Foffori Minne Mi Murinno Lon Fansoun Osupwang

EWE aposel Paul a peseikich: ”Sipwe fofor-murinno ngeni aramas meinisin, nge lapaloon ngeni chon ewe einangen luku.” (Kalesia 6:10) Noun Jiowa kewe Chon Pwarata won unusen fonufan ra tinikken le akkapwonueta ena kapasen alongolongun alluk lon manauer, ren ar foffori minne mi murinno ngeni aramas meinisin, akkaeuin, chiener kewe chon luku. Fan chommong, sipwe kukkuna ena mettoch lon fansoun osupwang. Iwe, sipwe pi ifa ussun an a fis ena lon ruu fonuen fonufan.

Fan Tisemper 2002, eu taifun mi fokkun watte a tori Guam ren asepwal mi lap seni 190 mail eu aua. A tatakkis chommong imw, iwe, ekkoch ra unusen talo. Chon ekkewe mwichefel lon ena fonu ra muttir akkota ekkoch mwichen chon alimelim pwe repwe alisi ekkewe familien Chon Pwarata Jiowa mi kuna osupwang watte lap seni ekkewe ekkoch. Ewe Guam branch ofis ra awora pisekin kau imw me chon angang pwe repwe forisefalli ekkewe imw mi ta, iwe, ewe Hawaii branch ofis a pwal awora alillis. Fitu chok wiik mwirin ewe taifun, fitemon chon taiku ra war seni Hawaii pwe repwe fiti ewe angangen ausefallieta imw, iwe, ren ar repwe alisi ekkewe brother seni Hawaii, ekkoch brother lon Guam ra aea ar kewe fansoun asoso seni ar kewe leenien angang. Ewe ngunun angangfengen mi apwapwa, ina eu minen pwarata ngeni meinisin.

 Lon ewe ierin afalafal a lo, chommong chon Mozambique ra kuna lengita pokiten nafangauen ut me uwangauen ewe fonu. Ewe branch ofisin Chon Pwarata Jiowa lon ena fonu a muttir mwokutukut ren an awora mongo ngeni ekkewe mi osupwang. Ewe angangen aineti mongo a fis lon ekkewe Kingdom Hall, fan ekkoch mwirin sarin ekkewe mwich. Emon sister mi wor noun nge esor puluan we a apasa: “Ua fokkun apilukulukungau atun ua feito fiti ewe mwich pun use silei met upwe amongouni nei kewe lupwen aipwe liwiniiti leimw.” Alillisin ekkewe brother mi tong a muttir apochokkula i. A apasa: “Me rei a ussun ita nge eu manausefal!”

Ekkewe Chon Pwarata ra pwal “fofor-murinno” lon pekin ngun ren ar uweifetalei an ewe Paipel poraus mi aururu aramas me awora apilukuluk allim. Ussun chok ewe mwan mi tipatchem lom lom, ra luku ei poraus, a era: “Nge eman mi auselingaei epwe manau fan kinamwe, esap ourek, esap pwal niueiti och feiengau.”​—An Salomon Fos 1:33.

[Sasing lon pekin taropwe 31]

1, 2. Ewe angangen aineti mongo ngeni ekkewe mi osupwang lon Mozambique

[Sasing lon pekin taropwe 31]

3, 4. Ewe taifun lon Guam a ataielo chommong imw

[Picture Credit]

Emon nau, peniefefin: Andrea Booher​/FEMA News Photo; Emon fefil, asan: AP Photo​/Pacific Daily News, Masako Watanabe