Amaaraata An Kraist Ekiek Ussun Tekia

“Are emon a mochen pwe epwe lapalap leimi, iwe, epwe chok noumi chon alillis.”​—MATEUS 20:26.

1. Ifa an fonufan ekiek ussun tekia?

 KANE ngeni ewe teliminw minen loom lon Isip itan Thebes (ikenai itan Karnak), orun 300 mwail ooren Cairo, mei wor liosun Farao Amenhotep III, 60 fiit tekian. Aramas mi atola ewe lios ra fokkun meefi kukkunuloor. Ei lios, ese mwaal mi ffor fan iten an epwe amwara aramas, a liosueta an ei fonufan ekiek ussun tekia​—emon epwe pwisin efisi an nikinikin lapalap me foummong me ameef ngeni aramas pwe ir kukkun me esor lamoter.

2. Ifa ewe leenien appiru Jises a isetiu fan iten noun kewe, me ikkefa ekkewe kapas eis sipwe pwisin eisinikich?

² Mi mwaalfesen ena ekiek ussun tekia me minne Jises a asukula aramas. Inaamwo ika i ‘nour we Sense me nour we Samol’ nge, Jises a asukuleer pwe tekian emon a pop seni an angang fan iten aramas. Lon ewe saingoon ranin manauan won fonufan, Jises a pwomweni weween minne a fen asukuleer ren an tolu pecher. Mwa met ren ei foffor mi tekisoson! (Jon 13:4, 5, 14) Angang ngeni  aramas are repwe angang ngonuk​—menni leir kopwe saani? An Kraist pisekin nengeni a efisi om mochen pwe kopwe tipetekison ussun chok i? Iwe, sipwe atittina an Kraist ekiek ussun tekia mi sokko seni ewe ekiek ussun tekia a choufetal won fonufan.

Poutalo An Ei Fonufan Ekiek Ussun Tekia

3. Ikkefa ekkewe poraus lon Paipel mi pwaralo mwiriloon mi alolilen ngeni chokkewe mi kutta linger seni aramas?

³ Mei wor chommong poraus lon ewe Paipel mi awewei ifa ussun an ewe fonufan ekiek ussun tekia a emmwen ngeni feiengau. Ekieki mwo ewe mwan itan Haman. Haman emon mwan mi foummong lein ekkewe nouwis lon Persia lon ranin Ester me Mortekai. An Haman kutta lingan a emmwen ngeni sau wachemuk me malo. (Ester 3:5; 6:10-12; 7:9, 10) Me ifa ussun ewe king mi lamalam tekia, Nepukatnesar, ewe emon a umwesilo lupwen a fokkun watte an pochokkul? An ekiek mi ppwor ussun tekia a pwalo lon ekkeei kapas: “Sap iei Papilon ewe telinimw mi lapalap ua aueta fan ai tufich me pochokul pwe ai lenien king, epwe pwal alinga lingen ai nemenem?” (Taniel 4:30) A pwal wor porausen pwal emon mi lamalam tekia, Erot Akrippa I, lupwen a etiwa ewe ling ese fich ngeni me ese alinga Kot. “Ul a ani fitukan, o a malo.” (Fofor 12:21-23) Ar tumunungau le eani an Jiowa ekiek ussun tekia a fen emmwen ngeni ekkeei mwan ar turutiw fan sau wachemuk.

4. Io a efisata an ei fonufan ngunun lamalam tekia?

⁴ A pwung ach mochen manaueni manauach pwe epwe tori kich sufol me assamol. Iwe nge, ewe Tefil a alamota ena mochen ren an epwe efisi lamalam tekia, ewe sokkun lapalap a nonnom ren i. (Mateus 4:8, 9) Sisap monuki pwe Setan “ewe koten ei fonufan,” me an mochen le alisata pwisin an ekiek ikei ie won fonufan. (2 Korint 4:4; Efisus 2:2; Pwarata 12:9) Pokiten ekkewe chon Kraist ra silei ewe popun ei sokkun ekiek, repwe poutalo an ewe fonufan ekiek usun tekia.

5. Sopwoch, foummong, me wou repwe atoto ngenikich menemenoch? Awewei mwo.

⁵ Eu me lein ekkewe ekiek ewe Tefil a alisata pwe ach foummong, an aramas mwareiti kich, me moni watte, repwe efisi pwapwaan manauach. Mei pwung ena? Ach angangoch, an aramas mwareiti kich me moni repwe fokkun ngenikich manau me menemenoch fansoun meinisin? Ewe Paipel a ourourakich pwe sisap tupulo ren ena esin ekiek. King Solomon a makkei: “Murin ua pwal kuna popun an aramas angang weires me ar kutta met repwe fefeita ren, pun ra lolowo ngeni chon arur. Iwe, pwal ei pon chok, a usun chok turufi asepwal.” (Än Salomon Afalafal 4:4) Chommong aramas mi fen fangolo manauer ngeni ar feffeita lon ei fonufan ra tongeni tipeeu ren ena poraus lon Paipel a pop seni ngunun Kot. Iei mwo eu poraus seni emon mwan a alillis le alapalapa, aueta, me cheki ewe rocket a uwei aramas ngeni ewe maram. A chechchemeni: “Ua fokkun angang weires me ua angangoch lon ai angang. Nge a ussun ita poon chok are esor lamotan ngeni ai upwe angei pwapwa mi nomofoch me kinamween letip.” * An fonufan ekiek  ussun tekia, seni business, sport, are kachito, esap atoto ngenikich pwapwa mi nomofoch.

Tekia Seni Ach Angang Ngeni Aramas Pokiten Sia Tonger

6. Met a pwarata pwe Jemes me Jon rese eani ekiek mi pwung ussun tekia?

⁶ Eu poraus ussun manauen Jises a pwaralo weween tekia mi enlet. Jises me noun kewe chon kaeo ra sailo Jerusalem ren ar repwe fiti ewe Pasofer lon 33 C.E. Atun ar sai, ruuemon pwiin Jises, Jemes me Jon, ra pwaralo ar ekiek mwaal ussun tekia. Iei met ra tingorei Jises nge ra nounou iner chon affor: “Kopwe chok alluku pwe nei keei ruemon aluwol repwe momot lon muom, emon peliefichum, o pwal emon peliemongum.” (Mateus 20:21) Fan iten ekkewe chon Jus, an emon mommot peliefichin are peliemongun emon nouwis a wewe ngeni eu assamol wachemuk. (1 King 2:19) Fan ar lamalam tekia, Jemes me Jon ra mochen angei ekkewe leenien samol. Ra mochen angei wiis tekia nge Jises a silei ekiekir. A alamota met a fen fisita ren an epwe awenachara ekiekir mi mwaal ussun tekia.

7. Ifa ussun Jises a awewei ewe aal ngeni an chon Kraist tekia mi enlet?

⁷ Jises a silei pwe lon ei fonufan mi lamalam tekia, aramas ra ekieki pwe emon a tekia ika a nemeni are a alluk ngeni aramas me lupwen a fichi poun kewe me ekkena aramas repwe muttir fori met a mochen. Nge lein noun Jises kewe, forun angang mi tekisoson a wewe ngeni ewe esissin mi esinna tekian emon. Jises a apasa: “Nge esap iei usun lefilemi, pun are emon a mochen pwe epwe lapalap leimi, iwe, epwe chok noumi chon alilis, o are emon epwe mochen nampa eu leimi, iwe, epwe chok noumi chon angang.”​—Mateus 20:26, 27.

8. Ifa weween ach wiliiti emon chon alillis, me ikkefa ekkewe kapas eis sipwe pwisin eisinikich?

⁸ Ewe kapas lon fosun Krik mi chiyaku ngeni “chon alilis” lon ewe Paipel a wewe ngeni an emon tinikken me akkachocho le fori angang fan iten aramas. Jises a asukula noun kewe chon kaeo eu lesen mi lamot: An emon alluku aramas met repwe fori esap ewe esissinnen an tekia; nge an angang fan iter fan tong ina ewe esissin. Kopwe pwisin eisinuk: ‘Epwe ifa ussun ai ekiek ika ngang Jemes are Jon? Upwe fen weweiti pwe tekia mi enlet a pop seni angang fan tong?’​—1 Korint 13:3.

9. Ifa ewe leenien appiru Jises a isetiu ren an kewe foffor ngeni aramas?

 ⁹ Jises a aiti ngeni noun kewe chon kaeo ifa ussun chon fonufan repwe auku tekian emon esap ifa ussun chon Kraist repwe auku tekian emon. Jises esap fan eu a lamalam tekia ngeni chokkewe a alisi are ammeef ngeniir pwe ir aramas kisikis. Sokkun aramas meinisin​—ekkewe mwan, fefin, semirit, chokkewe mi wouoch are woungau, me ekkewe nouwis, pwal ekkewe chon tipis mi itefoulo​—ra kinamwe lupwen ra nonnom ren Jises. (Mark 10:13-16; Luk 7:37-50) Fan chommong aramas ra mangau lupwen ra wiisen angangfengen me chokkewe mi tufichingau. Jises a sokkolo lapalapan. Inaamwo, fan ekkoch, noun kewe chon kaeo rese ekiekoch mwen ra fos me ra aninifengen nge, Jises a chuen asukuleer fan mosonottam, me a aiti ngeniir pwe i wesewesen emon mi tipetekison me mosonoson.​—Sekaraia 9:9; Mateus 11:29; Luk 22:24-27.

10. Ifa ussun unusen manauen Jises a pwaralo an akkomwa an angang fan iten aramas?

¹⁰ Ewe pisekin nengeni mi murinno Noun Kot we mi lapalap seni meinisin a isetiu, a aiti ngenikich weween tekia mi enlet. Jises ese feitiu fonufan pwe aramas repwe angang ngeni, nge a feito ren an epwe angang ngeni aramas, ren an apochokkula aramas mi uri sokkun “samau meinisin” me ren an angasalo aramas seni fan nemenien ekkewe timon. Inaamwo ika a tongeni molululo me a lamot pwe epwe asoso nge, a chok kutta met epwe efeiochu aramas akkom mwen met epwe pwisin feioch ren, me a unusen achocho le auruuruur. (Mark 1:32-34; 6:30-34; Jon 11:11, 17, 33) Pokiten an tong, a mochen alisi aramas lon pekin ngun me a sailo fite puku mwail won ekkewe aal mi ppwul ren an epwe afalafala ewe kapas allim ngeniir. (Mark 1:38, 39) Pwungun pwe Jises a luku pwe an alisi aramas eu mettoch mi fokkun lamot.

Appriu An Kraist Tipetekison

11. Ikkefa ekkewe lapalap mi lamot fan iten chokkewe mi eani ewe wiis elter lon ewe mwichefel?

¹¹ Orun 1890, ren ar repwe alisi noun Kot kewe aramas, pwiich kewe mi filata ekkewe elter mi saifetal ra menlapei ewe ekiek mi pwung ekkena elter repwe amaaraata. Zion’s Watch Tower minen September 1, 1894, a affata pwe repwe aramas “mi mosonoson​—pwe resap lamalam tekia . . . repwe ekiek tekison me resap afeffeitai pwisin ir, nge Kraist​—resap pwaralo pwisin ar sile, nge an we Kapas mi murinno me manaman.” A ffat pwe chon Kraist mi enlet resap kutta eu wiiser ren ar repwe wiliiti aramas tekia are foummong are manaman fan iten ar repwe nemeni ekkewe ekkoch. Emon elter mi tipetekison a chechchemeni pwe wiisan kewe ra wewe ngeni “angang murinno,” sap eu wiis tekia mi alingalo pwisin i. (1 Timoti 3:1, 2) Ekkewe elter me ministerial servant meinisin repwe angang weires fan iten aramas fan tipetekison,  me emmweniochu angang fan iten Kot ren ar isetiu eu leenien appiru mi murinno.​—1 Korint 9:19; Kalesia 5:13; 2 Timoti 4:5.

12. Ikkefa ekkewe kapas eis chokkewe mi mochen eani wiiser lon ewe mwichefel repwe pwisin eisiniir?

¹² Eli epwe lamot pwe emon brother a mochen wiiseni eu wiis epwe pwisin eis: ‘Ngang ua kutta ifa ussun ua tongeni angang ngeni aramas, are ua kan kutta ifa ussun repwe angang ngeniei? Ua achocho ngeni ai upwe fori sokkopaten angang aramas rese kan kuna?’ Ren chok awewe, eli emon aluwon epwe mochen eani afalafal atun an chon Kraist kewe mwich nge ese kon achocho le alisi ekkewe chinnap. Eli a pwapwaiti an chiechi ngeni chokkewe mei wor wiiser lon ewe mwichefel nge a pireir le fiti ewe angangen afalafal. Ena esin aluwon epwe pwisin eis: ‘Ua anefota ewe sokkun angang ngeni Kot aramas repwe apungaei me mwareitiei ren? Ngang ua mochen tekia mwen mesen aramas?’ Ika sia kutta ifa ussun sipwe alingalo kich pwisin, sise appiru Jises.​—Jon 5:41.

13. (a) Ifa ussun an emon elter tipetekison epwe etipetipa aramas? (b) Met popun tipetekison, are ekiek tekison, esap eu mettoch chon Kraist repwe chok ekis achocho ngeni?

¹³ Lupwen sia achocho le appiru an Kraist tipetekison, letipach epwe amwokutukich le angang fan iten aramas. Ekieki mwo porausen emon zone overseer a wiisen cheki ewe angang a fiffis lon eu me lein ekkewe branch ofes an Chon Pwarata Jiowa. A watte wiisan me a wor chommong mettoch epwe chuen cheki, nge ei overseer a kaulo ren an epwe alisi emon pwiich mi osukosuk ren eu mwesinnen achufengenni ekkewe pekin taropween echo chassi are brochure ren an akkuku ngeni weea. Pwiich we a apasa: “Use tongeni luku! A ereniei pwe a fen anganga ena sokkun mwesin lupwen i emon aluwon mi angang lon Bethel me a chechchemeni weiresin an a fori. A ekis ttam ewe fansoun a alisiei le angang won ewe mwesin lupwen a wor chommong mettoch mi lamot epwe chuen fori. Ua fokkun ingeiti an alisiei.” Iei ena brother a eani ewe wiis overseer lon eu me lein ekkewe branch ofes an Chon Pwarata Jiowa, me a chuen chechchemeni an we foffor mi tipetekison. Amwo sisap ekieki pwe sia kon tekia le fori angang mi tekisoson are a kon watte lamotach le fori angang mi kisikis. Sipwe pwilitalong “tipetekison.” Nge esap filiach ika sipwe fori are sisap fori. Ina kinikinin ewe “aramas fo” emon chon Kraist epwe pwilitalong.​—Filipai 2:3; Kolose 3:10, 12; Rom 12:16.

Ifa Ussun Sipwe Angei An Kraist Ekiek Ussun Tekia

14. Ifa ussun ach ekkekiekifichi ach chiechi me Kot me aramas epwe alisata ach amaaraata ewe ekiek pwung ussun tekia?

¹⁴ Ifa ussun sipwe angei ekiek pwung ussun tekia? Sipwe ekkekiekifichi ach chiechi me Jiowa Kot. An ling, an manaman, an tipatchem ra atekiata i seni won aramas. (Aisea 40:22) Ach ekkekiekifichi ach chiechi me aramas a pwal alisikich le amaaraata tipetekison. Ren chok awewe, eli sia angoch lap seni ekkewe ekkoch ngeni sokkopaten angang, nge repwe tongeni angoch senikich lon ekkoch mettoch mi lamot seni, are eli a wor ren pwiich kewe ekkewe lapalap mi murinno rese nom rech. Pwungun pwe sise kan afanni chommong mi fokkun auchea ngeni Jiowa pokiten ir mi mosonoson me tipetekison.​—An Salomon Fos 3:34; Jemes 4:6.

15. Ifa ussun tuppwolun noun Kot kewe aramas a pwaralo pwe esor emon a wor popun an epwe eani ekiek pwe a tekia seni pwal emon?

¹⁵ Porausen ekkewe Chon Pwarata Jiowa fan riaffou mwaal pokiten ar luku a anneta pwungun ena poraus. Fan chommong, chokkewe mi lamot kisikis lon mesen aramas ra fen amwochu ar luku lon Kot fan ekkeiin sossot.  Ach ekkekiekifichi porauser a tongeni alisata tipetekison me alisikich ach ‘sisap ekieki ren pwisin kich mi tekia seni minne mi fich.’​—Rom 12:3. *

16. Ifa ussun meinisin lon ewe mwichefel ra tongeni amaaraata ewe sokkun tekia a nom ren Jises?

¹⁶ Ekkewe chon Kraist meinisin, sarafo me chinnap, repwe achocho le amaaraata an Kraist ekiek ussun tekia. Mei wor sokkopaten angang epwe fis lon ewe mwichefel. Sisap oputa eu angang emon a awiisa ngenikich pokiten a ussun ita nikinikin angang ese kon lien lamot. (1 Samuel 25:41; 2 King 3:11) Sam me in kena, oua kan pesei noumi kewe semirit me sarafo ar repwe apwonueta ese lifilifil met sokkun angang oua awiisa ngeniir fan chengel, ika a fis lon ewe Kingdom Hall, are atun eu mwichelap? Ra kuna an ami fori angang mi ussun ita lamot kisikis? Emon pwiich we mi angang lon iolapen an Chon Pwarata Jiowa, a fokkun chechchemeni an seman me inan leenien appiru. A apasa: “Ukuukun ar achocho le limeti ewe Kingdom Hall are ewe leenien mwichelap a pwaralo ngeniei ekiekir pwe ena esin angang mi fokkun lamot. Ra kan achocho ngeni sokkopaten angang mi alisata ewe mwichefel are ewe mwichen pwipwi, nge meit ika ir angang mi nikinikin lamot kisikis. Ekiekin semei me inei a fen alisiei ai upwe etiwa ese lifilifil wiisei kewe lon Bethel.”

17. Ifa ussun ekkewe fefin mi tipetekison ra tongeni efeiochu ewe mwichefel?

¹⁷ Ester, ewe fefin a wiliiti kiwinin Persia lon ewe alimuen senturi B.C.E., a isetiu eu leenien appiru ren an akkomwa feiochun ekkewe ekkoch mwen pwisin an feioch. Inaamwo ika a nonnom lon imwen ewe king nge, a mmonleta le fangolo manauan fan iten noun Kot kewe aramas. An foffor a tipeeu ngeni letipen Kot. (Ester 1:5, 6; 4:14-16) Ese lifilifil ukuukun nour moni, ekkewe fin Kraist ikenai ra tongeni pwaralo ekiekin Ester ren ar pesei chokkewe mi letipeta, ren ar chuuri chokkewe mi semmwen, ren ar fiffiti ewe angangen afalafal, me ren ar angangfengen me ekkewe elter. Ekkeei fin Kraist eu feioch mi wachemuk ngeni ewe mwichefel!

Feioch Seni Ach Eani An Kraist Ekiek Ussun Tekia

18. Ikkefa ekkewe feioch ra pop seni ach pwaralo an Kraist ekiek ussun tekia?

¹⁸ Epwe wor chommong om kewe feioch lupwen kopwe eani an Kraist ekiek ussun tekia. Om achocho le angang fan iten aramas a wato pwisin om me ar chengel. (Fofor 20:35) Lupwen ka tipemecheres me achocho le angang fan iten pwiium kewe, kopwe achengicheng ngeniir. (Fofor 20:37) Nge a wesewesen ekiekin Jiowa pwe minne ka fori le alisata manauen pwiium kewe chon Kraist a ussun chok eu asorun mwareiti Kot Jiowa a fokkun pwapwa ren.​—Filipai 2:17.

19. Sipwe apposa letipach le fori met ussun an Kraist ekiek ussun tekia?

¹⁹ Emon me emon leich epwe atittina pwisin letipan me pwisin eisini: ‘Upwe chok fos ussun ai amaaraata an Kraist ekiek ussun tekia, are upwe fokkun amaaraata?’ A ffat ekiekin Jiowa ussun chokkewe mi lamalam tekia. (An Salomon Fos 16:5; 1 Piter 5:5) Amwo fofforuch kewe repwe pwaralo pwe sia pwapwaiti ach eani an Kraist ekiek ussun tekia, lon ewe mwichefelin Chon Kraist, lon ewe famili, are ngeni aramas meinisin. Amwo Kot epwe lingelo ren mettoch meinisin sia fori.​—1 Korint 10:31.

[Ekkewe pwóróus fan]

En Mi Tongeni Awewei?

• Met popun sipwe poutalo an ei fonufan ekiek ussun tekia?

• Me ren Jises, met popun emon a tekia?

• Ifa ussun ekkewe overseer ra tongeni appiru an Kraist tipetekison?

• Met a tongeni alisata ach amaaraata an Kraist ekiek ussun tekia?

[Ekkewe Kapas Eis fan Iten ewe Lesen]

[Pwoor lon pekin taropwe 26]

A Nom Ren Io An Kraist Ekiek Ussun Tekia?

Emon a mochen pwe aramas repwe angang ngeni are emon a mochen angang ngeni aramas?

Emon a mochen pwe aramas repwe kuna lamoten an angang are emon a pwal etiwa ekkewe sokkun angang a ussun ita ese kon lien watte lamoter?

Emon mi atekiatai pwisin i are emon a atekiatai ekkewe ekkoch?

[Sasing lon pekin taropwe 23]

Liosun Farao Amenhotep III mi fokkun watte

[Sasing lon pekin taropwe 24]

En mi silei met a fen emmwen ngeni an Haman turutiu?

[Sasing lon pekin taropwe 25]

En mi kutta ifa ussun kopwe angang ngeni aramas?