Mi Feioch Chokkewe Mi Alinga Kot

“Repwe feito o chapetiu mwen mesom, o repwe asamolu itom.”​—KÖLFEL 86:9.

1. Ifa ussun ach alinga Kot epwe lapalap seni forian kewe esor manauer?

 MI FICH pwe forien Jiowa kewe meinisin repwe mwareiti i. Forien Jiowa kewe rese manau ra mwareiti i, nge kich mi tongeni ekiek, wewe, meefi kilisou, me fel ngeni Kot. Iwe, ewe soumak kol mi fel a fos ngenikich ren an apasa: “Oupwe pupuchor ren pwapwa ngeni Kot, ami chon fonufan meinisin; oupwe kol ren lingen itan we; oupwe fakkun mwareiti i!”​—Kol Fel 66:1, 2.

2. Io kewe ra alleasochisi ewe alluk pwe aramas repwe alingalo iten Kot, me met popun?

² Lape-ngeni aramas rese mochen ekiek ussun Kot are alinga i. Iwe nge, lon 235 fonu, lap seni wonu milion Chon Pwarata Jiowa ra pwarata pwe ra kukkuna lapalapen Kot kewe rese pwa ngeni meser pokiten ar nennengeni ekkewe mettoch Kot a forata, me rongorong ar pwarata mi fanafanelo. (Rom 1:20; Kol Fel 19:2, 3) Ren ar kakkaeo ewe Paipel, ra silei me tongei Jiowa. Kol Fel 86:9, 10 a oesini: “Samol, ekkewe mu meinisin ka fen forata repwe feito o chapetiu mwen mesom, o repwe asamolu itom. Pun en mi lapalap, o ka forata ekkewe mettoch mi amwarar, en chok mi Kot.”

3. Ifa ussun ewe ‘mwich mi fakkun lapalap” a “angang ngeni Kot le ran me lepwin’?

³ A ussun we chok ifa ussun Pwarata 7:9, 15 a awewe won eu “mwich mi fakkun lapalap” ra “nonnom mwen an Kot we leenien motun king, o ra angang ngeni i le ran me lepwin lon an we imwen fel.” Sap minne ach Kot a alluk pwe noun kewe repwe mwareiti i fansoun meinisin nge noun kewe ra fiti eu mwicheich won unusen fonufan. Iwe, lupwen a pwinitiir lon ekkoch fonu, noun Kot kewe chon angang ra chuen afalafal ia won fonufan a saramelo ie. Ina ussun ra alinga Jiowa le ran me lepwin. Ewe fansoun mi arap ngenikich lupwen “mettoch meinisin mi ngasangas” repwe mwareiti Jiowa. (Kol Fel 150:6) Iei mwo, met sia tongeni fori ren ach sipwe mwareiti Kot? Ifa ussun ach  foffori a tongeni weires? Ikkefa ekkewe feioch mi wikkiti chokkewe mi alinga Kot? Ren ach sipwe polueni ekkena kapas eis, sipwe pwungupwung won poraus lon Paipel ussun eu einang lon Israel, ewe einangen Kat.

Eu Osukosuk Me Loom

4. Menni osukosuk a ppiita fan iten ewe einangen Kot?

⁴ Mwen Israel a tolong lon ewe Fonu Mi Pwonetiu, ewe einangen Kat a tingor ewe fonu mi och fan iten fonen kou otiuen ewe chanpupu Jortan. (Numperis 32:1-5) Ar nonnom ikena ie epwe atoto ngeniir ekkoch osukosuk. Ekkewe einang mi nonnom ngeni notoun ewe Jortan repwe kuna tumun seni ewe Lemonun Jortan​—eu minen tumun seni an aramas tooki fonuer. (Josua 3:13-17) Iwe nge, George Adam Smith a makkei ei poraus ussun ewe fonu otiuen ewe Jortan lon ewe puk The Historical Geography of the Holy Land: “[Ekkena fonu] ra sopwosopwolo nge esor minen eppet mi watte tori ewe sonosonochun Arabia mi watte. Ina popun repwe tongeni feiengau seni ekkewe aramas mi saifetal fansoun meinisin. Ekkoch aramas mi saifetal ra mauneer iteiten ier pokiten ewe fetil, anen nour kewe man.”

5. Met Jekop a era pwe chon Kat repwe fori lupwen aramas ra mauneer?

⁵ Epwe ifa nonnomun ewe einangen Kat fan ena osukosuk a chok sopwosopwolo? Semelaper we Jekop a oesini mwen an malo fite puku ier me mwan: “Kat, eu mwichen chon sola repwe fiu ngonuk, nge en kopwe kul o tapweriir fan pwora.” (Keneses 49:19) Eli letipen aramas mi tongeni chou lupwen ra keran rongorong ei poraus. Iwe nge, a wesewesen wewe ngeni eu alluk pwe ekkewe chon Kat repwe maunei ekkewe chon sola. Jekop a alukulukuur pwe ekkewe chon sola repwe kkuf me ssu seniir fan sau lupwen ekkewe chon Kat ra cheer.

Osukosuk Mi Tongeni Aweiresi Ach Fel Ikenai

6, 7. Ifa ussun nonnomun chon Kraist ikenai a wewe chok me nonnomun ewe einangen Kat?

⁶ Ussun chok ewe einangen Kat, chon Kraist ikenai ra meefi etipetipaen me ekkewe osukosuk seni an Setan kokkot; esor manaman mi amwarar seni lang a angasakich seniir. (Hiop 1:10-12) Chommong leich ra meefi osukosuk lupwen sia feilo sukul, angang, me alisi nouch kewe. Sisap mwo monuki ekkewe osukosuk lon inisich me tupuwach. Ekkoch ra likiitu fan ‘efoch folun ira lon fituker’ ussun chowean tterin inisir are semmwen. (2 Korint 12:7-10) Pwal ekkoch ra riaffou pokiten ra meefi pwe esor lamoter. “Ekewe ran mi ngau[en]” chinnap mi tongeni pinei chon Kraist mi chinnap  seni ar angang ngeni Jiowa ren ewe pochokkul me achocho ra eani me loom.​—Än Salomon Afalafal 12:1.

⁷ Ewe aposel Paul a achema ngenikich pwe “sipwe maun ngeni . . . chommong sokkun ngun ingau lon lang.” (Efisus 6:12) Ewe “ngunun fonufan,” ewe ngunun u ngeni me ekkewe foffor mi annou Setan me noun kewe timon ra alisata, a kkukich fansoun meinisin. (1 Korint 2:12; Efisus 2:2, 3) Sia tongeni riaffou ussun chok Lot pokiten ekkewe foffor mi limengau aramas ra foffori me fos ussun. (2 Piter 2:7) Setan a pwal tongeni mauneekich. Setan a maunei lusun chokkewe mi kepit, “ir mi amwochu ekkewe allukun Kot, o uwei ewe pwarata usun Jises.” (Pwarata 12:17) Noun Jises “ekkewe ekkoch siip” ra pwal meefi an Setan mauneer ren riaffou mwaal me pinepinin ar angang.​—Jon 10:16.

Fangeta Are Fiu Ngeni?

8. Ifa ussun sipwe polueni an Setan maunei kich, me met popun?

⁸ Ifa ussun sipwe poluen ngeni an Setan mauneekich? Ussun chok ewe einangen Kat me loom, sipwe pochokkul lon pekin ngun me u ngeni Setan me ren an Kot emmwen. Solap pwe ekkoch ra fen ekis fangeta pokiten ekkewe osukosuk lon manauer, me ra tumunungau ngeni wiiser lon pekin ngun. (Mattu 13:20-22) Emon Chon Pwarata a fos ussun ewe popun choochoon chon fiti mwich a kisikisitiu: “Pwiich kewe ra molulu. Ra osukosuk.” Pwungun pwe a wor chommong popun aramas ikenai repwe molulu. Ina popun a mecheres ar eani ekiek pwe fel ngeni Kot a aweiresi manauer, eu wiiser mi chou. Nge ina eu ekiek mi murinno​—are pwung?

9. Ifa ussun ach pwilitalong an Kraist we iok epwe asosokich?

⁹ Ekieki mwo met Jises a apasa ngeni ekkewe pwiin aramas mi pwal choutiu pokiten ekkewe osukosuken manauer: “Oupwe feito rei, ami meinisin mi pekus o chouchou, o ngang upwe asosokemi.” Jises a era pwe aramas repwe asoso ika repwe ekisalo ar angang ngeni Kot? Esap ina ussun pun Jises a apasa: “Oupwe pwilitalong ai iok, o kaeo seniei, pun ngang mi mosonoson me tipetekison; iwe, oupwe kuna asosoon ngunumi.” Eu iok a wewe ngeni eu pisek a ffor seni ira are mecha a atufichi emon aramas are man an epwe uwei osan mi chou. Iwe, met popun emon epwe pwilitalong eu iok? Esap pwe sia fen “pekus me chouchou”? Ewer, nge ekkewe kapas lon fosun Kris a pwal tongeni chiyaku iei ussun: “Fitiei fan ai we iok.” Mwa met ren ena. Jises a apasa pwe epwe alisikich le eki osach! Sisap uwei osach ren pwisin ach pochokkul chok.​—Mattu 9:36; 11:28, 29; 2 Korint 4:7.

10. Epwe met mwiriloon ach achocho le alinga Kot?

¹⁰ Lupwen sia pwilitalong ewe iok ren ach wiliiti noun Jises chon kaeo, sia fiu ngeni Setan. Jemes 4:7 a eani ei pwon: “Oupwe u ngeni ewe tefil, iwe, epwe su senikemi.” Sap minne ach fori epwe mecheres. Angang ngeni Kot a wewe ngeni angang weires. (Luk 13:24) Iwe nge ewe Paipel a pwonei lon Kol Fel 126:5: “Ir mi kechiu lupwen ar amoratiu repwe pupuchor ren pwapwa, lupwen repwe ionifengenni uwar kewe.” Ewer, sise fel ngeni emon Kot ese silei kilisou. Kot “a liwini ngeni ir ekkewe mi kukutta i,” me a efeiochu chokkewe mi alinga i.​—Ipru 11:6.

Alinga Kot Ren Ach Afalafala Ewe Muu

11. Ifa ussun ewe angangen afalafal epwe awora tumun lupwen Setan a maunei kich?

¹¹ Jises a eani ei alluk: “Oupwe feilo asoulangalo chon fonu meinisin.” Ewe angangen afalafal ewe minen fori eu “asoren mwareiti Kot.” (Mattu 28:19; Ipru 13:15) Ach ‘tukum ngeni pechech ekkewe pisekin ewe kapas allim’ ina kinikinin “unusen an Kot pisekin maun” mi lamot ika sipwe kuna tumun lupwen Setan a mauneekich. (Efisus 6:11-15) Ach mwareiti Kot lupwen sia feilo afalafal a wesewesen apochokkula ach luku. (2 Korint 4:13) A alisata ach tumunu seni ekiek mi ngau. (Filipai 4:8) Sia tongeni pochokkulelo seni ach chiechi ngeni chokkewe mi fel ngeni Kot lupwen sia feilo afalafal.

12, 13. Ifa ussun fiffiti ewe angangen afalafal epwe efeiochu ekkewe famili? Awewei mwo.

 ¹² Ewe angangen afalafal a pwal tongeni wewe ngeni eu angang mi murinno fan iten eu famili. Pwungun pwe kukkulou a wesewesen lamot ngeni ekkewe nau. Iwe nge, sap minne an ewe famili afalafalfengen a wewe ngeni eu oser mi chou. Ekkewe nau repwe pwapwaiti ewe angangen afalafal ika ekkewe sam me in repwe asukuleer ifa ussun repwe lipwakoch le fori. Esap pwe ekkewe kukkun ra pwapwaiti ar foffori ekkewe mettoch ra angangoch lon? Lupwen ekkewe sam me in ra ekiekoch me rese eriani ekkewe nau le fori mettoch ese ki rer, repwe alisata an nour kewe pwapwaiti ewe angangen afalafal.​—Keneses 33:13, 14.

¹³ Pwal och, an unusen eu famili fel ngeni Kot a aririochuur. Ekieki mwo porausen pwiich we, emon fefin. Puluwan we a su seni i me noun kewe limon semirit. A weires manauan pun a wiisen angang ren an epwe atufichi manauaen noun kewe. A kon chou wiisan kewe me a chok likatalo an noun kewe osupwang lon pekin ngun? Iei alon we: “Ua tinikken le kaeo lon ewe Paipel me ekkewe puk me ua sotun le apwonueta minne ua fen allea. Ua tumunu pwe nei kewe repwe fiffitiei le feilo mwich me lon ewe angangen afalafal imw me imw. Ifa mwiriloon ai achocho? Nei kewe limon ra papatais.” Ar fiffituk lon ewe angangen afalafal a pwal tongeni alisata om alisi noum kewe lon “sokkun amirit me fonou me ren ewe Samol.”​—Efisus 6:4.

14. (a) Ifa ussun ekkewe kukkun repwe alinga Kot lon sukul? (b) Met epwe alisikich ach sisap “mo sau ren ewe kapas allim”?

¹⁴ Ami kana sarafo, ika oua nonnom lon eu fonu ia a mumuta ie an ami aporausa porausen lamalam lon sukul, oua kan mwareiti Kot ren ami afalafal, are oua pireir pokiten oua niueiti aramas? (An Salomon Fos 29:25) Emon Chon Pwarata lon Peurto Rico, 13 ier, a makkei: “Use saueiti ai afalafal lon sukul pokiten ua silei pwe iei ewe enlet. Lon ai we class ua kan eitata pei ren ai upwe fos ussun met ua fen kaeo lon ewe Paipel. Ika esor ai class, ua feilo lon ewe library ren ai upwe alleaani ewe Young People Ask puk.” * Jiowa a fen efeiochu an afalafal? A apasa: “Fan ekkoch chienei kewe chon sukul ra eani kapas eis ngeniei are ra tingor ika repwe tongeni nouni ewe puk.” Ika oua fen pireir le afalafal lon sukul, neman epwe lamot pwe oupwe anneta ngeni pwisin ami “letipen Kot, minne mi murinno o fich o unusoch” ren pwisin ami kaeofichi. (Rom 12:2) Lupwen oua wesewesen luku pwe met oua fen kaeo mi enlet, ousap “mo sau ren ewe kapas allim.”​—Rom 1:16.

Eu ‘Asam’ Ngeni Afalafal Mi Suukulo

15, 16. Ifa ewe “asam lap ngeni angang” ekkoch chon Kraist ra pwerelong, me ikkefa ekkewe feioch ra fen kuna?

¹⁵ Ewe aposel Paul a makkei pwe “eu asam lap ngeni angang mi lamot” a fen suuk ngeni. (1 Korint 16:9) Nonnomun manuaom iei a atufichuk le pwerelong lon eu asam ngeni angang mi lamot? Ewe angangen regular are auxiliary pioneer a wewe ngeni 70 are 50 awaan afalafal iteiten maram. Chiener chon Kraist ra afanni ekkewe pioneer pokiten ar achocho lon ewe angangen afalafal. Nge ekkewe chommong awa ra afalafal esap efisata ar ekiek pwe ir mi tekia seni pwiir kewe. Ra eani ewe ekiek Jises a fos ussun: “Am chon angang mi chok  mwal; sia chok forata minne wisem.”​—Luk 17:10.

¹⁶ A lamot ngeni emon pioneer an epwe pwisin nemeniochu manauan, kokkotoch, me an tipemecheres le pennuku pwisin an mochen. A mmen watte ekkewe feioch. Emon pioneer itan Tamika a apasa: “Ai lipwakoch le aweweochu an Kot we Kapas mi enlet a wewe ngeni eu feioch mi watte. Iei lupwen ua afalafal imw me imw, ua tongeni chechchemeni ekkewe wokisin mi fich ngeni emon me emon chon imw.” (2 Timoti 2:15) Emon pioneer itan Mica a apasa: “Ai kuna ifa ussun ewe enlet a siwili manauen aramas ina pwal eu feioch mi amwarar.” Emon sarafo itan Matthew a fos ussun an pwapwa lupwen a kuna “emon mi etiwa ewe enlet. Esor och chengel mi arap ngeni ewe chengel seni ena.”

17. Ifa ussun emon chon Kraist a akkufu an ekiek ngau ussun ewe angangen pioneer?

¹⁷ Kopwe tongeni ekieki ussun om pwerelong lon ewe asam ngeni ewe angangen pioneer? Neman ka mochen nge ka meefi pwe en mi tufichingau ngeni. Emon pwiich we itan Kenyatte a apasa: “Use ekieki pwe ua tongeni pioneer. Use fen silei ifa ussun upwe ammonlata met upwe apasa akkom lon ai afalafal are ifa ussun upwe aweweochu ekkewe wokisin lon Paipel.” Iwe, ekkewe elter ra awiisa emon pioneer mi asimau an epwe mwin le afalafal ren Kenyatte. “Ua pwapwaiti am afalafal fengen ren me ina popun ua fen mochen pioneer.” Neman ren an emon apochokkuloketa me aiti ngonuk, kopwe pwal mochen pioneer.

18. Ekkewe misineri repwe kuna met sokkun feioch?

¹⁸ Eli om pioneer epwe suuk ngonuk pwal ekkoch wiis mi auchea. Ren chok awewe, ekkoch chon pupulu mi tongeni wiliiti misineri lon pwal eu fonu. Ekkewe misineri repwe eorenalo eu minefoon fonu, eli eu minefoon fos, minefoon eorenien aramas, me minefoon mongo. Nge weiriesin ar fori ekkena mettoch a kukkun lupwen sia alolloor ngeni ekkewe feioch ra pwapwaiti. Mildred emon misineri lon Mexico ren chommong ier, a apasa: “Esap fan eu ua fen niamam ren ai wiliiti misineri. Ina eu  mettoch ua fen mochen fori seni le kukkuni.” Ikkefa ekkewe feioch a fen pwapwaiti? “Lon fonuei loom, a weires le kuna emon sipwe kaeo ngeni. Ikei lon Mexico, fan ekkoch a fen wor fomon chon kaeo ra poputa le afalafal lon eu chok fansoun!”

19, 20. Ifa ussun angang lon Bethel, international service, me ewe Ministerial Training School ra fen efeiochu chommong?

¹⁹ A pwal chommong ekkewe feioch a tori aramas lon Bethel, iten ekkewe branch ofes an Chon Pwarata Jiowa. Iei met Sven, emon pwiich we mi angang lon ewe Bethel lon Tois, a apasa ussun an angang: “Ua meefi pwe ua foffori och angang mi auchea, me aucheaan a tongeni nomofoch. Ua tongeni aea ai kewe tufich lon ewe fonufan. Nge ai fori ena a ussun chok ai walong nei moni lon eu epwele bankrupt.” Ren enletin, an emon angang nge esor peioffun a wewe ngeni an fangeta sokkopatten mettoch a saani nge Sven a apasa: “Sarin angang lon eu ran, ka meefi pwe mettoch meinisin ka fori a fen ffor fan iten Jiowa. Me ena sile a ngenikich pwapwa wachemuk lon letipach.”

²⁰ Ekkoch pwiich kewe ra fen pwapwaiti ekkewe feioch seni ar aueta minefoon branch ofes lon ekkewe ekkoch fonu. Eu pupulu a fen angang lon walu fonu ra makkei: “Pwiich kewe lon ei fonu ra fokkun amwarar. Aupwe pwositiir lupwen aupwe feilo​—iei ewe awaluen fansoun a fen weires letipach. Mwa met ren amwararen ekkewe mettoch am mi fen fori, rongorong, me kuna!” A pwal wor ewe Ministerial Training School. Pwiich kewe mwan mi fich me lipich ra tongeni fiti. Emon a sochungio seni ena sukul a makkei: “A weires ai kuna ekkewe kapas mi tongeni pwarata ai kilisou ren ei sukul mi amwarar. Epwe wor pwal eu mwicheich a awora ei sokkun alillis?”

21. Chon Kraist meinisin repwe achocho le fori met lon ar angang ngeni Kot?

²¹ Ewer, mei wor chommong asam ngeni angang mi lamot ra sussuuk. Pwungun pwe lape-ngenikich sise tongeni angang lon Bethel are lon eu fonu mi towau. Jises a apasa pwe epwe sokkolo ukuukun ‘uwan’ ekkewe chon Kraist repwe uwani pokiten epwe sokkolo nonnomur. (Mattu 13:23) Kich chon Kraist sipwe achocho le alamota ach kewe tufich me nonnomun manauach pwe sipwe tongeni alapalo ach angang ngeni Jiowa me ren ekkena tufich me nonnomuch. Lupwen sia fori ena, sia mwareiti Jiowa, me sia silei pwe Jiowa a pwapwa. Ekieki mwo Ethel, emon pwiich we mi chinnap a nonnom lon eu imwen tumunu chinnap. A kan afalafal ngeni ekkewe ekkoch aramas lon leenian we me a pwal afalafal won phone. Mi aukuk met a tongeni fori, nge a fori an angang ren letip mi unus.​—Mattu 22:37.

22. (a) Ikkefa pwal ekkoch mettoch sia tongeni fori ren ach sipwe alinga Kot? (b) Menni fansoun mi amwarar a wikkitikich?

²² Sipwe chechchemeni pwe ach afalafal eu chok me lein ekkewe mettoch mi alinga Jiowa sia tongeni fori. Ren fofforuch mi murinno me ufach me foutach mi murinno lon ach angang, sukul, are lon imwach, sia apwapwai letipen Jiowa. (An Salomon Fos 27:11) An Salomon Fos 28:20 a eani ei pwon: “Eman aramas mi allukuluk epwe wor an feioch mi somwola.” Ina popun sipwe “amoratiu chommong” lon ach angang ngeni Kot, ren ach silei pwe sipwe kini chommong feioch. (2 Korint 9:6) Ika sia fori ena sipwe tongeni manau lon ewe fansoun mi amwarar lupwen “mettoch meinisin mi ngasangas” repwe alinga Jiowa ren ewe ling a fokkun fich ngeni!​—Kol Fel 150:6.

[Pwóróus fan]

En Mi Chechchemeni?

• Ifa ussun noun Kot kewe aramas ra angang ngeni Jiowa “le ran me lepwin”?

• Menni osukosuk a tori ewe einangen Kat, me met ekkewe chon Kraist ikenai ra tongeni kaeo seni?

• Ifa ussun ach angangen afalafal a wewe ngeni eu tumun lupwen Setan a maunei kich?

• Ifa ‘ewe asam’ ekkoch ra pwerelong, me ikkefa ekkewe feioch ra fen pwapwaiti?

[Ekkewe Kapas Eis fan Iten ewe Lesen]

[Sasing lon pekin taropwe 23]

Ussun chok ekkewe chon Kat ra maunei chokkewe mi mauneer, ekkewe chon Kraist repwe maunei Setan

[Sasing lon pekin taropwe 25]

Sia pwapwaiti chiechioch lon ach angangen afalafal

[Sasing lon pekin taropwe 26]

Ewe angangen pioneer a tongeni suuki eu asam ngeni pwal ekkoch wiis mi auchea, kapachelong:

1. International service

2. Angang lon Bethel

3. Angangen Misineri