“Am Aua Mochen Apasa, ‘Ewer!’”

EWE branch ofes lon Nigeria, an Chon Pwarata Jiowa, a angei echo taropwe mi apasa:

“Noum at, Anderson, a malo lupwen a 14 ierin. Mwen an malo, a foleni ruuemon chuko. Ita a mochen an epwe amomoloor me tinalo ewe moni ngeni ewe branch ofes ussun an asor fan iten ewe angangen afalafal won unusen fonufan. Nge a fen malo mwen an epwe tongeni amomoloor.

“Ren am afanni an nan mochen le tinalo ewe moni ngeni branch ofes, am aua pwisin foleni ekkewe chuko me amomoloor. Am aua tinalo ei moni ngenikemi ussun an Anderson asor. Pokiten an Jiowa pwon, am aua apilukulukoch pwe ekiselo​—arapakan chok—am aupwe kunasefalli Anderson. Me am aua mochen apasa ngeni, ‘Ewer!’ lupwen epwe eisinikem ika am aua fen apwonueta letipan we le tinalo ewe moni ngeni ewe branch ofes. Am aua mwotoresiiti ewe fansoun, esap chok Anderson me pwal chommong chon pwarata ‘usun eu kuchu mi lap’ repwe manausefal.”​—Ipru 12:1; Jon 5:28, 29.

A pwalo lon ei taropwe pwe luku lon ewe manausefal a apochokula ekkewe Chon Kraist mi enlet. A ifa me watteen ewe pwapwa ekkewe fite milion famili repwe kuna, ussun chok an Anderson famili, lupwen ra chuurisefalli nour kewe mi achengicheng mi fen malo seniir!​—1 Korint 15:24-26.

Ewe Kapasen Kot a awora eu apilukulukun manausefal nge ei apilukuluk eu chok me lein ekkewe mettoch mi awararar epwe pwonuta ekiselo chok fan nemenemen ewe Muun Kot, ewe minefoon otot mi pwung.(2 Piter 3:13) Ewe Paipel a fos ussun met Kot epwe fori fan iten ekkewe aramas lon ena atun, a era: “I epwe tolu seni meser chonun meser meinisin, o esap chuen wor malo, esap pwal chuen wor kechiu, are akurang, are metek, pun ekkewe mettochun lom ra fen morelo.”​—Pwarata 21:4.