Ita Menni Lamalam Kopwe Filata?

‘EKKEWE sokkopaten lamalam meinisin ra wewe ngeni fitefoch aal ngeni eu chok leeni. Pwungun pwe mei wor emon chok Kot, ika met?’ Chommong aramas ra eani ena ekiek nge ra meefi pwe inaamwo ika a lamot an aramas fiti eu lamalam nge, ese lifilifil menni repwe fiti.

Eli lupwen kopwe ekiek ussun ena poraus, kopwe tipeeu ngeni pun mei wor emon chok Kot, ewe mi Fokkun Tekia. (Aisea 44:6; Jon 17:3; 1 Korint 8:5, 6) Iwe nge, sise tongeni monuki minne mi sokkolo​—pwal mwo nge u fengen​—lein ekkewe chommong lamalam ra apasa pwe ra angang ngeni ewe Kot mi enlet. Ar foffor, luku, afalafal, me met a lamot ika emon epwe choni ewe lamalam a fokkun sokkofesen. A kon watte sokkofesennin ekkeei mettoch pwe chokkewe mi fiti eu lamalam ra weiresin weweiti are etiwa minne ekkewe ekkoch ra afalafala are luku.

Iwe, Jises a apasa: “Kot mi Ngun, iwe, chon fel repwe fel ngeni lon ngun o enlet.” (Jon 4:24) Fel ngeni Kot lon enlet a mut ngeni nonnomun ekkewe sokkopaten afalafal mi u fengen ussun Kot, an kewe kokkot, me ifa ussun Kot a mochen sipwe fel ngeni? Sipwe tongeni luku pwe ese lamot ngeni ewe Kot Mi Fokkun Tekia Seni Meinisin ifa ussun sia fel ngeni?

Chon Kraist Mi Enlet Me Loom Me Iei

Fan ekkoch chon Kraist loom ra tipefesen. Ren chok awewe, lupwen ewe aposel Paul a fos ussun chokkewe lon Korint, a apasa: “Pun ua fen sinei seni chon le imwen Kloe usun ami, pwii kena, pwe mi wor aninifengen lefilemi. Iwe, iei popun, pwe oua en me alon oua apasa, ‘Ngang noun Paul,’ are, ‘Ngang noun Apollos,’ are, ‘Ngang noun Sifas,’ are, ‘Ngang noun Kraist.’”​—1 Korint 1:11, 12.

Paul a eani ekiek pwe ar tipefesen a lamot kisikis? Emon me emon a chok feffetal won pwisin an we alen manau? Aapwi! Paul a apasa: “Upwe fonoukemi, pwii kena, fan iten ach Samol Jises Kraist, pwe ami meinisin oupwe tipeeu, o esap wor u fengen lefilemi; nge oupwe eufengen chok, lon ekiek eu o tipeeu.”​—1 Korint 1:10.

Pwungun pwe aramas resap tipeeufengen lon ar luku fan erian. Tipeeu a pop seni an emon me emon atittinafichi me weweiti ewe poraus, me seni ar pwisin etiwa eu chok  aweween ewe poraus. Ina popun kaeoon ewe Paipel me eu mochen le apwonueta minne a fen kaeo mi lamot ika epwe wor ewe sokkun tipeeu Paul a fos ussun. Mei wor ena sokkun tipeeu? Sia fen kaeo pwe Kot a kan alisi eu mwichen noun kewe aramas. Sia tongeni esinna ena mwichen aramas ikenai?

Ekkewe Feioch Seni Chiechi Mi Murinno

Ewe sou mak kol mi fel, Tafit, a eani ei kapas eis: “SAMOL, io epwe siamu lon om we im mangaku, io epwe nonnom won om we chukuchukuta mi fel? Ekkena ir mi fefetal lon minne mi enlet, o forata minne mi pung, ir mi apasata minne mi enlet seni lon letiper.” (Kol Fel 15:1, 2) An emon weweochuuti ewe Paipel epwe atufichi an esinna ewe lamalam a fori met Kot a kutta. Iwe, ren an fiti ena kumi, an luku epwe pochokkulelo pokiten an chiechifengen me aramas mi fel ngeni Kot fan tipeeu me “lon ngun o enlet.”

Chon Pwarata Jiowa ra fen pwarata pwe tipeeu lon luku a tufich lon ei fonufan mi unusen tipefesen. Me leir mei wor aramas seni fite puku lamalam me chommong sokkun aramas. Pwal ekkoch Chon Pwarata ra fen luku pwe rese tongeni silei Kot are pwe esor emon Kot. Pwal ekkoch rese kon lien ekiek ussun lamalam. Seni chommong sokkopaten lamalam, eoreni, me ekiek, a wor eu mwichen aramas mi pwapwaiti tipeeu lon pekin lamalam, eu mettoch ese kan pwalo lon ei fonufan ikenai.

Longolongun ei tipeeu ina an Kot we Kapas, ewe Paipel. Pwungun pwe Chon Pwarata Jiowa ra silei pwe rese tongeni alluk ngeni aramas ussun met repwe fori. Nge ra aucheani wiiser mi auchea ar repwe pesei aramas le kaeo ewe Paipel me kuna eu longolong mi nukuchar fan iten filier won ekkewe mettoch mi weneiti fel ngeni Kot “ren ngun o enlet.”

Ottmar a anneta pwungun ena ekiek. A maarita lon eu famili a fiti ewe lamalam Katolik lon Tois, nge a ukutiu seni an feilo fiti fel lupwen a chuen kukkun. A awewei: “Iteiten fansoun lupwen ua towu seni ewe fel, ewe poon lon letipei a ussun we chok me lupwen ua tolong.” Nge Ottmar a chuen luku pwe a wor emon Kot. A poputa le fos ngeni Chon Pwarata Jiowa me a eani ewe luku pwe ra enletin angang ngeni Kot. A kuna ewe lamoten an epwe chiechi ngeniir. Iei a apasa: “Pokiten ai fiti eu mwicheich mi angang won unusen fonufan, ua pwapwaiti kinamween ekiek me letip. Ua feffeita lon ai angei silei mi enlet ussun ewe Paipel. Ina eu mettoch a fokkun auchea ngeniei.”

Eu Kapasen Etiwetiw Ngeni Chokkewe Mi Kukkuta

Chon Pwarata Jiowa ra awora eu kkotun kaeo Paipel mi alisi aramas ar repwe weweochuuti met Kot a kutta seniir. Ei kkotun kaeo ewe Paipel ese kamo. Lon ewe ier a lo a fis 5,726,509 sukulen Paipel ren emon are fitemon aramas. Ei sokkun sukulen Paipel a fen alisi fite milion aramas ar repwe fori eu longolongun sile mi nukuchar mi alisata ar filiochu menni lamalam repwe fiti. Iei mwo mei wor eu etiwetiw fan iten om kopwe kaeo met Kot a kutta sonuk me ren minne mi makketiu lon ewe Paipel. Iwe mwirin en mi tongeni pwisin filata.​—Efisus 4:13; Filipai 1:9; 1 Timoti 6:20; 2 Piter 3:18.

Ika ka mochen apwapwai Kot, mi lamot om choni eu lamalam​—nge mi lifilifil menni lamalalam kopwe choni. Mi lamot pwe filiom lon pekin lamalam epwe alongolong won ewe sile mi enlet lon Paipel, esap chok won pwisin om ekiek are minne ka rongorong seni aramas. (An Salomon Fos 16:25) Kopwe kaeo met Kot a kutta fan iten lamalam mi enlet. Alollo minne ka kaeo ngeni pwisin om luku. Iwe, mwirin kopwe tongeni filioch me ren pwisin om sile.​—Tuteronomi 30:19.