Ita Kopwe Choni Eu Lamalam?

‘ESOR lamoten ai choni eu lamalam are fiffiti fel ren ai upwe luku Kot!’ A ina ussun lukuen chommong aramas ussun ar choni eu lamalam. Pwungun pwe ekkoch aramas ra apasa pwe ir mi arap ngeni Kot lupwen ra nonnom lon eu leenien fonufan mi ling lap seni lupwen ra fiti fel. Ikenai, ewe ekiek pwe aramas rese wiisen choni eu lamalam ika repwe luku Kot a choufetal.

Iwe nge, mi sokkolo ekiekin ekkewe ekkoch aramas. Ra apasa pwe an emon fiti eu lamalam a fokkun lamot ika Kot epwe pwapwa ren. Ina popun sisap eani ei kapas eis ren chok ach mochen kaeo me silei fitemon repwe mochen me resap mochen choni eu lamalam. Nge, pokiten ei kapas eis a weneiti ach chiechi me Kot, esap murinno ach sipwe silei ekiekin? Iwe, met sia tongeni kaeo seni an we Kapas, ewe Paipel, ussun ei kapas eis?

Ifa Ewe Kokkot Lefilen Kot Me Aramas Me Loom

Arapakan 4,400 ier me loom, eu nooter mi fokkun watte a efeiengaua unusen fonufan meinisin. Esap mecheres an aramas monuki ena, me a wor porausen eu nooter mi fokkun watte lon uruwoon chommong sokkopaten aramas won fonufan. Ekkoch porausen an aramas kewe uruwo ussun eu nooter mi sokkolo nge, mei pwal wor chommong poraus mi wewe chok, kapachelong ewe poraus pwe ekkoch chok aramas me man ra manau seni ewe Nooter.

Chokkewe mi manau seni ewe Nooter ra chok sereseroch? Ewe uruwo lon Paipel a affata pwe esap ina ussun. A lamot ach chechchemeni pwe Kot ese fen ouroura emon me emon ussun warotoon ewe Nooter. A ereni Noa, me Noa a wiisen ouroura pilon kewe ussun ewe Nooter.​—Keneses 6:13-16.

 Amanauen aramas a alongolong won ar choni ei kukkun kumi me won ar tipemecheres le etiwa ewe emmwen Kot a fen ngeni Noa. Pwal mwo nge ekkewe man rese tongeni manau ika rese fiti ei kumiin aramas. Awewe mi titchik a fen kawor ussun atufichien manauen ekkewe man.​—Keneses 6:17–​7:8.

Fite puku ier mwirin, mwirimwirin Noa kewe seni noun we Sem ra slave lon Isip. Iwe nge, letipen Kot pwe ekkeei aramas repwe ngaselo me repwe feilo won ewe fonu Kot a pwon ngeni samasamer we Eperiam. Ei poraus ese fen pwalo ngeni emon me emon slave nge a akkom pwalo ngeni chokkewe mi filita fan iten wiiser le emmweni ekkena aramas​—Moses me pwiin we, Aaron. (Ekistos 3:7-10; 4:27-31) Mwirin ar ngaselo, ekkewe slave ra angei an Kot kewe Alluk lupwen ra nonnom unukkun ewe Chuuk Sinai, me ra wiliiti ewe muun Israel.​—Ekistos 19:1-6.

Amanauen emon me emon chon Israel a alongolong won ar fiti ei kumi me won ar alleasochisi ekkewe kapas seni chokkewe mi seikita fan iten ar repwe emmweniir. Alillis a pwal kawor fan iten ekkewe chon Isip mi mochen chiechi ngeni ei mwichen aramas Kot a pwapwa ren. Lupwen ekkewe chon Israel ra towu seni Isip, ekkeei chon Isip ra fitiir, me a suuk ngeniir ewe tufichin kuna an Kot feioch.​—Ekistos 12:37, 38.

Iwe, lon ewe aewin senturi, Jises a poputa an angangen afalafal me a kutta noun kewe chon kaeo. Jises a asukula ewe mwichen aramas nge a alisi emon me emon leir lupwen a wor lamotan. Jises a ereni ekkewe 11 aposel mi tuppwol: “Ami oua fen nonnom rei lon ai kewe riaffou. Iwe, usun Semei a fen filata pwe upwe angei eu mu, iei usun ua pwal filikemita.” (Luk 22:28, 29) Mwirin, an Kot ngun mi fel a feitiu won ekkewe chon kaeo atun ar mwichfengen.​—Fofor 2:1-4.

Ekkeei poraus ra affata ngenikich pwe Kot a fen alisi ekkewe mwichen aramas mi kkotolo. Ekkewe aramas Kot a fos ngeni​—ussun chowean Noa, Eperiam, Moses, me ekkewe ekkoch​—ir chokkewe Kot a nounou ren an epwe aporausa poraus mi lamot ngeni ekkewe mwichen aramas. Esor popun ach sipwe luku pwe epwe sokkolo ren noun Kot kewe aramas ikenai. Iwe, ei poraus a eppieta pwal eu kapas eis: Ach choni ese lifilifil menni lamalam epwe och? Sipwe poraus ussun ena kapas eis mi lamot lon ewe lesen mwirin ei.

[Sasing lon pekin taropwe 4]

Seni me loom, Kot a fen emmweni noun kewe lupwen ra kkotolo ussun chok eu mwichen aramas