Eu Wiis Mi Lapalap, Wiisach Ach Sipwe Emiriti Nouch Kewe Lon Ei Fansoun

LON EU kuniolun, emon mwan a ekiekin asipalo an kafie, iwe mwirin, epwe feilo ngeni imwan. Nge ruuemon fefin fan emon kukkun ra tolong, iwe, ra era pwe repwe kamo och aner. Pokiten ewe mwan a fokkun pekkus, a mochen ereniir pwe a fen kesip ewe kafie, nge a asopwisekin fori aner. Lupwen ekkewe fefin ra mongo me kapasfengen, ewe kukkun a ssafetal lon ewe kafie, a atoropasa me atatakkisi fan pechen anan okasi. Inelapan ese apwungu, nge a chok emelimel. Lupwen ra towu seni ewe kafie, ena mwan mi fokkun molulu a weiresin limeti ewe piipi.

Eli ussun en mi fen silei, ena poraus mi wesewesen fis a affata pwe lon chommong famili, ekkewe sam me in rese kan apwonueta wiiser, wiisen ar repwe emiriti nour kewe. A sokkopat ekkewe popun ar ra ina ussun. Ekkoch sam me in ra mut ngeni nour kewe ar repwe pwisin nemeni fofforur pokiten ar ekieki pwe ese pwung an epwe wor och mettoch epwe eppeti mammaaritaan nour kewe. Are, pokiten a kon watte osukosuken ekkewe sam me in, eli resap awora fansoun fan iten ar repwe tumunufichi me emiriti nour kewe. Ekkoch sam me in ra meefi pwe a akkaewin lamot pwe nour kewe repwe fiffiti sukul, ina minne, ra kan mut ngeni nour kewe ar repwe foffori arapakan mettoch meinisin ra mochen ika epwe murinno nour repotun sukul, iwe mwirin, repwe fiti eu sukul tekia mi itefoulo.

Iwe nge, ekkoch ra apasa pwe mi lamot an epwe siwil ekiekin sam me in me aramas meinisin ese lifilifil ussun minne ra eani minen emmwen lon manauer. Ra apasa pwe ekkewe nau ra kan fori sokkun fofforun ipweri alluk meinisin me iteiten ran meinisin a lapalapalo kaweten aramas lon sukul. Ina minne, emon principal lon eu sukul lon Seoul, Korea, a affata pwe ekkewe nau repwe akkom kaeo ifa ussun ar repwe amurinnolo lapalaper. Iei alon: “Epwe akkom sorosorochulo aramas, iwe mwirin, epwe poputa ar kaeo lon sukul.”

Chommong sam me in mi mochen pwe nour kewe repwe fiti sukul tekia ra kan tunalo kapasen ourour. Ika en emon sam are in, ka mochen pwe epwe fet sorosorun noum we? Ka mochen pwe epwe wenechar me limoch letipan me epwe achocho le apwonueta wiisan kewe lupwen epwe watteta? Ka mochen pwe epwe kirokiroch, tipemecheres, me tinikken le awora alillis ngeni aramas? Ika ina mochenum, kopwe mwo alleani ena eu poraus mi tapwoto mwirin ei.