Tuttumunun Ekkewe Chinnap—Wiisen Chon Kraist

“Ngang ami Kot, upwe tumwunukemi tori fansoun ami chinlap, lupwen meten mokuremi a pwechela.”​—AISEA 46:4.

1, 2. Ifa sokkofesennin ewe tumun sia angei seni Semach lon lang me ewe sia angei seni semach me inach?

 EKKEWE sam me in mi tong ra tumunu nour kewe atun ir monukol, kukkun semirit, me sarafo. Pwal mwo nge lupwen ra watte me ra nounou, semer kewe me iner ra chuen tumunuur me alisiir ren tong.

² Inaamwo ika mi aukuuk met aramas ra tongeni fori fan asengesin nour kewe nge, Semach lon lang a tongeni awora tumun me alillis fan tong ngeni noun kewe chon angang fansoun meinisin. Lupwen Jiowa a kapas ngeni noun kewe aramas mi kefilita loom, a apasa: “Ngang ami Kot, upwe tumwunukemi tori fansoun ami chinlap, lupwen meten mokuremi a pwechela.” (Aisea 46:4) A ifa me eu minen alukuluk ekkena kapas ngeni chon Kraist mi chinnap! Jiowa ese likitalo chokkewe mi amwochu ar tuppwol ngeni i. Nge, a pwon pwe epwe tumunuur, alisiir, me emmweniir lon unusen manauer, pwal mwo nge lupwen ra chinnapelo.​—Kol Fel 48:14.

3. Met sipwe kaeo lon ei lesen?

³ Ifa ussun sipwe tongeni appiru an Jiowa tong fan iten ekkewe chinnap? (Efisus 5:1, 2) Sipwe kaeo ifa ussun ekkewe nau, ekkewe sou emmwen lon ewe mwichefel, me emon me emon chon Kraist ra tongeni tumunu osupwangen ekkewe mi chinnap lon ach mwichen pwipwi.

Wiisen Ekkewe Nau

4. Ifa wiisen ekkewe nau chon Kraist ngeni semer me iner kewe?

⁴ “Kopwe asamolu semom kewe me inom.” (Efisus 6:2; Ekistos 20:12) Ren ekkeei kapas mi mecheres nge mi alollol weweer seni ewe Tesin Ipru, ewe aposel Paul a achema ngeni ekkewe nau ussun wiiser kewe ngeni semer me iner. Nge ifa ussun ekkeei kapas ra weneiti tuttumunuun ekkewe mi chinnap? Eu poraus seni mwen ewe fansoun Kraist mi achungu letipach epwe alisikich le polueni ei kapas eis.

5. (a) Met a pwarata pwe Josef ese monukalo wiisan we ngeni seman? (b) Met weween ach sipwe asamolu semach me inach, me ifa ussun Josef a isetiu eu leenien appiru mi murinno ussun ei mettoch?

⁵ Ren lap seni 20 ier, Josef ese kuna seman mi chinnap, ewe semelap Jekop. Iwe nge, a ffat pwe ese pout seni Josef an tongei Jekop. Ren enletin, lupwen Josef a pwar ngeni pwiin kewe pwe i Josef, a eisiniir: ‘Ifa ussun semei, a chuen manau?’ (Keneses 43:7, 27; 45:3) Lon ena fansoun, a wor lengita lon ewe fonuen Kenan. Iwe, Josef a tiinalo ei poraus ngeni seman: “Kopwe feito rei, nge kosap mang. Kopwe nonom lon ewe fanu Kosen pwe kopwe arap ngeniei . . . Upwe tongeni tumwunuk.” (Keneses 45:9-11; 47:12) Ewer, ach asamolu semach me inach kewe mi chinnap a kapachelong ach tumunuur me ach awora minne mi lamot ngeniir lon pekin aion lupwen rese chuen tongeni pwisin tumunuur. (1 Samuel 22:1-4; Jon 19:25-27) Josef a pwapwa le eani ei wiis.

6 Ifa ussun Josef a pwarata tong enlet ngeni seman we, me ifa ussun sipwe tongeni appiru an foffor?

⁶ Ren alillis seni Jiowa, Josef a fen wiliiti emon mi wouoch me foummong seni meinisin lon Isip. (Keneses 41:40) Nge ese eani ewe ekiek pwe i a kon foummong are a kon osukosuk le asamolu seman we mi 130-ierin. Lupwen a silei pwe Jekop (are Israel) a waroto, “Josef  a amolata wan woken pwe epwe feila churi Israel saman we lon Kosen. Iwe, lupwen a churi, a romi saman o kechu won uan fansoun langatam.” (Keneses 46:28, 29) Met Josef a fori esap chok eu oereni fan iten pwarataan sufol. Josef a fokkun tongei seman we mi chinnap me ese sau le pwarata an tong. Ika mei wor semach are inach mi chinnap, sia pwal appiru Josef lupwen sia pwarata ach tongeer?

7. Me popun Jekop a mochen an epwe peias lon Kenan?

⁷ Jekop a amwochu an tongei Jiowa tori le muchuloon manauan. (Ipru 11:21) Pokiten an Jekop luku won an Kot kewe pwon, a tingor pwe epwe peias lon Kenan. Josef a asamolu seman we ren an apwonueta an tingor, inaamwo ika a watte ewe liwinin me a weires an epwe apwonueta.​—Keneses 47:29-31; 50:7-14.

8. Ifa ewe aewin popun sia mochen tumunu semach me inach kewe mi chinnap?

⁸ Met a amwokutu Josef le tumunu seman? Esap chok tong me kilisou ngeni ewe emon a ngeni i manau me tumun nge, ese mwaal Josef a pwal fokkun mochen apwapwai Jiowa. Ita epwe pwal ina ussun ach mochen. Paul a makkei: “Ika mi chuen wor ren emon leir noun kewe, repwe kaeo lom usun foforun Soulang ngeni lon pwisin ar famili, pwe repwe liwini och ar alisi ngeni semer kewe me iner. Pun ei sokkun fofor mi murinno fan mesen Kot.” (1 Timoti 5:4) Pwungun pwe tong fan iten Jiowa me ach niuokkusiiti i epwe amwokutukich le tumunu semach me inach kewe mi chinnap, ese lifilifil ika met sokkun osukosuk epwe torikich lupwen sia fori. *

Ifa Ussun Ekkewe Elter Ra Pwarata Ar Tong

9. Io a seikita me ren Jiowa pwe repwe tumunu ewe mwichefel, kapachelong ekkewe chon Kraist mi chinnap?

⁹ Le muchuloon manauan mi langattam, Jekop a eita ngeni Jiowa ewe “Kot mi emweniei lon unusen ranin manauei tori ikenai.” (Keneses 48:15) Ikenai, Jiowa a mammasa noun kewe chon angang won fonufan me ren ekkewe chon Kraist sou emmwen, are ekkewe elter, fan emmwenien Noun we, Jises Kraist, “ewe Samolun chon masen siip.” (1 Piter 5:2-4) Ifa ussun ekkewe sou emmwen repwe tongeni tumunu ekkewe mi chinnap mi choni ewe mwichefel?

10. Ifa ewe kokkot fan iten kaworen alillis lon pekin aion ngeni ekkewe chon Kraist mi chinnap?

¹⁰ Ekiselo chok mwirin poputaan ewe mwichefelin chon Kraist, ekkewe aposel ra filata “fumon mwan mi itoch, mi ur ren ewe Ngun o pwal ren tipatchem” pwe repwe tumunu “ar inetfeseni mongo iteiten ran” lein ekkewe fefin chon Kraist mi ma puluwer. (Fofor 6:1-6) Mwirin, Paul a ereni ewe sou emmwen Timoti pwe epwe lisinatiu iten ekkewe fefin mi ma puluwer mi achocho me fich ngeni ar repwe angei ewe alillis lon pekin aion. (1 Timoti 5:3, 9, 10) Pwal ussun chok ikenai, ekkewe sou emmwen lon ekkewe mwichefel  ra tipemecheres le akkota kaworen alillis fan iten ekkewe chon Kraist mi chinnap ika a lamot. Iwe nge, mei pwal wor ekkoch mettoch mi kapachelong lon tuttumunun ekkewe chinnap mi tuppwol.

11. Met Jises a apasa ussun ewe fefin mi woungau a fen ma puluwan mi awora ewe kukkun asor?

¹¹ Le muchuloon an Jises angang won fonufan, a mottiu lon ewe imwen fel me a “nengeni ewe pwin aramas usun ar isenalong mi chommong lon” ekkewe pworun asor. Ewe Paipel a apasa pwe a kuna lupwen “emon fefin mi woungau mi ma puluan a pwal feito isenalong ruefou moni kisikis, a wewe ngeni senis eu.” Jises a korato noun kewe chon kaeo me a ereniir: “Enlet, upwe apasa ngenikemi, pwe enan fefin mi woungau mi ma puluan a fen lap minne a isenalong seni ir meinisin ekkewe mi isenalong lon ewe leenien asor. Pun ir meinisin ra isenalong seni ar pisekisek, nge neminnan, seni an woungau, a isenalong mettoch meinisin mi wor ren, minne epwe manau ren.” (Mark 12:41-44) Mi kukkun liwinin ewe asor ewe fefin mi ma puluwan a isenalong, nge Jises a silei ukuukun watteen an Seman we lon lang aucheaani ena esin pwarataan tong mi feito seni letip. Ese lifilifil ierin ewe fefin mi ma puluwan nge, Jises ese tunalo met a fori.

12. Ifa ussun ekkewe elter repwe tongeni pwarata kilisou fan iten met ekkewe chon Kraist mi chinnap ra awora?

¹² Ussun chok Jises, ekkewe chon Kraist sou emmwen rese tunalo met ekkewe mi chinnap ra fori fan iten kalisitaan fel mi enlet. Mei wor popun ekkewe elter ra apunga ekkewe mi chinnap ren ar fiti ewe angangen afalafal, ren ar uwawu meefier lon ekkewe mwich, ren ar etipetip mi murinno lon ewe mwichefel, me ren ar likiitu. Eu kapasen apochokkul seni letip epwe tongeni alisi ekkewe mi chinnap pwe epwe “wor popun ar repwe pwapwa” lon ar angang ngeni Kot, iwe resap lichipung le alolloi met ra fori ngeni met ekkewe ekkoch chon Kraist ra fori are ren met ra fen fori me loom.​—Kalesia 6:4, NW.

13. Ifa ussun ekkewe elter repwe tongeni kaeo seni tipatchemen me kunaen manauen ekkewe mi chinnap?

 ¹³ Ekkewe elter ra tongeni etiwa ewe alillis mi auchea seni ekkewe chon Kraist mi chinnap ren ar kaeo seni ar sile me tufich. Ika mei wor pwoomw are interview, ekkewe chinnap mi achocho repwe tongeni eani ekkena wiis. Emon elter a apasa: “Chon ewe mwichefel ra fokkun auseling lupwen ua interviewini emon pwiich mi chinnap mi fen foleni nour kewe lon ewe enlet.” Ekkewe elter lon pwal eu mwichefel ra apasa pwe emon pioneer sister 71 ierin, a sopwoch le alisi ekkewe chon afalafal ar repwe feffeilo afalafal iteiten maram. A pwal peseer le “eorenalo” le akkalleaani ewe Paipel me ewe lesenin ran me ekkekieki met ra fen alleaani.

14. Ifa ussun eu mwichen elter a pwarata ar aucheaani emon chiener mi chinnap?

¹⁴ Ekkewe elter ra pwal aucheaani angangen chiener kewe elter mi chinnap. José, a 70 som ierin me a fen eani ewe wiis elter ren chommong ier. Kanoto chok a reirei. A ekiekin ukutiu seni wiisan presiding overseer lupwen a ekieki ussun ewe fansoun mi ttam mwen epwe pochokkulsefal. José a apasa: “Ua ruko ren meefien chienei kewe elter. Rese tipeeu ngeni met ua mochen fori nge, ra eisiniei met sokkun alillis ua osupwang ren pwe upwe tongeni chuen apwonueta wiisei kewe.” Ren alillis seni emon elter mi kukkun ierin seni, José a tongeni sopweilo le eani wiisan presiding overseer ren pwapwa, me ina eu feioch ngeni ewe mwichefel. Chienan elter a apasa: “Pwiich kewe ra fokkun aucheaani ewe angang José a fori ussun chok emon elter. Ra tongei me sufoliiti i pokiten an sile me foffor me fan iten an leenien appiru lon pekin ngun. A amurinnoolo am mwichefel.”

Tumunufengennikich

15. Met popun a lamot pwe ekkewe chon Kraist meinisin repwe ekieki ussun pochokkulen ekkewe mi chinnap lon ar mwichefel?

¹⁵ Esap chok ekkewe nau mei wor semer me iner mi chinnap me ekkewe elter repwe ekieki ussun ekkewe mi chinnap. Paul a alollofengenni ewe mwichefelin chon Kraist me inisin aramas, a apasa: “Kot a apachafengenni ewe inis: a fakkun aucheani ekkewe kifetin mi sap auchea, pwe aimufesen ete fisita lon ewe inis, nge ekkewe kifetin epwe tumunufengenni eu me eu lefiler.” (1 Korint 12:24, 25) A lamot pwe emon me emon epwe ekieki ussun pochokkulen chienan kewe lon luku, kapachelong ekkewe mi chinnap pwe ewe mwichefelin chon Kraist epwe mwokutukutoch.​—Kalesia 6:2.

16. Ifa ussun sipwe tongeni pwarata ach tongei ekkewe mi chinnap lupwen sia fiti ekkewe mwich?

¹⁶ Ach kewe mwich ra atufichikich le pwarata ach tong fan iten ekkewe mi chinnap. (Filipai 2:4; Ipru 10:24, 25) Sia fos ngeni ekkewe mi chinnap lon ekkena fansoun? Inaamwo ika mi och ach sipwe kapas eis ika ir mi pochokkul nge, sipwe tongeni ‘apochokkuleer ren och liffangen ngun,’ eli ren ach aporausa eu porausen afalafal are eu poraus seni Paipel? Pokiten mi aukuuk ia ekkewe mi chinnap ra tongeni feilo ie, epwe och ika sipwe chuuriir nge sisap wikkiti ar repwe chuurikich. Ika ewe chinnap a ekis selingepung, a lamot pwe sipwe ammangalo me affataochu ach fos. Ika sipwe wesewesen “aururufengenni letipach,” a lamot ach sipwe auselingaochu met ewe chinnap a apasa.​—Rom 1:11, 12.

17. Ifa ussun sipwe tongeni pwarata ach tongei ekkewe chon Kraist mi chinnap lupwen rese tongeni feilo seni imwer?

¹⁷ Nge ifa ussun ika mei wor ekkoch mi chinnap rese tongeni fiti ekkewe mwich? Jemes 1:27 a apasa pwe wiisach ach sipwe “aamwa ekkewe semirit mi masen, o pwal ekkewe fefin mi malo puluer, lon ar fansoun riaffou.” Ewe kapas “aamwa” lon fosun Krik a pwal wewe ngeni “ach sipwe chuuri.” (Fofor 15:36) Mwa met ren pwapwaan ekkewe mi chinnap lupwen sia chuuriir! Lupwen Paul, “emon chinnap” a kalapus lon Rom  orun 65 C.E., a alaemon chok. A fokkun mochen kuna chienan chon angang Timoti me a apasa: “Kopwe achocho om kopwe muttirito rei.” (Filemon 9; 2 Timoti 1:3, 4; 4:9) Inaamwo ika ekkewe mi chinnap rese wesewesen nonnom lon kalapus nge, ekkoch leir rese tongeni feilo ekis pokiten ar semmwen. A ussun ita ra apasa, ‘Kose mochen achocho le chuuriei.’ Sia apwonueta ar tingor?

18. Ach chuuri ekkewe mi chinnap epwe tongeni uwani met sokkun feioch?

¹⁸ Kesap alamotongaua aucheaan ach chuuri pwiich kewe mi chinnap. Lupwen ewe chon Kraist itan Onesiforos a nonnom Rom, a achocho le kutta Paul, me lupwen a kuna a ‘apochokkulata i.’ (2 Timoti 1:16, 17) Emon sister mi chinnap a apasa: “Ua fokkun saani am chufengen me ekkewe kukkun. Ewe mettoch ua saani seni meinisin, ar ammeef ngeniei pwe ngang chon ar famili. A fokkun apwapwaiei.” Pwal emon mi chinnap a apasa: “Ua fokkun pwapwa lupwen ua angei echo taropwe seni emon, ika emon a koriei won phone ren fitu minich chok, are ekis chuuriei. A fokkun asosoei.”

Jiowa A Liwini Chokkewe Mi Pwarata Tong

19. Ach tumunu ekkewe mi chinnap epwe uwani met sokkun feioch?

¹⁹ Ach tumunu ekkewe mi chinnap a uwani chommong feioch. Ach chiechi me ekkewe mi chinnap me ach kaeo seni ar sile me kunaen manauer ina eu feioch mi sokkolo aucheaan. Ekkewe chon tumunu chinnap ra kuna ewe pwapwa a feito seni ar liffangolo, me pwal seni ar menemenoch me kinamwe pokiten ar apwonueta wiiser me ren ewe Paipel. (Fofor 20:35) Pwal och, chokkewe mi tumunu ekkewe mi chinnap resap niuokkus pwe esap wor chon tumunuur lupwen ra chinnapelo. An Kot we Kapas a alukulukukich: “Eman aramas mi kichioch epwe pisekisekila, nge eman mi alisi aramas, aramas repwe pwal alisi.”​—An Salomon Fos 11:25.

20, 21. Ifa ekiekin Jiowa ussun chokkewe mi tumunu ekkewe mi chinnap, me met sipwe uppos le fori?

²⁰ Jiowa epwe liwini ngeni ekkewe nau mi niuokkusiiti Kot, ekkewe sou emmwen, me pwal ekkewe chon Kraist mi tong mi kisaseu le tuttumunu chiener kewe chon luku mi chinnap. Ar foffor a tipeeu ngeni ei mwitun: “Eman aramas mi kichioch ngeni chon woungau a fangala ngeni ewe Samol mi Lapalap, nge i epwe liwini ngeni liwinin an fofor.” (An Salomon Fos 19:17) Ika tong a amwokutukich le pwarata tong ngeni ekkewe mi tekisoson me mi woungau, a ussun ita sia fori ngeni Kot me epwe liwinikich ren chommong feioch. Epwe pwal liwinikich fan iten ach tumunuochu chienach kewe lon luku mi chinnap nge, chommong leir ‘mi woungau lon fonufan nge pisekisek lon luku.’​—Jemes 2:5.

²¹ A ifa me watteen liwinich seni Kot! A kapachelong manau esemuch. Fan iten lape-ngeni noun Jiowa kewe chon angang, a wewe ngeni manau esemuch lon paratis won fonufan, ia ekkewe liwinin tipis repwe morolo ie me ekkewe mi chinnap mi tuppwol repwe pochokkulelosefal. (Pwarata 21:3-5) Atun ach witiwiti ena fansoun, amwo sipwe sopweilo le apwonueta wiisach le tumunu ekkewe mi chinnap.

[Pwóróus fan]

Ikkefa Poluan Me Reom?

• Ifa ussun ekkewe nau repwe tongeni asamolu semer me iner kewe mi chinnap?

• Ifa ussun ekkewe elter repwe pwarata ar aucheaani ekkewe mi chinnap lon ewe mwichefel

• Met emon me emon chon Kraist epwe tongeni fori pwe repwe pwarata ar tongei ekkewe mi chinnap?

• Ikkefa ekkewe feioch ra feito seni tumunuun ekkewe chon Kraist mi chinnap?

[Ekkewe Kapas Eis fan Iten ewe Lesen]

[Sasing lon pekin taropwe 13]

Sia pwappwarata ach tongei semach me inach kewe mi chinnap?

[Sasing lon pekin taropwe 14]

Oukich meinisin lon ewe mwichefel mi tongeni pwarata ach tongei chienach kewe chon luku mi chinnap