Recipe Fan Iten Manau Mi Ttam Me Pwapwa

“ARAMAS meinisin mi mochen manau nge; esor emon a mochen chinnapelo.” Ina alon eu mwitun. Chommong aramas mi akkarap ngeni retire ra pwapwaiti ar repwe fori met ra mochen me kisikisiloon wiiser. Nge ra niuokkus pwe resap chuen lamot ngeni aramas me ar ekiek ussun esap chuen wor lamoten manauer. Ra pwal niueiti ar repwe alaemon chok, letipechou, me ar apwangapwangelo.

Ifa ewe kki ngeni manau mi pwapwa? Chiechi mi murinno me famili mi tong ra alisata pwapwa ngeni aramas ese lifilifil ika ir kukkun are chinnap. Sap ita met aramas ra fori fan iten emon chinnap nge ita ina chok ewe mettoch mi lamot nge, met ewe chinnap a tongeni fori fan iten aramas ina met mi lamot seni meinisin.

Eu kaeo mi langattam lon manauen 423 pean pupulu a pwarata pwe “kalisitaan manauen ekkoch aramas epwe tongeni atammalo manauach.” Stephanie Brown, ewe a fori ewe kaeo, a apasa: “Am kaeo a pwarata pwe ewe mettoch a efeiochukich esap met sia angei seni ach chiechi ngeni aramas nge minne sia fangelo.” Ach fangelo a kapachelong ach alisi aramas lon angang lon imwer, tumunun ekkewe semirit, kamoon pisek, ach uweiir lon waach, are ach auseling ngeni emon a mochen uwawu meefian.

Orun 2,000 ier loom, Jises Kraist a apasa: “Feiochun liffang mi lap seni feiochun angei.” (Fofor 20:35) Manauattam mi pwapwa ese alongolong won watteen nouch moni lon ewe bank are won ekkewe minen alillis pwe sisap chinnapelo me ekkewe mettoch sia ani. Nge, a alongolong won ach akkangang me ach fangolo ach fansoun me pochokkul ren ach alisi aramas.

Iwe nge, ekkena mettoch chok rese tongeni selanikich seni ach chinnapelo, semmwenilo, me malo. Muun Kot chok epwe tongeni amoielo ekkena mettoch. Fan nemenien ena Muu, semmwen esap chuen nom me pwal mwo nge “malo esap pwal chuen wor.” (Pwarata 21:3, 4; Aisea 33:24) Pwungun pwe aramas mi alleasochis repwe manau tori feilfeilo lon pwapwa lon paratis won fonufan. (Luk 23:43) Chon Pwarata Jiowa ra pwapwa pwe repwe tongeni ngeni aramas ei recipe seni ewe Paipel fan iten manau mi ttam me pwapwa.