An Aramas Kukutta Pwapwa

EKKOCH ier lom, a wor ei kapas eis ngeni aramas lon France, Germany, Great Britain, me ewe United States: “Met epwe atoto pwapwa ngeni manauom?” Walik me tiu percentin ir kewe mi polueni ena kapas eis ra apasa pochokkulen inis; 79 percent ra apasa pupulu mi murinno are ar nonnomfengen me emon ra mmen poluoch ngeni; 62 percent ra kapas ussun feiochun an aramas nounou; me 51 percent ra ekieki pwe ar eani eu angang mi auchea epwe atoto pwapwa. Iwe, inaamwo ika a choufetal ewe ekiek pwe moni esap tongeni atoto pwapwa, nge 47 percentin ir kewe mi uwawu meefier ra wesewesen luku pwe a tongeni. Ifa pwungun ena poraus?

Akkom, ekieki mwo minne aramas ra luku ussun moni, weween, ar luku pwe moni epwe tongeni atoto pwapwa. Och pekin kaeo mi nengeni manauen ekkewe ipuku aramas mi kon pisekisek seni meinisin lon ewe United States a affata pwe ar pwapwa ese lap seni pwapwaan ekkewe lusun aramas mi nonnom ikewe ie. Pwal och, inaamwo ika wouun chommong aramas lon ewe United States a fen lapalo won arapakan fan ruu, nge ar pwapwa ese lapalo seni lom, nge ina kunaen ekkewe sou silelap mi kaeo lapalapen ekiekin aramas. Ren enletin, iei alon eu repot: “Lon ewe chok ukuukun fansoun, a fokkun lapalo letipechou. A fen lapalo won fan ulungat an sarafo pwisin nniirelo. A fen lapalo nampaan mufesen won fan ruu. Lon lime fonu, ekkan aramas mi kaeo ika moni a tufichin alapalo pwapwa ra apwungalo pwe moni esap tongeni atoto pwapwa.

Oruuan, a ifa ukuukun lamoten pochokkulen inis, pupulu mi murinno, me eu angang mi auchea fan iten an aramas repwe tufichin kuna pwapwa? Iwe, ika ekkena mettoch ra wenewenen lamot fan iten an aramas repwe kuna pwapwa, ifa ussun ekkewe fite, fite milion aramas ese kan pochokkul inisir me ir kewe ese lien murinno ar pupulu? Ifa ussun ekkan chon pupulu rese nounou me meinisin ekkan mwan me fefin rese eani eu angang mi auchea? A ita weween pwe chokana resap tongeni kuna pwapwa lon manauer? Iwe, ewe ita pwapwa mi nom ren ir kewe mi pochokkul inisir me ir kewe mi eani pupulu mi murinno epwe morolo ika epwe siwil nonnomur?

A Pwung Minne Sia Ekiekin Kuna Pwapwa Seni?

Aramas meinisin ra tipeni pwe repwe pwapwa. Esap och poraus mi amairu ena pun a mak pwe ewe Chon Forata aramas, i “ewe Kot mi pwapwa,” me aramas ra for lon lapalapen Kot. (1 Timoti 1:11; Keneses 1:26, 27) Ina minne, a iei pukun nikinikin aramas, ar repwe kukutta pwapwa. Iwe nge, chommong ra kuna pwe ar tufichin  akkamwochu pwapwa a ussun chok ar sotuni le kakkamwoch foun ppi​—weween, ir me ruu ra mecheresin tiuelo senikich.

Iwe nge, sipwe tongeni apasa pwe a kon watte an ekkoch achocho ngeni ar repwe kuna pwapwa? Ina meefien Eric Hoffer, emon sou ekiek lon pekin an aramas nonnomfengen. Iei kunaan: “An aramas kukutta pwapwa eu me lein ekkewe popun watte an esor pwapwa.” Mi fokkun enlet ena ika pwe mi mwaal minne sia ekiekin kuna pwapwa seni. Ika sia ina ussun, iwe, sipwe chok lichipung me mangau. Ach achocho ngeni ach sipwe pisekisek, itefoulo, are itetekia, me ach ekiekin apwonueta angang mi auchea lon pekin muun, are fan iten alillisin chon fonuach, are fan iten lapaloon wouun aramas; are ach aea manauach fan iten pwisin ach pwapwa are mochenich esap tufichin atoto pwapwa. Ina ewe popun ekkoch ra fen eani ewe ekiek emon soumak a uwawu, nge iei alon: “Ika sipwe chok ukutiu seni ach chei ewe mettoch pwapwa eli sipwe kuna pwe pwapwa epwe pukun toto rech”!

Eu mettoch mi lamot a pwalo ren ewe minen kuttaen an aramas memmeef sia kapas ussun le poputaan ei poraus pun a affata pwe 40 percentin ekkewe aramas mi uwawu meefier ra meefi pwe pwapwa a kan toto seni ach foffori minne mi murinno me ach akkalisi aramas. Iwe, 25 percent leir ra apasa pwe ewe mettoch luku me achocho lon lamalam ra fokkun lamot fan iten an aramas repwe kuna pwapwa. A ffat pwe a lamot ach sipwe nengenifichi minne epwe atoto ewe sokkun pwapwa mi enlet. Ena eu poraus mi tapwoto epwe alisikich le fori ena mettoch.

[Sasing lon pekin taropwe 3]

Chommong ra ekieki pwe moni, ar eani ewe sokkun famili mi murinno, are eu angang mi auchea epwe wenewenen atoto pwapwa. En mi tipeeu ngeni ena?