ika sisap achanu, ussun chok Jeremaia me Paruk.—Kalesia 6:9.
20 Chommong chon Kraist ra weiresin likiitu fan ewe mettoch letipechou iteitan. Iwe nge, a sokkolo watteen ekkewe osukosuk mi tottori ekkewe sarafo. Nge a pwal suuk ngeniir chommong al mi ale ngeni chommong sokkun angang are feioch. Ena lesen mi tapwoto a weneiti ekkewe sarafo leich. Epwe pwal auchea ngeni ekkan sam me in me meinisin ekkan watte lon ewe mwichefel mi tufichin alisi ekkan sarafo lon ewe mwichefel ren ar kapas, ar isetiu leenien appiru ngeniir, me ar foffor fan asengesiir.
Ifa Ussun Kopwe Polueni?
• Pwata sipwe ekiekin kuna mettoch mi aletipechou, me sipwe kutta alillis seni io?
• Ifa ussun Jeremaia a pworaiti ewe mettoch letipechou, inaamwo ika a weires wiisan we?
• Met epwe efisata ‘pwapwa me chengel’ lon letipach, inaamwo ika epwe torikich fansoun weires?
[Ekkewe Kapas Eis fan Iten ewe Lesen]
[Sasing lon pekin taropwe 18]
Jeremaia a ekieki pwe a kon kukkun ierin me ese naf miritin fan iten ewe wiis soufos
[Sasing lon pekin taropwe 20]
Lon pwal mwo nge fansoun an aramas eriaffou i, Jeremaia a silei pwe Jiowa a “usun eman sounfiu mi pochokul” le peni i