‘Feilo Foralo Chon Kaeo’

“Nemenem meinisin lon lang o pwal won fonufan a fen ngeniei. Iei minne, oupwe feilo foralo chon kaeo.”​—MATEUS 28:18, 19, NW.

1, 2. (a) Ifa ewe wis Jises a awisa ngeni noun kewe chon kaeo? (b) Ikkefa ekkewe kapas eis ussun an Jises we alluk sipwe polueni?

 INA EU ranin leres lon Israel lon 33 C.E., iwe, Jises me noun kewe chon kaeo ra nonnomfengen won eu chuuk lon Kalili. Ekiselo chok, nour we Samol Jises mi fen manausefal epwele feita lang, nge akkom, a wor och poraus mi lamot epwe erenir. A wor eu wiis Jises epwe awiisa ngeniir. Ifa ena angang? Ifa ekiekin noun kewe chon kaeo ussun? Iwe, ifa ussun ena angang epwe weneitikich ikenai?

² Minne Jises a apasa a makketiu lon Mateus 28:18-20, a era: “Nemenem meinisin lon lang o pwal won fonufan a fen ngeniei. Iei minne, oupwe feilo foralo chon kaeo seni chon fonu meinisin, oupwe papataisir fan iten ewe Sam, me ewe Nau, me ewe Ngun mi Fel, oupwe afalafaler pwe repwe alleasochisi mettoch meinisin minne ua alluku ngenikemi. O nengeni, ngang upwe nonnom remi ran meinisin, tori le sopolon ei fansoun.” Jises a kapas ussun “nemenem meinisin,” “fonu meinisin,” “mettoch meinisin,” me “ran meinisin.” An kewe alluk ngeniir mi kku ekkena ruanu mettoch ra efisata ekkoch kapas eis mi lamot, “pwata”, “ia”, “met”, me “ineet”? Iwe, sipwe atittina eu me eu ekkena kapas eis. *

“Nemenem Meinisin A Fen Ngeniei”

3. Pwata sipwe alleasochisi ewe alluk pwe sipwe foralo chon kaeo?

³ Aeuin, pwata sipwe alleasochisi ewe alluk pwe sipwe foralo chon kaeo? Jises a apasa: “Nemenem meinisin lon lang o pwal won fonufan a fen ngeniei. Iei minne, oupwe feilo foralo chon kaeo.” Ekkewe kapas “iei minne” ra aiti ngenikich eu popun watte ach sipwe alleasochisi ei alluk. Popun, pun a nom ren Jises, atewe a atowu ewe alluk, “nemenem meinisin.” Ifa ukuukun watten an nemenem?

4. (a) Ifa ukuukun watten an Jises nemenem? (b) Ifa ussun ach weweiti ussun an Jises nemenem epwe anapanapa ach ekiek ussun ewe alluk pwe sipwe foralo chon kaeo?

⁴ A wor an Jises nemenem won an we mwichefel, me seni 1914, a wor an nemenem won an Kot we Muu mi koran poputa. (Kolose 1:13; Pwarata 11:15) Iwe, pokiten i ewe chonlang mi lapalap seni meinisin, a nemeni ekkewe fitepuku milion sounfiun chonlang. (1 Tesalonika 4:16; 1 Piter 3:22; Pwarata 19:14-16) Seman we a awiisa ngeni an epwe ataielo “ekkewe muu meinisin me nemenem meinisin me manaman” mi u ngeni ekkewe kapasen alongolongun alluk mi pwung. (1 Korint 15:24-26; Efisus 1:20-23) Ese aukuk an Jises we nemenem won chok ir kewe mi manau. Epwe pwal “sou kapwungun ekkewe mi manau me ekkewe mi malo” iwe, a pwal wor an manaman seni Kot pwe epwe amanauasefallita ekkewe mi fen mourelo lon malo. (Fofor 10:42; Jon 5:26-28) Enlet, sipwe fokkun alamota eu alluk mi katou seni ewe Emon mi sokkolo watten an nemenem. Ina minne, fan sufol, sipwe mochen alleasochisi an Kraist we alluk pwe sipwe ‘foralo chon kaeo.’

5. (a) Ifa ussun Piter a alleasochisi alon Jises? (b) Ifa ewe feioch Piter a kuna pokiten an alleasochisi an Jises we alluk?

⁵ Ekis chok fansoun mwirin an a poputa an we angangen afalafal, Jises a aiti ngeni noun kewe chon kaeo pwe ar esinna an nemenem me ar alleasochisi an kewe alluk epwe atoto ngenir feioch. Fan eu, a ereni Piter, emon chon attau: “Kopwe pwal ekinauu le alollol o oturatiu noumi keei cheu ren attau.” Piter a fokkun meefi pwe esor iik ikkewe ie, ina popun, a ereni Jises: “Masta, am aua resin achocho ngeni lepwinewe, nge am ause mo liap!” Iwe nge, fan tipetekison Piter a apasa:  “Nge, inaamo, upwele chok oturatiu ekkeei cheu pun ren om kapas.” Mwirin an Piter alleasochisi an Kraist we kapas, a liapeni “iik chommong.” Iwe, Piter a fokkun mairu, iwe, a “fotupukutiu unukkun pwosukun Jises, o a apasa, ‘Kopwele feilo seniei, Samol, pun ngang emon mwan mi tipis.’” Nge Jises a polueni: “Kete niuokus, seni iei kopwe liapeni aramas.” (Luk 5:1-10; Mateus 4:18) Met sipwe kaeo seni ei poraus?

6. (a) Ewe poraus ussun liapen ekkewe ik fan manamanen Jises a aiti ngenikich met ussun ewe sokkun alleasochis Jises epwe kutta seni aramas? (b) Ifa ussun sipwe tongeni appiru Jises?

⁶ Jises a awiisa ngeni Piter, Antru, me ekkewe ekkoch aposel ewe wiisen “liapeni aramas,” sap me mwen nge mwirin ar ra liapeni ekkewe chommong ik. (Mark 1:16, 17) A ffat pwe Jises ese kutta seniir ar repwe chok alleasochis nge esor popun. A awora ngeni ekkena mwan eu popun murinno ar resap tipemwaramwareiti, nge repwe alleasochisi i. Ussun chok ar alleasochisi an Jises we alluk pwe repwe oturatiu nour kewe cheu a atoto rer chommong ik, iwe, a pwal ina ussun ar alleasochisi an Jises we alluk pwe repwe ‘liapeni aramas” epwe atoto rer feioch watte. Fan unusen ar luku, ekkewe aposel ra fori ena angang. Ewe poraus a muchulo ren ekkeei kapas, a era: “Lupwen ra ineiti ewe fonu, ra chok likitalo mettoch meinisin, o ra tapwelo mwirin i.” (Luk 5:11) Ikenai, atun sipwe pesei pwal ekkoch aramas ar repwe fiti ewe angangen foralo chon kaeo, sipwe appiru Jises. Sisap kutta seni aramas ar repwe chok foffori minne sipwe ereniir, nge sipwe aweweochu ekkewe popun ar repwe alleasochisi an Kraist we alluk.

Ekkewe Popun me Ekkewe Minen Amwokut

7, 8. (a) Me ren Paipel, ikkefa ekkoch popun sipwe fiti ewe angangen afalafala ewe Muu me foralo chon kaeo? (b) Menni wokisin a akkaeuin amwokutuk le fiffiti ewe angangen afalafal? (Pwal nengeni ewe footnote.)

⁷ Pokiten sia esinna an Kraist we nemenem, sia fiffiti ewe angangen afalafala ewe Muu me foralo chon kaeo. Ikkefa pwal ekkoch popun auchea seni Paipel ach sipwe foffori ena angang sipwe aiti ngeni chokewe sia mochen amwokutu ar repwe pwal eani foffor-murinno? Ekieki mwo minne ekkoch Chon Pwarata mi tuppwol seni ekkoch fonu ra apasa, me nengeni ifa ussun ekkewe wokisin ra tipeeu ngeni minne ra apasa.

⁸ Roy a papatais lon 1951, iwe, a era: “Lupwen ua fangelo manauei ngeni Jiowa, ua pwonei pwe upwe angang ngeni fansoun meinisin. Ua mochen apwonueta ai we pwon.” (Kol Fel 50:14; Mateus 5:37) Heather a papatais lon 1962, iwe, a era: “Lupwen ua ekieki ussun mettoch meinisin minne Jiowa a fen fori fan asengesi, ua mochen aiti ngeni ai kilisou ren ai akkangang ngeni fan tuppwol.” (Kol Fel 9:1, 9-11; Kolose 3:15) Hannelore a papatais lon 1954, iwe, a apasa: “Iteiten fansoun sia fiti ewe angangen afalafal, ekkewe chonlang ra alisikich​—ina eu wis mi fokkun auchea!” (Fofor 10:30-33; Pwarata 14:6, 7) Honor, emon mi papatais lon 1969, a era: “Lupwen epwe war an Jiowa we ranin kapwung, use mochen an epwe wor emon lon sopwi an epwe tipi ngeni Jiowa  me noun kewe Chon Pwarata pwe ra tilikop me apasa, ‘Use mwo fen rongorong ewe kapasen ourour fan eu!’” (Isikiel 2:5; 3:17-19; Rom 10:16, 18) Claudio, emon a papatais lon 1974, a era: “Lupwen sia akkafalafal, sia nonnom ‘mwen mesen Kot’ me ‘ekketi Kraist.’ Mwa met! Atun sia foffori ewe angangen afalafal, sia pwapwaesini ach mwinfengen me Chienach kewe mi murinno seni meinisin.”​—2 Korint 2:17. *

9. (a) Met ewe poraus ussun an Piter me ekkewe ekkoch aposel we angangen attau a pwarata ussun ewe popun mi pwung ach sipwe alleasochisi Kraist? (b) Ifa ewe popun mi pwung a amwokutukich ach sipwe alleasochisi Kot me Kraist ikenai, iwe, pwata?

⁹ Ewe poraus mi amwarar ussun liapen ekkewe iik a pwal pwarata lamoten an epwe pwung ewe popun ach sipwe alleasochisi Kraist​—tong. Lupwen Piter a apasa, “Feilo seniei, pun ngang emon mwan mi tipis,” Jises ese feilo, iwe, ese pwal apwungu Piter pokiten an tipis. (Luk 5:8) Jises ese pwal esiita Piter ren an tingormau pwe epwe feilo seni. Nge, fan kirokiroch, Jises a polueni: “Kete niuokus.” Epwe mwaal an emon epwe alleasochisi Kraist pokiten an niuokkus. Iwe nge, Jises a ereni Piter pwe ir me chienan kewe repwe wiliti chon attauato aramas. Ikenai, sise pwal aea niuokkus are ena esin memeef, awewe chok ren mengiringir are sau, le echimwa aramas pwe repwe alleasochisi Kot. Ewe chok sokkun alleasochis mi popu seni tong ngeni Kot me Kraist epwe apwapwai letipen Jiowa.​—Mateus 22:37.

“Foralo Chon Kaeo Seni Chon Fonu Meinisin”

10. (a) Ifa ewe poraus mi titchik ussun an Jises we alluk a efisata weiresin ewe angang ngeni noun kewe chon kaeo? (b) Met ekkewe chon kaeo ra fori ussun an Jises we alluk?

¹⁰ Iei ewe oruuan kapas eis sipwe tongeni eis ussun an Kraist we alluk: ia ewe angangen foralo chon kaeo epwe fis ie? Jises a ereni noun kewe chon kaeo: “Foralo chon kaeo seni chon fonu meinisin.” Me mwen an Jises we angangen afalafal, chon Israel repwe etiwa chon ekis ika repwe etto ngeni Israel pwe repwe angang ngeni Jiowa. (1 Kings 8:41-43) Jises a akkaeuin pwisin afalafal ngeni ekkewe chon Jus lon pekin fituk, nge iei a ereni noun kewe chon kaeo pwe repwe feilo ngeni chon ekkewe muu meinisin. A enlet pwe ewe leenien attau, weween, ewe leenien afalafal noun kewe chon kaeo repwe afalafal lon, a aukuk ngeni eu “pat”​—wesewesen ekkewe chon Jus lon pekin fituk​—nge ekiselo chok, epwe kapachelong unusen ewe “matauen” aramas. Inaamwo ika ena siwil epwe wewe ngeni eu angang mi weires ngeni ekkewe chon kaeo, nge ra muttir alleasochisi an Jises we kapasen emmwen. Kis seni 30 ier mwirin an Jises we malo, ewe aposel Paul a tongeni makkei pwe ewe kapas allim a tori, sap chok ekkewe chon Jus, nge “ekis meinisin fan lang.”​—Kolose 1:23.

11. Ifa lapaloon ewe ‘leenien attau’ a fis seni le poputaan ewe 20th senturi?

¹¹ Lon ekkewe fansoun mi kukkuto, a pwal lapalapelo ewe leenien afalafal. Le poputaan ewe 20th senturi, ewe ‘leenien attau’ a wewe ngeni fitu chok fonuen fonufan. Nge, lon ena fansoun, noun Kraist kewe chon kaeo ra appiru ekkewe Chon Kraist lon ewe aeuin senturi me alapalo ewe leeni ikkewe repwe afalafal ie. (Rom 15:20) Ekiselo mwirin 1930, ra foralo chon kaeo lon orun ipuku fonu. Ikenai, ach we ‘leenien attau’ a lapelo ngeni 235 fonuen fonufan.​—Mark 13:10.

“Seni Sokkun Kapas Meinisin”

12. Ewe oesini lon Sekaraia 8:23 a mmenlapei menni sossot ngeni ekkewe chon apwonueta?

¹² Ewe angangen foralo chon kaeo seni chon ekkewe muu meinisin, ina eu angang mi fokkun weires, iwe, esap pokiten chok saisin ewe leenien afalafal, weween chommong fonu, nge pwal pokiten ekkewe sokkopaten fosun fonufan. Me ren ewe soufos Sekaraia, Jiowa a oesini: “Lon ekkena ran, engol mwan seni ekewe mwu mi sokola ar kapas repwe amwochu lepwulun ufen eman chon Juta o ura, ‘Kose mochen kopwe mwut ngenikem pwe aipwe etikemi, pun am aia rong pwe Kot a etikemi.’” (Sekaraia 8:23) Lon pwonuetaan ei oesini mi lapalap, ewe “eman chon Juta” a liosueta lusun ekkewe Chon Kraist mi kepit, nge  ekkewe “engol mwan” ra liosueta ewe “mwich mi lapalap.” * (Pwarata 7:9, 10; Kalesia 6:16) Chon ena mwichen noun Kraist kewe chon kaeo mi lapalap repwe nonnom lon chommong fonuen fonufan, me repwe eani chommong fosun fonufan, ussun chok Sekaraia a apasa. Iwe, ifa ussun, noun Kot kewe aramas lon ach ei fansoun ra popu seni chommong muu me ra eani sokkopaten kapas? Ewer.

13. (a) Met a fiffis ren porausen ekkewe fosun fonufan lein noun Kot kewe aramas ikenai? (b) Met ewe mwichen chon angang mi tuppwol a fori pokiten lapaloon lamoten an epwe wor mongo lon pekin ngun lon chommong fosun fonufan? (Nengeni ewe pwor “Ekkewe Puk fan iten Ekkewe mi Mesechun.”)

¹³ Lon 1950, orun ulumon me lein iteiten limmon Chon Pwarata Jiowa won unusen fonufan ra eani fosun English. Ren 1980, a siwil ngeni orun ruuemon me lein limmon, me ikenai, emon chok me lein iteiten limmon Chon Pwarata Jiowa a eani fosun English. Iwe, met ewe chon angang mi tuppwol me tipatchem a fori pokiten ena siwil pwe lap ngeni pwiich kewe meinisin ra eani eu fosun fonufan lukun fosun English? Iwe, ra alapalo ar awora mongoon ngun lon chommong sokkopaten fosun fonufan. (Mateus 24:45) Awewe chok, lon 1950 nouch kewe puk ra for lon 90 fosun fonufan, nge ikenai, a feita ngeni orun 400. Iwe, a sopwoch ei angangen alisi aramas seni chommong sokkopaten fos? Ewer! Orun 5,000 som aramas seni ‘sokkun kapas meinisin’ ra wiliti noun Kraist kewe chon kaeo iteiten wiik lon eu me eu ier! (Pwarata 7:9) Iwe, a sopweilo lapaloon chochoon. Lon ekkoch fonu, ekkewe “cheu” ra liapeni chommong!​—Luk 5:6; Jon 21:6.

Eu Angangen Afalafal mi Apwapwa—​Kopwe Tongeni Fiffiti?

14. Epwe ifa ussun sipwe tongeni alisi ekkewe mi nonnom lon ach we leenien afalafal nge ra eani pwal eu fosun fonufan? (Nengeni ewe pwor “Fos nge Pwomweni me ewe Angangen Foralo Chon Kaeo.”)

¹⁴ Lon chommong fonu, warotoon chommong chon ekis a efisi lamoten pukun chon ewe fonu ar repwe achocho le foralo chon kaeo seni  ‘sokkun kapas meinisin’. (Pwarata 14:6) Epwe ifa ussun sipwe tongeni alisiir mi eani eu fos mi sokko seni ach fos lon ach we leenien afalafal? (1 Timoti 2:4) Sipwe tongeni aea ekkewe pisekin attau mi fich, lon kapas awewe. Anounou ngeni ekkena aramas ekkewe puk mi mak lon fosun fonuer. Ika mei tufich, tingorei emon Chon Pwarata mi eani ena fosun fonuer an epwe wisen chuuri. (Fofor 22:2) A mecheres iei lap seni me lom ach sipwe fori ena mettoch pun chommong Chon Pwarata ra fen kaeo pwal eu fosun fonufan sap pukun ar fos fan iten ar repwe alisi ekkewe chon ekis ar repwe wiliti noun Kraist kewe chon kaeo. Ekkewe repot ra pwarata pwe ei sokkun alillis, ina eu minen apwapwa.

15, 16. (a) Ikkefa ekkoch poraus ra pwarata pwe mi apwapwa ach sipwe alisi ekkewe mi eani pwal eu kapasen fonufan? (b) Ikkefa ekkewe kapas eis sipwe afanni ussun ach tufichin awora alillis ngeni ekkewe chon ekis?

¹⁵ Nengeni ruu poraus seni ewe Netherlands, ikkewe ie ewe angangen afalafala ewe Muu a fis lon 34 fosun fonufan ie. Eu pean chon pupulu Chon Pwarata ra feilo foralo chon kaeo lein ekkewe chon ekis mi eani fosun Poland. Pokiten a chommong ekkewe chon auseling, a achungu letipen ewe mwan pwe epwe akukkunatiu an fansoun angang pwe epwe wor pwal eu ranin afalafal iteiten wiik an epwe kaeo Paipel ngeni ekkewe mi mochen. Ra apasa: “Ach we angangen afalafal a fokkun apwapwa ngenikem.” Ekkewe chon foralo chon kaeo ra akkaeuin pwapwa lupwen ekkewe mi rongorong ewe enlet seni Paipel lon pwisin fosun fonuer ra pwarata ar kilisou. Ren chok awewe, atun a fis eu mwich lon fosun Vietnam, emon chinnap mwan a uta me tingor pwe epwe fos. A suputiu chonun mesan kewe, iwe, a ereni ekkewe Chon Pwarata: “Kilisou chapur ngenikemi ren ami achocho le kaeo fosun fonuei mi fokkun weires. Ua fokkun kilisou le kaeo chommong mettoch mi amwarar seni Paipel iei, atun ua chinnap.”

¹⁶ Ina popun sise mairu pwe ekkewe mi fiti ekkewe mwichefel mi eani pwal eu fosun fonufan ra meefi pwe ra kuna feioch watte seni. Eu pean pupulu seni Britain ra apasa: “Ewe angangen afalafal me lein chon ekis mi eani pwal eu fosun fonufan a fokkun amwarar lon ekkewe 40 ier am aua fiffiti angangen ewe Muu.” En mi tongeni ekis siwili kokkotun manauom fan iten om kopwe fiti en esin angangen afalafal mi apwapwa? Ika en mi chuen fiti sukul, kopwe tongeni kaeo eu fosun fonufan fan iten om kopwap fiti ei sokkun angangen afalafal? Om kopwe fori ena epwe tongeni  suuki ngonuk efoch alen manau mi ur ren feioch. (An Salomon Fos 10:22) Pwata kese kapas ussun ngeni semom kkewe me inom?

Sotuni Sokkopaten Alen Afalafal

17. Met sipwe tongeni fori pwe sipwe alapalo ach tufichin chuchuuri aramas lon en me an mwichefel we leenien afalafal?

¹⁷ Pwungun pwe nonnomun manauach esap mut ngeni lap ngenikich meinisin ach sipwe oturatiu ach kewe “cheu” lon ekkewe leeni ikkewe ra eani pwal eu fosun fonufan ie. Iwe nge, eni sipwe tongeni achommongalo ekkewe aramas sipwe chuuri lon en me an mwichefel leenien afalafal. Ifa ussun? Sap ren ach siwili masouen ach afalafal, pwe ren ach sipwe sotuni sokkopaten alen afalafal. Lon chommong leeni, a chommongelo ekkewe aramas mi nonnom lon ekkewe imw tekia ikkewe ie ese mumuta ngeni aramas ese lifilifil ar repwe tolong ie. Pwal ekkoch aramas rese nonnom lon imwer kkewe atun sipwe afalafal imw-me-imw. Iwe, ina minne, a lamot ach sipwe oturatiu ach kewe “cheu” lon pwal ekkoch fansoun me lon pwal ekkoch leeni. Epwe ina ussun sipwe appiru Jises. A tinikken le kukkutta ifa ussun epwe tongeni fos ngeni aramas lon fansoun me leeni mi sokkopat.​—Mateus 9:9; Luk 19:1-10; Jon 4:6-15.

18. Pwata a sopwoch ewe angangen afalafal lon sokkopaten leeni? (Nengeni ewe pwor “Foralo Chon Kaeo lein Chon Sopai.”).

¹⁸ Lon ekkoch fonuen fonufan, a lamot ach sipwe afalafal ikkewe aramas repwe nonnom ie, fan iten ach sipwe foralo chon kaeo. Ekkewe chon foralo chon kaeo mi lipwakoch ra alapalo ar chuchuuri aramas lon chommong leeni mi sokkopat. Lukun ar afalafal imw-me-imw, iei ekkewe chon afalafal ra fori ar angang lon ekkewe kasoro, ofis, sitoa, leenien chitosa lukun ekkewe sitoa, leenien witiwiti pas, won al, lon leenien kunou, oroset, me pwal ekkoch leeni. Chommong Chon Pwarata mi koran papatais lon Hawaii ra akkom rongorong porausen Paipel lon ekkena sokkun leeni. Lupwen sipwe sotuni pwal ekkoch alen afalafal, epwe alisikich ach sipwe unusen apwonueta an Jises we alluk pwe sipwe foralo chon kaeo.​—1 Korint 9:22, 23.

19. Ikkefa pwal ekkoch kinikinin an Jises we alluk ngenikich sipwe kaeo lon ewe lesen mwirin ei?

¹⁹ A kapachelong lon an Jises awisa ngenikich ach sipwe foralo chon kaeo, sap chok pwata me ia sipwe fori ena angang pwe pwal met sipwe eani afalafal me tori ineet sipwe afalafal. Sipwe kaeo ussun ekkeei ruu kinikinin an Jises we alluk ngenikich lon ewe lesen mwirin ei.

[Ekkewe pwóróus fan]

En mi Chechemeni?

• Ikkefa ekkewe popun me met a amwokutukich ach sipwe fiti ewe angangen afalafala ewe Muu me foralo chon kaeo?

• Ifa ukuukun watten an noun Jiowa kewe chon angang ikenai apwonueta an Jises we alluk pwe repwe foralo chon kaeo seni muu meinisin?

• Ifa ussun sipwe tongeni fori ‘ach angangen attauato aramas’ nge lon sokkopaten lapalap, iwe, pwata sipwe fori ena?

[Ekkewe Kapas Eis fan Iten ewe Lesen]

[Pwoor lon pekin taropwe 22]

Ekkewe Puk fan iten Ekkewe mi Mesechun

Albert, emon Chon Kraist elter me chon afalafal full-time, a nonnom lon ewe United States. A mesechun. An nounou ekkewe puk mi mak lon Braille a alisi an epwe lipwakoch lon an we angangen afalafal me pwal lon wisan we, wisen service overseer. Ifa ussun a akkapwonueta wisan we lon ewe mwichefel?

Jemes, ewe presiding overseer, a apasa: “Ese fen wor pwal emon mi lipwakoch lon wisan we, wisen service overseer lap seni Albert lon ach ei mwichefel.” Albert, emon me lein orun 5,000 aramas mi mesechun lon ewe United States mi akkangei ekkewe puken awewei Paipel lon English me Spanish Braille ren fitu ier. Iwe, seni 1912 feffeilo, a katou seni ewe mwichen chon angang mi tuppwol lap seni ipuku puken alillis lon Braille. Iei, ren ar akkaea ekkewe minefoon mwesin, an ekkewe Chon Pwarata Jiowa leenien for puk ra peresei fitu million pekin taropwe lon Braille iteiten ier lon lap seni engol fosun fonufan me ra aineti ngeni lap seni 70 fonuen fonufan. En mi silei emon mi tongeni angei alillis seni ekkewe puken awewei Paipel fan iten ekkewe mi mesechun?

[Pwoor lon pekin taropwe 23]

Foralo Chon Kaeo lein Ekkewe Chon Sopai

Atun an a afalafala chon sopai lon ar kewe ofis ikkewe ra angang ie, emon Chon Pwarata lon Hawaii a chuuri emon meilapen eu kompani mi wisen ukkuwei pisek. Inaamwo ika a osukosuk, nge ewe mwan a tipeeu ngeni an epwe kaeo ewe Paipel ukukun 30 minich iteiten wiik lon an we ofis. Iteiten lesessorun Aulungat, a ereni noun kewe chon angang ar resap atai an fansoun kaeo ika emon epwe kori won telefon, iwe mwirin, a unusen aea ewe fansoun le kakkaeo. Pwal emon Chon Pwarata lon Hawaii a kaeo Paipel ngeni emon chon forisefalli suus fan eu iteiten wiik lon an we sitoa. Ewe kaeo a chok fis lon ewe sitoa. Ika a tolong emon chon kamo, ewe Chon Pwarata a ekis kinilo. Lupwen a lo ewe chon kamo, ra sopweilo ewe kaeo.

Ir me ruuemon, meilapen ewe kompani me pwal ewe chon sitoa, ra poputa le kaeo pokiten an ekkewe Chon Pwarata oturalong nour kewe “cheu” lon sokkopaten leeni. En mi tongeni ekieki ussun pwal ekkoch leeni lon an om we mwichefel kkewe leenien afalafal, ikkewe kopwe tongeni chuuri aramas ie, pun a weires ach sipwe chuurir lon imwer kewe?

[Pwoor lon pekin taropwe 24]

Fos nge Pwomweni me ewe Angangen Foralo Chon Kaeo

Fite ngerou Chon Pwarata won unusen fonufan, pachelong chommong sarafo mi tinikken, ra fen kaeo fos nge pwomweni pwe repwe tongeni alisi ekkewe aramas mi selingepung ar repwe wiliti noun Kraist kewe chon kaeo. Mwiriloon ena foffor, lon chok Brasil, 63 aramas mi selingepung ra papataiselo lon chok eu ier mi kanoto, me iei, 35 Chon Pwarata mi selingepung ra fiti ewe angangen afalafal full-time. Won unusen fonufan, mei wor lap seni 1,200 mwichefel me mwichen aramas mi kukkun mi eani ewe fos nge pwomweni.

[Sasing lon pekin taropwe 23]

Kopwe tongeni angang lein ekkewe mi eani pwal eu fosun fonufan?