Aramas Ra Oput Ir, Nge Esor Popun

“Ra fen oput ngang, nge esor popun.”​—JOHANNES 15:25.

1, 2. (a) Pwata ekkoch ra kan osukosuk lupwen aramas repwe esiita chon Kraist, nge pwata sisap mairu ren ena sokkun kapas? (b) Met sokkun “oput” sipwe kaeo ussun lon ei lesen? (Pi ena poraus, weween, footnote, me asan.)

 CHON PWARATA JIOWA ra achocho ngeni ar repwe emmweni manauer ren ekkewe kapasen alongolongun alluk mi mak lon an Kot we Kapas. Ina minne, ra iteuoch lon chommong fonu. Iwe nge, fan chommong, aramas ra amwaalli porauser. Ren chok awewe, iei alon emon nouwiisin muun lon St. Petersburg, Russia: “Am aua rong pwe Chon Pwarata Jiowa och keangen lamalam mi sokkolo lapalapan me ra foffori ar angang le monomon, iwe, ra kan nnielo semirit me pwisin ir.” Nge mwirin an angangfengen me Chon Pwarata Jiowa fan iten eu mwichelap, iei kunaen ena nouwiis: “Iei ua kuna pwe sap minne ir mi sokkolo, nge ir aramas mi kan ekemelimel . . . Ir aramas mi kinamwe me tipefesir, me a fokkun watte ewe tong lefiler.” A pwal apasa pwe “Use fokkun weweiti ika pwata aramas ra efisata ena sokkun kapas mi chofona ussur.”​—1 Piter 3:16.

² Noun Kot kewe chon angang rese kan meefi pwapwa ren an aramas aitengauer pwe ussun ita ir chon fofforingau, nge rese kan mairu ika aramas repwe kapas ingau ussur. A iei ussun an Jises ouroura noun kewe chon kaeo: “Are ewe fonufan a oput ami, oupwe chok sinei pwe a fen oput ngang mwen an a oput ami. . . . Nge iei usun a fis pwe epwe pwonueta ewe kapas mi mak lon ar we puken alluk, pwe ‘Ra fen oput ngang, nge esor popun.’” * (Jon 15:18-20, 25; Kol Fel 35:19; 69:4) Mesemwan iei alon ngeni noun kewe chon kaeo: “Ika ra eita ngeni mastaan ewe im Peelsepul, epwe fakkun lapelo ar esiita ngeni chon lon imwan.” (Mattu 10:25) Chon Kraist ra weweiti pwe ar kukkuna ena sokkun esiit a kapach ngeni ewe “iraan nninni” ra tipeeu ngeni ar repwe mwarei lupwen ra wiliiti chon appiru Kraist.​—Mattu 16:24.

3. A ifa ukuukun an aramas eriaffou chon ewe lamalam mi enlet?

³ An aramas eriaffou chon ewe lamalam mi enlet a poputa seni chok lom lom, weween, seni “Epel, atewe mi pwung.” (Mattu 23:34, 35) Sap minne fan ekkoch chok a fis ena mettoch. Jises a apasa pwe “aramas meinisin repwe oput” noun kewe chon kaeo pokiten itan we. (Mattu 10:22) Pwal och, ewe aposel Paul a makkei pwe noun Kot kewe chon angang meinisin repwe ekiekin kuna an aramas eriaffour, nge mi pwal kapachelong emon me emon leich. (2 Timoti 3:12) Met popun epwe fiffis ena mettoch?

Ewe Emon Koputer Ese Pwung a Popu Seni

4. Ifa ussun ewe Paipel a affata wesewesen ewe popun an a fiffis meinisin ewe sokkun oput ese pwung?

⁴ An Kot we Kapas a pwarata pwe seni chok popun lom, a fen wor emon chon efisata riaffou. Ekieki mwo nninniiloon ewe akkaemonun chon lukuluk, Epel. Ewe Paipel a apasa pwe pwiin we Kein, ewe mi nnielo i, a “popu seni ewe emon mi ngau,” Setan ewe Tefil. (1 Jon 3:12) Kein a mwiri nikinikin Setan, me ewe Tefil a nounou i ren an epwe apwonueta an kewe ekiek mi ngau. Ewe Paipel a pwal aiti ngenikich ussun minne Setan a fori lupwen Jop me Jises Kraist ra kuna riaffou watte. (Hiop 1:12; 2:6, 7; Jon 8:37, 44; 13:27) Ewe puken Pwarata a affata ewe popun aramas ra eriaffou chon appiru Jises pwe iei alon: “Ewe Tefil epwe oturalong ekkoch leimi lon imwen fotek, pwe oupwe kuna sosot.” (Pwarata 2:10) Iwe, Setan, ina i ewe emon mi efisata sokkun oput meinisin ese pwung ngeni noun Kot kewe aramas.

5. Met popun Setan a oput chon ewe lamalam mi enlet?

 ⁵ Met popun Setan a oput chon ewe lamalam mi enlet? Lon eu rau mi affata watteen an lamalam tekia, Setan a fen u ngeni “ewe King tori feilfeilo chok,” Jiowa Kot. (1 Timoti 1:17, NW; 3:6) A ussun ita apasa pwe a kon pochokkul an Kot nemenem won forian kewe me ese pwung ewe popun an aramas angang ngeni Jiowa, weween, ussun ita ra angang ngeni pokiten chok ar mochen kuna feioch seni. Setan a kan apasa pwe ika a wor an mumu pwe epwe sotuni aramas, epwe tongeni okullu meinisin seni ar angang ngeni Kot. (Keneses 3:1-6; Hiop 1:6-12; 2:1-7) Ren an aitengaua Jiowa ren an apasa pwe i emon chon eriaffou aramas, me an kapas mi chofona, me a lipwakingau le nemenem, Setan a ekiekin atekiatai pwisin i pwe epwe u ngeni an Jiowa nemenem. Ina minne, an song ngeni noun Kot kewe chon angang a popu seni an tipeni pwe aramas repwe fel ngeni i.​—Mattu 4:8, 9.

6. (a) Ifa ussun sia kapachelong lon ewe popun alongolongun kapwung mi weneiti an Jiowa pwuung le nemeni mettoch meinisin? (b) Ifa ussun ach weweiti ena poraus a kan alisikich pwe sipwe tuppwol fansoun meinisin? (Pi ena refiref lon pekin taropwe 10.)

⁶ Ka weweiti ifa ussun ena popun alongolongun kapwung a kku manauom? Pokiten en emon chon angang ngeni Jiowa, neman ka fen kuna pwe inaamwo ika om foffori letipen Kot eu angang mi weires, nge ekkewe feioch mi toto seni a mmen lapalap. Iwe nge, kopwe fet ika nonnomum epwe siwil, iwe, epwe weires are eu minen eriaffou ngonuk om kopwe atipeeufengenni manauom me an Jiowa kewe alluk me an kewe kapasen alongolongun alluk? Epwe pwal ifa ussun ika a ussun ita esor och feioch mi toto ngonuk? Kopwe ita ekieki pwe esor lamoten om kopwe chuen angang ngeni Jiowa? Are om tong ngeni Jiowa me watteen om aucheani lapalapan kewe mi fokkun amwarar epwe amwokutuk om kopwe sopweilo om feffetal lon an kewe al meinisin? (Tuteronomi 10:12, 13) Pokiten an Jiowa mut ngeni Setan an epwe efisata fansoun weires lon manauach, a awora ngeni emon me emon leich ewe alen ach sipwe tufichin pwisin polueni an Setan kewe tipimwaal.​—An Salomon Fos 27:11.

“Lupwen Aramas Repwe Esiitakemi”

7. Ifa eu mettoch ewe Tefil a akkaea pwe epwe sotuni le okullukich seni Jiowa?

⁷ Iei sipwe nengenifichi eu me lein ekkewe foffor mi tipachchem sola Setan a kan aea ren an epwe sotuni le anneta pwe mi pwung an kewe kapas fan iten ewe popun alongolongun kapwung​—nge iei an aea kapas mi chofona, kapasen esiit. Jises a apasa pwe Setan “semen kapas chofona.” (Jon 8:44) Ewe it Tefil a wewe ngeni “Chon Pweni,” iwe, a affata pwe ena emon ewe nampa eu chon pweni Kot me an kapas mi murinno me itan we mi fel. Ewe Tefil a kan aea kapasen affanien, tipimwaal, me kapas chofona ren an epwe aitengaua an Jiowa nemenem, me a aea ekkena chok mettoch ren an epwe aitengaua noun Kot kewe chon angang mi tuppwol. Ren an ekkesiita ekkena Chon Pwarata Jiowa, epwe tongeni awattei choun eu sossot pwe epwe lapalo weiresin ar likiitu fan.

8. Ifa ussun Setan a aitengaua Jop, iwe, met mwiriloon?

⁸ Ekieki mwo minne a fis ngeni Jop, nge weween itan ei, “Emon mi Kuna Oput.” Setan ese chok efisata poutuloon minne Jop a manau ren, noun kewe, me pochokkulen inisin, nge a pwal rauei pwe epwe ussun ita nge Jop emon chon tipis  mi kuna apwung seni Kot. Inaamwo ika a mmen watte an aramas sufoliiti Jop mesemwan, nge mwirin, Jop a kuna esiit, seni pwal mwo nge mararin kewe me chienan kewe mi achengicheng. (Hiop 19:13-19; 29:1, 2, 7-11) Pwal och, ren an nounou chon auruur mi chofona, Setan a ekiekin ‘atatakisi lelukan ren kapas,’ iwe, ra akkom chofonata ewe ekiek pwe neman Jop a fori och tipisilap, iwe mwirin, ra apwungu i ren ar apasa pwe i emon chon fofforingau. (Hiop 4:6-9; 19:2; 22:5-10) Ese mwaal a mmen watte letipechoun Jop pokiten ena mettoch!

9. Met popun a ussun ita nge Jises emon chon tipis?

⁹ Noun Kot we a nampa eu lein chon peni an Jiowa nemenem, ina minne, Setan a akkaewin oput i. Lupwen Jises a feitiu fonufan, Setan a sotun aitengaua pwe epwe ussun ita nge i emon mi wor tterin lon pekin ngun, ussun an we a fori ngeni Jop, iwe, a ussun ita nge Jises emon chon tipis. (Aisea 53:2-4; Jon 9:24) Aramas ra apasa pwe i emon chon sakau me a mongommong, me a ‘toki timon.’ (Mattu 11:18, 19; Jon 7:20; 8:48; 10:20) Ra tipimwaal ngeni pwe a esiita Kot. (Mattu 9:2, 3; 26:63-66; Jon 10:33-36) Jises a riaffou ren ena mettoch, pun a silei pwe ena sokkun poraus a aitengaua Seman we. (Luk 22:41-44) Iwe, le sopwoloon, a nninniilo won efoch ira, nge a ussun ita i emon chon tipis mi anumamau. (Mattu 27:38-44) Ren an pwarata pwe a unusen tuppwol, Jises a likiitu fan chommong ‘kapasen esiit seni chon tipis.’​—Ipru 12:2, 3.

10. Lon ach keei fansoun, ifa ussun Setan a pwarata pwe a wesewesen oput lusun ekkewe chon kepit?

¹⁰ Lon ach ei fansoun, lusun noun Kraist kewe chon kaeo mi kepit ra fen pwal kuna oput seni ewe Tefil. A mak pwe Setan ‘ewe chon tipi ngeni pwiin [Kraist] kewe . . . , ewe mi tipi ngenir le ran o lepwin mwen mesen ach Kot.” (Pwarata 12:9, 10) Seni ewe fansoun an we a koturutiu seni lang, iwe, a fotek orun ei fonufan, Setan a fen alapalo an angangen aitengaua pwiin Kraist kewe pwe epwe ussun ita nge ir aramas mi sochoul. (1 Korint 4:13) Lon ekkoch fonu, aramas ra pweniir ren ar apasa pwe ar we pekin eu keangen lamalam mi fokkun efeiengau ngeni aramas, nge ina ewe chok mettoch a fis ngeni chon Kraist lon ewe aewin senturi. (Fofor 24:5, 14; 28:22) Ussun a fen mak le poputaan ei poraus, aramas ra pweniir ren ar aea poraus mi chofona. Iwe nge, ‘fan iteuoch me itengau, fan kapas mi ngau me kapas mi murinno,’ pwiin Kraist kewe mi kepit ra fen achocho le ‘amwochu ekkewe allukun Kot, o uwei ewe pwarata usun Jises’ fan tipetekison me pwal fan alillisin chiener kewe, weween, ekkewe “pwal fitemon siip.’​—2 Korint 6:8; Jon 10:16; Pwarata 12:17.

11, 12. (a) Met epwe tongeni efisata ekkoch kapasen esiit chon Kraist repwe kuna? (b) Pokiten minne ra luku, chon Kraist repwe tongeni kuna ewe sokkun riaffou ese pwung lon met sokkun lapalap?

¹¹ Pwungun pwe sap minne meinisin kapasen esiit ngeni noun Kot kewe chon angang a fis fan iten ‘minne mi pwung.’ (Mattu 5:10) Eli ekkoch osukosuk epwe fis pokiten pwisin ach kewe apwangapwang. Sap minne sipwe itoch ika sipwe ‘tipis me kuna nninni ren, iwe, likiitu fan.’ Iwe nge, ika emon chon Kraist ‘epwe likiitu fan sossot mi chou me kuna nninni ese pwung ren pokiten mwelien letipan mi fiti ekiekin Kot, iei eu mettoch mi murinno’ mwen mesen Jiowa. (1 Piter 2:19, 20, NW) Ena mettoch epwe tongeni fis lon met sokkun fansoun?

¹² Ekkoch ra kuna kirikiringau pokiten ar rese mochen fiti ekkoch eoreni fan iten felin mei ma, nge mi u ngeni Paipel. (Tuteronomi 14:1) Chon Pwarata sarafo ra kuna esiit pokiten ar kamwochunnuk won an Jiowa kewe alluk ussun foffor mi limoch. (1 Piter 4:4) Aramas ra fen tipimwaal ngeni ekkoch chon Kraist sam me in ren ar apasa pwe ir mi “tumunungau” are “kirikiringau” pokiten ar kutta ewe sokkun safei ese fiti chcha fan iten nour kewe. (Fofor 15:29) Chon Kraist ra kuna esiit seni mararir me chon orur kewe pokiten chok ar wiliiti chon angang ngeni Jiowa. (Mattu 10:34-37) Chokana meinisin ra tapwelo mwirin ewe leenien appiru Jises me ekkewe soufos ra isetiu lupwen ra kuna ewe sokkun nninni ese pwung.​—Mattu 5:11, 12; Jemes 5:10; 1 Piter 2:21.

Likiitu Fan Esiit

13. Met epwe tongeni alisikich pwe sipwe uweneta lon pekin ngun ika sipwe kuna watte esiit?

¹³ Lupwen sipwe kuna watte esiit pokiten minne sia luku, eli sipwe letipechoulo, ussun chok ewe soufos Jeremaia, iwe, sipwe meefi pwe sisap chuen tongeni angang ngeni Kot. (Jeremaia  20:7-9) Met epwe tongeni alisikich pwe sipwe uweneta lon pekin ngun? Sipwe achocho le eani an Jiowa ekiek ussun ach sossot. Iei an ekiek, pwe ekkewe mi tuppwol fan sossot, ir chon pworacho, nge esap ir chon osupwang. (Romans 8:37) Kopwe sotun ekieki chokewe mi fen tuppwol le peni an Jiowa nemenem fan sokkun sossot meinisin ewe Tefil a sotuniir ren​—awewe chok ren ekkan mwan me fefin iter Epel, Jop, Meri, inen Jises we, me ir kewe mi tuppwol lom lom me pwal chienach kewe chon angang lon ach ei fansoun. (Ipru 11:35-37; 12:1) Ekiekifichi watteen ar tuppwol. Ekkena chommong, chommong chon tuppwol ra etiwakich pwe sipwe fitiir le uta won ewe leeni mi tekia a fen imulo ren ir kewe mi pworaiti fonufan ren ar luku.​—1 Jon 5:4.

14. Ifa ussun ach tinikken le iotek epwe tongeni apochokkulakich pwe sipwe tuppwol?

¹⁴ Ika ‘letipach epwe aureki chommong mettoch,’ sipwe tongeni iotek ngeni Jiowa fan tinikken, iwe, epwe auruurukich me apochokkulakich. (Kol Fel 50:15; 94:19) Epwe awora ewe tipachchem mi lamot ngenikich fan iten ach sipwe tufichin likiitu fan ewe sossot, iwe, epwe alisikich le chechchemeni fansoun meinisin ewe popun alongolongun kapwung mi lapalap, ewe mi weneiti an Jiowa pwuung le nemeni mettoch meinisin, nge ina ewe popun noun kewe chon angang ra kuna ewe sokkun oput ese pwung. (Jemes 1:5) Jiowa epwe pwal tongeni awora ngenikich “an Kot we kinamwe, ewe mi somelo seni ach ekiek meinisin.” (Filipai 4:6, 7) Ena kinamwe seni Kot a atufichikich pwe sipwe kinamwe me uppos fan sossot mi fokkun watte, nge esap wor ach tipemwaramwar are niuokkus. Ren an we ngun mi fel, Jiowa epwe tongeni alikiitukich fan sokkun sossot meinisin epwe mut ngenikich ach sipwe kuna.​—1 Korint 10:13.

15. Met epwe tongeni alisikich pwe site tipekoum lupwen sipwe kuna riaffou?

¹⁵ Met epwe tongeni alisikich pwe site tipekoum ngeni ir kewe mi oput kich nge esor popun? Chechchemeni mwo pwe ekkewe mi akkaewin fiu ngenikich, ir Setan me ekkewe timon. (Efisus 6:12) Inaamwo ika ekkoch aramas ra pwisin filata pwe repwe eriaffoukich me ra wewefichiiti minne ra fori, nge chommong me lein ir kewe mi u ngeni noun Kot kewe aramas ra ina ussun pokiten ar wewengau are pokiten an ekkoch aramas peppeseer. (Taniel 6:4-16; 1 Timoti 1:12, 13) Jiowa a tipeni pwe “sokkun aramas meinisin” repwe tufichin “kuna amanauen ngunur o sineifichi minne mi enlet.” (1 Timoti 2:4) Pwungun pwe ekkoch mi fen pin u ngenikich me lom, ir pwiich chon Kraist iei pokiten ar kukkuna pwe kich aramas mi foffor murinno fansoun meinisin. (1 Piter 2:12) Pwal och, sia tongeni kaeo eu lesen seni fofforun noun Jekop we Josef. Inaamwo ika Josef a kuna riaffou watte pokiten minne pwiin kewe ra fori ngeni, nge ese tipekoum ngeniir. Met popun? Pun a miritiiti pwe poun Jiowa a angolong lon minne a fis ngeni, iwe, a nemeni minne a fis lon manauan ren an epwe apwonueta an we kokkot. (Keneses 45:4-8) Ika epwe torikich ewe sokkun riaffou ese pwung, Jiowa epwe pwal tongeni awilalo riaffouuch fan iten an epwe minen aling ngeni itan we.​—1 Piter 4:16.

16, 17. Pwata sisap kon aurek ika chon u ngenikich repwe sotuni le eppeti ach angangen afalafal?

¹⁶ Esap wor popun sipwe kon aurek ika a ussun ita chon u ngenikich ra wesewesen tufichin eppeti afeffeitaan ewe poraus allim ren och fansoun. Iei Jiowa a akkachchecha ekkewe muu ren ewe angangen afalafal mi fiffis won unusen fonufan, iwe, ekkewe mettoch mi auchea ra ikkionfengen. (Akai 2:7) Iei alon Kraist Jises, ewe Chon Masen Siip mi Murinno: “Nei kewe siip ra auseling leuwei; o ua sinei ir, o ra pwal tapwelo mwiri. Iwe, ua ngenir manau esemuch . . . O esap pwal wor emon epwe weiti ir seni lon pei.” (Jon 10:27-29) Ekkewe chonlang mi fel ra pwal fiti ewe angang mi lapalap lon pekin ngun, angangen kini uwaan atake. (Mattu 13:39, 41; Pwarata 14:6, 7) Ina  popun, esap wor och me lein minne ekkan chon u ngenikich repwe apasa are fori epwe tongeni eppeti pwonutaan an Kot we kokkot.​—Aisea 54:17; Fofor 5:38, 39.

¹⁷ Fan chommong, a fen sossor fofforun chokewe mi u ngenikich. Lon eu sopw lon Africa, chommong kapas mi chofona ussun Chon Pwarata Jiowa ra feilfetal, pachelong ewe poraus pwe ir chon fel ngeni ewe Tefil. Pokiten ena, lupwen Chon Pwarata Jiowa ra tori imwen emon fefin itan Grace, neminnei a kan op lukisokurun imwan we tori ar repwe lo seni. Eu ran sounpetakin an we lamalam a minata eu me lein nouch kewe puk, iwe, a ereni meinisin mi chuto pwe resap alleani pun epwe amwokutuur ar repwe towu seni ar na lamalam. Ena mettoch a siwili ekiekin Grace pwe mwirin a mochen silei ussun ach angang. Lupwen Chon Pwarata Jiowa ra tori imwan mwirin, ese op seniir, nge a kapas ngeniir me a angei eu ewe esin puk seniir. A poputa an kaeo Paipel, iwe, a papatais lon 1996. Iei Grace a kan aea an fansoun le kutta io kkan mi rong poraus mi mwaal ussun Chon Pwarata Jiowa.

Akkapochokkula Om Luku Iei Chok

18. Pwata a lamot ach sipwe akkapochokkula ach luku mwen an epwe piita sossot mi watte, me ifa ussun sipwe tongeni fori ena mettoch?

¹⁸ Pokiten Setan epwe tongeni muttir maun ngenikich fan ewe sokkun oput ese pwung fansoun meinisin ese lifilifil, a mmen lamot ach sipwe akkapochokkula ach luku iei chok. Ifa ussun sipwe tongeni fori ena mettoch? Iei eu repot seni eu fonu ikewe aramas ra fen eriaffou noun Jiowa kewe aramas ie: “Iei eu mettoch a fen wesewesen ffatolo: Ir kewe mi eoreni ar repwe akkomwa mettochun ngun me a mmen watte ar aucheani ekkewe poraus mi enlet seni Paipel ra kuna pwe esor weiresin ar repwe tuppwol lupwen sossot epwe toriir. Nge fan chommong, ir kewe rese fiffiti meinisin ach kewe mwich, me rese lien fiffiti ewe angangen  afalafal, me rese tuppwol lon ekkewe mettoch mi kisikis ra kan turulo lupwen sossot mi watte epwe toriir.” (2 Timoti 4:2) Ika kopwe kuna och mettoch mi lamot om kopwe amurinnolo, kopwe muttir achocho le angang won.​—Kol Fel 119:60.

19. Met a kan fiffis pokiten tuppwolun noun Kot kewe chon angang fan ewe sokkun oput ese pwung?

¹⁹ Tuppwolun ekkewe chon fel mi enlet fan riaffoun ewe oput seni Setan eu pisekin annet pwe mi pwung an Jiowa nemenem. Ar tuppwol a kan apwapwai leluken Kot. Inaamwo ika aramas repwe esiiter, nge ewe emon mi tekia seni fonufan me lang “ese mo sauesini an epwe iteni ar Kot.” A fokkun pwung pwe ei kapas a kan fichiiti meinisin ekkena chon tuppwol: “Ese mo fich ngeni aramasen fonufan pwe ekkeei aramas repwe nonnom rer.”​—Ipru 11:16, 38.

[Pwóróus fan]

En mi Tongeni Awewei?

• A popu seni ia ewe sokkun oput ese pwung, ewe mi weneiti chon ewe lamalam mi enlet?

• Ifa ussun Setan a aea ewe mettoch esiit ren an epwe sotuni le atai tuppwolun Jop me Jises?

• Ifa ussun Jiowa a kan apochokkulakich pwe sipwe uppos fan ewe oput mi popu seni Setan?

[Ekkewe Kapas Eis fan Iten ewe Lesen]

[Pwoor lon pekin taropwe 10]

Ra Miritiiti Wesewesen ewe Popun Alongolongun Kapwung

Iei kunaen emon Chon Pwarata Jiowa lon Ukraine, ikewe a pinepin ewe angangen afalafala porausen ewe Muu ie ren lap seni 50 ier: “Sisap ekieki pwe minne a fis ngeni Chon Pwarata Jiowa, iei eu mettoch a kan pukun fiffis chok lefilen aramas. . . . A lap me lein ekkewe nouwiis ra chok apwonueta minne chok wiiser. Lupwen ewe muu a siwil, a pwal siwil minne ekkena nouwiis ra tuppwol ngeni, nge am aua ususun we chok. Am aua miritiiti pwe a fen mak lon ewe Paipel wesewesen ewe popun an a torikem riaffou.

“Am ause ekieki pwe am chon kuna riaffou pokiten chok kirikiringauen aramas. Minne a alisikem le likiitu, iei am wewefichiiti ewe popun alongolongun kapwung a piita lon ewe malamalen Ichen​—weween, ewe popun alongolongun kapwung mi weneiti an Kot pwuung le nemeni mettoch meinisin. . . . Am aua uppos fan iten eu popun alongolongun kapwung mi weneiti esap chok minne mi lamot ngeni aramas pwe pwal minne mi lamot ngeni ewe Chon Nemeni unuselapen lang me fonufan. A mmen alollol am weweiti wesewesen ekkewe popun alongolongun kapwung mi kapachelong. Ena mettoch a apochokkulakem me a atufichikem pwe aupwe uppos fan am tuppwol pwal mwo nge fan ekkewe sossot mi fokkun watte.”

[Sasing lon pekin taropwe 7]

Itengauen Jises a popu seni io?

[Sasing lon pekin taropwe 9]

Jop, Meri, me noun Kot kewe chon angang lon ach keei fansoun ra fen atekiatai an Jiowa nemenem

[Sasing lon pekin taropwe 10]

Victor Popovych a ares lon 1970